Ciò chì tocc’à fà per campà in lu mondu novu

I primi artìculi anu mustratu chì da quì à pocu Diu hà da falla finì cù a sucetà currotta oghjinca è dunque cù tutti i castichi chì acciàccanu l’umanità. Què accaderà di sicuru. Perchè ? Perchè a Parolla di Diu, a Bìbbia, assicura chì :

« Stu mondu hè in traccia di smarì » (1 GHJUVANNI 2:17, nwt-F).

Pudemu esse dinù sicuri chì ci serà umani chì firmeranu in vita, perchè stu versettu bìblicu prumette chì :

« Quellu chì face a vulintà di Diu camperà per sempre. »

Tandu, à chì vole fermà in vita li tocc’à fà a vulintà di Diu. È per sapè qualessa hè a vulintà di Diu, prima ci vole à amparà à cunnosce à Diu.

SCAMPASSILA À « AMPARÀ À CUNNOSCE À DIU »

Seguita di fiure : 1) Ind’un ospidale, un’infirmiera ch’ùn ne pò più, hè à calapusà di stanchezza. 2) À a ripusata à a caffeterìa, ella rimarca chì una chì travàglia cun ella hè in traccia di leghje una rivista, boccarisa. 3) Quella chì travàglia cun ella li leghje un versettu bìblicu è li dà una carta di vìsita jw.org.

Ghjesù hà dettu : « a vita eterna ghjè què : ch’elli ampàrghinu à cunnosceti à tè, u solu veru Diu » (Ghjuvanni 17:3, nwt-F). Per scampassila à a fine di u mondu è campà in eternu, ci vole dunque à ‘amparà à cunnosce’ à Diu. Ùn basta micca solu di sapè ch’ellu esiste o di cunnosce certe cose nant’à ellu. Ci vole à diventà u so amicu. È cum’è per ogni amicìzia stretta, ci vole à piglià tempu per sviluppà a nostra amicìzia cun Diu. Stemu à vede certe verità bìbliche impurtantìssime chì ci aiuteranu à ligassi d’amicìzia cun Diu.

Verità chì a Bìbbia insegna

Diu avìa privistu ch’è no campèssimu in un paradisu.

Diu hà creatu i primi umani, Àdamu è Eva, è l’hà messi in un locu magnìficu, chjamatu « giardinu d’Èdene ». Eranu perfetti, è Diu li avìa rigalatu tuttu ciò ch’elli avìanu bisognu per esse beati. Pudìanu campà per sempre. Infatti, fintantu ch’elli sterìanu amichi cun Diu, ùn murerìanu micca. Ma anu sceltu di disubbidì à un òrdine sìmplice sìmplice di Diu.

U perchè di e nostre suffrenze.

Quandu Àdamu hà disubbiditu, hà persu a pussìbilità di campà per sempre per ellu stessu è dinù pè u restu di l’umanità. A Bìbbia spiega : « Perciò, cum’è per mezu d’un solu omu u piccatu hè intrutu in lu mondu, è pè u piccatu a morte, è chì cusì a morte s’hè stesa nantu à tutti l’omi » (Rumani 5:12). Di listessa manera chì si pò erede un difettu o una malatìa da i so parenti, tutti i figlioli d’Àdamu anu avutu in làscita l’imperfezzione. U fruttu di sta làscita : s’invechja è si more.

Ciò chì Diu hà digià fattu per noi.

A Bìbbia dice : « Diu hà tantu amatu u mondu ch’ellu hà datu u so Figliolu ùnicu, affinchì chiunque crede in ellu ùn perisca, ma ch’ellu àbbia a vita eterna » (Ghjuvanni 3:16). Iè, Diu hà mandatu à Ghjesù nant’à a terra per ch’ellu dessi a so vita per noi. Prabhakar, un Indianu di 86 anni, dichjara : « [Sta prova d’amore] mi face vede sin’à chì puntu Ghjehovaa mi tene caru. Gràzia à st’amore, aghju a speranza di campà in eternu. »

Cume sprimà a nostra ricunniscenza à Diu per sta prova d’amore.

A Bìbbia ampara ch’è no mustremu a nostra ricunniscenza à Diu pè a so prova d’amore, à ubbidì à i so cummandamenti (1 Ghjuvanni 2:3). Cù amore, Ghjehova Diu c’indetta ciò chì ci tocc’à fà per cunnosce digià oghje una vita felice (Esàia 48:17, 18). Ùn vole micca chì l’umani tribulèghjinu. Prumette chì, s’è no seguitemu i so cunsìglii, oghje digià seremu felici eppò in più averemu a pussibilità di campà per sempre.

LIGHJITE A PAROLLA DI DIU, A BÌBBIA, TUTTI I GHJORNI

Allora ch’ella hè in traccia di manghjà fora, l’infirmiera fideghja u celu dop’avè lettu a Bìbbia. — Per scampassila à a fine di stu mondu, prigate à Diu d’aiutavvi è fate ciò chì l’aggarba.

Per stà in vita, manghjemu tutti i ghjorni. Ma Ghjesù hà dettu : « L’omu ùn camperà micca solu di pane, ma d’ogni parolla chì esce da a bocca di Ghjehova » (Matteu 4:4, nwt-F).

Oghje, e parolle di Ghjehova sò indè e pàgine di a Bìbbia. À studià stu libru sacru, scuprerete verità capitale tucchendu e relazione trà Diu è l’umanità, e relazione di eri, di oghje, è quelle da vene.

PRIGATE À DIU CH’ELLU V’AIUTI

È s’è vo vulete seguità i cunsìglii di Diu ma chì ùn ci la fate micca à cappià vezzi chì ùn li piàcenu, chì pudete fà ? Indè stu casu quì, amparà à cunnosce à Diu vi pò esse d’un aiutu speziale.

Una donna, ch’è no chjameremu Sakura, era una donna di gattiva vita. À studià a Bìbbia, hà scupertu stu cummandamentu di Diu : « Fughjite l’immuralità sessuale » (1 Curintini 6:18, nwt-F). Tandu, Sakura s’hè messa à prigà à Diu ch’ellu li dessi forza, è què l’hà aiutata à cappià sti vezzi. Ma li tocca sempre à scumbatte certe tentazione. Ella dice : « Quandu mi vènenu in capu cose immurale, ne parlu cù franchezza ind’a prighera à Ghjehova, chì a sò chì, sola, ùn sò micca capace di scumbatte. A putenza di a prighera m’hà permessu d’esse più vicin’à Ghjehova. » Cum’è Sakura, millioni di ghjente ampàranu à cunnosce à Diu. È Diu li dà a forza di fà i scambiamenti chì ci vole per campà d’una manera chì l’aggarba (Filippesi 4:13).

Più amparerete à cunnosce à Diu, più serete ‘cunnisciuti da Diu’ è più a vostra amicìzia cun ellu serà stretta (Galatesi 4:9 ; Salmu 25:14). Ùn hè chè cusì chì puderete scampavvila à a fine di stu mondu è entre in lu mondu novu di Diu. Ma, ssu mondu novu, à cosa s’assumiglierà ? Ghjè ciò chì spiega l’artìculu chì vene.

a Ghjehova hè u nome di Diu rivelatu ind’a Bìbbia.