Careltu hna Sinin Biahalnak
Jesuh cu Israel ram chung dihlak ah kal in phung a rak chim. Cu a si ah Judah mi le an haotu pawl nih Jesuh an thah tikah an “hngalh lo ruangah a si” tiah lamkaltu Piter nih zeitindah a chim khawh?—Lam. 3:17.
Messiah thihnak ah an i telnak kong kha Judah mibu sin a chim tikah lamkaltu Piter nih hitin a ti: “Nanmah le nan haotu hna nih nan rak tuahmi kha zei a si ti awk nan rak hngalh lo ruangah a si ti kha fiang tein ka hngalh.” (Lam. 3:14-17) Judah mi cheukhat nih Jesuh le a cawnpiaknak kha an rak hngalhthiam lo a si men lai. A dang caah cun hngalh lo in an tuahnak a ruang ah Pathian lungton duhnak ngeih lo, mi thleidan rak ngeih, nahchuahnak le huatnak hna aa tel.
Jehovah lungton duhnak ngeih lo nih Jesuh cawnpiaknak he aa tlai in mi tampi an hmuhnak zeitindah a hnorsuan kha zoh hmanh. Jesuh nih bianabia in a cawnpiak tawn hna i hngalh chap a duhmi kha a sullam a chimh hna. Asinain mi a cheu nih hngalh i zuam lo in an kal tak. Voikhat cu a zultu pawl hmanh Jesuh hmanmi tahchunhnak pakhat ruangah an lung a dong. (Johan 6:52-66) Jesuh bianabia nih an khuaruahnak le tuahsernak thlen an duh maw, duh lo a hneksak hna kha annih nih an hngal lo. (Isa. 6:9, 10; 44:18; Matt. 13:10-15) Cun Messiah nih a cawnpiaknak ah bianabia a hman lai timi chimchung bia kha zei ah an rel lo.—Salm 78:2, NW.
A dang cu mi thleidan an rak hman ruang ah Jesuh cawnpiaknak kha an al. Jesuh cu a chuahkehnak khau Nazareth, pumhnak inn ah a cawnpiak hna tikah mi cu “an khuaruah a har dih.” Jesuh kha Messiah in cohlan nemmam cu, hnulei a kong tu kha biahalnak an tuah: “Hi vialte hi khuazei ah dah a va hmuh hnga? . . . Mari fapa, lehtama kha a si lo maw? Jeim le Joses le Judas le Simon hna u kha a si lo maw? A farle zong kha hika ah an um ko lo maw?” (Mar. 6:1-3) Jesuh cu mi sawhsawh chungkhar in a ṭhan caah a cawnpiaknak cu Nazareth khuami hna caah man ngei lo a rak si.
Biaknak lei upa pawl tah zeitin? A tam deuh cu mah bantuk ruang ah khan Jesuh bia ṭhate in ngaih an duh lo. (Johan 7:47-52) A cawnpiaknak zong kha an al, Jesuh nih mi tampi lungthin a lakmi kha an nahchuah caah a si. (Mar. 15:10) Cun Jesuh nih minthangmi tampi an depdetnak le mi an hlennak kha zapi hmai ah a chim tikah ṭhalo ngai in an lehrulh taktak. (Matt. 23:13-36) Jesuh nih hramhram in hngalhthiam an duh lomi kha a hmaan ningin sual a phawt hna i hitin a ti: “Nannih Phungbia cawnpiaktu saya hna, nan caah ṭihnung a va si dah. Hngalhnak innka hunnak tawh kha nannih nih nan ken, nanmah cu [Pennak ah] nan lut duh ṭung lo i luh aa zuammi hna zong kha nan dawnh fawn ṭung hna.”—Luka 11:37-52.
Jesuh cu vawlei cung ah kum thum le a cheu phung a rak chim. Mah rian ah i tel dingin midang tampi zong a rak cawnpiak hna. (Luka 9:1, 2; 10:1, 16, 17) Jesuh le a zultu pawl cu zeituk in hmual an ngeih ti ah cun hiti tiang hin Farasi pawl an rak zai: “Vawlei pumpi nih an zulh cang hih.” (Johan 12:19) Cucaah Judah mi tam deuh nih an hngalh bak lomi a si lo. Asinain Jesuh cu Messiah a si kha a hrampi cun an ‘hngal lo.’ Annih nih Messiah he aa tlaimi an hngalhnak le an dawtnak kha an kauhter khawh ko nain an tuah lo. A cheu cu Jesuh thahnak ah a bawmtu an rak si. Cucaah lamkaltu Piter nih an lak i atam deuh kha hitin a forh hna: “Cucaah nan sualnak cu an hnawhpiak hna nakhnga, i ngaihchih u law Pathian lei ah khan i mer tuah u. Cun Bawipa nih thlarau thazang thar hmuhnak caan ṭha an pek hna lai i amah nih nan caah a thim cangmi Messiah, Jesuh kha nan sinah a run thlah lai.” (Lam. 3:19, 20) Cinken tlak a simi cu “tlangbawi tampi” tel in Judah mi thong tampi nih ṭhate in a hun ngaih. Hngal lo in an tuah ti lo. Mah canah an sualnak an i ngaichih i Jehovah mithmai ṭha an rak hmu.—Lam. 2:41; 4:4; 5:14; 6:7.