Pathian Thlarau Zeicah I Hruaiter Awk A Si?

‘Nangmah cu ka Pathian na si; na thlarau in himnak lam ah ka hruai tuah.’—SALM 143:10.

1. Na phanh ballonak hmun na kal tikah lamhruaitu ṭha zeicah na herh?

NA PHANH ballonak hmun ah khual na tlawng hei ti u sih. Cuka kalnak lam a hngal ti na zumh mipa he nan kalṭi. A hngalh taktak a si ahcun lam aan hruai lai, a lamhruainak na zulh ahcun lam na tlau lai lo.

2, 3. (a) Jehovah nih hlanliopi in zei a ṭhawnnak dah a hman? (b) Tuchan ah Pathian rianṭuan ṭhawnnak nih lam a kan hruai khawh kha zeitindah kan hngalh?

² Minung nakin ṭha deuh in lam a kan hruai khotu mit in hmuh khawh lomi ṭhawnnak a um. Mah cu zeidah a si? Baibal a hramthawk bik a hme pakhat le pahnih ah mah ṭhawnnak kong aa ṭial. Jehovah nih hlanliopi ah a rak tuahmi kha Genesis ah hitin kan hmuh: “Pathian nih van le vawlei ser hram aa thawk.” Mah thilsernak ah a ṭhawnnak a hman ti kan hngalh, zeicahtiah “ti cungah cun thlipi a hrang” tiah Baibal nih a ti caah a si. (Gen. 1:1, 2) Mah thlipi asiloah ṭhawnnak cu zeidah a si? Mah cu Pathian rianṭuan ṭhawnnak a simi a thiang thlarau a si. Jehovah nih a thiang thlarau hmang in nunnak a kan pek i thil dang vialte zong a ser.—Job 33:4; Salm 104:30.

³ Jehovah nih a rianṭuan ṭhawnnak in a kan ser ti kan hngalh, asinain mah ṭhawnnak cu kan nunnak ah huham a ngei kho maw? Pathian Fapa nih a ngei kho tiah a ti. A zultu pawl kha ‘thlarau nih biatak chungah cun an luhpi hna lai’ tiah a ti hna. (Johan 16:13) Mah thlarau cu zeidah a si? Zeicah lam kan i hruaiter awk a si?

Thiang Thlarau timi cu

4, 5. (a) Thumkomh pathian a zummi nih thiang thlarau kha zei a si ti in dah an zumh? (b) Thiang thlarau timi cu zeidah a si?

⁴ Phungchimnak ah na tonmi hna cheukhat cu thiang thlarau kong ah Baibal he aa ralchanmi zumhnak an ngei men lai. Thumkomh pathian a zummi nih thlarau cu Pa, Pathian he an i khat tiah an zumh. (1 Kor. 8:6) Asinain Thumkomh pathian zumhnak cu Baibal he aa ralchanh ti kha fawi tein hngalh khawh a si ko.

⁵ Thiang thlarau timi cu zeidah a si? Genesis 1:2 ah hmanmi ruʹach timi Hebru biafang cu ‘thlarau’ tiah leh a si i ‘thli’ ti zong in leh khawh a si. (Genesis 8:1 he tahchunh.) Thli cu hmuh khawh a si lo nain a um ti cu kan hngalh. Cu bantukin thiang thlarau zong hmuh khawh a si lo nain a rianṭuannak cu hmuh khawh a si. Thiang thlarau cu pum a ngei lo. Pathian ṭhawnnak a si. Pathian nih a duhnak tlinter awkah minung le thil cungah a hmanmi a si. Cu bantuk khuaruahhar ṭhawnnak cu Lianngan bik Pathian nih a ngeih ti cu zumh awkah a har maw? A har lo.—Isaiah 40:12, 13 rel.

6. David cu Jehovah sin ah zeitindah thla a cam?

⁶ Jehovah nih minung lamhruai awkah a thiang thlarau a hmang maw? David kha hitin bia a kamh: “Na zulh awk hnga lam kha kan hmuhsak lai, kan cawnpiak lai.” (Salm 32:8) David nih Pathian lamhruainak zulh a duh maw? A duh caah Jehovah sin ah hitin thla a cam: ‘Nangmah cu ka Pathian na si; cucaah na duhnak tuah kha ka cawnpiak ko. Na thlarau in himnak lam ah ka hruai tuah.’ (Salm 143:10) Kannih zong Pathian thlarau lamhruainak zulh kan duh awk a si. Zeicah? Kan duh awk a sinak a ruang pali i ruah u sih.

