Thlarau Lamhruai Ning In Kalnak Nih Pumpekmi Ning In Nun Awk A Kan Bawmh
‘Thlarau lamhruai ning in kal u law nan minung sinak duhning kha zul hlah u.’—GAL. 5:16, NW.
1. Pentekos ni ah zei tipil innak dah a um?
JESUH zultu pawl C.E. 33 Pentekost ni ah holh dang in an holh cu thiang thlarau in tipil an in hnu ah a si. Thlarau in an hmuhmi khuaruahhar laksawng kha an langhter. (1 Kor. 12:4-10) Mah laksawng le lamkaltu Piter phungchimmi nih zeidah a chuahter? Mi tampi “an lungthin a hriah ngaingai hna.” Piter nih a forh hna bantukin an i ngaihchih i tipil an ing. Hitin aa ṭial: “Mi tampi nih a bia cu an zumh i tipil kha an in; cu ni ah cun an bu ah khan mi thong thum tluk an i chap.” (Lam. 2:22, 36-41) Jesuh lamhruainak bantukin Pa, Fapa le thiang thlarau min in ti ah tipil an ing men lai.—Matt. 28:19.
2, 3. (a) Thiang thlarau in tipil innak le thiang thlarau min in tipil innak aa dannak kha fianter. (b) Tuchan a hmaanmi Khrihfa dihlak cu zeicah ti ah tipil in a herh?
2 Asinain thiang thlarau in tipil innak le thiang thlarau min in tipil innak ah aa dannak a um maw? A um. Thiang thlarau in tipil a ingmi hna cu Pathian thlarau nih a chuahtermi fale in hrin ṭhan an si. (Johan 3:3) Annih cu hmailei ah Pathian vancung Pennak ah siangpahrang ṭuan hawi le tlangbawi rian ṭuan awkah chiti thuh an si i langhternak in Khrih pum cheubang an si. (1 Kor. 12:13; Gal. 3:27; Biat. 20:6) Cucaah hi tipil innak—thiang thlarau in tipil innak cu Jehovah nih Khrih he uktu rian a ṭuan ṭi ding kha a thim hnanak a si i mah tipil innak cu Pentekos ni le mah hnu in pek a si. (Rom 8:15-17) Asinain tuchan Jehovah miphun nih civui hna ah an tuah tawnmi thiang thlarau min in tipil innak cu tah zeidah a si?
3 Ti tipil innak cu a hmaanmi Khrihfa hna nih Jehovah Pathian sin lungthin dihlak in an i peknak a langhtermi hmelchunhnak a si. Cucaah vancung ah auhmi hna cu ti ah tipil an ing. Asinain vawlei ah zungzal nunnak aa ruahchanmi tuchan minung nuai tampi zong ti ah tipil in an herh ve. Mi pakhat aa ruahchanmi cu zei a si hmanh ah Pa le Fapa le thiang thlarau min in ti ah tipil a in cu Pathian cohlanmi si awkah tuah a herhmi kehlan a si. Cu bantuk in tipil a ingmi Khrihfa dihlak cu ‘thlarau lamhruai ning in kal’ awk kan i ruahchan. (Galati 5:16 rel.) Thlarau lamhruai ning in na kal maw, naa pumpekmi ning in na nung maw?
‘Thlarau Lamhruai Ning in Kal’ Zeidah A Si
4. ‘Thlarau lamhruai ning in kal’ timi cu zeidah a si?
4 ‘Thlarau lamhruai ning in kalnak’ ah thiang thlarau rianṭuannak cohlan le thiang thlarau in khah awk nawl pek aa tel. Chim duhmi cu nifate na rianṭuannak ah thiang thlarau i hruaiter kha a si. Galati angan 5 nih thiang thlarau duhmi le minung sining nih a duhmi aa dannak kha a langhter.—Galati 5:17, 18 rel.
5. Thiang thlarau in khahnak ah zei ziaza hrial dah aa tel?
5 Thiang thlarau in na khah ahcun minung sining nih a duhmi kha hrial naa zuam lai. Mah ziaza cu ‘nu le pa sualnak, a thurhnawm mi thil, aa dawhcah lomi thil, siasal biak, dawih le eih, pakhat le pakhat i ral, i doh, i nahchuah, thinhun, mah zawn cio lawng ruah, i ṭhen, ziar i ngeih, zurit, au khuannak’ hna hi an si. (Gal. 5:19-21) Phun dang in chim ahcun ‘sualnak tuahmi kha thlarau in na thah’ a si. (Rom 8:5, 13) Mah nih thlaraulei thil duh awk le minung sinak duhning zulh canah thlarau lamhruainak ning in nun awk an bawmh lai.
