Fevriye

Ki mannyer landirans i kapab “form” nou konpletman? I pou ed nou vin “san defo dan tou laspe e zot pa pou mank nanryen.” (Zak 1:4) Ler nou pas dan en leprev, nou remarke ki petet nou bezwen demontre plis pasyans, lapresyasyon ek lanmour. Anmezir ki nou andir sa leprev, nou pou aprann pour montre sa bann kalite plis ankor e dan sa fason nou pou amelyor nou personnalite Kretyen. Vi ki landirans i kapab fer nou vin en pli bon Kretyen, nou pa ti pou anvi kas lalwa Zeova zis pourvi ki sa leprev i arete. Par egzanp, si ou pe lalit avek bann panse imoral, pa bezwen les ou ganny tante! Demann Zeova pour ed ou rezet bann move panse. Oubyen, si en manm ou fanmir pe opoz ou, pa bes lebra! Reste determinen pour kontinyen servi Zeova. Pa oubliye, ki pour ganny laprouvasyon Bondye, nou bezwen andire.​—Rom. 5:3-5; Zak 1:12. w16.04 2:15, 16

Zeova pa krwar ki en dimoun oubyen group dimoun i pli meyer ki en lot. Pour li, nou tou nou egal. Byensir, Zeova in fer nou tou diferan avek kanmarad e nou kapab apresye e admir sa varyete. I pa anvi ki nou abandonn nou kiltir, me i osi pa anvi ki nou krwar ki nou pli meyer ki lezot. (Rom. 10:12) Nou pa devret zanmen tro fyer pour nou pei ouswa nasyon ki nou krwar i pli meyer ki nenport lezot. Si nou santi koumsa, petet i pou difisil pour nou kontinyen pa pran kote. Sa ti arive dan premye syek. Serten frer ki koz Ebre ti negliz bann vev ki koz Grek. (Akt 6:1) Ki mannyer nou kapab konnen si nou pe konmans devlop lorgey? Si en frer ouswa en ser ki sorti dan en lot pei i donn ou en sizesyon, eski deswit ou mazinen, ‘Nou fer keksoz pli byen isi’ e apre rezet li? Si wi, mazin sa konsey enportan ki dan teks pour ozordi. w16.04 4:12, 13

Zezi ti anons “Bon Nouvel Rwayonm” e i anvi ki son bann disip i fer parey. Lekel sa group dimoun ki pe anons sa mesaz avek tou dimoun? (Mat. 28:19) Zis Temwen Zeova! En pret misyonner ki’n viv dan plizyer pei ti dir en Temwen Zeova. Dan sak pei ki i’n vizite, i ti’n demann Temwen Zeova ki mesaz zot pe anonse. Sa pret ti dir, “Zot tou zot ti sitan bet ki zot ti donn menm larepons: ‘Sa bon nouvel konsernan Rwayonm.’” Sa ki sa pret ti dir i prouve ki nou pa bet me nou ini konman bann vre Kretyen. (1 Kor. 1:10) Rwayonm Bondye i mesaz prensipal Latour Veyer pe anons Rwayonm Zeova. Sa magazin i disponib dan 254 langaz e an mwayenn, 59,000,000 kopi i ganny enprimen sak mwan ki fer ki i sa magazin ki pli ganny distribye dan lemonn antye! w16.05 2:6

Petet ou ti pou anvi fer pionye. Ou’n fer serten sanzman dan ou lavi pour ki ou kapab pas plis letan dan predikasyon. Me ou pa ankor asire si ou pou vreman ere avek mwens larzan e mwens keksoz. I vre ki Labib pa dir ki nou bezwen fer pionye pour servi Zeova. Nou kapab kontinyen servi li fidelman konman en proklanmater. Me de lot kote, Zezi ti dir ki Zeova i beni sa bann ki fer bann sakrifis pour Rwayonm. (Lik 18:29, 30) Labib i osi dir ki nou fer Zeova plezir ler nou fer tou sa ki nou kapab pour loue li e i anvi ki nou servi li dan lazwa. (Ps. 119:108) Ler nou priy e medit lo sa bann keksoz, nou pou kapab fer en desizyon ki pratik dan nou sityasyon e enn ki Zeova pou beni. w16.05 3:13

