Mars

Ler nou lir Zenez sapit 1 ek 2, nou aprann ki Adan ek Ev ti annan sa kalite laliberte ki dimoun ozordi i kapab zis reve pour annan. Zot ti annan tou sa ki zot ti bezwen, zot pa ti per nanryen e personn pa ti tret zot dan en fason enzis. Zot pa ti trakas pour manze, travay, maladi ouswa lanmor. (Zen. 1:27-29; 2:8, 9, 15) Me i enportan pour nou rapel ki zis Zeova ki annan laliberte total. Akoz? Parski i’n kree tou keksoz e i sa Dirizan pli pwisan dan liniver. (1 Tim. 1:17; Rev. 4:11) Kontrerman avek li, laliberte tou bann ki dan lesyel e lo later i annan limit. Sa i vedir ki zot annan zis en serten degre laliberte. Zeova i anvi ki nou konpran ki zis li ki annan sa drwa pour deside ki limit ki zis, neseser e rezonnab. Depi lo konmansman, Zeova in etabli bann limit pour son kreasyon. w18.04 4 ¶4, 6

Dan sa lemonn, sel fason ki nou andire se gras a led Zeova. (2 Kor. 4:7, 8) Alor mazin bann ki napa en lanmitye avek Zeova. I bezwen ki i vreman difisil pour zot viv dan sa lemonn san son led. Parey Zezi, nou leker i fermal ler nou mazin zot sityasyon e nou anvi “anmenn bon nouvel konsernan en keksoz meyer.” Alor annan pasyans avek ou bann etidyan. Rapel ki petet zot pa’n zanmen mazin lo serten laverite ki dan Labib ki nou nou konn tre byen. An plis, en kantite parmi zot i konvenki ki sa ki zot krwar ladan i vre. I kapab ki zot santi ki zot larelizyon i en keksoz enportan ki fer zot vin pros avek zot fanmir, zot kiltir ek bann dimoun dan zot kominote. Avan nou demann dimoun pour abandonn zot krwayans ki vreman presye pour zot, nou kapab konmans par ed zot pour aprann e kontan bann nouvo laverite, setadir bann lansennyman Labib ki zot pa ti konnen avan ki zot ti konmans etidye. I selman apre sa ki zot pou kapab abandonn zot vye krwayans. I kapab pran letan pour ed dimoun fer sa bann sanzman.​—Rom. 12:2. w19.03 22 ¶10; 23 ¶12, 13

Lafason ki Zeova ti eksprim son lanmour ek laprouvasyon pour son Garson i fer nou rapel ki nou osi nou bezwen rod bann loportinite pour ankouraz lezot. (Zan 5:20) Nou fer pli byen ler en dimoun ki nou kontan i montre ki i kontan nou e felisit nou ler nou fer en bon keksoz. Pareyman, nou bann frer ek ser dan kongregasyon ek nou fanmir i bezwen nou lanmour ek lankourazman. Ler nou felisit lezot, nou ranforsi zot lafwa e ed zot pour servi Zeova fidelman. Bann paran i sirtou bezwen ankouraz zot zanfan. Ler bann paran i felisit zot zanfan senserman e demontre lafeksyon pour zot, sa i ed zot zanfan progrese. Ler Zeova ti dir: “Ou menm . . . ki mon’n aprouve,” sa ti montre ki i ti annan konfyans ki Zezi ti pou fer son lavolonte fidelman. Vi ki Zeova ti annan konfyans dan son Garson, nou osi nou kapab annan konfyans total ki Zezi pou fidelman akonpli bann promes Zeova. (2 Kor. 1:20) Ler nou mazin lo legzanp Zezi, nou pli determinen pour aprann avek li e swiv son legzanp.​—1 Pyer 2:21. w19.03 8 ¶3; 9 ¶5-6

Ler nou ganny en kado presye, nou rekonesan anver sa dimoun ki’n donn nou sa kado. Me bann Izraelit pa ti rekonesan pour sa laliberte ki Zeova ti donn zot. Zis detrwa mwan apre ki Zeova ti liber zot Lezip, zot ti konmans annan lanvi pour bann manze ek bwar ki zot ti gannyen Lezip. Zot ti konplent konsernan sa lamann ki Zeova ti pe donn zot pour manze. Zot ti menm anvi retourn Lezip! Pour zot, ‘pwason, kokonm, melon, pwaro, zonnyon ek lay’ ti pli enportan ki sa laliberte ki Zeova ti’n donn zot pour ador li. I pa drol alor ki Zeova ti pran en gran lakoler avek zot. (Nom. 11:5, 6, 10; 14:3, 4) Sa i ansenny nou en leson enportan. Pol ti averti tou bann Kretyen pour pa perdi zot rekonesans pour sa laliberte ki Zeova in donnen atraver son garson, Zezi Kri.​—2 Kor. 6:1. w18.04 10-11 ¶6-7

