Avril

Me nou, eski nou pans parey Zeova ouswa parey bann dimoun dan sa lemonn? Konman Kretyen, nou travay dir pour fer sir ki nou aksyon i fer plezir Bondye. Me ki nou pou dir lo nou fason panse? Eski nou pe esey annan menm fason panse avek Zeova, savedir pour vwar keksoz parey Zeova i vwar? I demann bokou zefor pour fer sa. Par kont, i vreman fasil pour annan menm fason panse avek dimoun dan sa lemonn, parski leta lespri sa lemonn i partou. (Efe. 2:2) Osi, dimoun dan sa lemonn i souvandfwa konsantre lo zot menm e nou kapab ganny tante pour mazin parey zot. I difisil pour annan menm fason panse avek Zeova, me i vreman fasil pour mazin parey bann dimoun dan sa lemonn. Si nou les sa lemonn enfliyans nou fason panse, i tre probab nou pou vin egois e anvi desid pour nou menm kwa ki byen e kwa ki mal. (Mark 7:21, 22) Alor i vreman enportan ki nou aprann pour “mazin parey Bondye,” pa “parey en zonm.” w18.11 21 ¶1; 22 ¶3-4

Trwa fwa, Zeova ti koz direkteman depi lesyel pour fer son Garson konnen ki i kontan li. Sa ti’n bezwen ankouraz Zezi en kantite! Zis apre ki Zezi ti batize dan Larivyer Zourden, Zeova ti dir sa ki dan nou teks pour ozordi. I paret ki zis Zan ki batize ki ti tann sa parol. Apre sa, apepre enn an avan Zezi i mor, trwa son bann zapot ti tann Zeova dir sa lo Zezi: “Sa i mon garson ki mon kontan, sa enn ki mon’n aprouve. Ekout li.” (Mat. 17:5) Finalman, detrwa zour avan lanmor Zezi, Zeova ti koz avek son Garson ankor enn fwa depi lesyel. (Zan 12:28) Zezi ti konnen ki dimoun ti pou dir ki i koz an mal lo Bondye e ki i ti pou mor en lanmor ki anmenn laont. Toudmenm, i ti priye ki lavolonte Bondye i ganny fer e non pa sa ki pour li. (Mat. 26:39, 42) “I pa ti pran kont laont pour mor lo en poto martir,” parski i ti anvi ganny rekonnet par son Papa e non pa par sa lemonn.​—Ebr. 12:2. w18.07 7-8 ¶15-16

Zis apre ki Zezi ti’n entrodwi Repa Senyer, i ti demontre en kantite kouraz. Akoz nou dir sa? Zezi ti pare pour fer lavolonte son Papa, menm si i ti konnen ki i ti pou ganny kondannen amor pour swadizan koz kont Bondye, en keksoz ki ti vreman fer onte. (Mat. 26:65, 66) Zezi ti reste fidel pour onor non Zeova, siport drwa Zeova pour dirize e donn bann imen ki repantir sa loportinite pour viv pour touzour. An menm tan, Zezi ti prepar son bann disip pour sa ki zot ti pe al pas atraver. Zezi ti osi demontre kouraz par met dekote tou son traka e konsantre lo bezwen son bann zapot fidel. Apre ki Zida ti’n ganny demande pour ale, Zezi ti entrodwi sa repa senp avek bann ki ti pou vin bann Kretyen swazir. Sa repa ti pou fer son bann disip swazir rapel bann byenfe ki disan Zezi ek sa nouvo lalyans i anmennen.​—1 Kor. 10:16, 17. w19.01 22 ¶7-8

An retour, Papa Zezi ti koze dan lesyel e dir: “Mon’n glorifye li e mon pou glorifye li ankor.” Lespri Zezi ti fatige parski i ti annan en gro responsabilite. I ti konnen ki i pe al ganny fwete e pas atraver en lanmor kriyel e ki i ti pou bezwen reste fidel anver Zeova. (Mat. 26:38) Pli enportan ki tou, Zezi ti anvi glorifye non son Papa. Zezi ti ganny akize konmkwa ki i ti’n koz kont Bondye e i ti enkyet ki son lanmor ti pou anmenn repros lo Bondye. Parey Zezi, i kapab ki nou osi nou enkyet konsernan repros ki’n ganny anmennen lo non Zeova. Petet nou osi nou sibir bann lenzistis parey Zezi. Oubyen i kapab ki nou ganny afekte avek bann fo zistwar ki bann opozan i fannen lo nou. Petet nou mazin lo repros ki sa bann zistwar i anmennen lo non Zeova. Dan bann letan koumsa, sa ki Zeova ti dir i donn nou bokou rekonfor. Zeova pou toultan glorifye son non.​—Ps. 94:22, 23, NWT; Iza. 65:17. w19.03 11-12 ¶14-16

