Mars

Bann frer Yifta ti fors li pour kit sa pei ki legalman ti pour li akoz zot ti zalou li e ay li. (Ziz 11:1-3) Me ler bann ansyen sa nasyon ti sipliy li pour vin ed zot, i ti al deswit. (Ziz 11:4-11) Lager pour defann non Zeova ek son pep ti pas avan santiman Yifta. I ti determinen pour reste fidel avek Zeova. Sa latitid ki Yifta ti demontre, ti fer li ek bann Izraelit ganny benediksyon Zeova. (Ebr. 11:32, 33) Ki nou aprann avek legzanp Yifta? Ki nou pou fer si nou bann frer ek ser i fer en keksoz ki nou pa ti pe ekspekte oubyen nou santi ki zot tret nou dan en fason ki nou pa kontan? Nou pa devret les nou santiman anpes nou servi Zeova. Pa zanmen aret al renyon oubyen aret pas letan avek bann dan kongregasyon. Annou imit Yifta e obei Zeova. Sa pou ed nou sirmont bann sityasyon difisil e nou osi nou pou kapab vin en bon legzanp.​—Rom. 12:20, 21; Kol. 3:13. w16.04 1:7, 9, 10

Nou bezwen andire ziska lafen, pa zis pour en serten letan. Meton en bato pe koule. Pour sirviv, bann pasaze i bezwen naze ziska lo lans. Sa dimoun ki abandonnen ler i konmans naze pou noye. Sa enn ki abandonnen zis avan i ariv lo lans osi pou noye. Alor si nou anvi viv dan nouvo lemonn, nou bezwen kontinyen andire. Annou annan menm latitid ki zapot Pol ki ti dir: “Nou pa perdi kouraz.” (2 Kor. 4:16) Parey Pol, nou asire ki Zeova pou ed nou andire ziska lafen. Pol ti ekri dan Romen 8:37-39: “Nou sorti avek laviktwar konplet par sa enn ki’n kontan nou. Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, ni okenn pisans, ni bann zabitan dan lemonn ki anler, ni dan lemonn ki anba, ni okenn lezot kreatir pa pou zanmen kapab separ nou avek lanmour Bondye dan Kris-Zezi nou Senyer.” w16.04 2:17, 18

Demann Zeova lasazes pour rekonnet en sityasyon ki kapab fer li difisil pour kontinyen pa pran kote. Demann li pour osi ed ou fer sa ki byen dan sa sityasyon. Ou kapab ganny met dan prizon ouswa ganny pini dan lezot fason akoz ou fidelite avek Zeova. Si sa i arive, priye pour ganny kouraz pour ki ou kapab eksplik avek lezot dan en fason kler akoz ou pa pran kote. Ou kapab asire ki Zeova pou ed ou andire. (Akt 4:27-31) Zeova in donn nou Labib pour donn nou plis lafors. Medit lo bann verse ki pou ed ou pour kontinyen pa pran kote. Esey aprann sa bann verse e rapel zot, parski zot pou itil si en zour ou napa ou Labib avek ou. Labib i osi kapab ranforsi ou lespwar dan sa ki Bondye in dir pour lavenir. Nou bezwen sa lespwar pour andir persekisyon. (Rom. 8:25) Swazir bann verse ki dekrir bann keksoz ki ou ti pou vreman kontan dan nouvo lemonn e imazin ou laba. w16.04 4:14, 15

Bann sef relizye ki pretann ki zot Kretyen pa pe anons Rwayonm Bondye. Par kont, ler zot koz lo Rwayonm Bondye zot dir ki i zis en santiman dan leker en dimoun. (Lik 17:21) Zot pa ansenny bann dimoun ki sa Rwayonm i en gouvernman ki dan lesyel e ki Zezi pe dirize dan sa Rwayonm. O kontrer, zot koz lo Zezi zour Nwel oubyen Pak. Zot pa dir ki Rwayonm pou rezourd tou problenm limanite e ki byento i pou elimin tou move keksoz lo later. (Rev. 19:11-21) I kler ki bann sef relizye ki pretann ki zot Kretyen pa konnen ki Zezi pou fer konman Lerwa sa Rwayonm Bondye. Zot pa konpran akoz zot devret anons sa mesaz. Bann disip Zezi pa devret anons sa bon nouvel pour fer larzan oubyen pour konstri bann batiman enpresyonan. Alor, travay pour anons sa bon nouvel pa en biznes. (2 Kor. 2:17) Bann disip Zezi pa devret demann en lapey pour sa travay ki zot fer.​—Akt 20:33-35. w16.05 2:7, 8

