Kumzabu Pakhatnak Le Tuchan Ah Pathian Thlarau Lamhruainak
“Hi thil vialte a tuahtu hi thlarau pakhat a si.”—1 KOR. 12:11.
1. Hi capar ah zei kong dah kan i ruah lai?
PENTEKOS ni ah lungthawh awk ngai a simi thil pakhat a rak cang. Mah ni ah Pathian nih a salle kha thiang thlarau a toih hna. (Lam. 2:1-4) Mah caan thawk in Pathian nih a miphun kha lam thar in hruai awkah a thlarau a hman. Hmasa capar ah Pathian nih hlanlio zumhfekmi a salle kha a harmi an rian ṭuan khawh awkah a thlarau in a bawmh hnanak kong kan i ruah cang. Asinain Pathian thlarau nih Khrihfabu dirh a si hlan ah a salle a hruai hna ning le dirh a si hnu a hruai hna ning zeitindah aa dan? Tuchan Khrihfa hna cu Pathian thiang thlarau lamhruainak in zei ṭhatnak dah an hmuh? Mah kong kha hi capar ah kan i ruah lai.
‘Kei cu Jehovah Salnu Ka si Ko’
2. Mari nih thiang thlarau he aa tlai in zeidah a hngalh?
2 Jerusalem khua ah thiang thlarau toih a simi hna lakah Mari zong aa tel ve. (Lam. 1:13, 14) Jehovah nih a thiang thlarau hmang in khuaruahhar thil a tuah ti kha mah hlan a hmuhtonmi thil in Mari nih a rak hngalh cang. A luancia kum 30 leng lio ah Jehovah nih a Fapa nunnak kha vancung in ngaknu thiang Mari nauinn chung ah a ṭhial. Mah thil cu “thiang thlarau thawng in a si.”—Matt. 1:20.
3, 4. Mari cu zei lungput dah a ngeih, zeitindah a nawl kan i cawn khawh?
3 Jehovah nih Mari kha zeicah a thim? Vancungmi nih Pathian Fapa na hrin lai ti a chimh tikah Mari nih hitin a leh: ‘Kei cu Jehovah salnu ka si ko, na chim bang cun ka cungah si ko seh.’ (Luka 1:38) Mari cu a chimmi bia nih zei bantuk minung a si kha a langhter. Jehovah nih tuah seh ti a duhmi tuah awkah timhcia in a um. Vancungmi kha fa ka pawi ahcun mi nih zeitindah an ka hmuh lai asiloah ka vat hnga dingmi Josef he kan i pehtlaihnak zeitindah a um lai tiah a hal lo. Mari nih Jehovah salnu ka si ko a tinak thawng in lungthin dihlak in Jehovah aa bochan kha a langhter.
4 Pathian rian cheukhat cu ṭuan awkah a har tuk tiah na ruat bal maw? Hitin kan i hal awk a si: ‘Thil kongkau kha Jehovah nih a duhmi ning in a tuah lai tiah lungthin dihlak in ka zum maw? Jehovah nih tuah seh ti a ka duhmi ning in tuah duhnak ka ngei maw?’ Jehovah nih lungthin dihlak in amah aa bochanmi le cungnung bik a si a cohlangmi kha a thlarau a pek hna ti na zumh khawh.—Lam. 5:32.
Thiang Thlarau nih Piter A Bawmh
5. C.E. 33 Pentekos ni hlan ah thiang thlarau nih Piter kha zeitindah a bawmh?
5 Mari bantukin lamkaltu Piter zong nih C.E. 33 Pentekos ni hlan ah thiang thlarau rianṭuannak kha amah theng nih a rak hmuh ve. Jesuh nih Piter le lamkaltu dang kha khuachia ṭhawl khawhnak ṭhawnnak a pek hna. (Mar. 3:14-16) Mah kong kha Baibal nih tampi a chim lo nain Piter nih mah ṭhawnnak kha rak hmang sehlaw a lo. Cun Galili rili ah Jesuh nih Piter kha ti cungah a ke in a sin rat awk a sawm tikah ti cung kal khawh awk zong thiang thlarau nih a bawmh. (Matthai 14:25-29 rel.) Cucaah Piter nih khuaruahhar thil a tuah khawh cu thiang thlarau aa bochan caah a si ti a fiang. A rauhhlan ah thiang thlarau nih Piter le lamkaltu dang kha thil dang tampi tuah khawh awkah ṭhawnnak a pek hna lai.