6. Thlarau nih a chuahtermi ziaza langhter awkah zeidah a herh kha tahchunhnak in chim.
6 Thiang thlarau na cung a um ahcun “thlarau nih a chuahtermi” ziaza na langhter lai. (Gal. 5:22, 23) Asinain naa zuam a hau lai. Tahchunhnak ah, lothlopa nih lo a tuah. Nitlang le ti a herh; mah an um lo ahcun zeihmanh a zun lai lo. Thiang thlarau kha nitlang he kan tahchunh khawh. Thlarau nih a chuahtermi ziaza langhter awkah thiang thlarau a herh. Asinain lothlopa nih teima in a ṭuan lo ahcun zeidah a chuak lai? (Ptb. 10:4) Na lungthin vawlei na sersiam ning cu thiang thlarau nih a chuahtermi ziaza zeizat le zeitluk tiang na langhtermi ah a lang lai. Hitin i hal, ‘thiang thlarau nih a chuahtermi ziaza langhter awkah mah ziaza ning in ka nung maw?’
7. Thiang thlarau nih a chuahtermi ziaza ṭhanchoter kan duh ahcun Baibal rel le ṭha tein ruah cu zeicah a biapit?
7 Thei ṭha zun awkah lothlopa nih ti zong a toih a hau. Thlarau nih a chuahtermi ziaza ṭhanchoter awkah Baibal le tuchan ah Khrihfabu in hmuhmi biatak ti kan herh. (Isa. 55:1) Cathiang hi thiang thlarau lamhruainak in ṭialmi a si kha mi tampi na hmuhsak men hna lai. (2 Tim. 3:16) Cun zumhawk a tlakmi le a fimmi sal nih a thiangmi ti Baibal biatak kha hngalhthiam awkah a herhmi kha a kan pek. (Matt. 24:45-47) Chim duhmi cu a fiang ko. Thiang thlarau in khah awkah Baibal rel le ṭha tein ruah a hau. Cuti na tuah ahcun hngalhmi kong ‘ruah le khah in a kawlmi’ profet hna zohchunh awk naa cawn a si. Vancungmi hmanh nih biakammi Tefa le chiti thuhmi Khrihfabu kong biatak kha hngalh an rak duh ngaimi thil a si.—1 Piter 1:10-12 rel.
Thlarau In Khah Khawh Ning
8. Jehovah kha a thlarau hal cu zeicah a biapit?
8 Baibal rel le ṭha tein ruah men lawng a za lo. Jehovah bawmhnak le lamhruainak hal peng a hau. Amah cu “kan hal khawh leng le kan ruah khawh leng in thil a tuah khotu” a si. (Efe. 3:20; Luka 11:13) “Pathian nih ‘kan hal hlan in kan herhmi a hngalh dih ko’ ahcun zeicah hal lengmang cu a hauh?” tiah pakhatkhat nih a ti ah tah zeitindah na leh lai? (Matt. 6:8) Pakhat cu thiang thlarau hmuh awkah thla na cam cu Jehovah naa bochan na langhter a si. Tahchunhnak ah, pakhatkhat cu bawmhnak hal ah na sin a rat ahcun na bawmh lai, zeicahtiah nangmah kha an bochan i bawmh an hal caah a si. (Phungthlukbia 3:27 tahchunh.) Mah bantukin Jehovah kha thlarau na hal cu a duhmi a si i an pek lai.—Ptb. 15:8.
9. Pathian thlarau in khah awkah Khrihfabu pumhnak nih zeitindah a kan bawmh?
9 Pathian thlarau in khah khawhnak a dang pakhat cu pumhnak le civui ah i tel a si kha ṭha tein na hngalh ko lai. Pumh khawh i zuam le ṭha tein ngaih cu a biapi tuk. Mah nih “Pathian nih aa tinhmi a thukmi” hngalhthiam awk an bawmh lai. (1 Kor. 2:10) A phi pek lengmang zong a ṭha. Kan hnulei zarh li chung naa pumhmi pumhnak kong ruat ṭhan hmanh. Na zumhnak langhter ruah ah a phi pek awk voi zeizat dah na kut na thlir? Hi zawn ah ṭhancho na herhnak na hmu maw? Na hmuh ahcun a ra laimi zarh ah zeidah na tuah lai kha biakhiak. A phi pek na duh kha Jehovah nih a hmuh lai i pumhnak in ṭhatnak tam deuh hmuh awkah a thiang thlarau in zeimaw zat an bawmh lai.
