Ch’hà da compie u reame di Diu ?

CIÒ CHÌ U REAME DI DIU HÀ DIGIÀ FATTU

Indè l’artìculu di nanzu, emu sviluppatu u segnu predettu da Ghjesù. Ssu segnu chì tuttu u mondu pò vede ghjè a prova chì u reame di Diu, guvernatu da Ghjesù Cristu, hè statu messu in piazza in celu.

A Bìbbia dice chì, quandu Ghjesù hà pigliatu a so càrica di Rè, hà messu fora di u celu à Satanassu è i so demònii. Dapoi, e so attività sò cunfinate à a terra. Ghjè una di e ragiò chì face chì, dapoi u 1914, l’affari s’impeghjurìscenu tantu (Apocàlisi 12:7, 9).

Ancu sè e cundizione mundiale impeghjurìscenu, Ghjesù, ind’a so càrica di Rè di u reame di Diu, travàglia à prò di l’umani. Gràzia à l’òpera mundiale d’insignamentu bìblicu ch’ellu avìa predettu, assai scòprenu i princìpii di a Bìbbia è i mèttenu in pràtica ogni ghjornu (Esàia 2:2-4). Ssi princìpii aiùtanu milioni di ghjente à fà sòiu un parè misuratu nant’à u travàgliu, à esse più felice in famìglia, gode e cose materiale senza diventanne schiavu. Ampàranu à campà megliu oghje è divèntanu ghjente chì Diu vole cum’è citadini di u so reame.

CIÒ CHÌ U REAME DI DIU HÀ DA COMPIE DOPU

Ancu sè Ghjesù guverna digià in celu, sò sempre omi chì guvèrnanu a terra. Eppuru, Diu hà datu st’òrdine à Ghjesù : « Dumineghja à mezu à i to nimici ! » (Salmu 110:2). Frà pocu, Ghjesù hà da stirpà tutti l’uppunanti à u reame, ciò chì purterà cunfortu à l’umani chì stanu à sente di core à Diu.

Per fà què, eccu ciò ch’hà da fà u reame di Diu :

• Hà da fà smarì ogni farza religione. E religione chì anu amparatu bugìe nant’à Diu è chì anu fattu strazià a ghjente ùn seranu più. A Bìbbia paraguneghja l’inseme di e farze religione à una prustituita. A so smarita hà da stunà ne parechji (Apocàlisi 17:15, 16).

• Hà da falla finì cù a duminazione di l’omi. U reame di Diu hà da mette fine à ogni duminazione umana (Apocàlisi 19:15, 17, 18).

• Hà da stirpà l’umani gattivi. Chì ne serà di i testardi chì cuntinuèghjanu à fà u male è chì ùn vòlenu stà à sente à Diu ? « Ma i gattivi saranu stirpati » (Pruvèrbii 2:22).

• Hà da stirpà à Satanassu è i demònii. Satanassu è i demònii ùn seranu più in capacità d’‘ingannà e nazione’ (Apocàlisi 20:3, 10, nwt-F).

Tandu cume serà a vita di i citadini di u reame di Diu ?

CIÒ CH’HÀ DA FÀ U REAME DI DIU PER L’UMANITÀ

À guvernà da u celu, Ghjesù hà da compie più affari chì un dirighjente umanu ùn hà mai pussutu compie. Centu quaranta quattru milla dirighjenti scelti trà mezu à l’umani li seranu sòcii per aiutallu (Apocàlisi 5:9, 10 ; 14:1, 3). Hà da mette in òpera a vuluntà di Diu custì, nant’à a terra. Chì benfatte u reame di Diu hà da arrecà à quelli chì càmpanu nant’à a terra ?

• Hà da stirpà a malatìa è a morte. « Nisun abitante dice : Sò malatu ! », è « a morte ùn esisterà più » (Esàia 33:24 ; Apocàlisi 21:4).

• Hà da assicurà una vera pace è una vera securità. « A pace di i to figlioli serà abbundante », è « staranu ognunu sottu à a so vigna è sottu à a so fica, è ùn ci sarà più nimu pè scumpiglialli » (Esàia 54:13, nwt-F ; Michea 4:4).

• Hà da rigalà à l’umani un travàgliu chì suddisface. « I mo eletti si gudaranu l’òpera di e so mani. Ùn travagliaranu micca indarnu » (Esàia 65:22, 23).

• Hà da scioglie i prublemi eculògichi. « U desertu è u paese dissiccatu saranu in la cuntintezza ; a sulitùdine si raligrarà, è fiurisciarà cum’è u narcisu » (Esàia 35:1).

• Hà da amparà à l’umani ciò ch’elli dèvenu fà per campà pè u sempre. « Orbè, a vita eterna, ghjè ch’elli ti cunnòscanu, tù, u solu veru Diu, è quellu chì tù hai mandatu, Ghjesù Cristu » (Ghjuvanni 17:3).

Diu vole chè vo gòdite sse benfatte (Esàia 48:18). L’artìculu chì seguita spiega ciò chè vo pudete fà avà per cunnosce st’avvene beatu.