Bann disip Zezi ti dan sok! Zot ti krwar ki Zezi ti pou retabli rwayonm Izrael, me Zezi ti dir ki byento i ti pou soufer e mor. Zapot Pyer ti koz premye: “Ou bezwen bon avek ou lekor Senyer, sa pa pou zanmen ariv avek ou.” Zezi ti reponn: “Pas deryer mwan Satan! Ou parey en ros dan mon semen, parski ou pa mazin parey Bondye me plito parey en zonm.” (Mat. 16:22, 23, not; Akt 1:6) Ler Zezi ti dir sa, i ti fer kler ki fason panse Zeova i diferan avek bann nide sa lemonn kontrole par Satan. (1 Zan 5:19) Pyer ti ankouraz Zezi pour annan sa menm latitid egois ki en kantite dimoun dan sa lemonn i annan. Larepons Zezi i montre klerman ki i ti aksepte fason panse Zeova e rezet fason panse sa lemonn konpletman. w18.11 21 ¶1-2

Imazin sa ki Zeova i vwar ler plizyer milyon dimoun dan lemonn pe zwenn ansanm pour selebre Repa Senyer. I pa get zis sa gran kantite dimoun me i remark sak endividi ki la prezan. Par egzanp, i vwar tou sa bann ki fidelman asiste Memoryal tou le-z-an. Parmi zot i annan bann dimoun ki asiste Memoryal menm si zot pe fer fas avek persekisyon. Lezot pa asiste renyon regilyerman, me pour zot, Memoryal i vreman enportan alor zot touzour prezan. Zeova i osi vwar sa bann ki vin Memoryal pour premye fwa, petet akoz zot enterese pour konnen kwa ki pase pandan sa renyon. Vreman, Zeova i kontan pour vwar sa kantite dimoun ki pe asiste Memoryal. (Lik 22:19) Kantmenm sa, se rezon akoz zot asiste Memoryal ki pli enportan pour li. Eski nou enpasyan pour ganny ansennyen par Zeova ek son lorganizasyon?​—Iza. 30:20; Zan 6:45. w19.01 26 ¶1-3

Zezi ti pare pour mor pour son bann disip e osi pour viv sak zour dan en fason kot i ti met zot lentere avan sa ki pour li. Par egzanp, i ti zwenn avek son bann disip menm si i ti fatige fizikman oubyen i ti pe soufer emosyonnelman. (Lik 22:39-46) I ti konsantre lo sa ki i ti kapab donn lezot, pa lo sa ki lezot ti kapab donn li. (Mat. 20:28) Nou form parti sa sel lasosyasyon frer ek ser kot i annan vre lanmour e nou kontan pas en kantite letan pour envit bann nouvo pour zwenn ansanm avek nou. Par kont, nou enterese pour ed “sirtou nou bann frer ek ser dan lafwa” ki’n vin inaktif. (Gal. 6:10) Nou montre ki nou kontan zot par ankouraz zot pour asiste renyon, espesyalman Memoryal. Parey Zeova ek Zezi, nou vreman kontan ler bann ki inaktif i retourn kot Zeova.​—Mat. 18:14. w19.01 29 ¶12, 14; 30 ¶15