10. Thlarau lamhruai ning in kalnak ah midang zei sawmnak dah aa tel?
10 Thlarau lamhruai ning in kalnak ah Biathlam 22:17 chung sawmnak leh zong aa tel: “Thlarau le va ngei lai mi ngaknu nih khan, ‘Ra u,’ an ti. Hi bia a theimi paoh nih khan, ‘Ra u,’ ti ve hna seh. Ti a haalmi paoh cu, ra u; nunnak ti hi man lo in i lak u, a duhmi paoh nih i lak u.” Thlarau cu va ngei laimi ngaknu he nunnak ti i lak u ti sawmnak ah rian a ṭuan. “Ra u” timi sawmnak na cohlan a si ahcun “ra u” timi sawmnak ah tel ding bia na khiak maw? Nunnak a hmuhtermi rian ah telnak nawl hmuh cu tinvo sung a va si dah!
11, 12. Thiang thlarau cu phungchimnak rian ah zeitindah aa tel?
11 Tuchan ah hi a biapimi rian cu thiang thlarau lamhruainak tang ah lim a si cang. Kum zabu pakhatnak ah thawngṭha chimtu hna ca hmun thar hunpiak awkah thiang thlarau aa tel ning kha kan rel cang. Lamkaltu Paul le a hawile cu “Asia ram chungah thiang thlarau nih thawngṭha kha chim awkah a awnh hna lo” cun Bithinia ram kal zong a awnh hna lo. Thlarau nih zei ruangah kal a awnh hna lo cu fiang tein kan hngal lo nain thlarau nih Paul kha Europe lei ah kal a fial cu a fiang. Paul nih langhnak ah Masidonia mi nih bawmhnak a halmi kha a hmuh.—Lam. 16:6-10.
12 Tuchan zongah Jehovah thlarau nih vawleicung pumpi phungchimnak kha a hruai. Jehovah nih lamhruainak ah khuaruahhar langhnak cu a hmang lo; mahcan ah chiti thuhmi hna kha thiang thlarau in a hruai hna. Thlarau nih unau pawl kha phungchimnak le cawnpiaknak ah an si khawh tawk ṭuan awkah a forh hna. Hi a biapimi rian ah naa tel lai cu a fiang ko. Hi rian ṭuannak ah tam deuh in naa lawm kho maw?
13. Thiang thlarau lamhruainak zeitindah na zulh khawh? Tahchunhnak in chim.
13 Pathian miphun caah timhpiakmi thil hna na nunnak ah na hmannak thawngin thiang thlarau lamhruainak na zulh khawh. Japan ram i mino Mihoko timi nu kong hi ruat hmanh. Hmaikal a ṭuanka ah lennolh tuah a thiam lo, innngeitu nih a duh nakhnga zeitin chim awk a hngal lo. Mah lio caan ah Kannih Pennak Rianṭuannak ah a tawinak in lennolh tuah ning ruahnak cheuhnak aa tel. Mah hnu ah Lungsinak A Pemi Nunnak—Zeitindah Hmuh Khawh A Si, [A Satisfying Life—How to Attain It] brochure chuah a si. Japan ram ah mah brochure cu hman awkah a ṭha ngai. Mihoko nih brochure hman khawh ning le a hlei in tawi tein lennolh tuah khawh ning ruahnak cheuhmi kha a hman. A rauh hlan ah hlan ah Baibal cawn a duh lomi hna he Baibal cawnnak a thawk khawh. Hitin a chim, “Baibal cawnpiaknak tampi ka ngei, voikhat cu 12 tiang ka ngei, cucaah a cheukhat cu chikkhat hngak rih u tiah ka ti hna.” Jehovah nih a salle a pekmi hna lamhruainak na zulhnak thawngin, thlarau lamhruai ningin na kal tikah thluachuah tampi na hmu lai.
Pathian Thlarau I Bochan
14, 15. (a) Mitlinglo minung cu pumpekmi ning in zeitindah a nun khawh? (b) Hawikom ṭha zeitindah na hmuh khawh?
14 Phungchim rianṭuantu in ṭuan awk phungchim rian a um. (Rom 10:14) Mah rian ṭuan awkah sining ka tlinh tiah na ruat lai lo. Asinain chiti thuhmi hna cung thil a hung um bantukin sining an tlinhtertu cu Pathian a si. (2 Korin 3:5 rel.) Na si khawh chung in ṭuan le Pathian thlarau naa bochannak thawngin naa pumpekmi ning in na nung kho lai.