6. C.E. 33 Pentekos ni le a hnu ah Pathian thlarau nih Piter kha zei tuah awk dah a bawmh?
6 C.E. 33 Pentekos ni ah thiang thlarau nih Piter le midang kha Jerusalem ah a rak rami hna holh, chim khawh awk a bawmh hna. Cun Piter cu mibu hmai ah a dir i phung a chim. (Lam. 2:14-36) Piter cu a caan ah a ral a chia asiloah khuaruat rat lo in thil tuah a hmang. Asinain thiang thlarau a hmuh hnu cun hremnak le khenkhamnak a ton bu in ralṭha tein phung a chim kho. (Lam. 4:18-20, 31) Pathian thlarau nih Piter kha a thlithup in tuahmi thil a hngalhter. (Lam. 5:8, 9) Cun mithi thawhter khawhnak ṭhawnnak zong a pek.—Lam. 9:40.
7. Piter cu chiti thuh a si hnu lawng ah Jesuh cawnpiakmi zei kong dah a hngalhthiam?
7 Pentekos ni a phanh hlan in Piter nih Jesuh cawnpiakmi tampi kha a hngalhthiam cang. (Matt. 16:16, 17; Johan 6:68) Asinain Pentekos ni tiang a hngalhthiam lomi kong a um rih. Tahchunhnak ah, Khrih cu a thih hnu nithumnak ni ah thlarau pum in a tho ṭhan lai timi le a Pennak cu van ah dirh a si lai timi kha a hngalthiam lo. (Johan 20:6-10; Lam. 1:6) Minung cu van ah kai in Pennak ah uktu an ṭuan lai timi kong zong a hngalthiam lo. Pentekos ni ah amah theng chiti thuh a si i van ruahchannak pek a si hnu lawng ah mah vialte kha a hngalhthiam.
8. Chiti thuhmi le tuudang nih zeidah an hngalhthiam?
8 Jesuh zultu pawl nih thiang thlarau an hmuh hnu ah hlan ah an rak hngalhthiam lomi cawnpiaknak kha an hun hngalhthiam. Thiang thlarau nih Khrihfa Greek Baibal a ṭialtu hna kha Jehovah tinhmi biatak fianter khawh awk a bawmh hna. (Efe. 3:8-11, 18) Tuchan ah chiti thuhmi le tuudang cu thlarau rawl pekṭi an si caah biatak an hngalhthiam ning aa khat. (Johan 10:16) Pathian Bia kha thiang thlarau bawmhnak thawng in na hngalhthiam caah naa lawm maw?
Paul cu “Thiang Thlarau in a Khat”
9. Thiang thlarau nih Paul kha zei tuah awk dah a bawmh?
9 C.E. 33 Pentekos ni in kum khat hrawng a rauh hnu ah Saul, a hnu ah Paul tiah auhmi zong thiang thlarau toih a si. Pathian thlarau nih Paul kha atu kan chan tiang a ṭhahnemmi thil tuah awk a bawmh. Tahchunhnak ah, thiang thlarau lamhruainak in Baibal cauk uk 14 a ṭial. Piter bantukin Paul zong thiang thlarau nih a thi kho lomi vancung nunnak kong hngalhthiam awk le ṭial awk a bawmh. Cun khuachia ṭhawl khawh awk, mizaw damh khawh awk le mithi thawhter khawh awk zong a bawmh. Mah nakin a biapi deuhmi rian ṭuan khawh awk zong a bawmh. Tuchan ah kannih zong Pathian thlarau bawmhnak thawng in mah rian kha kan ṭuan khawh nain khuaruahhar thil tu cu kan tuah kho lo.
10. Paul cu bia a chim tikah thiang thlarau nih zeitindah a bawmh?
10 “Thiang thlarau in a khatmi” Paul nih camhthiammi pa kha ralṭha tein a leh. Mah kha Saipras tikulh uktu bawi nih a ngaih i Paul chimmi nih a lung a suk tuk caah biatak a cohlan. Baibal nih hitin a ti: “Bawipa kong an cawnpiakmi nih khan a lung a sukhai ngaingai.” (Lam. 13:8-12) Biatak ralṭha tein ka chim khawh cu Pathian thlarau thawng in a si ti kha Paul nih a hngalh ko lai. (Matt. 10:20) A hnu, Efesa Khrihfa hna sin a cakuat ah biatak kha “ralṭha in ka chim nakhnga” thla ka campiak u tiah a ṭial.—Efe. 6:18-20.
