Quale hè u Rè di u reame di Diu ?

• Sceltu da Diu. « Sò èiu chì aghju untu u mio rè [...] ti daraghju e nazioni in làscita, l’estremità di a terra per pusessu » (Salmu 2:6, 8).

• Erede di u rè Davìdiu. « Chì un figliolu ci hè natu, un figliolu ci hè datu [...]. Dà à l’imperu accriscimentu, è una pace senza fine à u tronu di Davìdiu è à u so reame, assuddalu è sustènelu » (Esàia 9:5, 6).

• Natu in Bethlemme. ‘È tù Bethlemme [...] da tè surtarà per mè quellu chì duminarà [...] chì sarà glurificatu finu à i lìmiti di a terra’ (Michea 5:1, 3).

• Righjittatu da l’omi è tombu. « Disprizzatu è abbandunatu da l’omi, [...] ma era feritu pè i nostri piccati, troncu pè e nostre iniquità » (Esàia 53:3, 5).

• Risuscitatu è glurificatu. « Chì ùn darè micca a mio ànima à u sughjornu di i morti, ùn permittarè chì u to benamatu vechi a curruzzione. [...] Eterne delìzie à a to diritta » (Salmu 16:10, 11).

Ghjesù Cristu : u Dirighjente ideale

Trà mezu à tutti l’umani chì anu campatu, unu solu currisponde à ssa descrizzione di u dirighjente ideale, è st’omu, ghjè Ghjesù Cristu. In fatti, un ànghjulu hà dettu à Maria, a mamma di Ghjesù : « Diu li darà u tronu di Davìdiu, u so babbu [...], è u so regnu ùn avarà mai fine » (Lucca 1:31-33).

Quand’ellu campava nant’à a terra, Ghjesù ùn hè mai statu dirighjente. Ghjè da u celu, cum’è Rè di u reame di Diu, ch’ellu hà da direge l’umanità. Perchè si pò dì ch’ellu hè u Dirighjente ideale ? Vidite ciò ch’ellu hà fattu quand’ellu era nant’à a terra.

• Hà fattu prò à a ghjente. Ghjesù aiutava l’omi è e donne, i zitelli è i vechji qualsìasi e so urìgine o a so cundizione suciale (Matteu 9:36 ; Marcu 10:16). Quandu, supplichendu, un liparosu li hà dettu : « S’è tù voli, mi poi rende puru », Ghjesù, cummossu di cumpassione, hà guaritu st’omu (Marcu 1:40-42).

• Hà amparatu à l’altri cume fà per piace à Diu. Ghjesù hà dettu : « Ùn pudete serve à Diu è à Mamòniu. » Ci hà dettu dinù di trattà l’altri cum’è ci piacerìa chì l’altri ci trattèssinu, un princìpiu chì serà chjamatu più tardi a Règula d’oru. Hà fattu sapè chì Diu ùn dà micca solu capu à ciò chè no femu, ma ancu à ciò chè no pensemu o risintimu. Dunque, per piace à Diu, ci tocca à ammaestrà i nostri sìntimi arradicati (Matteu 5:28 ; 6:24 ; 7:12). In più, hà fattu vede di manera chjara chì per truvà a vera felicità, ci vole à amparà ciò chì Diu vole chè no fèssimu è dopu, falla (Lucca 11:28).

• Hà amparatu à l’altri ciò chì vole dì amà. E parolle è i fatti di Ghjesù èranu putenti è tuccàvanu u core di quelli chì u stàvanu à sente, « a ghjente fù culpita da a so duttrina ; perchì insignava cum’è avendu auturità » (Matteu 7:28, 29). Hà ricummandatu « Amate i vostri nimici ». Hà ancu prigatu per certi chì anu pigliatu parte à fallu tumbà : « Babbu, pardònali, chì ùn sanu ciò ch’elli fàcenu » (Matteu 5:44 ; Lucca 23:34).

Ghjesù hà tutte e qualità di u perfettu dirighjente per guvernà l’umanità, un dirighjente bravu è primurosu. Ma cumencia quandu à guvernà ?