15 Mitling lo minung nih a tlingmi Pathian Jehovah sin i pumpek ning in nun cu a fawi lo. A har khunnak pakhat cu hlan ah na rak komhmi hna cheukhat nih na nunning thar kha an hngalthiam lo i “an in serhset” men lai. (1 Pit. 4:4) Asinain a biapi bikmi Jehovah le Jesuh Khrih he hawikom kan si timi kha philh hlah. (Jeim 2:21-23 rel.) Vawlei cung pumpi “unau a simi” chung ah aa telmi na umnak Khrihfabu unau pawl zong na hngalh hna a herh. (1 Pit. 2:17; Ptb. 17:17) Na cungah ṭhatnak a pemi hawikom ngeih awkah Jehovah nih a thlarau in an bawmh lai.
16. Paul nih ‘ka derthawmnak ah kaa lawm ko’ tiah a timi kha nang zong zeicah na ti khawh?
16 Khrihfabu chung ah bawmtu hawikom an um na hmanh in nifate harnak tonmi a har kha na hmuh men lai. A caan ahcun tonmi harnak cu a dong kho lomi bantuk si in mahnih na lung an donghter men lai. Mah bantuk ah a hlei in Jehovah sin i mer in a thiang thlarau hal caan a si. Lamkaltu Paul nih hitin a ṭial: “Ka derthawm tikah hin ka ṭhawn a rak si.” (2 Korin 4:7-10; 12:10 rel.) Minung derthawmnak cu zei bantuk a si hmanh ah Pathian thlarau nih a bawmh khawh kha Paul nih a hngalh. Cucaah ka derthawm, bawmh ka hau ti na ruah tikah Pathian thlarau nih an bawmh khawh. Paul nih ‘ka derthawmnak ah kaa lawm ko’ tiah a ṭial. Ka derthawm ti a ruah tikah thiang thlarau ṭhawnnak ka cungah a um tiah a ruah. Mah bantuk cu na ton ve men lai.—Rom 15:13.
17. Naa tinhmi lam na kal lioah thiang thlarau nih zeitindah an bawmh khawh?
17 Pathian sin pumpekmi ning in nun peng awkah a thlarau kan herh. Tilawng puanzar ngeimi ah kepṭen ka si tiah i ruat hmanh. Naa tinhmi cu a zungzal in Jehovah biak kha a si. Thiang thlarau cu kal na duhnak ah him tein phanh awk an bawmhtu thli bantuk a si. Satan vawlei thli nih a kenkip ah choihmi si na duh lai lo. (1 Kor. 2:12) Thli kalnak lam hmaan zei a si hngal in mah lam ning in kal awk a si. Mah thli lam hmaan cu thiang thlarau a si. Baibal le thlarau lamhruainak tang um bupi in thiang thlarau nih lam hmaan ah an kalpi lai.
18. Atu na biakhiahnak cu zeidah a si, zeiruangah a si?
18 Jehovah Tehte pawl he Baibal na cawng i anmah he i komh zong na duh ko nain a biapimi pumpeknak le tipil innak na tuah rih lo ahcun ‘Zeicah kaa congawr?’ tiah i hal. Tuchan ah Jehovah duhmi hlawhtlinnak ah thiang thlarau rianṭuannak na hngalh i mah kha mansung ah na chiah ahcun a hmaan tiah na hngalhmi kha tuah. Jehovah nih thluachuah tampi an pek lai. A thiang thlarau kha siang ngai in an pek lai. Nai kum ah tipil a ingmi asiloah tipil na innak a sau cang a si ahcun thiang thlarau na cung a um na ton bal lai cu a fiang. Pathian nih a thlarau in zeitindah thazang a kan pek kha na ton ko lai. A dong kho lomi hmailei zongah cu bantukin a si kho. Cucaah thiang thlarau lamhruai ning in kal zungzal awk biakhiak u sih.
Naa Cinken Maw?
• ‘Thlarau lamhruai ning in kal’ timi cu zeidah a si?
• ‘Thlarau lamhruai ning in kal’ awkah zeinihdah an bawmh khawh?
• Pumpekmi ning in zeitindah nun khawh a si?
[Cahmai 15 Hmanthlak]
Na lungthin vawlei ṭhancho awkah naa zuam a hau
[Cahmai 16, 17 Hmanthlak]
Pathian thlarau in khah kha na duh maw?