Bann Kretyen pli aze pa devret krwar ki zot pa bezwen lir bann piblikasyon pour zenn. Laplipar problenm ki ganny diskite dan sa bann lartik pour zenn, i annan en lefe lo tou Kretyen. Par egzanp, nou tou nou bezwen defann nou krwayans, annan kontrol lo nou lemosyon, pa les lezot met presyon lo nou e evit bann move frekantasyon ek divertisman. Alor, kantmenm sa bann piblikasyon in ganny ekrir pour bann zenn, sa bann lenformasyon i sorti dan Labib e sa i kapab anmenn byenfe pour tou Kretyen. Bann piblikasyon ki’n ganny ekrir pour bann zenn i kapab osi ed zot pour ranforsi zot lanmitye avek Zeova. Bann adilt osi i kapab servi sa bann piblikasyon pour zot prop byenfe.​—Ekle. 12:13. w16.05 5:15, 16

‘Zeova nou Bondye i en sel Zeova.’ Pa sa i en parol pwisan! Sa rapel ti donn kouraz bann Izraelit pour andir bann difikilte ler zot ti antre e konkerir Later Promiz. Sa bann parol i kapab ankouraz nou osi pour ki nou kapab pas atraver gran ladetres e ede dan sa paradi ki pe vini. Annou kontinyen donn Zeova en devosyon ki zis pour li tousel. Nou bezwen kontan e servi li avek tou nou leker, lespri ek lafors e nou bezwen travay dir pour prezerv linite parmi nou bann frer ek ser. Si nou kontinyen fer sa bann keksoz, Zezi pou ziz nou konman bann mouton e nou pou vwar son bann parol vin vre: “Vini, zot ki mon Papa in beni! Vin erit rwayonm ki’n ganny prepare pour zot depi kreasyon lemonn.”​—Mat. 25:34. w16.06 3:2, 20

Lorgey i kapab fer nou zistifye nou move kondwit. Ler sa i arive, nou nepli parey larzil mou. Eski ou’n deza ganny ofanse par en frer oubyen ser? Eski ou ti sagren ler ou ti perdi en privilez? Ki mannyer ou ti reazir? Eski ou ti vin orgeye ouswa ou ti realize ki fer lape avek ou frer e gard ou fidelite anver Zeova i pli enportan? (Ps. 119:165; Kol. 3:13) Ler en dimoun i kontinyen fer pese e kasyet sa ki i pe fer, i pou kapab difisil pour li aksepte konsey Bondye. Alor, i vin pli fasil pour li komet pese. (Ekle. 8:11) En frer ki pour en serten letan ti abitye get pornografi ti dir, “Mon ti konmans devlop en latitid pour kritik bann ansyen.” Son latitid ti andomaz son relasyon avek Zeova. Ler lezot ti aprann ki i ti pe fer, i ti ganny led avek bann ansyen. I vre ki nou tou nou enparfe, me si nou konmans kritik bann ki konsey nou oubyen si nou rod leskiz ler nou’n fer en keksoz mal, dan plas demann Bondye pardon e demann li led, nou leker i kapab vin dir. w16.06 2:5, 6

Zezi ti konnen ki son bann disip ti trakas lo sa ki zot ti pou manze, bwar e lo sa ki zot ti pou mete, alor i ti dir zot: “Pa trakase lo sa ki zot . . . bezwen pour viv.” Zezi ti anvi ed zot konpran akoz zot pa devret trakase pour sa bann keksoz. I ti konnen ki si zot trakas tro bokou, menm pour bann keksoz ki zot vreman bezwen, zot ti pou kapab oubliy sa ki pli enportan dan lavi. Zezi ti sitan kontan son bann disip ki i ti averti zot ankor kat fwa kont sa danze dan son Sermon lo Montanny. (Mat. 6:27, 28, 31, 34) Zezi ti konnen ki dimoun i bezwen. I ti konnen ki dan “bann dernyen zour,” son bann disip ti pou viv dan bann letan vreman difisil. (2 Tim. 3:1) Anfet, bokou dimoun ozordi pa kapab ganny en travay e bann keksoz i kontinyen vin pli ser. Dan plizyer landrwa, dimoun i vreman pov e zot napa preski nanryen ouswa napa ditou manze. Me Zezi ti osi konnen ki lavi en dimoun i pli enportan ki manze e lekor i pli enportan ki lenz. w16.07 1:8, 9