11. Paul cu Pathian thlarau nih zeitindah lam a hruai?
11 Paul cu phung a chim tikah thiang thlarau nih a bawmh, asinain a caan ahcun hmun cheukhat i phungchim kha a awnh lo. Missionary in khual a tlawn lio zong ah thiang thlarau nih lam a hruai. (Lam. 13:2; Lamkaltu 16:6-10 rel.) Jehovah nih tuchan zong ah phungchim rian kha thiang thlarau in lam a hruai rih ko. Nawlngaimi Jehovah salle nih Paul bantukin biatak kha ralṭha te le lungtho tein chim an i zuam. Paul chan le tuchan ah Pathian nih a thiang thlarau a hman ning aa khat lo, asinain biatak hngalh a duhmi hna hnuh awkah a thiang thlarau a hman rih ko ti cu kan zumh khawh.—Johan 6:44.
‘Rianṭuan Khawhnak a Phunphun a Um’
12-14. Pathian salle dihlak cungah thlarau rian a ṭuan ning aa khat maw? Fianter.
12 Kumzabu pakhatnak chiti thuhmi Khrihfa pawl Jehovah nih thluachuah a pek hnanak kong rel cu kan caah thazaang petu taktak a si. Mah chan lio Khrihfa hna kha thiang thlarau nih “laksawng” asiloah a hleikhunmi thil ti khawhnak a pek hna. Paul nih Korin Khrihfabu sin ah mah laksawng kong kha hitin a ṭial: “Thlarau laksawng hi a phunphun in a um, sihmanhsehlaw cu laksawng vialte a petu hna cu thlarau ṭhiamṭhiam kha a si ko. Rianṭuan hi a ning tampi a um, sihmanhsehlaw a rian kan ṭuanmi cu Bawipa ṭhiamṭhiam kha a si ko. Rianṭuan khawhnak hi a phunphun in a um, sihmanhsehlaw cu bantuk ṭuan khawhnak a petu hna cu Pathian ṭhiamṭhiam kha a si ko.” (1 Kor. 12:4-6, 11) Thiang thlarau cu tinhmi thil pakhat caah lam phunphun in Pathian salle pakhat cio cungah rian a ṭuan kho tiah Paul nih a chim. “Tuurun hmete” he “tuudang” he Pathian thiang thlarau nih lam a hruai hna. (Luka 12:32; Johan 10:16) Asinain Khrihfa pakhat cio cung rian a ṭuan ning tu cu aa dang.
13 Tahchunhnak ah, Khrihfa upa cu thiang thlarau in thim an si. (Lam. 20:28) Asinain thlarau in chiti thuhmi an dihlak in Khrihfa upa cu an si lo. Cucaah thiang thlarau cu Khrihfabu chung mi pakhat cio cung ah lam phunphun in rian a ṭuan kho ti a lang.
14 Chiti thuhmi hna Pathian fa an si a hngalhter tu thlarau le Jehovah nih Jesuh thlarau pum in thawhter awkah a hmanmi thlarau cu aa khat. (Rom 8:11, 15 rel.) Mah thlarau ṭhiamṭhiam khan Jehovah nih van le vawlei a rak ser. (Gen. 1:1-3) Jehovah nih mah thlarau hmang in Bezalel kha puanthlam thilri ser khawhnak thiamnak a pek, Samson kha ahohmanh ngeihlomi ṭhawnnak a pek i Piter kha ti cung ah kal khawh awk a rak bawmh. Cucaah Pathian thlarau nih lamhruai timi le Pathian thlarau in chiti thuh timi cu aa khat lo ti a fiang. Thiang thlarau in chiti thuh timi cu Pathian thlarau rianṭuan ning phun khat a si. Thlarau in chiti thuhmi hna cu Pathian thimmi an si.
15. Thiang thlarau in chiti thuhnak cu a um zungzal lai maw? Fianter.
15 Pathian nih thlarau in chiti a thuh hna hlan, kum thong tampi lio in zumhfekmi a salle cung ah a thiang thlarau kha lam phunphun in a rak hman cang. Thiang thlarau in chiti thuhnak cu C.E. 33 Pentekos ni in aa thawk nain a zungzal cun a si lai lo. Thiang thlarau in chiti thuhnak cu a dong te lai nain Pathian miphun kha Pathian duhnak tuah khawh awkah cun a bawmh zungzal hna lai.