Meton ou vreman kontan en kalite fason sanze, me ou konnen ki si ou met sa kalite lenz, sa i kapab ofans serten dan kongregasyon. Labib pa dir nanryen lo sa kalite lenz ki ou kontan. Alor, ki mannyer ou kapab konn sa ki Zeova i panse? Labib i dir nou: “Ki bann fanm i abiy zot dan en fason desan, diny e senp. Pa bezwen ki zot orn zot seve avek bizou annor, oubyen perl ek labiyman byen ser. O kontrer, ki zot ganny admire pour zot bann bon aksyon, ki apropriye delapar bann fanm ki annan respe pour Bondye.” (1 Tim. 2:9, 10) Byensir, tou serviter Zeova, enkli bann zonm, i kapab aprann en leson avek sa konsey. Ler nou modes, nou mazin lo sa ki lezot i kapab panse lo bann lenz ki nou swazir pour mete. Vi ki nou kontan nou bann frer ek ser, nou pou evite trouble ouswa ofans zot.​—1 Kor. 10:23; Fili. 3:17. w16.05 3:14

Ler Adan ti rebel kont son Kreater, i ti nepli en garson Bondye. Me en kantite desandans Adan in swazir Zeova konman zot Dirizan. (Ebr. 12:1) Akoz zot annan limilite, zot obei zot Kreater e sa i montre ki zot anvi li konman zot Papa ek Potye e non pa Satan. (Zan 8:44) Zot fidelite anver Bondye i fer nou rapel sa ki nou teks i dir ozordi. Ozordi, bann vre adorater Zeova i fer zot mye pour devlop limilite ek lobeisans. Pour zot, i en loner pour apel Zeova zot Papa e zot anvi li konman zot Potye. Eski nou anvi vin sa larzil mou ki fasil pour Bondye fasonnen pour vin en resipyan presye? Eski nou vwar sakenn nou bann frer ek ser konman bann dimoun ki ankor pe ganny formen parey larzil ki Bondye pe fasonnen? w16.06 1:2, 3

Nou tre pros avek nouvo lemonn e nou lafwa pe ganny teste. Alor nou bezwen egzaminen ki kalite lafwa nou annan. Ki mannyer nou kapab fer sir ki nou lafwa i for? Nou kapab egzamin parol Zezi ki dan Matye 6:33. Demann ou lekor: ‘Eski mon bann lobzektif ek mon bann desizyon i montre ki mon krwar dan parol Zezi? Eski mon pou mank renyon ouswa predikasyon pour mwan fer plis larzan? Ki mon pou fer si mon travay i demann plis mon letan ek lenerzi? Eski mon pou les sa lemonn fasonn mwan e menm fer mwan aret servi Zeova?’ Si nou pa ekout sa ki Labib i dir konsernan move frekantasyon, ganny ekskli ek divertisman, nou leker i kapab vin dir. Ki ou devret fer si sa i konmans ariv avek ou? Deswit ou devret egzamin ou lafwa! Reste onnet avek ou lekor e regilyerman servi Parol Bondye pour koriz ou fason panse. w16.06 2:8, 9

Lo later antye, i annan en lorganizasyon ki son dimoun i kontan e anvi servi Zeova. Sa bann dimoun i Temwen Zeova. Menm si zot annan defo e fer fot, Zeova i gid son pep avek son lespri sen. An 1914, ti napa bokou dimoun ki ti ador Zeova. Me Zeova in beni sa travay predikasyon. Sa in fer ki plizyer milyon dimoun in aprann laverite sorti dan Labib e vin Temwen Zeova. Zeova in dekrir sa gran logmantasyon ler i ti dir sa parol ki dan teks pour ozordi. Apre i ti azoute: “Mwan [Zeova] mon pa pou tarde pour realiz tousala dan son letan.” Ozordi nou kapab vwar klerman ki sa profesi in ganny akonplir. Pep Zeova i parey en gran nasyon. Anfet, i annan plizyer nasyon dan lemonn ki son popilasyon i mwens ki pep Zeova. w16.06 4:1, 2