Nou tou nou anvi ki dimoun i kontan nou. Nou osi anvi ki keksoz i ganny fer dan en fason zis. Si nou kontinyelman santi ki lezot pa kontan nou oubyen ki nou ganny trete dan en fason enzis, sa i kapab fer nou santi nou dezespere e ki nou pa vo nanryen. Zeova i konnen ki nou vreman anvi ganny trete avek lanmour ek lazistis. (Ps. 33:5) Nou kapab asire ki nou Bondye i vreman kontan nou e i anvi ki nou ganny trete dan en fason zis. Sa i evidan letan nou egzamin o profon sa Lalwa ki Zeova ti donn nasyon Izrael atraver Moiz. Anmezir ki nou etidye Lalwa Moiz, nou aprann en bon pe konsernan lanmour ek labonte ki nou bon Papa Zeova i annan. (Rom. 13:8-10) Nou kapab remarke ki Lalwa Moiz ti baze lo lanmour akoz se lanmour ki motiv Zeova pour fer tou keksoz. (1 Zan 4:8) Tou bann lalwa ki Zeova ti donnen dan Lalwa Moiz ti baze lo sa de komannman: Kontan Bondye e kontan ou prosen. (Lev. 19:18; Det. 6:5; Mat. 22:36-40) Sak komannman dan sa 600 i ansenny nou en keksoz lo lanmour Zeova. w19.02 20-21 ¶1-4

Zob ti vey byen son konportman anver bann madanm. (Zob 31:1) I ti konnen ki i mal pour montre en lentere romantik pour okenn lezot madanm. Ozordi, nou pe viv dan en lemonn ki ranpli avek imoralite seksyel. Parey Zob, eski nou refize konmans montre en lentere romantik dan en dimoun ki pa nou msye oubyen nou madanm? Eski nou pou refize get okenn portre obsenn oubyen pornografi? (Mat. 5:28) Si toulezour nou vreman fer zefor pour annan kontrol lo nou lekor, nou pou pli determinen pour reste fidel e san defo. Zob ti osi obei Zeova dan lafason ki i ti konsider keksoz materyel. Zob ti konpran ki si i met son konfyans dan sa ki i posede, sa ti pou en pese grav ki merit pinisyon. (Zob 31:24, 25, 28) Ozordi, nou pe viv dan en lemonn ki vreman kontan bann keksoz materyel. Si nou devlop en pwennvi balanse lo larzan ek keksoz materyel parey Labib i konsey nou pour fer, nou pou pli determinen pour reste fidel e san defo.​—Prov. 30:8, 9; Mat. 6:19, 20. w19.02 6-7 ¶13-14

Zezi ti demontre sa menm lanmour ki Zeova i annan pour nou dan tou sa ki i ti fer e i ti fer li dan en fason parfe. (1 Zan 4:8-10) Me pli enportan ki tou, son lanmour senser ti pous li pour sakrifye son lavi pour nou. Ki swa nou form parti bann Kretyen swazir oubyen “lezot mouton,” nou benefisye avek lanmour ki Zeova ek son Garson in demontre anver nou atraver sa sakrifis. (Zan 10:16; 1 Zan 2:2) Mazin osi sa bann keksoz ki ti ganny servi pandan sa repa Memoryal. Sa osi i montre lanmour ek konsiderasyon ki Zezi ti annan pour son bann disip. Dan ki fason? Zezi ti demontre lanmour anver bann Kretyen swazir par entrodwi en repa senp ki zot ti pou kapab kontinyen selebre me pa en seremoni konplike. Avek letan, sa bann Kretyen swazir ti bezwen selebre Memoryal sak lannen, dan diferan sirkonstans e menm dan prizon. (Rev. 2:10) Eski zot ti kapab kontinyen obei Zezi? Wi! Depi premye syek ziska dan nou letan, bann vre Kretyen in fer zefor pour komemor lanmor Zezi. w19.01 24 ¶13-15