16. Tuchan ah Pathian salle nih thiang thlarau bawmhnak in zeidah an tuah khawh?
16 Tuchan ah Jehovah salle nih thiang thlarau bawmhnak in zeidah an tuah khawh? Biathlam 22:17 nih hitin a chim: “Thlarau le va ngei laimi ngaknu nih khan, ‘Ra u,’ an ti. Hi bia a theimi paoh nih khan, ‘Ra u,’ ti ve hna seh. Ti a haalmi paoh cu, ra u; nunnak ti hi man lo in i lak u, a duhmi paoh nih i lak u.” Tuchan ah thiang thlarau bawmhnak thawng in Jehovah salle nih nunnak ti “a duhmi paoh” kha din awkah an sawm hna. Mah rian kha chiti thuhmi hna nih an hruai i tuudang zong nih an ṭuan ve. Thiang thlarau nih an phu hnih in lam a hruai hna. An phu hnih in Jehovah sin an i pumpeknak kha “Pa le Fapa le Thiang Thlarau min in” tipil an innak in an langhter. (Matt. 28:19) An zapi in thlarau nih a chuahtermi ziaza kha an nunnak ah an langhter. (Gal. 5:22, 23) Pathian thlarau bawmhnak thawng in Pathian duhmi ning in nun khawh awkah an i zuam.—2 Kor. 7:1; Biat. 7:9, 14.
Thiang Thlarau kha Hal Zungzal
17. Pathian thlarau na cung a um kha zeitindah na langhter khawh?
17 Naa ruahchanmi cu van a si ah, vawlei a si ah a dongh tiang zumhfek tein um awkah Jehovah nih “thilti khawhnak ṭhawnnak” aan pek khawh. (2 Kor. 4:7) Phung na chim ruang ah mi nih an in nihsawh men lai. Asinain ngol lo in na chim peng ahcun Pathian thlarau na cung a um na langhter a si. Mah bia hi i cinken, “Khrih zultu nan si ruang i serhsatnak nan in ahcun, nan caah lunglawmh awk a va si dah; cu nih cun sunparnak a ngeimi thlarau, Pathian thlarau kha nan cungah a um ti kha a langhter.”—1 Pit. 4:14.
18, 19. Jehovah nih thiang thlarau hmang in zeitindah aan bawmh lai? Zeidah na tuah zungzal awk a si?
18 Pathian nih lungtak in a thiang thlarau a halmi kha siang ngai in a pek hna. Thiang thlarau nih thiamnak ngeih chin awk le Pathian rian na si khawh chung in ṭuan duhnak ngeih chin awk aan bawmh khawh. “Pathian tinhmi kha nan zulh khawh nakhnga le cu tuah duhnak lungthin nan ngeih nakhnga, Pathian cu nan chungah rian a ṭuan zungzal ko.” Thiang thlarau bawmhnak le “nunnak bia” fek tein tlaih naa zuamnak thawng in ‘na khamhnak a tlin khawh nakhnga, ṭih le phang lengmang in na ṭuan’ khawh lai.—Fil. 2:12, 13, 15, 16.
19 Pathian thlarau kha na lungthin dihlak in i bochan law Pathian pekmi rian kha felte le ṭha tein ṭuan, cun a sinah bawmhnak zong hal. (Jeim 1:5) A Bia hngalhthiam awk, harnak in khawh awk le thawngṭha chim khawh awkah aan bawmh lai. Jesuh nih hitin bia a kan kamh: “Hal u law pek nan si lai; kawl u law nan hmuh lai; king u law innka cu hunpiak nan si lai.” (Luka 11:9, 13) Mah ah thiang thlarau hal zong aa tel. Cucaah Pathian salle kha thiang thlarau nih lam a hruai hna bantukin aan hruai ve nakhnga Jehovah sinah thla cam zungzal.
Na Fianter Kho Maw?
• Mari kha zeitindah kan i zohchunh khawh i zei thluachuah dah kan hmuh lai?
• Paul cu Pathian thlarau nih zeitindah lam a hruai?
• Tuchan Pathian salle cu thiang thlarau nih zeitindah lam a hruai hna?
[Cahmai 24nak i hmanthlak]
Pathian thlarau bawmhnak in Paul nih camhthiammi pa kha ralṭha tein a leh khawh
[Cahmai 26nak i hmanthlak]
Chiti thuhmi zong, tuudang zong thiang thlarau nih lam a hruai hna