Zezi ti napa okenn dout ki si son Papa i pran swen avek bann zwazo, i pou osi pran swen avek bann imen. (1 Pyer 5:6, 7) Byensir, parey bann zwazo, nou pa devret pares. Pour nou ganny nou manze, nou bezwen swa kiltiv later ouswa rod en travay pour ganny ase larzan pour aste manze. Zeova i kapab beni nou zefor. Menm ler nou napa ase larzan oubyen manze, i ankor kapab donn nou sa ki nou bezwen. Par egzanp, lezot i kapab partaz sa ki zot annan avek nou. Zeova i osi donn bann zwazo en landrwa reste. I’n donn zot sa abilite pour fer nik e i’n fer bann keksoz ki zwazo i servi pour fer zot nik. Pareyman, Zeova i kapab ed nou ek nou fanmir ganny en landrwa reste. Apre ki Zezi ti’n dir sa bann parol ki dan teks pour ozordi, i tre probab ki Zezi ti pe mazinen ki byento i ti pe al donn son lavi pour bann imen. (Konpar Lik 12:6, 7.) Wi, Zezi pa ti mor pour bann zwazo ek lezot zannimo. I ti mor pour ki nou viv pour touzour.​—Mat. 20:28. w16.07 1:11-13

Akoz nou komet pese e nou mor? Labib i dir ki “akoz sa sel zonm, lanmor in pran pouvwar.” Alor, vi ki nou desandans Adan nou enparfe e nou mor. (Rom. 5:12, 14, 17) Par kont, nou ankor kapab swazir pour pa les pese domin oubyen kontrol nou. Ki mannyer sa i posib? Ler nou demontre lafwa dan sakrifis Zezi, nou ganny bann byenfe gras a labonte ekstraordiner Zeova. (Rom. 5:20, 21) Menm si nou ankor peser, nou pa bezwen les pese domin nou. Alor ler nou fer en keksoz mal, nou demann Zeova pour pardonn nou. Alor, ki mannyer nou kapab benefisye avek labonte ekstraordiner Bondye? Pol ti dir: “Sa labonte ekstraordiner Bondye i . . . osi form nou pour viv dan en fason drwat, avek bon zizman ek devosyon pour Bondye dan sa lemonn, konmela.”​—Tit 2:11, 12. w16.07 3:5, 6

Sa premye maryaz pa ti reisi akoz Adan ek Ev ti dezobei Zeova. “Sa premye serpan,” Satan oubyen Dyab, ti anbet Ev par dir li ki si i manz sa fri ki ti lo “pye ki donn konnesans lebyen ek lemal” i ti pou ganny en konnesans spesyal. Satan ti dir ki si Ev ti manz sa fri, sa ti pou permet li deside kwa ki byen e kwa ki mal. Ev ti montre en mank respe pour Adan konman sef fanmir, ler i ti deside manz sa fri san koz avek Adan avan. Adan ti dezobei Bondye ler i ti aksepte sa fri ki son madanm ti donn li. (Rev. 12:9; Zen. 2:9, 16, 17; 3:1-6) Ler Zeova ti kestyonn zot, Adan ti blanm son madanm. Ev li, i ti blanm sa serpan ki ti’n anbet li. (Zen. 3:12, 13) Adan ek Ev ti napa okenn leskiz pour zot dezobeisans e Zeova ti ziz sa bann rebel. Anfet, zot legzanp i en lavertisman pour nou! Pour ki maryaz i reisi, msye ek madanm i bezwen obei Zeova e pran responsabilite pour zot prop aksyon. w16.08 1:1, 4, 5