Gras a Zeova, nou’n ganny libere avek fo larelizyon, linyorans ek siperstisyon. A lavenir, nou pou “ganny laglwar ek laliberte bann zanfan Bondye.” (Rom. 8:21) Menm la konmela ou kapab profit sa laliberte ler ou viv dapre bann lansennyman Kris. (Zan 8:31) Dan sa fason, ou pou aprann “konn laverite” pa zis atraver sa ki ou aprann, me osi par viv laverite! Dan sa lemonn, menm sa ki dimoun i dir i en bon lavi pa dire pour bokou letan. Personn pa konnen ki pou arive demen. (Zak 4:13, 14) Alor sa pli bon keksoz ki ou kapab fer i bann swa ki pou ed ou ganny “sa vre lavi,” setadir, lavi eternel dan sa zoli nouvo lemonn Bondye. (1 Tim. 6:19) Zeova pa fors personn pour servi li. Nou menm nou ki bezwen deside ki nou pou fer. Alor fer Zeova ou “soutyen” par travay sak zour pour vin pli pros avek li e apresye tou “bann bon keksoz” ki i donn ou. (Ps. 16:5; 103:5, NWT) Ou kapab asire ki Zeova i kapab donn ou lazwa ek lakontantman annabondans pour touzour!​—Ps. 16:11. w18.12 26 ¶19, 21

Tou Kretyen i devret onor maryaz parey Zeova ek Zezi i fer. Par kont, parfwa serten pa fer sa, parski nou tou nou enparfe. (Rom. 7:18-23) Alor nou pa devret sirprann ki serten Kretyen dan premye syek ti annan bann difikilte dan zot maryaz. Pol ti ekri ki “en madanm marye pa devret separe avek son msye.” Me parfwa sa ti arive. (1 Kor. 7:10) Pol pa ti dir kwa ki ti fer bann koup separe. Me nou konnen ki i pa ti akoz imoralite seksyel. Akoz nou dir sa? Parski meton sa msye ti’n komet imoralite seksyel, sa madanm ti pou’n annan en rezon pour divorse e remarye. Me Pol ti ekri ki en madanm ki separe avek son msye i devret “reste tousel si non i bezwen rekonsilye avek son msye.” Alor Bondye ti ankor konsider zot konman en koup marye. Pol ti dir ki malgre nenport problenm oubyen difikilte ki en koup i annan, si ni enn ant zot pa ti’n komet imoralite seksyel, zot devret annan sa lobzektif pour rekonsilye, setadir rezourd zot problenm e reste ansanm. Zot kapab rod led avek bann ansyen. w18.12 13 ¶14-15

Ozordi, Bondye i anvi ki nou vin son zanmi e pour fer nou mye pour pres sa bon nouvel. (Mat. 28:19, 20; Zak 4:8) Me serten dimoun ki annan bon lentansyon i kapab esey dekouraz nou. Par egzanp, i kapab ki ou anplwayer i ofer ou plis larzan me ou konnen ki ou pou bezwen travay plis e ki ou pou napa menm kantite letan pour renyon ek predikasyon. Ouswa si ou pe lekol, i kapab ki ou bann ansenyan i ofer ou sa loportinite pour al lwen avek kot ou reste pour ganny plis ledikasyon. Eski prezan ki ou pou bezwen priye, fer resers e koz avek lezot avan fer en desizyon? I pli bon si ou aprann ki mannyer Zeova i vwar sa bann keksoz depi la konmela e fer son fason panse vin ou fason panse. Koumsa, si ou ganny ofer sa bann keksoz, i kapab ou pou vwar ki zot pa vreman tant ou. Ou konn egzakteman ki pour fer parski ou’n deza deside pour reste konsantre lo servi Zeova. w18.11 31 ¶18

Salomon ti vin lerwa Izrael ler i ti ankor en zenn onm. Ler i ti’n fek vin lerwa, Zeova ti aparet avek li dan en rev e dir: “Demann mwan sa ki ou oule.” Salomon ti reponn: “Mwan mon ankor zenn e mon napa leksperyans. . . . Alor, silvouple donn mwan en leker obeisan pour ziz ou pep.” (1 Rwa. 3:5-10, NWT) Salomon ti rekonnet ki i ti bezwen led Zeova, sanmenm i ti demann li “en leker obeisan.” Nou kapab konpran akoz Zeova ti kontan Salomon. (2 Sam. 12:24) Zeova ti telman kontan sa ki sa zenn lerwa ti’n demann li ki i ti donn Salomon “lasazes ek disernman.” (1 Rwa. 3:12) Tan ki Salomon ti reste fidel, i ti ganny en kantite benediksyon. I ti ganny privilez pour konstri en tanp “an loner non Zeova, Bondye Izrael.” (1 Rwa. 8:20, NWT) Salomon ti vin popiler akoz son lasazes ki Bondye ti’n donn li. Osi, bann keksoz ki Bondye ti enspir li pour dir in ganny ekrir dan trwa liv dan Labib. Enn sa bann liv i Proverb. w19.01 14 ¶1-2

