Sottu a duminazione di Diu, a creazione sana campava unita è in pace.

Perchè ne avemu bisognu di u reame di Diu ?

À l’inìziu di a stòria umana, u nostru Creatore, chì u nome hè Ghjehova, era u solu Dirighjente. Guvernava cù amore. Avìa fattu per l’umani un locu magnìficu, u giardinu d’Èdene. Li dava robba da manghjà à buzeffu. Li avìa datu dinù un incàricu appassiunante (Gènesi 1:28, 29 ; 2:8, 15). S’ella era stata sottu à so duminazione piena d’amore, l’umanità camperìa in pace.

Àdamu tene in manu u fruttu difesu ch’Eva vene di dalli. — I primi umani anu mandatu vìa l’auturità di Diu.

A Bìbbia rivela chì un ànghjulu ribellu, più tardi chjamatu Satanassu u Diàvule, hà ricusatu di ricunnosce u dirittu di Diu di guvernà. Hà sottintesu chì l’umani serìanu più felici senza a duminazione di Diu è senza i so cunsìgli. Per disgràzia, Àdamu è Eva, i nostri primi parenti, anu seguitatu a listessa strada chì Satanassu : si sò rivultati contr’à Diu (Gènesi 3:1-6 ; Apocàlisi 12:9).

Cum’elli anu mandatu vìa l’auturità di Diu, Àdamu è Eva anu persu ssu paradisu di casa è a speranza di campà per sempre in una salute perfetta (Gènesi 3:17-19). A so decisione hà ancu fattu tortu à i so figlioli, nati più tardi. Àdamu avendu peccatu, « u piccatu hè intrutu in lu mondu, dice a Bìbbia, è pè u piccatu a morte » (Rumani 5:12). U peccatu hà avutu un’antra cunsequenza tràgica : « L’omu dumineghja nant’à l’omu pè rèndelu disgraziatu » (Ecclesiasta 8:9). Vale à dì, quandu umani supranèghjanu umani, i prublemi affàccanu.

L’OMU SI METTE À SUPRANÀ L’OMU

Nimrod, pretenziunutu. Daretu, ghjente chì custruìscenu un casale. — Nimrod s’hè rivultatu contr’à Ghjehova.

U primu dirighjente umanu chì parla a Bìbbia si chjamava Nimrod. Ss’omu s’hè rivultatu contr’à a duminazione di Ghjehova. Dapoi l’èpica di Nimrod, umani chì anu un’auturità fàcenu un gattivu usu di u so putere. 3 000 anni fà, u rè Salamone hà scrittu : « L’oppressi sò in le làcrime, è nimu chì i cunsola. Sò esposti à a viulenza di i so oppressori » (Ecclesiasta 4:1).

Oghje, ghjè listess’affare. In lu 2009, una publicazione di e Nazione unite dicìa chì u « malguvernu » hè cunsideratu cum’è « una di e prime càuse chì sòffrenu e nostre sucietà ».

AVÀ GHJÈ ORA DI SCAMBIÀ !

U mondu hà bisognu di dirighjenti di prima trinca è d’esse megliu guvernatu. È ghjè ghjust’appuntu ciò chì u nostru Creatore ci prumette !

Sèguita di fiure : E cunsequenze di u malguvernu umanu. 1) Un’asiàtica, à pusà in terra ind’un carrughju malsanu, tene in bracce u so cininu chì pienghje. 2) Un omu vechju è malatu ind’un lettu d’uspidale. 3) Suldati in guerra tìranu fucilate. 4) Ghjente in còllera chì mùghjanu è sventulèghjanu cartelle. 5) Ghjunte in casa, una donna è a so figliola si rèndenu contu chì u vetru di a porta di l’entrata hè rottu. 6) Una cità cù fumaghjoli è palli d’elettricità ind’una fumaccia. — Ancu i guverni umani i più capaci ùn ci l’anu fatta à scioglie i prublemi i più pèssimi di l’umanità.

Diu hà messu in piazza un reame, o guvernu. Stu guvernu hà da rimpiazzà tutte e duminazione umane è « ellu stessu sussistarà in eternu » (Daniellu 2:44). Eccu ciò chì hè ssu regnu, o reame, chì milioni di ghjente prèganu (Matteu 6:9, 10). Ma ùn serà micca Diu stessu chì guvernerà. Per esse Capu di ssu guvernu, Diu hà sceltu à qualchissìa chì hà campatu da umanu. Quale hè ?