Quandu hè chì u reame di Diu hà da guvernà a terra ?

CHÌ EVENTI GHJESÙ HÀ PREDETTU ?

Ghjesù hà dettu : « Una nazione s’hà da rizzà contru à una nazione, è un regnu contru à un regnu ; ci sarà gran trambusti di terra, è, in diversi lochi, peste è caristie » (Lucca 21:10, 11). Da listessa manera chì e righe fàcenu una stampa di diti, st’inseme d’eventi cumpunerìa un segnu chjaru. Cum’è una stampa di diti permette di cunnosce l’identità di qualchissìa, stu segnu permitterìa di capì chì « u regnu di Diu hè vicinu ». Si vèdenu eventi cusì accade attempu è à u livellu mundiale ? Stemu à vede qualchi fatti.

1. GUERRE

In lu 1914 hà schjattatu una guerra d’una stesa mai vista. I stòrichi dìcenu spessu chì 1914 hè statu un scambiamentu ind’a Stòria, perchè ghjè st’annu quì chì hà principiatu a prima guerra mundiale. Mitragliette, bumbardamenti, gasi tòssichi, carri armati... Mai omu ùn s’era ghjuvatu d’arme tumbatoghje à un livellu cusì grande. Eppò dopu, hà schjattatu a seconda guerra mundiale, chì hà vistu, pè a prima volta, l’omi aduprà arme atòmiche. Dapoi u 1914, ci hè sempre statu guerre appena dapertuttu in lu mondu chì anu fattu milioni di morti.

2. TRAMBUSTI DI TERRA

Ogni annu, si conta una centinàia di seismi abbastanza putenti per fà « disguasti impurtanti », dice l’enciclupedìa Britannica Academic. L’Institutu di stùdii geològichi di i Stati-Uniti dice chì « d’appressu à infurmazione raccolte à long’andà (dapoi circa u 1900), ci vole à aspettassi in media à 16 seismi putenti à l’annu ». D’appressu à certi, ghjè perchè emu migliuratu a dittezzione di i seismi chì ci pare ch’elli crèscinu. Di tutte e manere, gran trambusti di terra cagiunèghjanu suffrenze è morte cum’è mai.

3. CARESTÌE

In parechji lochi in u mondu, per vìa di e guerre, a curruzzione, e crise ecunòmiche, una malgestione di l’agricultura o una mancanza di preparazione à i fenòmeni climàtichi stremi ci hè scarsina di robba da manghjà. Secondu u bilanciu di u 2018 di u Prugramma alimentàriu mundiale, « in u mondu, 821 milioni di ghjente sò sottalimentate, 124 milioni frà elle sò famite ». Per vìa di a malnutrizione, ogni annu 3,1 milioni di zitelli mòrenu di fame. In lu 2011, hè stata rispunsèvule di 45 % di a morte di zitelli in u mondu.

4. MALATÌE È EPIDEMÌE

Una publicazione di l’Organizazione mundiale di a salute dice : « U sèculu 21 hè digià bè marcatu da tamante epidemìe. Vechje malatìe cum’è u culerà, a pesta è a frebba gialla vòltanu è nove malatìe spùntanu cum’è u SRAS, grippa pandèmica, MERS, Ebola è Zika. » Ancu sè a scienza è a medicina anu fattu parechje scuperte, ùn ci la fàcenu micca à truvà trattamenti contr’à tutte e malatìe.

5. UN’ÒPERA DI PREDICAZIONE MUNDIALE

Dendu retta à un’antra parte di u segnu, Ghjesù hà predettu : « Ista bona nova di u regnu sarà pridicata in lu mondu interu, pè serve di tistimunianza à tutte e nazioni. Tandu vinarà a fine » (Matteu 24:14). Allora chì, prublemi tremendi acciàccanu u mondu, più di ottu milioni di ghjente di tutte e nazione annùnzianu a bona nova di u reame di Diu indè 240 paesi è territòrii, è in più di 1 000 lingue. Què ùn s’hè mai vistu !

CHÌ CI VOLE À CAPÌ ?

Ogni parte di u segnu ch’hà datu Ghjesù accade oghje. Perchè dalli capu ? Perchè Ghjesù hà dettu : « Quand’è vo vidarete accade sse cose, sàppiate chì u regnu di Diu hè vicinu » (Lucca 21:31).

U segnu datu da Ghjesù è a crunulugìa bìblica ci danu à capì chì Diu hà messu in piazza u so reame celincu in lu 1914a. Ghjè à ssu mumentu quì ch’ellu hà fattu rè u so Figliolu, Ghjesù Cristu (Salmu 2:2, 4, 6-9). Frà pocu, u reame di Diu hà da guvernà u mondu, stirpà tutte e duminazione opposte è fà di a terra un paradisu induve l’umani camperanu pè u sempre.

Da quì à pocu, anu da còmpiesi sse parolle di u mudellu di prighera chì Ghjesù hà amparatu : « Chì u to regnu venghi ; chì a to vulintà sìa fatta nantu à a terra cum’è in lu celu » (Matteu 6:10). Ma chì face u Reame dapoi ch’ellu hè statu messu in piazza in lu 1914 ? Chì avvene si pò sperà quandu ssu reame guvernerà l’umanità sana ?