Serten dimoun pa anvi ki personn i enfliyans zot fason panse. Zot dir, “Mon pa bezwen personn pour dir mwan ki pour fer.” I tre probab ki zot pe sey dir ki zot anvi fer zot prop desizyon e ki zot annan drwa fer li. Zot pa oule ki lezot i kontrol zot oubyen fors zot pour vin zis parey tou lezot dimoun. I byen pour konnen ki si nou aksepte fason panse Zeova, nou ankor kapab annan nou prop lopinyon. Dezyenm Korentyen 3:17 i dir: “Kot lespri sen Zeova i ete, i annan laliberte.” Zeova i donn nou sa laliberte pour vin sa kalite dimoun ki nou anvi vini. Nou kapab annan nou prop preferans e swazir ki keksoz ki enteres nou. Zeova in fer nou dan sa fason. Me sa pa vedir ki nou annan laliberte total. (1 Pyer 2:16) Ler nou bezwen konnen kwa ki byen e kwa ki mal, Zeova i oule ki nou servi son Parol konman nou gid. w18.11 22 ¶5-6

Ler nou ti aprann laverite, nou ti realize ki servi Zeova i bokou pli enportan ki bann keksoz materyel e nou ti kontan pour sakrifye nenport keksoz pour laverite. Me avek letan, nou kapab vwar lezot pe aste bann dernyen lekipman elektronik oubyen pe profit lezot keksoz ki larzan i kapab aste. Nou kapab konmans santi ki nou pe mank serten keksoz. Petet nou nepli satisfe avek sa ki nou annan e nou kapab konmans konsantre plis lo ganny bann keksoz materyel e fer mwens dan nou servis pour Zeova. Sa i fer nou rapel sa ki ti arive avek Demas. I ti telman kontan “sa lemonn konmela” ki i ti kit sa responsabilite ki i ti annan pour travay avek zapot Pol. Petet Demas ti kontan bann keksoz materyel plis ki i ti kontan pour servi Bondye. Oubyen petet i ti nepli anvi fer bann sakrifis pour li kapab servi ansanm avek Pol. Ki leson nou aprann? I kapab ki dan lepase nou ti vreman kontan bann keksoz materyel. Si nou pa fer atansyon, sa lanmour i kapab redevlope e vin sitan for ki nou perdi nou lanmour pour laverite. w18.11 12 ¶9

Satan ti annan en move lentansyon ler i ti koz manti parski i ti konnen ki si Ev ti krwar li e manz sa fri, Ev ti pou mor. Sanmenm sa ki ti arive. Ev ti dezobei lord Zeova e pli tar Adan osi ti fer parey e avek letan zot tou le de ti mor. (Zen. 3:6; 5:5) An plis ki sa, “tou dimoun i mor” akoz Adan ti’n fer pese. Anfet, “lanmor in osi domin lo sa bann ki ti fer pese menm si zot pa ti fer pese parey Adan.” (Rom. 5:12, 14) I pour sa rezon ki nou pa parfe e nou pa viv pour touzour parey Bondye ti anvi. O kontrer, nou viv zis pour apepre “70 an, parfwa 80 an pour bann ki pli for” e dan lavi “nou konn zis traka ek lapenn.” (Ps. 90:10) Tousala in arive akoz Satan ti koz manti! Zezi ti dir sa lo Satan: “I ti kit laverite parski laverite pa dan li.” (Zan 8:44) Satan pa’n sanze. I ankor pe “anbet dimoun lo later antye” avek son bann mansonz. (Rev. 12:9) Me nou nou pa anvi ki Satan i anbet nou. w18.10 3-4 ¶1-4

Ler nou pran sa linisyativ pour fer lape avek lezot, nou kapab ere. Disip Zak ti ekri: “Fri ladrwatir i ganny senmen dan lape pour sa bann ki pe fer lape.” (Zak 3:18) Alor si ou vwar li difisil pour annan en bon relasyon avek en dimoun dan ou kongregasyon ouswa dan ou fanmir, sipliy Zeova pour ed ou fer lape. Apre, Zeova pou donn ou son lespri sen ki pou ed ou demontre bann kalite Kretyen e ou pou pli ere. Zezi ti met lanfaz lo ki degre i enportan pour pran sa linisyativ pour fer lape ler i ti dir: “Si ou pe anmenn ou lofrann devan lotel e laba ou mazinen ki ou frer i annan en keksoz kont ou, kit ou lofrann laba devan lotel, al fer lape avek ou frer avan tou, apre retournen e ofer ou lofrann.”​—Mat. 5:23, 24. w18.09 19 ¶17