Akoz serten koup i eksperyans bann problenm grav? Pour serten, zot maryaz i pa sa ki zot ti pe ekspekte, alor zot dezapwente oubyen ankoler. Souvan bann problenm i akoz bann diferans dan lafason ki bann dimoun in ganny elve oubyen dan lafason ki zot reakte emosyonnelman. Bann difikilte avek paran bann konzwen, ouswa bann dezakor lo ki mannyer pour depans larzan e ki mannyer pour elve zanfan i osi kree bann problenm. Par kont, i bon pour vwar ki laplipar koup i kapab trouv solisyon pour zot problenm akoz zot in les Bondye gid zot. Ler i annan bann problenm grav, bann koup i devret demann bann ansyen led. Sa bann zonm i annan leksperyans e zot kapab ed bann koup pour aplik bann konsey Bondye dan zot lavi. Deplis, ler bann konzwen i demann Zeova son lespri sen, sa i kapab ed zot pour aplik bann prensip Labib e demontre bann kalite Kretyen.​—Gal. 5:22, 23. w16.08 2:11-13

Zezi ti vreman okipe. Me ler dimoun ti pare pour ekout li i ti pas letan avek zot e ansenny zot bokou keksoz. Par egzanp, en zour en lafoul dimoun ti zwenn o bor lanmer pour ekout Zezi. Alor Zezi ti anbark dan en bato avek Pyer e konmans ansenny zot. Apre sa, i ti anvi ansenny Pyer osi en leson. Zezi ti fer en mirak par fer Pyer atrap en kantite pwason. Apre i ti dir Pyer sa parol ki dan teks pour ozordi. Deswit Pyer ek lezot ti “anmenn zot kannot ater, zot ti kit tou” e swiv Zezi. (Lik 5:1-11) Nikodenm osi ti anvi aprann plis avek Zezi. Me vi ki Nikodenm ti en manm Sannedren, i ti per sa ki lezot ti pou dir si zot ti vwar li pe koz avek Zezi. Alor i ti al kot Zezi aswar. Zezi pa ti fer li ale, me o kontrer i ti pas letan avek li e eksplik li bann laverite enportan. (Zan 3:1, 2) Zezi ti toultan pare pour servi son letan pour ansenny dimoun laverite e fortifye zot lafwa. Dan menm fason, nou osi nou bezwen pare pour vizit dimoun dan en letan ki apropriye pour zot e nou bezwen pas letan avek zot pour ed zot konpran Labib. w16.08 4:10, 11

Dan en fason modes nou rekonnet ki Zeova i pir, sen e ki son bann standar i sa pli bon gidans pour nou. Si nou anvi vin en dimoun ki modes e annan limilite, nou pou aplik son bann standar dan nou lavi. Si nou modes nou pou osi respekte santiman ek lopinyon lezot. Nou fason sanze i devret montre klerman ki nou bann serviter Zeova. Bann standar Zeova i o e nou kontan pour swiv zot. An zeneral, nou bann frer ek ser i merite ganny felisite pour zot laparans ek bon kondwit. Zot atir bann dimoun senser pour ekout sa mesaz ki sov lavi ki dan Labib e ki anmenn laglwar ek lazwa pour Zeova. w16.09 3:18-20

Zakob ti vreman determinen e i ti prouve ki i ti pou travay dir pour ganny en benediksyon! (Zen. 32:24-26) Zeova ti beni Zakob pour son perseverans e donn li sa non Izrael, ki vedir rival oubyen en dimoun ki “lite kont Bondye.” Zakob ti ganny laprouvasyon ek benediksyon Zeova e sa i sa menm rekonpans ki nou osi nou pe rode. Rasel, madanm Zakob, ti enpasyan pour vwar ki mannyer Zeova ti pou gard son promes avek Zakob konsernan son desandans. Me Rasel pa ti’n zanmen kapab fer zanfan e sa ti en keksoz ki ti vreman fer bann madanm soufer dan letan Labib. Ki mannyer Rasel ti kontinyen lalit malgre son sityasyon dekourazan? I pa ti zanmen perdi lespwar. O kontrer, i ti kontinyen lalit par priy Zeova en kantite. Zeova ti tann son lapriyer senser e Rasel ti santi ki Zeova ti’n beni li ler i ti finalman kapab fer zanfan.​—Zen. 30:8, 20-24. w16.09 2:6, 7

