Jehovah nih harnak a tongmi hna kha hrimhnak a pek khawh hna i a hnemh khawh hna. Jehovah kha i zohchunh in midang kha zeitindah zaangfahnak kan langhter khawh i kan hnemh khawh hna? Lamkhat cu zaangfahnak le midang hnemh duhnak sining ngeih awkah kan i zuamnak thawng in a si. Mah sining cheukhat cu zei hna dah an si? Ni fatin ‘pakhat le pakhat i bawmh peng’ awk le i dawt peng awkah zeinihdah a kan bawmh lai? (1 Thes. 4:18) Zawnruahnak, unau dawtnak le zaangfahnak ti bantuk sining hna kha kan ngeih a hau. (Kol. 3:12; 1 Pet. 3:8) Mah sining hna nih zeitindah a kan bawmh lai? Midang cung ah zaangfahnak le zawnruahnak taktak kan ngeih ahcun harnak an ton tikah bawmh kan duh hna lai. Jesuh nih “kaa nih cun lung chung i a khatmi kha pei a chim cu. Miṭha nih cun thil ṭha aa khonmi chung khan thil ṭha a chuah hna” tiah a ti. (Matt. 12:34, 35) An herh lio caan te ah unau pawl hnemh cu kan dawt hna ti kan langhter khawhnak a biapi bikmi lam a si. w23.11 10 ¶10-11

Baibal chimchungbia kha hngalhthiam kan duh ahcun bawmhnak kan hal hna a hau. Mah tahchunhnak kong hi ruathmanh. Na hngalh tuk lomi hmun pakhat ah khual na tlawng tiah na mitthlam ah cuanter hmanh. Asinain na kalṭimi na hawi pakhat nih cuka hmun kong kha ṭha tein a hngalh. Khoika dah nan phanh ti le lam pakhat cio cu khoikalei dah a zawh ti kha ṭha tein a hngalh. Cucaah mah na hawi nih nangmah he kalṭi ding in a hna a tlak caah naa nuam tuk lai ti cu a fiang ko. Cu bantuk in Jehovah nih zei bantuk caan ah dah kan nun ti le zei lam dah kan panh ti kha a hngalh. Cucaah Baibal chimchungbia pawl hngalhthiam awkah Jehovah sinah toidor tein bawmhnak kan hal a hau. (Dan. 2:28; 2 Pet. 1:19, 20) Nulepa ṭha bantuk in Jehovah nih a fale kha a nuammi hmailei nunnak ngei hna seh ti a duh. (Jer. 29:11) Asinain a tling lomi nulepa he i lo loin Jehovah nih cun hmailei kong kha fiang te le tling tein a chimchung khawh. A biapimi thil sining kong kha a can hlan in kan hngalh khawh nakhnga Baibal ah chimchungbia paw kha a ṭialter hna.—Isa. 46:10. w23.08 8-9 ¶3-4

Pathian nih Jesuh kha minung tonmi buaibainak vialte tawnghtham awkah ṭhawnnak a pek. A tuahmi khuaruahhar thil thawngin Jesuh nih kanmah tein kan tawngtham khawh lo dingmi buaibainak hna tawnghtham awkah ṭhawnnak a ngeih kha a langhter. Tahchunhnak ah, Jesuh cu minung tonmi buaibainak a chuahtertu hrampi a simi, zawtnak le thihnak i telin sualnak ro kan comi in luatter awkah ṭhawnnak a ngei. (Matt. 9:1-6; Rom 5:12, 18, 19) A tuahmi khuaruahhar thil nih zawtnak “a phunphun” a ngeimi kha a damter khawh hna i a thimi hmanh a thawhter khawh hna ti kha a langhter. (Matt. 4:23; Johan 11:43, 44) Cun thlichia kha a uk khawh i thlarau ṭhalo sinin minung luatter khawhnak ṭhawnnak zong a ngei. (Mar. 4:37-39; Luka 8:2) Jehovah nih a Fapa kha cu bantuk ṭhawnnak a pek ti hngalh cu zeitluk in dah hnemtu a si. Pathian Pennak ah hmailei thluachuah hna a tling lai ti kha kan zumh khawh. Vawleicung ah Jesuh nih minung pakhat in a tuahmi khuaruahhar thil hna nih Pathian Pennak i vancung Siangpahrang in thil tam deuh a tuah lai ti kha a kan cawnpiak. w23.04 3-4 ¶5-7