Hà da ghjunghje quandu a fine ? Ciò chì Ghjesù hà dettu

FATE CASU À STE DUIE DICHJARAZIONE DI GHJESÙ NANT’À A FINE :

« Vighjate dunque, postu chì vo ùn sapete nè u ghjornu, nè l’ora » (MATTEU 25:13).

« State attenti, vighjate è pricate ; chì ùn sapete quandu ssu tempu vinarà » (MARCU 13:33).

Dunque, nimu sà di manera precisa quandu si passerà a fine di ssu mondu. A Bìbbia ampara solu chì Diu hà sceltu u mumentu, o ‘u ghjornu è l’ora’ precisu (Matteu 24:36). Vole dì ch’ùn ci hè manera di sapè quandu s’avvicinerà a fine ? Manc’appena ! Ghjesù hà dettu à i so discìpuli di stà attenti à unipochi d’eventi chì mustrerìanu chì a fine serìa vicina vicina.

U SEGNU

St’eventi serìanu u segnu chì u mondu si tròva in lu tempu di a so fine. Ghjesù hà predettu : « Una nazione si rizzarà contru à una nazione, è un regnu contru à un regnu, è ci sarà, in diversi lochi, carestie è trambusti di terra » (Matteu 24:3, 7). Hà ancu predettu « epidemìe » (Lucca 21:11, nwt-F). È voi, e vidite compiesi ste prufezìe ?

Oghje, l’umanità hè culpita da guerre, da famenere è trambusti di terra chì scèmpianu tuttu, è ancu da malatìe appiccicaticcie. Per esèmpiu, in lu 2004, un trambustu di terra maiò in oceanu Indianu hà caghjunatu un tsunami chì hà tombu 225 000 di ghjente. In più d’un annu, a pandemìa di Covid-19 hà fattu 2,6 millioni di morti in lu mondu. Ghjesù hà dettu chì st’eventi mustrerìanu chì a fine di stu mondu serìa vicina.

« L’ÙLTIMI GHJORNI »

A Bìbbia chjama u spàziu di tempu ghjustu nanz’à a fine di ssu mondu « l’ùltimi ghjorni » (2 Petru 3:3, 4). Dui Timuteu 3:1-5 dice chì l’ùltimi ghjorni serìanu marcati da una trafalata chjara di i valori murali (vede l’inquadratu « Ghjustu nanz’à a fine di stu mondu »). È voi, oghje, ne vidite ghjente chì ùn pènsanu chè à elli, ingordi, spietati è senza amore ? Ghjè un’antra prova chì a fine di ssu mondu hè vicina vicina.

Quantu tempu anu da piglià st’ùltimi ghjorni ? « Pocu tempu » dice a Bìbbia. Eppò dopu, Diu hà da ‘distrughje quelli chì sò in traccia di distrughje a terra’ (Apocàlisi 11:15-18, nwt-F ; 12:12).

FRÀ POCU U PARADISU NANT’À A TERRA !

Diu hà digià dicisu di u ghjornu è di l’ora per falla finì cù stu mondu gattivu (Matteu 24:36). È l’altra bona nutìzia, ghjè chì Diu vole « chì mancunu [umanu] perisca » (2 Petru 3:9). Iè, ellu hà a brama chì tutti stèssinu in vita à a fine di ssu mondu è campèssinu in lu so mondu novu, nant’à a una terra riaccunciata in paradisu. Eccu perchè ellu dà à tutti a pussibilità di seguità e so legge.

Ghjè per quessa ch’ellu hà messu in ballu un prugramma d’insignamentu mundiale affine d’amparà à a ghjente cume fà parte di l’umani chì camperanu in lu mondu novu, guvernatu da u so reame. Ghjesù hà dettu chì a bona nova di u reame di Diu serìa predicata « nant’à a terra sana » (Matteu 24:14, nwt-F). In lu 2019, in lu mondu interu, i Testimoni di Ghjehova anu passatu più di dui miliardi d’ore à predicà è insegnà u messaghju di speranza chì si trova ind’a Bìbbia. Ghjesù hà dettu chì sta campagna di predicazione serìa fatta dapertuttu nant’à a terra prima ch’ella ghjunghi a fine.

U tempu di a duminazione umana hè quasi finitu. Per furtuna, pudete sopravvive à a fine di stu mondu è campà in lu paradisu terrestru prumessu da Diu. L’artìculu chì seguita face vede ciò chì vi tocca à fà per campà indè stu mondu novu.