I enportan ansenny ou zanfan ki i pou pli ere ler i obei sa ki Labib i dir. (Ps. 1:1-3) Par egzanp, ou kapab demann ou zanfan pour mazinen ki i pe al reste lo en zil. I pou bezwen swazir serten dimoun pour al reste avek li laba. Apre ou kapab demann li ki kalite dimoun i ti pou anmenn avek li si i ti anvi ki tou dimoun i byen avek kanmarad. Finalman, ou kapab lir Galat 5:19-23 pour vwar ki kalite dimoun Zeova i anvi dan nouvo lemonn. Dan sa fason, ou kapab ansenny ou zanfan de leson enportan. Premyerman, Zeova pe ansenny nou ki mannyer pour viv en lavi ere konmela menm e pour viv anpe avek lezot dimoun. Dezyenmman, Zeova pe ansenny nou ki mannyer pour viv dan sa nouvo lemonn. (Iza. 54:13; Zan 17:3) Ou osi kapab montre ou zanfan ki mannyer Labib in ed lezot frer. Par egzanp, rod en biografi dan enn nou bann piblikasyon petet dan sa seri “Labib i sanz lavi” dan Latour Veyer. w16.09 5:13, 14

Menm si nou kapab vreman okipe, nou tou nou bezwen fer letan pour fer letid personnel ek ladorasyon fanmir. (Efe. 5:15) Nou lobzektif i pa zis pour lir en kantite oubyen prepar en komanter pour renyon. O kontrer, nou lobzektif i pour permet parol Bondye annan en lefe lo nou e fortifye nou lafwa. Nou bezwen annan en bon balans. Ler nou etidye, nou pa devret zis mazin bezwen lezot me osi nou prop bezwen. (Fili. 1:9, 10) Nou devret rekonnet ki ler nou prepare pour al predikasyon, pour al renyon oubyen pou fer diskour i kapab pa fasil aplik sa ki nou pe lir pour nou menm. Par egzanp, menm si en kwizinyen i bezwen gout manze avan i donn lezot, sa ki i’n goute i tro ptigin pour li viv lo la. Si i anvi reste an bonn sante, i bezwen regilyerman prepar bann bon manze pour li menm. Pareyman, si nou anvi fortifye nou relasyon avek Zeova, nou bezwen etidye Labib regilyerman. Sa bann letid o profon pou donn nou tou sa ki nou bezwen. w16.10 2:10, 11

Ebre 11:1 i dekrir lafwa. (1) Lafwa i “ler nou asire ki sa ki nou pe espere” pou vin vre. Bann keksoz ki nou pe espere i enkli bann promes Bondye konsernan lavenir. Par egzanp, nou asire ki bann move keksoz pou disparet e i pou annan en nouvo lemonn. (2) Lafwa i “sertitid” oubyen levidans konkret “dan keksoz ki nou pa war.” Nou konnen ki Zeova, Zezi Kri, bann lanz e sa Rwayonm ki dan lesyel i egziste kantmenm nou pa vwar zot. Ki mannyer nou kapab demontre ki nou vreman annan lafwa dan bann promes Bondye e bann keksoz ki nou pa vwar? Nou fer sa par nou fason viv e par sa ki nou dir e sa ki nou fer. w16.10 4:6

Ler nou fer sa, nou pe imit Zeova ek Zezi. Sa ki nou fer i annan en gran valer pour zot, menm si nou pa kapab fer otan ki nou ti a voudre. (Lik 21:1-4; 2 Kor. 8:12) Par egzanp, nou konnen ki i demann bokou zefor pour nou bann aze vin renyon e prese regilyerman. Eski nou ankouraz e felisit zot pour tou sa ki zot fer? Ankouraz lezot otan ki nou kapab. Ler ou vwar en dimoun fer en bon keksoz, fer sir ki ou felisit li. Ler Pol ek Barnabas ti Antyos, Pisidi, bann sef sinagog ti dir zot: “Bann frer, si zot annan okenn keksoz pour dir pour ankouraz nou, koze.” Pol ti servi sa loportinite pour ankouraz bann dimoun. (Akt 13:13-16, 42-44) Ler nou ankouraz lezot, i tre probab ki lezot pou ankouraz nou osi.​—Lik 6:38. w16.11 1:3, 15, 16