Vi ki nou pa kapab obei Zeova dan en fason parfe, sa i fer ki nou pa merit okenn labonte sorti kot Bondye. Anfet, nou merit lanmor. Lerwa Salomon ti dir: “Lo later napa en sel zis, ki fer zis sa ki byen san komet en pese.” (Ekle. 7:20) Pli tar, zapot Pol ti dir: “Tou dimoun in fer pese e zot pa arive reflekte laglwar Bondye” e “konsekans pese se lanmor.” (Rom. 3:23; 6:23a) Vi ki Zeova i telman kontan bann imen, i’n anvoy “son sel Garson” pour mor pour nou. Sa ti pli gran fason pour demontre son labonte ekstraordiner. (Zan 3:16) Pol ti dir ki Zezi in “ganny kouronnen avek laglwar ek loner parski i’n soufer ziska lanmor pour ki gras a labonte ekstraordiner Bondye, i kapab mor pour tou dimoun.” (Ebr. 2:9) Wi, “don gratwit ki Bondye i donnen, i lavi eternel dan linyon avek Zezi-Kri, nou Senyer.”​—Rom. 6:23b. w16.07 3:3, 4

I normal pour marye. Me ki mannyer maryaz ti ganny entrodwir e avek ki bi sa ti ganny fer? Ler nou konn sa, sa pou ed nou annan en bon pwennvi lo maryaz ek son bann benediksyon. Bondye ti kree sa premye zonm, Adan e i ti demann Adan pour donn bann zannimo zot non. Adan ti vwar ki tou zannimo ti annan en konpanny, “me pour zonm ti napa en led ki ti koresponn avek li.” Alor, Bondye ti fer Adan tonm dan en profon sonmey, i ti tir enn son kot e i ti fer en fanm. Zeova ti anmenn sa fanm kot Adan e i ti vin son madanm. (Zen. 2:20-24, NWT) Alor, nou kapab dir ki maryaz i en kado sorti kot Zeova. Bokou lannen pli tar, Zezi ti repet sa ki Zeova ti’n dir dan zarden Edenn: ‘En zonm pou kit son papa ek son manman pour ini avek son madanm e tou lede pou vin en sel laser.’ (Mat. 19:4, 5) Parski Bondye ti pran en kot avek Adan pour kree sa premye fanm, sa koup ti’n bezwen realize ki zot ti al byen avek kanmarad. Zeova pa ti zanmen anvi ki en msye ek madanm i divorse oubyen annan plis ki en konzwen an menm tan. w16.08 1:1, 2

Pa toultan ki Zezi ti koz avek en lafoul dimoun. Souvan i ti koz avek bann dimoun endividyelman e i ti fer sa dan en fason amikal. Par egzanp, i ti ganny en bon konversasyon avek en madanm ki ti vin tir delo dan en pwi pre avek lavil Sikar. (Zan 4:5-30) Zezi ti osi koz avek Matye Levi, en kolekter taks e envit li pour vin son disip. Matye ti aksepte son lenvitasyon e pli tar i ti envit Zezi ek lezot pour en repa kot li. Laba, Zezi ti koz avek bokou dimoun. (Mat. 9:9; Lik 5:27-39) Zezi ti koz amikalman avek Natanael menm si i ti’n dir bann move keksoz lo bann dimoun sorti Nazaret. Vi ki Zezi ti koz avek li amikalman sa ti fer Natanael sanz lafason ki i ti santi pour Zezi ki ti sorti Nazaret. Natanael ti anvi aprann konn plis lo Zezi. (Zan 1:46-51) Atraver legzanp Zezi nou aprann ki ler nou koz amikalman e zantiman avek bann dimoun, i tre probab ki zot pou pli pare pour ekout sa ki nou anvi dir. Ler nou form bann nouvo pour fer koumsa, zot pou pli apresye predikasyon. w16.08 4:7-9

Ler bann problenm grav pa ganny rezourd, serten koup i kapab deside pour separe oubyen divorse. Serten koup i kapab santi ki zot problenm i sitan grav ki zot bezwen separe. Par kont, Zezi ti montre ki degre serye separasyon i serye ler i ti repet sa ki Bondye ti dir lo maryaz o konmansman e apre i ti dir: “Sa ki Bondye in ini, zonm pa devret separe.” (Mat. 19:3-6; Zen. 2:24) Alor Zeova i anvi msye ek madanm i reste ansanm. (1 Kor. 7:39) Nou tou nou bezwen rapel ki nou bezwen rann kont avek Zeova pour nou bann aksyon. Sa i kapab ed nou pour rezourd bann problenm vitman avan ki zot vin pli grav. w16.08 2:10, 11

