Cume a vostra famìglia pò esse felice ?

1. Perchè maritassi hè indispensèvule pè a felicità di a famìglia ?

E bone nutìzie vènenu da Ghjehova, u Diu beatu, chì vole chì e famìglie sìanu felice (1 Timuteu 1:11). Ghjè ellu chì hè à l’orìgine di u matrimòniu. U matrimòniu legale hè indispensèvule pè a felicità di a famìglia : dà un sentimentu di sicurezza à u còppiu è à i zitelli. I cristiani dèvenu rispettà e legge di u paese nant’à u registramentu di i matrimònii. — Leghje Lucca 2:1, 4, 5.

Cume Diu cunsidereghja u matrimòniu ? Per ellu, u matrimòniu unisce un omu è una donna pè a vita. Vole chì un maritu è a so mòglia sìanu fidi unu à l’altru (Ebrei 13:4). Òdia u divòrziu (Malàchia 2:16). Ma permette à u cristianu di divurzià è di rimaritassi sè u so maritu o a so mòglia l’hà traditu. — Leghje Matteu 19:3-6, 9.

2. Cume mòglia è maritu dèvenu trattassi tramindui ?

Mòglia è maritu anu tramindui a so parte à fà in u matrimòniu, è sse parte si cumplèttanu. Ghjè ciò chì Ghjehova hà privistu quand’ellu l’hà creati (Gènesi 2:18). Cum’ellu hè u capu di famìglia, u maritu hà rispunsabilità. Li tocca à sazià i bisogni di a so mòglia è di i so figlioli. È hà u duvere di parlalli di Diu è d’insegnalli. Deve dinù tene caru à a so mòglia è esse prontu à fà sacrifizii per ella. Una mòglia è un maritu dèvenu tènesi caru è rispettassi. Vistu chè tutti i mariti è tutte e mòglie fàcenu sbàgli, dèvenu amparà à perdunà. Ghjè unu di i secreti d’un matrimòniu felice. — Leghje 1 Curintini 11:3 ; Efesini 4:31, 32 ; 5:33 ; 1 Petru 3:7.

3. Lascerete cascà sè vo ùn site micca felice in matrimòniu ?

Sè u vostru còppiu và male, duvete fà tramindui assai sforzi per trattavvi cù amore (1 Curintini 13:4, 5). A Parolla di Diu ùn ricumanda micca di spiccassi per sciòglie i prublemi cummuni à u matrimòniu. — Leghje 1 Curintini 7:10-13.

4. Sè tù sì un zitellu o un ghjòvanu, chì vole Diu per tè ?

Ghjehova vole chì tù sìa felice. Ti dà i cunsigli i più boni chì sìanu per apprufittà di a to ghjuventù. Vole chì tù stessi à sente i to parenti, chì anu di più saviezza è sperienza cà tè (Culussesi 3:20). Vole dinù chì tù cunnuscissi a giòia di fà qualcosa per Ellu, u to Creatore, è pè u so Figliolu. — Leghje Ecclesiasta 12:1-3 ; Matteu 19:13-15 ; 21:15, 16.

5. Sè vo site un babbu o una mamma, chì vi tocca à fà perch’elli sìanu felici i vostri figlioli ?

Vi tocca à strazià per dà u manghjà, l’alloghju è u vestitu à i vostri figlioli (1 Timuteu 5:8). Ma perch’elli sìanu felici, duvete ancu amparalli à tene caru à Diu è à lasciassi insegnà da ellu (Efesini 6:4). Sè vo fate vede indè a vostra vita chè vo tenite caru à Diu, què pò avè un pesu maiò nant’à elli. È sè a struzzione chè vo li date s’appoghja nant’à a Bìbbia, tandu averà pesu nant’à a so manera di pensà. — Leghje Deuterònumu 6:4-7 ; Pruvèrbii 22:6.

Face un prò tamantu à i zitelli d’esse incuragiti è cumplimentati. I zitelli anu ancu bisognu d’esse accrianzati. Ssa furmazione serà una prutezzione : i francherà di fà certe cose chì l’impediscerìanu d’esse felici (Pruvèrbii 22:15). Ma quandu si disciplineghja i so figlioli, ùn ci vole à esse mai duri o crudeli. — Leghje Culussesi 3:21.

I Testimoni di Ghjehova anu publicatu unipochi di libri per aiutà i parenti è i zitelli. Sti libri s’appòghjanu nant’à a Bìbbia. — Leghje Salmu 19:8, 12.