Kanmah tein Lam kan i Hruai Kho lo

7, 8. (a) Zeicah kanmah tein lam kan i hruai khawh lo? (b) Hi vawlei ṭhalo ah Pathian lamhruainak kan herh kha zei tahchunhnak nih dah a kan hngalhter?

⁷ Pathian thlarau lamhruainak kan duh awk a sinak a ruang pakhatnak cu kanmah tein lam kan i hruai khawh lo caah a si. Lamhruai timi cu kalnak lam hmuhsak kha a si. Jehovah nih a kan ser tikah mahte in lam i hruai kho ding in a kan ser lo. Mah leng ah mitling lo kan si i kanmah te’n lam kan i hruai tikah kan palh lengmang. Profet Jeremiah nih hitin a ṭial: “Maw BAWIPA, minung nih a zulhmi a lam hi amah nih aa thimmi an si lo i a nun chung i a kalnak lam zong hi amah nih aa ser khawhmi an si lo ti kha ka hngalh.” (Jer. 10:23) Zei ruang ah a si? Pathian nih Jeremiah hmang in a ruang kha hitin a chim: “Lungthin hi zeizong vialte nakin a zer bik, Aho nih dah minung lungthin hi a hngalh khawh lai? Damh khawh ti lo tiangin a zaw cang.”—Jer. 17:9; Matt. 15:19.

⁸ Mi pakhat cu kalnak lam ṭha tein a hngalh lomi ṭih a nungmi ramlak ah lamhruaitu i kalpi lo in amah lawng in a kal ahcun a hruh a si lai. Ramlak ah lam tlau lo awkah zeitin kal ding a si le ṭihnungmi thil zeitin hrial ding a si a hngalh lo ahcun harnak a tong ko lai. Cu bantukin hi vawlei ṭhalo ah Pathian lamhruainak zul lo in mahte in lamhruai aa timmi cu ṭihnungmi thil an tong lai. Cucaah David bantuk in Jehovah sin ah bawmhnak hal ve awk a si. Hitin thla a cam: “Maw BAWIPA, na lam kha ka cawnpiak hna law ka hngalhter hna.” (Salm 25:4; 23:3) Mah lamhruainak cu zeitindah hmuh khawh a si?

9. Thiang thlarau nih zeitindah lam a kan hruai khawh?

⁹ Kan i toidor le Jehovah kan i bochan ahcun lamhruaitu ah a thiang thlarau a kan pek lai. Thiang thlarau nih zeitindah a kan bawmh lai? Jesuh nih a zultu kha hitin a chimh hna: “Ka Pa nih ka min in a run thlah laimi bawmtu, thiang thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai.” (Johan 14:26) Baibal chung ah aa telmi Jesuh cawnpiaknak le a dangdang kong kha thlacam bu in kan hlathlai ahcun thiang thlarau nih a thukmi Jehovah fimnak hngalhthiam awk a kan bawmh lai i a nawlngaih awk zong a kan bawmh lai. (1 Kor. 2:10) Cun kan nunnak ah kan ruahlomi thil kan ton tikah Pathian thlarau nih zeidah tuah awk a si hngalh awk a kan bawmh lai. Kan rak hngalh ciami Baibal phunglam hngalh ṭhan awk le biakhiahnak tuah tikah hmanthiam awk a kan bawmh lai.

Jesuh cu Pathian Thlarau nih Lam a Hruai

10, 11. Jesuh nih thiang thlarau he aa tlai in zeidah aa ruahchan? Thiang thlarau nih zeitindah a bawmh?

¹⁰ Pathian thlarau lamhruainak kan duh awk a sinak a ruang pahnihnak cu Pathian Fapa zong kha thiang thlarau nih lam a hruai caah a si. Jesuh nih vawleicung a rat hlan in hi chimchungbia hi a hngalh cang: ‘A mi kha a uk khawh hna nakhnga Jehovah ṭhawnnak nih amah cu fimnak le hngalhnak le thiamnak a pek lai. Jehovah duhnak kha zeidah a si ti a hngalh lai i Jehovah cu a ṭih lai.’ (Isa. 11:2) Jesuh caah vawleicung um cu a fawi lai lo. Cucaah Pathian thlarau bawmhnak a herh tuk lai ti cu hngalhthiam a si ko.