Nou bezwen reste vizilan toultan. Akoz? Nou bann lennmi i kapab atak nou ler ki nou pa pe ekspekte ouswa ler nou fay. Si nou kontinyen lager kont lemal, nou kapab ranport laviktwar! Par kont, si nou bes nou gard e aret lager alor Satan, son lemonn e nou bann febles i kapab pran kontrol lo nou. Alor, pa zanmen aret lalit. Pa dekouraze, ni bes lebra! (1 Pyer 5:9) Pour reisi ranport laviktwar, nou bezwen rapel akoz nou pe lalit. Sa i akoz nou anvi ganny laprouvasyon ek benediksyon Bondye. Ebre 11:6 i dir: “Sa enn ki apros kot Bondye i devre krwar ki Bondye i egziste e ki i rekonpans tou dimoun ki rod li.” Rod Zeova i vedir ki nou bezwen travay vreman dir si nou anvi ganny son laprouvasyon.​—Akt 15:17. w16.09 2:4, 5

Labib i donn en gidans pratik ki kapab ed nou fer bann swa ki saz e ki anmenn loner lo Bondye. Toudmenm, sa ki nou mete i reflekte nou gou personnel. Bann fason sanze ek lenz ki nou mwayen i permet nou aste, i kapab diferan avek sa ki pour lezot, me nou lenz i devret toultan annord, prop, respektab, apropriye pour sak lokazyon e akseptab dan nou pei. I pa toultan fasil pour trouv lenz ki respektab e apropriye. Preski tou laboutik i vann zis bann lanmod lenz popiler. Alor, i demann bokou zefor pour trouv oubyen swazir bann zip, rob, kor, palto ek kannson ki pa tro sere e ki respektab. Me nou bann frer ek ser pou remarke e apresye zefor ki nou fer pour met bann zoli lenz ki apropriye. Alor, i vo lapenn fer sa bann sakrifis akoz nou pou ganny sa satisfaksyon ki nou’n anmenn laglwar lo nou Papa lanmour ki dan lesyel. w16.09 3:15, 16

Ler ou servi legzanp, ou fer ou zanfan servi son limazinasyon. Sa pou ed li reflesir lo sa ki ou pe ansenny li. I pou konpran pli byen e i pa pou bliy sa pwen. I pou osi kontan pour aprann. Ou kapab servi bann legzanp pour montre ou zanfan ki sa ki Labib i dir i vre. Par egzanp ou ti kapab lir sa teks pour ozordi. Pa zis montre ou zanfan ki sa lenformasyon dan sa verse i sorti kot Zeova. O kontrer, ed li pour servi son limazinasyon. Ou kapab dir ki dimoun dan letan Zob pa ti krwar ki later pe flote dan lespas. Zot ti konnen ki okenn lobze, parey boul oubyen ros i bezwen tenir lo en keksoz. Sa letan, personn pa ti ankor prouve ki later pe flote dan lespas vi ki i ti napa teleskop oubyen okenn mwayen pour al dan lespas. Leson ki nou tire, menm si Labib ti ganny ekrir bokou letan pase, sa ki i dir i toultan vre akoz i sorti kot Zeova.​—Nee. 9:6. w16.09 5:9, 12

Ler nou annan lafwa dan Zeova ek Zezi, nou pa zis konn sa ki zot in fer e sa ki zot pou fer pour nou. Nou osi vreman oule viv dapre zot standar. Nou osi kontan pour ed lezot konn Zeova ek Zezi. I evidan ki pour ganny lavi eternel dan nouvo lemonn ki Bondye in promet, nou bezwen annan lafwa e nou bezwen kontinyen gard li for. Lafwa i parey en plant. Nou bezwen aroz en plant pour li reste an bonn sante e kontinyen vin pli for. Me si nou pa donn li ase delo, i pou sek e mor. Pareyman, nou bezwen fer sir ki nou lafwa i reste “solid” e i kontinyen vin pli “for.”​—Tit 2:2; 2 Tesa. 1:3; Lik 22:32; Ebr. 3:12. w16.10 4:4, 5

