Serà chì stu mondu ghjunghje à a so fine ?

Ciò chì ùn hà da micca smarì

L’UMANITÀ

Ciò chì a Bìbbia dice : Diu ‘l’hà criata perch’ella ùn fussi micca deserta, chì l’hà furmata perch’ella fussi abitata’ (ESÀIA 45:18).

A NOSTRA PIANETA

Ciò chì a Bìbbia dice : « Una generazione si ne và, un’antra vene, è a terra susiste sempre » (ECCLESIASTA 1:4).

SPIEGAZIONE : Dappress’à a Bìbbia, a terra ùn serà mai distrutta è ci serà sempre abitanti nant’à ella. Allora, chì ci vole à capì da « fine di u mondu » ?

TINITE CONTU DI QUÈ : A Bìbbia mette à paragone a fine pròssima di u mondu cù un eventu chì ghjè accadutu in tempi di Noè. À st’èpica, a terra s’era impiuta di viulenza (Gènesi 6:13). Noè ellu era un omu dirittu. Diu hà priservatu a vita di Noè è di a so famìglia, ma hà fattu more l’umani gattìvi cù u dilùviu. Parlendu di st’eventu a Bìbbia dice : « U mondu di tandu perì, ricupertu da l’acqua » (2 Petru 3:6). È cusì s’hè compiu un mondu. Ma, chì ghjè chì hè statu distruttu ? Micca a terra, ma l’umani gattìvi chì campàvanu nant’à a terra. Dunque, quandu a Bìbbia parla di a fine di u mondu, ùn parla micca di distruzzione di a pianeta. Ma parla piuttostu di a smarita di l’umani gattìvi chì ci càmpanu è dinù di l’istituzione ch’elli anu messu in piazza.

Ciò ch’hà da smarì

I PRUBLEMI È A GATTIVERA

Ciò chì a Bìbbia dice : « Torna appena di tempu, è più gattivi ; guarderai u locu duv’elli eranu, più nimu. Ma l’ùmili pussideranu a terra è si guderanu una pace cumpleta » (SALMU 37:10, 11, nwt-F).

SPIEGAZIONE : À l’èpica di Noè, u Dilùviu ùn hà micca fattu smarì per sempre a gattivera. Dopu u Dilùviu, umani gattìvi anu fattu torna strazià a ghjente. Ma frà pocu, Diu hà da falla finì cù a gattivera. Cum’è l’hà detta u salmistu, ùn ci serà « più gattivi ». Diu hà da fà smarì a gattivera gràzia à u so reame, un guvernu mundiale chì, da u celu, hà da stradà una sucetà umana attaccata à a ghjustìzia.

TINITE CONTU DI QUÈ : I capizzoni chì oghje supranèghjanu u mondu à cappieranu vulinteri a so piazza per lascialla à u reame di Diu ? Manc’appena dice a Bìbbia. Averanu ancu a scimità di mettesi contru à stu reame (Salmu 2:2). Ch’hà da accade ? U reame di Diu rimpiazzerà tutti i guverni umani è « ellu stessu sussistarà in eternu » (Daniellu 2:44). Ma perchè ci vole chì a duminazione umana pigliessi fine ?

A fine di a duminazione umana : bisognu ci hè

Ciò chì a Bìbbia dice : « Ùn hè à l’omu, quand’ellu camina, à direge i so passi » (GHJERÈMIA 10:23).

SPIEGAZIONE : L’umani ùn sò micca stati fatti cù a capacità di stradassi da per elli. Ùn ci la fàcenu micca à guvernà l’altri è à truvà una suluzione à i so prublemi.

TINITE CONTU DI QUÈ : U situ enciclupèdicu Britannica Academic dice chì mancu un statu pare capace di « vince i nimichi universali cum’è a misèria, a fame, e malatìe, e catastròfe naturale è e guerre o d’antre spèzie di viulenza ». L’artìculu dice dinù, chì dappress’à certi, « solu una spèzia di guvernu mundiale pò esse efficace di pettu à sti castichi ». Ma, ancu sè tutti i guverni umani si mittìanu inseme, u mondu serìa sempre guvernatu da umani imperfetti, chì ùn ci la fàcenu à sciòglie e difficultà ch’avemu parlatu prima. U reame di Diu hè u solu guvernu capace di falla finì per sempre cù i prublemi di u mondu.

Cusì dappress’à a Bìbbia, a fine di u mondu, vale à dì a sucetà oghjinca storta, ùn hè micca qualcosa chì deve spaventà i boni. Ghjè piuttostu qualcosa chì si pò aspettà cù brama perchè stu vechju mondu chì si ne và in pezzi, hà da esse rimpiazzatu da u magnìficu mondu novu di Diu !

Hà da fassi quandu ? Scuprite a risposta di a Bìbbia indè l’artìculu chì seguita.