Pa i en gran loner pour form parti lorganizasyon Zeova e pour konn sa ki i ekspekte nou fer! Byensir, si nou konn sa ki fer plezir Bondye, nou annan sa responsabilite pour obei li e fer sa ki byen. Menm si bokou dimoun i kontan fer sa ki move, nou devret “deteste lemal,” parey Zeova i fer. (Ps. 97:10) Nou pa devret zanmen vin parey bann ki krwar sa ki “byen [i] mal e sa ki mal, byen.” (Iza. 5:20) Nou anvi fer plezir Zeova, alor nou determinen pour reste pir dan tou fason. (1 Kor. 6:9-11) Sa ki Zeova i dir nou dan Labib i pour nou prop dibyen. Nou kontan li e nou anvi reste fidel avek li. Sa i akoz nou swiv son gidans kot lakour, dan kongregasyon, kot travay, kot lekol ouswa nenport landrwa nou kapab ete. w16.11 3:13

Bann etidyan Labib ti senser, me zot pa ti vreman konpran parol Zeova ki dir ki zot devret obei bann gouvernman. Sanmenm sa ki par ler, konman en group, zot ti pran kote pandan lager. Par egzanp, kan prezidan Leta-z-ini ti demann bann dimoun pour priy pour lape le 30 Me 1918, Latour Veyer ti ankouraz bann Etidyan Labib pour zot osi priye. Serten frer ti donn sipor finansyel pour lager e serten parmi zot ti vin bann solda e al lager. Menm si zot ti bezwen fer serten azisteman, i pa ti pou byen pour mazinen ki sa i rezon ki zot ti ganny anmennen an egzil dan Gran Babilonn. Anfet, zot ti’n preski separ konpletman avek fo larelizyon pandan Premye Lager Mondyal.​—Lik 12:47, 48. w16.11 5:9

Akoz Pol ti averti bann Kretyen swazir kont viv “dapre lekor enparfe”? Akoz bann Kretyen i bezwen ganny sa lavertisman ozordi? Parski nenport serviter fidel Bondye i kapab konmans fer son prop dezir vin sa keksoz pli enportan dan son lavi. Par egzanp, Pol ti ekri ki serten bann frer Ronm ti bann lesklav “zot move dezir.” I kapab ki Pol ti pe koz lo relasyon seksyel, manze oubyen lezot plezir ki ti sa keksoz pli enportan dan zot lavi. (Rom. 16:17, 18; Fili. 3:18, 19; Zid 4, 8, 12) An plis ki sa, pour en serten letan, i ti annan en sityasyon dan kongregasyon kot en zonm ti annan relasyon seksyel “avek madanm son papa.” (1 Kor. 5:1) I kler alor ki sa bann Kretyen dan premye syek ti bezwen lavertisman Pol konsernan viv “dapre lekor enparfe.” (Rom. 8:5, 6) Sa lavertisman i osi aplikab ozordi. w16.12 2:5, 8, 9

En fason ou kapab ganny led ler ou pe trakase i par annan en konversasyon fran e onnet avek en dimoun ki ou annan konfyans ladan. Ou konzwen, en zanmi pros oubyen en ansyen dan kongregasyon i kapab ed ou konpran ou sityasyon pli byen. Labib i dir: “En proze pa reisi si nou pa demann konsey; me i reisi kan i annan bokou konseye.” (Prov. 15:22) Nou bann renyon kongregasyon i osi ede redwir nou bann traka. Dan renyon sak semenn, ou kapab pas letan avek ou bann frer ek ser ki enterese avek ou e oule ankouraz ou. (Ebr. 10:24, 25) Ler lezot i “ankouraz” ou, sa pou fortifye ou e fer li pli fasil pour ou fer fas avek traka.​—Rom. 1:12. w16.12 3:17, 18