Ler Danyel ek son bann zanmi ti an egzil Babilonn, bann Babilonnyen ti esey fors zot pour aksepte zot kiltir ek larelizyon. Ki mannyer sa? Zot ti aprann “langaz bann Kaldeen” e donn zot bann non Babilonnyen. (Dan. 1:3-7, NWT) Sa nouvo non ki bann Babilonnyen ti donn Danyel ti refer avek Bel, bondye prensipal Babilonn. Alor, i posib ki Lerwa Neboukadnezar ti anvi fer Danyel krwar ki bann bondye Babilonnyen ti pli for ki Bondye Danyel, Zeova. (Dan. 4:8) Laba Babilonn, Danyel ti ganny ofer bann bon manze lerwa. Me i ti “determinen dan son leker” pour pa dezobei lalwa Bondye. (Dan. 1:8) Vi ki i ti kontinyen etidye “bann liv sakre” ki ti an Ebre, i ti gard son relasyon avek Zeova for ler i ti pe reste dan en lot pei. (Dan. 9:2, not dan NWT) Anfet, apepre 70 an apre ki i ti’n vin Babilonn, zot ti ankor konn li par son non Ebre, Danyel.​—Dan. 5:13. w16.10 2:7, 8

Depi 1919, Zezi pe servi “sa lesklav fidel e pridan” pour ed pep Bondye konpran bann lansennyman Labib e swiv sa ki i dir. (Mat. 24:45-47) Par obei sa ki Labib i dir, nou gard kongregasyon pir, anpe e dan linite. Demann ou lekor, ‘Eski mon pou fidel avek Zezi e swiv gidans lesklav fidel?’ Dan Labib, nou aprann ki bann serviter Zeova dan lesyel i organize zot osi. Par egzanp, Ezekyel ti vwar en vizyon kot Zeova ti kondwir en saret ki ti kapab bouz vit dan nenport direksyon ki Zeova ti anvi i ale. (Ezek. 1:4-28) Sa saret i reprezant sa parti lorganizasyon Bondye ki dan lesyel. Byento Kris avek son bann lanz pou detri sa move lemonn. I pou napa personn ki pou dezonor Zeova ek son non ouswa kritik son fason dirize ankor! w16.11 3:9, 10

Dan nou bann renyon, nou aprann konn Zeova e nou ankouraz kanmarad. (1 Kor. 14:31) Menm bann ki’n servi Zeova pour en bon pe letan i bezwen ganny ankouraze. Mazin Zozye, ler bann Izraelit ti pros pour antre dan Later Promiz, Zeova ti swazir li pour diriz zot. Me kantmenm sa, Zeova ti demann Moiz pour ankouraz li menm si i ti’n servi Zeova pour plizyer lannen. Zeova ti dir: “Donn ou lord Zozye, ankouraz li, rann li for, akoz li menm ki pou diriz le pep e donn li patrimwann sa pei ki i pou war.” (Det. 3:27, 28) I ti neseser pour Zozye ganny ankouraze, parski pli tar, sa nasyon ti pou pran par dan plizyer batay e menm perdi omwen enn. (Zoz. 7:1-9) Ozordi, nou kapab ankouraz bann ansyen ek sirveyan rezyonal ki travay dir pour pran swen avek pep Bondye.​—1 Tesa. 5:12, 13. w16.11 1:12, 13

Bann Etidyan Labib pa ti anvi ki zis zot fanmir, zanmi ek bann manm Legliz i konnen ki zot ti nepli siport fo larelizyon, me zot ti anvi lemonn antye konnen ki Gran Babilonn i en prostitye relizye. Alor, ant Desanm 1917 e boner 1918 sa detrwa milye Etidyan Labib ti distribye 10,000,000 kopi en trak ki ti enkli en lartik ki apel “Babilonn in tonbe” (“The Fall of Babylon.”) Sa trak ti pe montre klerman laverite konsernan bann larelizyon Kretyen. Parey ou kapab mazinen, bann sef relizye ti vreman ankoler! Me bann Etidyan Labib pa ti aret la. Zot ti determinen pour kontinyen prese e obei “Bondye plito ki zonm.” (Akt 5:29) Ki sa i montre nou? Sa i montre ki pandan Premye Lager Mondyal, sa bann zonm ek fanm Kretyen pa ti pe al an egzil, o kontrer zot ti pe liber zot avek fo larelizyon e ed lezot pour fer parey. w16.11 5:2, 4