Pandan dernyen lannwit ki Zezi ti pase avek son bann disip avan i mor, i ti mansyonn lanmour apepre 30 fwa. I ti dir son bann disip ki zot devret “kontan kanmarad.” (Zan 15:12, 17) Zot lanmour ti pou telman evidan ki lezot ti pou remarke e konnen ki zot ti bann vre disip Kris. (Zan 13:35) Sa lanmour ki Zezi ti koz lo la pa zis en santiman, i en kalite vreman for ki pous nou pour met lentere lezot avan sa ki pour nou. Zezi ti dir: “Personn napa en pli gran lanmour ki sa, ki en dimoun i pare pour donn son lavi pour son bann zanmi. Zot mon zanmi si zot obei mon komannman.” (Zan 15:13, 14) Ozordi bann serviter Zeova i koni pour zot lanmour senser kot zot met lentere lezot avan sa ki pour zot e zot osi koni pour zot linite. (1 Zan 3:10, 11) I pa enportan ki nasyonalite ouswa tribi nou sorti ladan, ki langaz nou koze, ki landrwa nou sorti ouswa ki fason nou’n grandi. Partou dan lemonn, bann serviter Zeova i vreman kontan kanmarad. w18.09 8 ¶1-2

Zeova i ekspekte ki nou pran swen avek nou fanmir. Par egzanp, petet ou bezwen travay pour ganny larzan pour pran swen avek ou fanmir. En kantite manman i bezwen reste kot lakour avek zot zanfan ler zot ankor ptipti. Osi, ler nou paran pa kapab okip zot prop lekor, petet nou ki bezwen pran swen avek zot. Sa i bann keksoz ki neseser. Si ou annan bann responsabilite fanmir, petet ou pa pe fer sa kantite ki ou ti a kontan fer pour Zeova. Me pa dekouraze! Zeova i kontan ler ou pran swen avek ou fanmir. (1 Kor. 10:31) Si ou napa bann responsabilite fanmir ki ou bezwen fer toudswit, eski ou kapab ed bann frer ek ser malad, aze oubyen ki annan lezot bezwen? Oubyen eski ou kapab ed bann ki pran swen avek zot? Rod bann dan ou kongregasyon ki bezwen sa bann kalite led. Ler ou fer sa, petet ou pe travay avek Zeova pour reponn en lapriyer.​—1 Kor. 10:24. w18.08 22 ¶3, 5

Mazin lo legzanp Zozef. Parmi tou bann garson Zakob, Zozef ti son prefere. Sa ti fer son bann frer vreman zalou. Ler Zozef ti annan 17 an, zot ti vann li konman en lesklav. (Zen. 37:2-4, 23-28) Pour apepre 13 an, i ti soufer Lezip, premye kou konman en lesklav e pli tar konman en prizonnyen. Zozef ti vreman lwen avek son papa ki i ti kontan en kantite. Son sityasyon ti’n kapab fer li dezespere e ankoler, me pa sa ki i ti fer. Kwa ki ti ed li? Ler Zozef ti pe soufer dan prizon, i bezwen ki i ti pe konsantre lo lafason ki Zeova ti pe ed li. (Zen. 39:21; Ps. 105:17-19, NWT) Petet i ti osi mazin lo sa bann rev profetik ki i ti’n gannyen ler i ti ankor zenn e i kapab ki sa ti reasir li ki Zeova ti avek li. (Zen. 37:5-11) I tre probab ki i ti priy souvan e dir Zeova tou sa ki ti dan son leker. (Ps. 145:18) Zeova ti reponn lapriyer Zozef par donn li plis konfyans ki I ti pou “avek li” malgre nenport kwa ki arive. w18.10 23 ¶3-4

I kapab arive ki nou form bann pwennvi lo lezot dapre si zot ris oubyen pov. Me ki mannyer larises ouswa lapovrete en dimoun i kapab afekte lafason ki nou vwar li? Salomon ti ganny enspire pour ekri sa laverite ki dan teks pour ozordi. Ki nou aprann avek sa proverb? Si nou pa fer atansyon, i kapab arive ki nou pou anvi fer zanmi avek bann frer ek ser ris e pa avek bann ki pov. Akoz i sitan danzere pour ziz dimoun dapre sa ki zot annan ouswa napa? Parski i kapab kree divizyon dan kongregasyon. Sa ti arive dan serten kongregasyon dan premye syek e disip Zak ti averti zot lo sa size. (Zak 2:1-4) Nou pa kapab les bann divizyon egziste dan nou kongregasyon. Annou fer sir ki nou evite ziz lezot dapre sa ki zot annan. w18.08 11-12 ¶8-10