Ler nou annan bann problenm lasante ek lezot difikilte ki an deor nou kontrol, nou devret larg nou traka lo Zeova e annan konfyans ki i pou pran swen avek nou. (1 Pyer 5:6, 7) Nou devret osi fer tou sa ki nou kapab pour benefisye atraver bann renyon Kretyen e avek lezot progranm lansennyman ki lorganizasyon Zeova i donnen. (Ebr. 10:24, 25) Ki nou kapab dir lo bann paran ki zot zanfan in aret servi Zeova? Profet Samyel pa ti kapab fors son bann garson ki ti’n vin adilt pour reste fidel avek Bondye. (1 Sam. 8:1-3) I ti bezwen les sa dan lanmen Zeova. Par kont, Samyel ti fer tou sa ki i ti kapab pour reste fidel avek Bondye e fer plezir son Papa ki dan lesyel. (Prov. 27:11) Ozordi, bokou paran Kretyen i dan menm sityasyon parey Samyel. Zot annan konfyans ki Zeova i toultan pare pour akey bann ki repantir. (Lik 15:20) Antretan, bann paran i kapab konsantre lo reste fidel avek Zeova e annan sa lespwar ki zot legzanp pou motiv zot zanfan pour retourn kot Zeova. w17.01 1:15, 16

Normalman, en dimoun ki annan limilite i osi en dimoun modes. I rekonnet ki i annan son limit e avek limilite i admet ler i annan tor. I pare pour ekout nide lezot dimoun e aprann avek zot. Zeova i vreman apresye en dimoun ki annan limilite. Labib i montre ki en dimoun modes i konnen ki kalite dimoun i ete e ki i rekonnet ki i annan serten keksoz ki i pa kapab fer oubyen i napa drwa fer. Sa i ed li pour respekte lezot e tret zot zantiman. Par kont, nou kapab konmans annan bann rezonnman arogan san ki nou realize. Ki mannyer sa i kapab arive? Nou kapab konmans santi ki nou pli enportan ki lezot akoz nou annan serten responsabilite dan kongregasyon ouswa akoz nou pros avek bann ki annan responsabilite. (Rom. 12:16) En lot fason ki sa i kapab arive, se ki nou konmans atir tro bokou latansyon lo nou menm. (1 Tim. 2:9, 10) Oubyen nou menm kapab konmans dir lezot sa ki zot devret ouswa pa devret fer.​—1 Kor. 4:6. w17.01 3:6-8

Ozordi, sa travay predikasyon i kontinyen ogmante e lorganizasyon Zeova pe servi teknolozi modern pour anons sa bon nouvel avek otan dimoun posib. Me parfwa bann frer ek ser aze i kapab vwar li difisil pour aprann bann nouvo fason fer keksoz. (Lik 5:39) An plis, i normal ki lafors ek lenerzi en dimoun i diminyen anmezir ki i antre dan laz. (Prov. 20:29) Alor, i fer sans ki bann ki pli aze i form bann zenn pour desarz plis responsabilite dan lorganizasyon Zeova. (Ps. 71:18) Par ler bann ki annan lotorite i vwar li difisil pour konfye serten travay oubyen responsabilite avek bann ki pli zenn. Serten frer i kapab sagren ler zot mazinen ki zot pe al perdi en responsabilite ki zot vreman kontan. Zot kapab tris pour aret sa travay spesyal ki zot kontan fer oubyen zot enkyet ki si zot pa pe diriz travay, sa travay pa pou ganny byen fer. Petet zot kapab santi ki zot napa ase letan pour form lezot. Pareyman, bann zenn i bezwen annan pasyans ler zot pa ganny plis responsabilite. w17.01 5:3, 4

