Cawnpiaknak ah Lemthiammi Si
1. Phungchimnak ah Baibal hmualngei tein hmannak ah zeidah aa tel?
1 Lamkaltu Paul bantukin hmualngei in phung a chimmi hna nih ‘biatak hmaan tein mi an cawnpiak’ hna tikah Baibal cang chim lawng in a zat lo kha an hngalh. (2 Tim. 2: 15) Baibal hmang in cawnpiak tikah ‘lemthiamnak’ kha zeitindah kan hman khawh?—Lam. 28:23, NW.
2. Mi nih Baibal an upat deuh nakhnga zeitindah kan bawmh khawh hna?
2 Baibal Chimmi Hmuhsak: Pakhatnak ah, Baibal ah Pathian fimnak a um ṭha tein an hngalh khawh nakhnga Baibal kha dairek in zohter. Baibal kan zumhnak nih a ngaitu kha kan relmi Baibal cang ṭha tein ngaih awkah a forh khawh. (Heb. 4:12) Hitin kan chim khawh: “Mah kong ah Pathian hmuh ning hngalh cu a ṭhahnem. Baibal nih zeitindah a chim hi zoh hmanh.” A si khawh fate Baibal cang dairek relnak in Baibal chimmi kha hmuhsak.
3. Baibal cang rel hnuah a sullam hngalhthiam awk zeitindah bawmh khawh a si?
3 Pahnihnak ah, Baibal cang relmi kha fianter. Mi tampi nih Baibal cang pakhat hmasa bik an rel ah hngalhthiam an i harh. Kan i ruahmi kong le Baibal cang aa peh-tlaih ning kha fianter a herh tawn. (Luka 24:26, 27) Kan i ruahmi a biapi bik a kong a sawhmi Baibal cang bia kha langhter khun a hau. A lungfian le fian lo hngalh awkah biahalnak tuah khawh a si.—Ptb. 20:5; Lam. 8:30.
4. Cawnpiaknak ah lemthiammi si awkah a herhmi a pathumnak cu zeidah a si?
4 Baibal cang kha Biatak tein Ruah-ter: Pathumnak ah, a lungsuk i zuam. Baibal cang cu innngeitu he zeitindah aa pehtlaih hmuhthiam awk bawm. Baibal cang hna biatak tein ruahternak nih mi pakhat a ruahnak thlen awkah a forh khawh. (Lam. 17:2-4; 19:8) Tahchunhnak ah, Salm 83:18 [NW] rel hnu ah mi pakhat he i hawikomh awkah a min hngalh zeitluk in dah a biapit kha ruah-ter khawh a si. Cun hitin hal: “Pathian min hngalhnak nih na thlacamnak kha sullam a ngeihter deuh lai tiah na ruat maw?” Cutin Baibal cang le innngeitu a nunnak pehtlaihternak nih Baibal cang man a ngeih kha a langhter. Cawnpiaknak ah Baibal in lemthiamnak nih lungthin ṭha a ngeimi kha a hmaanmi le a nungmi Pathian Jehovah biak awkah a hnuh hna.—Jer. 10:10.