¹¹ Jehovah bia cu a tling taktak. Jesuh tipil a in cangka a cangmi thil kha Thawngṭha ṭialtu Luka nih hitin a ṭial: “Jesuh cu thiang thlarau he khat in Jordan tiva khan a ra kir i thlarau nih ramcar chungah khan a kalpi.” (Luka 4:1) Jesuh, rawl a ulh lio, thla a cam lio le dai tein khua a ruah lio ah Jehovah nih lamhruainak le hmailei a ton hngami thil kong chim seh law a lo. Pathian thlarau cu Jesuh lungthin ah rian a ṭuan i a ruahnak le a biakhiahnak zong ah lam a hruai. Cucaah a Pa nih zeidah duh seh ti a duh kha a hngalh i mah ning in a tuah.

12. Lamhruaitu ding ah Pathian thlarau zeicah kan hal awk a si?

¹² Jesuh nih a nunnak ah Pathian thlarau zeitlukin dah man a ngeih a hngalh caah a zultu pawl kha thiang thlarau hal awk le an nunnak ah lam i hruaiter awk a forh hna. (Luka 11:9-13 rel.) Kannih zong Pathian thlarau zeicah kan hal awk a si? Mah nih kan ruahnak a thlen khawh i “Khrih lungthin” ngeih awk a kan bawmh khawh caah a si. (Rom 12:2; 1 Kor. 2:16) Pathian thlarau lam kan i hruaiter ahcun Khrih bantukin khua kan ruat lai i a nawl kan i cawn khawh lai.—1 Pit. 2:21.

Vawlei Thlarau nih Lam Ping ah a kan Hruai Khawh

13. Vawlei thlarau cu zeidah a si i mi kha zeidah a tuahter hna?

¹³ Pathian thlarau lamhruainak kan duh awk a sinak a ruang pathumnak cu Pathian thlarau nih a kan hruai lo ahcun vawlei thlarau nih lam ping ah a kan hruai khawh caah a si. Tuchan mi tampi cu vawlei thlarau nih a uk hna. Mah thlarau nih mi kha thiang thlarau duhmi tuahsernak he aa ralchanmi thil a tuahter hna. Cun Khrih lungthin ngeih awk a bawm hna lo i hi vawlei uktu Satan lungthin le ziaza tu a ngeihter hna. (Efesa 2:1-3; Titas 3:3 rel.) Mi pakhat cu vawlei thlarau nih a uk ahcun “minung sining nih a tuah tawnmi” thil a tuah lai i ‘Pathian pennak a hmu lai lo.’—Gal. 5:19-21.

14, 15. Vawlei thlarau kha zeitindah tei khawh a si?

¹⁴ Vawlei thlarau doh khawh awkah Jehovah nih a herhmi thil a kan pek. Lamkaltu Paul nih “Bawipa he nan i pehtlaihnak thawng le a ṭhawnnak a nganmi thawng in nan thazaang cu ṭhawnter chin ko u” tiah a ti. Zeicahtiah “ni ṭhalo kha a hung phanh tikah nan ral cu nan rak doh khawh lai” tiah a ti chap. (Efe. 6:10, 13) Jehovah nih a thiang thlarau thawng in Satan hlennak doh khawh awk a kan bawmh. (Biat. 12:9) Vawlei thlarau cu a ṭhawn caah a zungzal cun hrial khawh a si lo. Asinain doh khawh a si ko. Thiang thlarau cu vawlei thlarau nakin a ṭhawng deuh i a bawmh zong a kan bawmh lai.

¹⁵ Kumzabu pakhatnak ah biatak lam in a pialmi hna kong kha lamkaltu Piter nih hitin a chim: “Lam ding kha an pialtak i an tlau cang.” (2 Pit. 2:15) “Kannih kan hmuhmi thlarau cu hi vawlei thlarau hi a si lo, . . Pathian nih a run thlahmi thlarau” a si caah lunglawmh awk ngai a si. (1 Kor. 2:12) Thiang thlarau lam kan i hruaiter le thlaraulei ṭhawn awkah Jehovah nih a kan timhpiakmi vialte kan hman ahcun vawlei thlarau kha kan tei khawh lai.—Gal. 5:16.

