Careltu Hna Sinin Biahalnak

1 Timote 5:21 i “thimmi vancungmi hna” cu ahote dah an si?

Lamkaltu Paul nih Khrihfa upa rian a ṭuanṭimi Timote sinah hitin ca a kuat: “Mah lamhruainak hi kapkhat lei lawng ṭanhnak le thleidannak um loin zulh awkah Pathian le Khrih Jesuh le thimmi vancungmi hna hmaiah fakpi in kaan nawl.”—1 Tim. 5:21.

Pakhatnak, mah vancungmi phu ah ahote dah an i tel kho lai lo timi kong kha zoh u sih. Chiti thuhmi 144,000 cu an i tel kho lai lo. Zeicahtiah Paul nih Timote sin ca a kuat lioah chiti thuhmi Khrihfa hna cu van an kai rih lo. Lamkaltu le a dang chiti thuhmi hna cu thlarau pum in an i thlen rih lo caah annih cu “thimmi vancungmi hna” phu ah an i tel kho lai lo.—1 Kor. 15:50-54; 1 Thes. 4:13-17; 1 Joh. 3:2.

Mah leng ah “thimmi vancungmi hna” ah Buanchukcho lio i Pathian nawl a buarmi vancungmi zong an i tel kho lai lo. Mah vancungmi hna cu Satan hnu a zul i khuachia ah a cangmi an si, cun Jesuh ral zong an si. (Gen. 6:2; Luka 8:30, 31; 2 Pet. 2:4) Annih cu hmailei ah kum 1,000 chung khor ah thlak an si lai i a hnuah Satan he hrawh chih an si lai.—Jud. 6; Biat. 20:1-3, 10.

Paul nih a chimmi “thimmi vancungmi hna” cu “Pathian le Khrih Jesuh” lei ah a ṭangmi an si a hau.

Zumhfekmi vancungmi thong tampi an um. (Heb. 12:22, 23) Caankhat te ah an dihlak in aa lomi rian an ṭuan tiah kan ruah awk a si lo. (Biat. 14:17, 18) Vancungmi pakhat cu Assiria ralkap 185,000 hrawh awkah rian pek a si ti kha i cinken. (2 Si. 19:35) Vancungmi tampi cu “mi a sualtertu le ṭhatlonak a tuahmi hna kha vancung Pennak chung in” pumh hna awkah rian pek an si te lai. (Matt. 13:39-41) A cheu cu “thim a simi hna kha” vancung ah pumh hna awkah rian pek an si lai. (Matt. 24:31) A cheu tu cu ‘kan kalnak kip i kanmah zohkhenhtu ding ah’ rian pek an si men lai.—Salm 91:11; Matt. 18:10; Matthai 4:11 he tahchunh; Luka 22:43.

1 Timote 5:21 i “thimmi vancungmi hna” cu Pathian miphun he aa tlaiin a hleiin rian pekmi vancungmi si dawh an si. A hnuhmai bia ah Paul nih Khrihfabu chung i upatnak hmuh awkah aa tlakmi Khrihfa upa hna he aa tlaiin lamhruainak kong kha a chim. Khrihfa upa hna nih “kapkhat lei lawng ṭanhnak le thleidannak um loin” rian an ṭuan awk a si i khuaruat loin biachahnak an tuah awk a si lo. Paul nih mah lamhruainak zulh awkah a ruang ṭha a um ti kha a langhter. Khrihfa upa hna cu “Pathian le Khrih Jesuh le thimmi vancungmi hna hmaiah” rian an ṭuan tiah a ti. Mah nih vancungmi cheukhat cu Khrihfabu bawmtu in rian an ṭuan ti kha a kan hngalhter. Mah vancungmi hna nih Pathian salle kha an huhphenh hna i phungchimnak ah an bawmh hna. Cun Khrihfabu ah a cangmi kong hna kha Jehovah sinah thawng an thanh ṭhan.—Matt. 18:10; Biat. 14:6.