Nou montre ki nou apresye lanmitye Zeova par lafason ki nou tret nou bann frer ek ser. Zot pour Zeova, zis parey nou nou pour li. Si nou rapel sa, nou pou toultan tret zot avek labonte ek lanmour. (1 Tesa. 5:15) Akoz sa i sitan enportan? Zezi ti dir: “Par sa, tou dimoun pou konnen ki zot mon disip, si zot annan lanmour antre zot.” (Zan 13:35) Malaki ti dir ki Zeova ti pe ‘port latansyon e ekout’ lafason ki son pep i tret kanmarad. (Mal. 3:16, NWT) Zeova “i konn sa bann ki pour li.” (2 Tim. 2:19) I konn tre byen tou sa ki nou dir e fer. (Ebr. 4:13) Zeova i vwar ler nou pa demontre labonte anver nou bann frer ek ser. Me nou kapab asire ki Zeova i osi vwar ler nou demontre lospitalite ek zenerozite, pare pour pardonnen e demontre labonte.​—Ebr. 13:16. w18.07 25 ¶15, 17

I byen pour nou reste pros avek Zeova. Napa personn ki pli pwisan, saz e annan plis lanmour ki li! Byensir, nou toultan anvi reste fidel avek li e reste lo son kote. (Ps. 96:4-6) Me serten ki ti ador Bondye pa ti reisi fer sa. Par egzanp, mazin legzanp Kaen. I pa ti ador bann fo bondye, me kantmenm sa Zeova pa ti aksepte son ladorasyon. Akoz non? Zeova ti vwar ki Kaen ti annan bann move tandans dan son leker. (1 Zan 3:12) Zeova ti averti Kaen: “Si ou fer sa ki byen, ou ava refer, si ou pa fer sa ki byen, pese pou dormi devan ou laport. Me ou, fodre ou kontrol li.” (Zen. 4:6, 7) Zeova ti pe fer kler ki si Kaen ti repantir e swazir pour lo kote Bondye, Bondye osi ti pou lo kote Kaen. Me Kaen pa ti ekout Bondye. w18.07 15 ¶1, 3; 16 ¶4

En fason enportan ki nou lalimyer i devret briye i par anons sa bon nouvel e fer disip. (Mat. 28:19, 20) Apard ki prese, nou kondwit osi i glorifye Zeova. Bokou dimoun i vwar nou ler nou pe prese. Ler nou fer en pti sourir e dir zot bonzour, sa i ed zot pour annan en bon pwennvi lo nou e lo sa Bondye ki nou adore. Zezi ti dir son bann disip: “Ler ou antre dan lakaz, dir tou dimoun ki reste la, ‘Ki lape i avek zot.’” (Mat. 10:12) Dan sa landrwa kot Zezi ti prese, i ti dan koutim bann dimoun pour envit bann dimoun ki zot pa konnen se zot. Dan bokou landrwa ozordi, sa i nepli le ka. Dimoun i souvandfwa per oubyen ankoler ler zot vwar en dimoun ki zot pa konnen devan zot laport. Me si nou amikal e zantiy, sa i kapab fer zot santi zot pli alez. Ler ou pe fer temwannyaz an piblik avek prezantwar, eski ou’n deza remarke ki si ou fer en pti sourir e dir dimoun bonzour dan en fason amikal, zot santi zot pli alez? w18.06 22 ¶4-5

Zapot Pyer ti’n abitye pas letan zis avek bann Zwif. Apre, Bondye ti fer li kler ki bann Kretyen pa devret fer lapreferans e alor, Pyer ti pres avek Korney ki ti en solda Romen. (Akt 10:28, 35) Apre sa, Pyer ti pas letan avek bann Kretyen non Zwif e manz ansanm avek zot. Me plizyer lannen pli tar dan lavil Antyos, i ti aret manz avek bann Kretyen non Zwif. (Gal. 2:11-14) Pol ti koriz Pyer e Pyer ti aksepte sa koreksyon. Ki mannyer nou konnen? Ler Pyer ti ekri son premye let pour bann Kretyen Zwif ek non Zwif ki ti reste Lazi Miner, i ti koz lo lenportans pour kontan tou nou bann frer ek ser. (1 Pyer 1:1; 2:17) I kler ki gras a legzanp Zezi, bann zapot ti aprann pour kontan “tou sort kalite dimoun.” (Zan 12:32; 1 Tim. 4:10) Menm si i ti pran letan, zot ti sanz zot fason vwar dimoun. Vi ki bann Kretyen in “devlop sa nouvo personnalite,” zot in aprann pour vwar tou dimoun egal, parey Bondye i vwar zot.​—Kol. 3:10, 11. w18.06 13 ¶15-16