Thiang Thlarau nih Ziaza Ṭha a Ngeihter

16. Thiang thlarau nih zei ziaza dah a kan ngeihter khawh?

¹⁶ Pathian thlarau lamhruainak kan duh awk a sinak a ruang palinak cu Pathian thlarau nih ziaza ṭha a kan ngeihter khawh caah a si. (Galati 5:22, 23 rel.) Kan dihlak in dawtnak a ngeimi, aa lawmmi, mi he aa remmi, a lung a saumi, zaangfahnak a ngeimi le miṭha si kan duh ko lai. Cun zumhnak a ṭhawngmi, aa toidormi le mah le mah aa uk khomi si zong kan duh ko lai. Mah ziaza pawl tam deuh in ngeih kan i zuam ahcun chungkhar le Khrihfabu ah ṭhatnak a chuak lai. Mah ziaza langhter khawh awkah i zuam zungzal a hau. Thlarau nih a chuahtermi ziaza pa zeizat lawng dah ngeih kan herh ti le zeitluk tiang dah langhter kan herh timi rikhiah a um lo.

17. Thlarau nih a chuahtermi ziaza ngeih awkah zeidah tuah awk a si?

¹⁷ Kan bia le kan tuahsernak nih thlarau lamhruainak kan zulh le thlarau nih a chuahtermi ziaza kan ngeih a langhter maw ti kan ruah awk a si. (2 Kor. 13:5a; Gal. 5:25) Mah ziaza lakah cheukhat ngeih kan i zuam a herh rih ti kan hngalh ahcun zeidah kan tuah lai? Mah ziaza ngeih khawh awkah thiang thlarau nih lam a kan hruai nakhnga i zuam a hau. Baibal le bupi chuahmi cauk chung ah mah ziaza pakhat cio kong kha ṭha tein kan hlathlai awk a si. Nifate kan nunnak ah zeitin langhter khawh a si kan ruah lai i langhter kan i zuam lai.a Kanmah theng le unau pawl nunnak ah thlarau lamhruainak zulhnak thawng in a chuakmi ṭhatnak kan hmuh tikah thlarau lamhruainak zulh zeitlukin dah a herh kha kan hngalh lai.

Pathian Thlarau Lamhruainak Na Zul Maw?

18. Pathian thlarau lamhruainak zulhnak ah Jesuh cu zeitindah zohchunhawk ṭha a si?

¹⁸ Jesuh cu vawleicung a um lio ah Pathian thiang thlarau nih a umpi tiah Baibal nih a ti. Thiang thlarau nih lam ka hruai seh ti a duh i a hruai tikah a zulh. (Mar. 1:12, 13; Luka 4:14) Nang tah Jesuh bantukin thiang thlarau kha lam naa hruaiter maw?

19. Thiang thlarau nih lam a kan hruai nakhnga zeidah kan tuah lai?

¹⁹ Pathian rianṭuan ṭhawnnak nih a lamhruainak zulh a duhmi kha a hruai rih ko hna. Lam hmaan ah a kan hruai nakhnga zeidah kan tuah lai? Pathian nih a thlarau a kan pek nakhnga le a lamhruainak zulh duhnak lungthin kan ngeih nakhnga thlacam zungzal awk a si. (Efesa 3:14-16 rel.) Pathian thlarau lamhruainak in ṭialmi Baibal hlathlainak thawng in thlarau lam i hruaiter na duh kha langhter. (2 Tim. 3:16, 17) Baibal lamhruainak kha cohlang law lungtho tein zul. Cuti na tuah ahcun hi chan ṭhalo ah Jehovah nih a thlarau hmang in lam ṭha bik ah a ka hruai khawh ti na zumh na langhter a si.

[A Tanglei Fianternak]

A Biapimi Tete Naa Cinken Maw?

• Thiang thlarau nih kan nunnak ah zeitindah a kan bawmh khawh?

• Pathian thlarau lamhruainak kan duh awk a sinak a ruang pali cu zeidah an si?

• Thlarau nih lam hmaan ah a kan hruai nakhnga zeidah kan tuah lai?

[Cahmai 15nak i hmanthlak]

Thiang thlarau nih Jesuh kha a umpi

[Cahmai 17nak i hmanthlak]

Pathian rianṭuan ṭhawnnak nih a lamhruainak zulh a duhmi kha a hruai hna