EN LEMONN DAN BOULVERS

1 | Protez ou lasante

AKOZ I ENPORTAN

Bann sityasyon vreman difisil oubyen en dezas i kapab afekte lasante dimoun dan plizyer fason.

Sa bann problenm i fer dimoun strese e si zot kontinyen strese sa i kapab fer zot malad souvan.
Bann dezas, pandemi ek lezot problenm ankor i kapab fer li difisil pour bann lopital pran swen avek sa kantite dimoun an menm tan e i kapab napa ase latizann.
Sa bann sityasyon i kapab fer li difisil pour dimoun aste bann keksoz ki zot vreman bezwen parey manze ek latizann.

Sa ki ou devret konnen

Bann maladi grav ek stres i kapab fer ou fer bann move desizyon. Sa i kapab anpes ou fer bann bon keksoz pour ou lasante e fer ou pli malad.
Si ou pa pran ka avek sa bann problenm, ou lasante i kapab vin pli pir e ou menm kapab perdi ou lavi.
Si ou reste an bonn sante, ou pou pli byen kapab fer bann bon desizyon ler i annan bann boulvers.
Menm si ou ris oubyen pov, ou kapab fer keksoz pour protez ou lasante.

Sa ki ou kapab fer la konmela

En dimoun ki saz i vwar bann danze ki kapab arive e i fer sa ki i kapab pour evit sa bann danze. Sa i kapab aplik pour ou lasante. Souvandfwa, ou kapab evit bann maladi oubyen anpese ki sa bann maladi i vin pli grav ler ou gard ou lekor ek ou lakour prop. Prevansyon i pli bon ki gerizon.

“Ler mwan ek mon madanm, nou gard nou lakour ek nou lekor prop, nou pa depans bokou larzan pour al kot dokter e pour aste latizann.”—Andreas.a

a Serten non dan sa magazin in sanze.

KI OU KAPAB FER? Sizesyon

Ler i annan boulvers, protez ou lasante e fer sa bann keksoz

ANNAN EN BON LIZYENN

Annan en bon lizyenn

Labib i dir: “En dimoun ki pridan i al kasyet ler i vwar danze.” (Proverb 22:3) Esey prepar davans e evit bann keksoz ki kapab met ou lasante an danze.

Lav ou lanmen souvan avek delo ek savon espesyalman avan ki ou tous manze oubyen ler ou sorti dan kabinen.
Netway e dezenfekte ou lakaz regilyerman, sirtou bann sirfas ek lobze ki souvan ganny touse.
Otan ki posib, evite ganny kontak avek dimoun ki annan en maladi ki atrape.

ANNAN EN BON LADYET

Annan en bon ladyet

Labib i dir: “Napa en zonm ki’n deza ay son prop lekor, me i nouri li e pran swen avek li.” (Efezyen 5:29) Nou montre ki nou kontan nou lekor ler nou vey sa ki nou met dan nou lekor.

Bwar bokou delo.
Manz diferan kalite fri ek legim.
Pa manz bokou lagres, disel ek disik.
Pa servi sigaret, bwar tro bokou ouswa servi drog.

“Mwan ek mon madanm, nou esey annan en bon ladyet pour evite ki nou malad, sinon nou pou depans tou nou pti larzan pour pey dokter ek latizann. Nou prefere servi nou larzan pour aste bann keksoz ki bon pour nou lasante.”—Carlos.

FER LEGZERSIS E DORMI BYEN

Fer legzersis

Labib i dir: “I pli bon si en dimoun i repoz en ptigin dan plas ki i travay dir e i tay deryer divan.” (Eklezyast 4:6) Nou bezwen travay me nou osi bezwen repoze.

Reste aktif fizikman. Ou kapab konmans par fer en pti marse toulezour. Legzersis i kapab amelyor ou lasante menm si ou aze, annan dezabilite oubyen annan en maladi kronik.
Dormi byen

Dormi byen. Si ou pa dormi byen, ou pou vin pli strese e ou pou annan mwens konsantrasyon. Avek letan, ou kapab ganny bann problenm lasante ki pli grav.
Swazir en ler pour ou dormi. Esey al dormi e lev menm ler toulezour.
Evite get televizyon oubyen servi bann lekipman elektronik lo lili.
Evite manz bokou, servi bann keksoz ki annan kafein e bwar lalkol avan ou al dormi.

“Mon vwar ki dormi i annan en lefe lo mon lasante. Si mon pa dormi byen, parfwa mon latet ek mon lekor i fermal. Me ler mon dormi byen, mon santi mwan byen e mon pare pour fer nenport keksoz ki mon bezwen fer! Mon annan en kantite lenerzi e mon pa malad souvan.”—Justin.