Serten dimoun i krwar ki Pol ti pe dekrir bann ki ti Kretyen e bann ki pa ti Kretyen. Me la, Pol ti pe ekri bann Kretyen, bann ki’n “ganny swazir pour vin bann sen.” (Rom. 1:7) Alor, bann ki ti viv “dapre lekor enparfe” ek bann ki ti viv “dapre lespri sen” ti bann Kretyen. Pol ti ekri: “Ler nou ti pe viv dapre bann dezir nou lekor enparfe, bann move dezir pour fer pese ki ti ganny revele par Lalwa ti pe travay dan nou lekor.” (Rom. 7:5) Pol ti eksplike ki bann dimoun ki viv “dapre lekor enparfe” i bann ki zis konsantre e swiv zot prop dezir pour fer pese e fer sa ki zot anvi. w16.12 2:5, 7

Par ler dimoun i trakase akoz en fot ki i’n fer dan lepase. Par ler, Lerwa David ti vreman trakase pour bann fot ki i ti’n fer. I ti admet: “Mon ronfle avek douler dan mon leker.” (Ps. 38:3, 4, 8, 18) Dan sa sityasyon, David ti fer en keksoz vreman saz. I ti annan konfyans ki Zeova ti pou annan pitye pour li e pardonn li. (Ps. 32:2, 3, 5) Par ler nou kapab trakas pour ozordi. Par egzanp, kan David ti ekrir Psonm 55 i ti per ki i ti pou ganny touye. (Ps. 55:2-5) Kantmenm sa, i pa ti les traka fer li perdi konfyans dan Zeova. David ti sipliy Zeova pour ed li dan son bann problenm, me i ti konnen ki i ti enportan pour li osi fer en keksoz konsernan son sityasyon. (2 Sam. 15:30-34) Ou kapab aprann en leson avek David. Dan plas les traka anvair ou, fer sa ki ou kapab pour rezourd sa problenm e annan konfyans ki Zeova pou pran swen avek ou. w16.12 3:14, 15

David ti les Zeova ed li. Par egzanp, i ti aksepte koreksyon sorti kot Natann, en profet Zeova. David ti osi priy Zeova e konfes son bann pese, ki montre ki i ti vreman anvi reganny laprouvasyon Zeova. (Ps. 51:1-17) Dan plas les son konsyans kontinyen fatig li, i ti tir en leson avek son fot. I pa ti fer ankor sa bann pese grav. I ti reste fidel ziska son lanmor e koumsa ki Zeova i rapel li. (Ebr. 11:32-34) Ki nou kapab aprann avek legzanp David? Si nou fer en pese grav, nou bezwen repantir senserman, konfes nou pese avek Zeova e demann li pour pardonn nou. (1 Zan 1:9) Nou osi bezwen koz avek bann ansyen parski zot kapab ed nou pour aranz nou relasyon avek Zeova. (Zak 5:14-16) Ler nou aksepte led Zeova, nou montre ki nou annan konfyans dan son promes ki i pou pardonn nou. Deplis, nou bezwen tir leson avek sa fot ki nou’n fer e kontinyen servi Zeova avek konfyans.​—Ebr. 12:12, 13. w17.01 1:13, 14

Kisisa en aksyon arogan? I ler nou fer en keksoz ki nou napa drwa ouswa lotorite pour fer, petet akoz nou enpasyan ouswa tro fyer. Akoz nou lenperfeksyon, i tre probab ki nou tou nou’n deza fer en keksoz ki nou ti napa drwa oubyen lotorite pour fer. Me parey nou aprann avek legzanp Lerwa Sail, si sa i vin en labitid, Zeova pa pou kontan. Psonm 119:21 i dir ki Zeova pou “reprimann bann arogan.” Akoz i fer sa? Premyerman, si nou fer en keksoz ler nou napa lotorite pour fer li, nou pe demontre en mank respe pour Zeova, nou Bondye ek Sef. Dezyenmman, ler nou fer sa ki nou napa lotorite pour fer, i tre probab ki nou pou ganny plis dezakor ek dispit avek lezot dimoun. (Prov. 13:10) Trwazyenmman, nou pou parey en lenbesil ler lezot i remarke ki nou’n fer en keksoz ki nou ti napa lotorite pour fer. (Lik 14:8, 9) Alor i evidan ki Zeova i oule ki nou vin modes. w17.01 3:4, 5