En solda Romen ti met en proteksyon pour son pwatrin ki ti souvandfwa ganny fer avek bann plak feray orizontal. Tanzantan i ti bezwen verifye ki sa bann plak ti dan zot plas pour protez son leker ek lezot lorgann. Sa proteksyon pour nou pwatrin i reprezant bann standar drwat Zeova ki protez nou “leker,” setadir sa dimoun ki nou ete anndan. (Prov. 4:23) En solda pa ti pou zanmen fer lesanz sa proteksyon pour son pwatrin pour enn ki’n ganny fer avek en metal pli fay. Dan menm fason, nou pa ti pou zanmen fer lesanz bann standar drwat Zeova pour nou prop nide lo sa ki nou nou krwar i drwat. Nou zis napa ase lasazes pour protez nou prop leker. (Prov. 3:5, 6) Se pour sa rezon ki tanzantan nou bezwen verifye ki nou ‘proteksyon pour nou pwatrin’ i ankor pe protez nou leker. Anmezir ki nou lanmour pour bann laverite ki dan Parol Bondye i agrandi, nou vwar li pli fasil pour met nou ‘proteksyon pour nou pwatrin,’ setadir pour viv dapre bann standar drwat Bondye.​—Ps. 111:7, 8; 1 Zan 5:3. w18.05 22 ¶3, 4, 6; 23 ¶7

Malgre tou sa letan ki Moiz ti’n pran byen swen avek zot, lepep ti konplent. Zot pa ti konplent zis akoz i ti napa delo me osi akoz zot ti swaf, konmsi sa ti lafot Moiz. (Nom. 20:1-5, 9-11) Moiz ti pran lakoler e la i pa ti demontre ladouser. Olye demontre lafwa e koz avek sa ros parey Zeova ti’n demann li, Moiz ti koz avek lepep dan lakoler e i ti donn lenpresyon ki li menm ki ti pou fer en mirak. Apre, i ti tap sa ros de fwa e en kantite delo ti sorti. Lorgey ek lakoler ti fer li fer en gro fot. (Ps. 106:32, 33) Vi ki Moiz pa ti demontre limilite sa zour, i ti napa drwa antre dan Later Promiz. (Nom. 20:12) Nou aprann bann leson enportan atraver sa legzanp. Premyerman, nou bezwen toultan fer zefor pour kontinyen demontre limilite. Si nou pa fer sa, menm pour en pti moman, lorgey pou pran plas e i kapab fer nou dir oubyen fer en keksoz bet. Dezyenmman, ler nou anba presyon, sa i kapab afekte nou. Alor, nou bezwen fer zefor pour demontre limilite menm ler nou anba presyon. w19.02 12-13 ¶19-21

Eski i en fardo pour nou prese? Non. Apre ki Zezi ti koz lo legzanp sa pye rezen, i ti dir ki ler nou prese nou pou ganny son lazwa. (Zan 15:11) Ki mannyer sa i posib? Rapel byen ki dan sa legzanp, Zezi ti dir ki li i sa pye rezen e ki son bann disip i bann brans. (Zan 15:5) Bann brans i ganny delo ek mineral ki zot bezwen avek sa pye rezen si selman zot reste atase avek sa pye rezen. Dan menm fason, nou osi nou kapab annan menm kantite lazwa ki Zezi ti annan si selman nou reste ini avek li e swiv son lepa fidelman. Apre nou pou annan sa lazwa ki li i ti annan, sa lazwa ki nou gannyen ler nou fer lavolonte Bondye. (Zan 4:34; 17:13; 1 Pyer 2:21) Hanne, ki’n fer pionye pour plis ki 40 an, i dir, “Sa lazwa ki mon toultan gannyen apre predikasyon, i motiv mwan pour kontinyen dan servis Zeova.” Lazwa pou donn nou lafors pour kontinyen prese menm ler laplipar dimoun pa ekoute.​—Mat. 5:10-12. w18.05 9 ¶2; 12 ¶14

Zapot Pol ti en bon legzanp en dimoun ki ti donn lankourazman son bann frer. Lespri sen ti anvoy li pour al pres avek bann Grek, Romen ek lezot ki ti ador plizyer bondye. (Gal. 2:7-9) Pol ti vwayaz dan sa bann landrwa ki konmela i apel Latirki, ensi ki Lagres ek Itali. I ti pres avek bann non Zwif ki ti pe reste dan sa bann landrwa e i ti form bann kongregasyon Kretyen. Lavi pa ti fasil pour sa bann nouvo Kretyen. Dimoun dan zot prop pei ti persekit zot, alor zot ti bezwen lankourazman. (1 Tesa. 2:14) Apepre lannen 50, Pol ti ekri en let ankourazan pour sa nouvo kongregasyon Tesalonik. I ti dir: “Ler nou priy pour zot tou, nou touzour remersye Bondye. Parski nou touzour pe mazin zot travay fidel, zot dir travay avek lanmour e zot landirans.” (1 Tesa. 1:2, 3) I ti osi demann zot pour fortifye kanmarad e i ti ekri: “Kontinyen ankouraz kanmarad e batir kanmarad.”​—1 Tesa. 5:11. w18.04 19-20 ¶16-17