Zeova ti transfer lavi Zezi, son premye garson spirityel lo later. (Zan 1:14) Alor Zezi ti vin en imen parfe, zis parey Adan. Me kontrerman avek Adan, Zezi ti swiv standar Zeova parey en zonm parfe ti ekspekte fer. Menm ler i ti ganny teste severman, Zezi pa ti zanmen kas okenn lalwa Bondye. Par mor konman en zonm parfe, Zezi ti kapab sov imen dan pese ek lanmor. I ti koresponn egzakteman avek tou sa ki Adan ti’n devret ete. Zezi ti en zonm parfe ki ti obeisan e fidel avek Bondye. (1 Tim. 2: 6) I ti mor pour nou e son sakrifis i donn tou zonm, madanm ek zanfan loportinite pour viv pour touzour. (Mat. 20:28) Ranson i sa keksoz prensipal dan lakonplisman plan Bondye.​—2 Kor. 1:19, 20. w17.02 1:15, 16

Meton ou pe dray ou loto tousel aswar. Dan milye semen, loto i tenny avek ou. Lavi i kapab parey sa vwayaz. Kekfwa ou bezwen pas par bann moman vreman difisil e ou santi ki sa bann problenm i tro bokou pour ou. Petet menm Zezi ti santi koumsa. Ler i ti lo poto martir, i ti ganny imilye e i ti dan en ta douler. Sa ti bezwen sa moman pli difisil dan son lavi! (Ebr. 12:3) Kwa ki ti ed li andire? Zezi ti konsantre lo rekonpans son landirans, sirtou, ki i ti pou ede sanktifye non Bondye e ede siport son drwa pour dirize. I ti konnen ki sa leprev pa ti pou dir pour lontan e ki son rekonpans dan lesyel ti pou dir pour touzour. Ozordi, bann leprev ki ou pas atraver i kapab afekte ou en kantite e fer ou soufer, me zis rapel ki zot pa pou dir pour touzour. w16.04 2:10

Ozordi bokou dimoun pa santi zot koupab ler zot fer pese, alor zot pa konpran akoz imen i bezwen en ranson. Bokou dimoun pa konnen ki savedir pese, ki lefe pese i annan lo nou e ki nou bezwen fer pour sorti anba lesklavaz pese. Ler zot konpran ki savedir pese, bann dimoun ki senser i kontan pour aprann ki Zeova in anvoy son garson lo later pour liber nou avek pese ek lanmor. Zeova i fer sa akoz son gran lanmour ek son labonte ekstraordiner. (1 Zan 4:9, 10) Sakrifis Zezi i en gran laprev ki Bondye i kontan nou e i demontre ki kantite I annan labonte ekstraordiner. Pa i rekonfortan pour konnen ki si nou demontre lafwa dan sakrifis Zezi, nou pese pou ganny pardonnen e nou pou annan en bon konsyans! (Ebr. 9:14) San dout sa i en bon nouvel pour anons avek lezot! w16.07 4:6, 7

Zeova i asir nou ki akoz nou annan lafwa dan ranson, nou pese i “ganny efase.” I kapab pardonn nou pese konpletman. (Akt 3:19-21) Ranson i fer li posib pour Zeova adopte serten imen pour vin son bann garson dan lesyel. Sa bann imen i bann Kretyen swazir. (Rom. 8:15-17) I envit “lezot mouton” pour form parti son fanmir ki pou viv lo later. Apre ki zot in vin parfe, i pou annan en test final. Si zot fidel avek li, i pou adopte zot osi konman son bann zanfan. (Rom. 8:20, 21; Rev. 20:7-9) Zeova pou toultan kontan tou son bann zanfan. Sa ranson pou kontinyen anmenn bann byenfe pour touzour. Zeova in donn nou sa kado presye ki personn pa pou kapab aras nou. w17.02 2:15, 16

Nou kapab annan en lanmitye avek Zeova e servi li. Toultan rapel ki mannyer ou ti vin zanmi Zeova. I ti konnen ki ou ti annan bann defo ek febles. Kantmenm sa, Zeova i ankor anvi ki ou vin son zanmi. Zeova in telman kontan nou ki i’n donn nou en kado presye. I ti anvoy son Garson, Zezi lo later pour ki i donn son lavi konman en ranson pour liber nou dan pese. (Zan 3:16) Ler nou fer en fot nou kapab demann Zeova pour pardonn nou. Vi ki i’n pey sa ranson, nou kapab asire ki i pou pardonn nou e ki nou pou reste son zanmi menm si nou enparfe!​—1 Tim. 1:15. w16.05 4:6, 7