Adan ek Ev ti nepli kapab imit Zeova parfetman. Adan e tou son bann zanfan ti perdi en lavenir merveye. Adan ti kapab zis pas lenperfeksyon, pese ek lanmor avek son bann zanfan. (Rom. 5:12) Adan ti fer zot perdi sa sans pour viv pour touzour. Adan ek Ev pa ti pou zanmen kapab fer en zanfan parfe e zot zanfan osi pa ti pou kapab fer bann zanfan parfe. Depi ki Satan ti fer Adan ek Ev vir kont Bondye, Dyab in esey enfliyans tou imen pour fer parey. (Zan 8:44) Zeova pa ti aret kontan bann imen. Menm si Adan ek Ev ti’n kit li, i ti oule ki imen i annan en bon relasyon avek li. I pa ti oule ki personn parmi zot i mor. (2 Pyer 3:9) Alor, deswit Bondye ti fer bann laranzman pour ki bann imen i kapab revin son zanmi.​—Zan 3:16. w17.02 1:12-14

Nou pou vin pli modes ler nou rod sa ki bon dan lezot, parey Zeova i fer. Dan plas toultan esey ganny tou latansyon lezot oubyen dir lezot sa ki zot devret fer, nou pou demann zot konsey e nou pou pare pour aksepte zot bann nide. Nou kontan ler nou bann frer ek ser i ganny bann responsabilite spesyal e nou remersye Zeova ki i permet nou tou pour servi li. (1 Pyer 5:9) Deplis, ler nou aprann pour vwar keksoz parey Zeova, nou kapab fer bann desizyon ki fer li plezir. Anmezir ki nou etidye, priye e aplik sa ki nou aprann, nou konsyans pou vin pli for. (1 Tim. 1:5) Nou aprann met lezot premye. Si nou fer sa bann keksoz, Zeova i promet nou ki i pou ‘fini nou formasyon’ enkli ed nou pour vin pli modes.​—1 Pyer 5:10. w17.01 4:17, 18

Nou bann frer ek ser i merit nou loner ek respe. Sa i aplik sirtou pour bann frer ki annan bann responsabilite, tel parey bann ansyen, sirveyan rezyonal, manm Komite Biro Brans e bann manm Konsey Direkter. Zot tou zot pran swen avek pep Bondye e Labib i refer avek sa bann serviter konman “bann zonm konman kado.” (Efe. 4:8) I fer sans alor ki nou pou onor e respekte zot ki swa zot nasyonalite, ledikasyon, ran sosyal ouswa zot sityasyon finansyel. Bann premye Kretyen in kit en bon legzanp pour nou. Zot ti onor bann zonm ki ti annan bann responsabilite e ozordi nou osi nou fer parey zot. Ler nou avek sa bann zonm, nou pa tret zot konmsi zot bann lanz, savedir bann ki annan pwisans ekstraordiner, me nou onor e annan respe zot pour zot bann travay dir ek zot limilite.​—2 Kor. 1:24; Rev. 19: 10. w17.03 1:13

Erod Agripa 1 ki ti vin dirizan Zide ti annan en latitid vreman diferan avek sa ki pour Zezi. En zour dan en renyon spesyal, Erod ti met en lenz rwayal vreman ser e enpresyonan. Ler bann dimoun ti vwar li e tann li, zot ti kriye: “Lavwa en bondye sa, pa lavwa en zonm!” Erod ti kontan ganny loner. Me “deswit lanz Zeova ti frap li akoz i pa ti’n donn Bondye laglwar. Lever ti manz li e i ti mor.” (Akt 12:21-23) Pa sa i montre klerman ki Zeova pa ti’n swazir Erod pour vin dirizan! Par kont, Zezi ti montre ki Bondye ti’n swazir li e i ti toultan onor Zeova konman sa Sef Siprenm parmi Son pep. Zeova ti anvi Zezi i vin Dirizan pour plis ki zis detrwa lannen. Apre son rezireksyon, Zezi ti dir son bann disip: “Mon’n ganny tou lotorite dan lesyel e lo later.” I ti azoute: “Mazinen! mon avek zot tou le zour ziska lafen sa lemonn.”​—Mat. 28:18-20. w17.02 3:20, 21