Zenn, ler ou konsantre lo fer plezir Zeova, ou pou anvi koz lo li avek lezot. Alor, sa travay predikasyon i irzan e i devret enn parmi bann keksoz pli enportan pour nou. Eski ou kapab met sa lobzektif pour pres pli souvan? Eski ou kapab fer pionye? Me ki ou kapab fer si ou pa tro kontan prese? Ki mannyer ou kapab eksplik ou bann krwayans pli byen? De keksoz pou ed ou: Prepar byen e pa zanmen aret koz lo sa ki ou konnen lo Zeova avek lezot. Ou kapab menm sirprann ki kantite ou pou kontan prese. Konmans par prepar en larepons pour serten kestyon ki ou bann kanmarad lekol i kapab demande, par egzanp, “Eski ou krwar ki Bondye i enterese avek nou soufrans?” I annan bann lartik lo jw.org ki kapab ed ou reponn sa kestyon. Ou pou vwar en led pour etidye ki annan pour tit “Eski Bondye i enterese avek nou soufrans?” Sa led pour etidye pou ed ou prepar ou prop larepons. w18.04 29-30 ¶10-11

Menm si Adan ek Ev ti annan en kantite laliberte, zot laliberte ti annan limit. Serten sa bann limit ti natirel pour zot. Par egzanp, pour kontinyen viv zot ti bezwen respire, manze e dormi. Eski sa ti vedir ki zot pa ti lib? Non. Anfet, Zeova ti fer sir ki ler zot pe fer sa bann keksoz, zot ere e satisfe. (Ps. 104:14, 15; Ekle. 3:12, 13) Zeova ti donn Adan ek Ev en lord spesifik. I ti dir zot fer zanfan, ranpli later e pran swen avek later. Eski sa lord ti pran zot laliberte? Pa ditou! Sa lord ti donn zot sa loportinite pour fer later antye vin en paradi e en landrwa kot zot ti kapab reste pour touzour avek zot zanfan parfe. Sa ti plan Bondye. (Ps. 127:3; Iza. 45:18) Si Adan ek Ev ti’n obei Zeova, zot ti pou’n kapab annan en lavi maryaz ek en fanmir ere pour touzour. w18.04 4 ¶7-8

Si nou annan pasyans avek bann dimoun dan teritwar, nou pa pou ekspekte ki zot konpran ouswa aksepte bann laverite dan Labib premye fwa ki zot tann li. Konman en legzanp, mazin lo ki mannyer nou kapab ed en dimoun pour konpran ki nou annan sa lespwar pour viv pour touzour dan en paradi lo later. En kantite i krwar ki ler en dimoun i mor, i pa pou kapab viv ankor ouswa ki tou bon dimoun i al dan lesyel. Annou vwar ki mannyer en frer i ed dimoun pour konpran ki nou annan sa lespwar pour viv pour touzour lo later. Premyerman, i lir Zenez 1:28. Apre i demann sa met lakour kote Bondye ti anvi bann imen i viv e ki kalite lavi i ti anvi zot annan. Laplipar dimoun i dir, “Lo later e i ti anvi ki zot ere.” Apre sa, sa frer i lir Izai 55:11 e i demann zot si plan Bondye in sanze. Souvandfwa, sa met lakour pou dir non. Finalman, sa frer i lir Psonm 37:10, 11 (NWT) e i demande ki mannyer imen pou viv a lavenir. An servan Labib dan sa fason, i’n ed en kantite dimoun pour konpran ki Bondye i ankor oule ki bann bon dimoun i viv pour touzour dan en Paradi lo later. w19.03 24 ¶14-15; 25 ¶19

Zeova ti fer kler ki i anvi ki nou ekout e obei parol son Garson. Zezi ti ansenny son bann disip ki mannyer pour pres sa bon nouvel e plizyer fwa i ti fer zot rapel ki zot bezwen kontinyen veye. (Mat. 24:42; 28:19, 20) I ti osi ankouraz zot pour fer bokou zefor e pour pa zanmen abandonnen. (Lik 13:24) Zezi ti fer resorti ki i vreman enportan pour son bann disip kontan kanmarad, reste ini e pour obei son bann komannman. (Zan 15:10, 12, 13) Sa konsey ti itil dan letan Zezi e i ankor itil ozordi. Zezi ti dir: “Tou sa ki dan kote laverite i ekout mwan.” (Zan 18:37) Nou montre ki nou pe ekout Zezi ler nou “kontinyen siport kanmarad e pardonn kanmarad volonterman.” (Kol. 3:13; Lik 17:3, 4) Nou osi montre ki nou pe ekout li ler nou anons sa bon nouvel avek devouman “dan letan favorab e dan letan difisil.”​—2 Tim. 4:2. w19.03 10 ¶9-10