Pour entrodwir Memoryal son lanmor, Zezi ti servi sa dipen Lapak ek diven ki ti deza la. Zezi ti dir son bann zapot ki sa de keksoz senp i reprezant son lekor parfe ek disan ki byento i ti pou ofer. Petet, bann zapot pa ti sirprann ki sa nouvo repa ti sitan senp. Akoz? Plizyer mwan pli boner, kot son bann bon zanmi, Lazar, Mart ek Mari, Zezi ti konmans ansennyen. Mart ti la me i ti okipe pe fer en gran repa pour son envite spesyal. Ler Zezi ti remark sa, i ti zantiman koriz Mart e ed li realize ki i pa toultan neseser pour fer en gran repa. (Lik 10:40-42) Aprezan, Zezi i aplik son prop konsey. I pa ti reste bokou letan avan son lanmor, alor i ti fer en repa Memoryal senp. w19.01 20-21 ¶3-4

Zeova ti donn Zezi loner dan en fason ki i pa ti pe ekspekte. Ler Zeova ti resisit Zezi, i ti donn li “en pozisyon pli siperyer” dan lesyel. I ti osi donn Zezi lavi imortel dan lesyel, en keksoz ki personn pa ti’n deza gannyen avan! (Fili. 2:9; 1 Tim. 6:16) Pa sa i en fason merveye pour Zeova rekonpans Zezi pour son servis fidel! Kwa ki pou ed nou konsantre lo ganny laprouvasyon Zeova e non pa laprouvasyon sa lemonn? Nou devret konsantre lo lefet ki Zeova i toultan montre ki i rekonnet son bann serviter fidel e ki i souvan rekonpans zot dan bann fason ki zot pa pe ekspekte. Nou pa kapab konn tou fason ki Zeova pou beni nou a lavenir! Me pour lemoman, anmezir ki nou andir bann problenm ek difikilte dan sa move lemonn, nou bezwen rapel ki sa lemonn pou disparet. (1 Zan 2:17) De lot kote, nou Papa ki kontan nou, pa pou zanmen oubliy nou travay ek lanmour ki nou’n demontre pour son non, parski i “pa enzis.”​—Ebr. 6:10. w18.07 8 ¶17-18

Pandan sa dernyen repa ki Zezi ti pran avek son bann zapot, i ti trakas konsernan zot linite. Ler i ti pe fer lapriyer ansanm avek zot, i ti dir ki i anvi ki son bann disip i vin en sel, andotmo ki zot ini, zis parey li ek son Papa zot ini. Si bann disip Zezi ti ini, sa ti pou en laprev pour lezot ki Zeova ti’n anvoy Zezi lo later. Dimoun ti pou konnen lekel bann vre disip Zezi par zot lanmour pour kanmarad e sa lanmour ti pou fer zot pli ini. (Zan 13:34, 35) Nou kapab konpran akoz Zezi ti koz bokou konsernan linite sa zour swar. I ti’n remarke ki son bann zapot pa ti konpletman ini. Par egzanp, ankor enn fwa bann zapot ti dispit antre zot konsernan “lekel parmi zot ki ti pli gran.” (Lik 22:24-27; Mark 9:33, 34) En lot fwa, Zak ek Zan ti’n demann Zezi pour donn zot sa plas pli enportan dan Rwayonm lesyel akote li.​—Mark 10:35-40. w18.06 9 ¶1-2

Zeova i anvi ki bann koup marye i kontan kanmarad en kantite e ki zot lanmour i sitan for ki i dire pour touzour. (Mat. 19:3-6) Adilter i enn parmi bann pli move keksoz ki en dimoun i kapab fer kont son konzwen. Sa i vreman en mank lanmour. Sanmenm sa, setyenm komannman ti defann komet adilter. (Det. 5:18) I en pese “kont Bondye” e i en keksoz vreman kriyel pour fer kont ou konzwen. (Zen. 39:7-9) En dimoun ki’n ganny tronpe i kapab soufer akoz sa traizon pour plizyer lannen. Zeova i osi vreman enterese avek byennet bann zanfan. Zeova ti demann paran pour pran swen avek zot zanfan fizikman e osi spirityelman. Bann paran ti bezwen servi tou loportinite pour ansenny zot zanfan pour kontan Zeova ek son Lalwa. (Det. 6:6-9; 7:13) Bann paran pa ti devret konsider zot zanfan konman en keksoz ki zot ti kapab neglize oubyen maltrete, me zot ti bezwen vwar zot zanfan konman en trezor oubyen en kado presye sorti kot Zeova.​—Ps. 127:3. w19.02 21 ¶5, 7

Zob ti reste fidel e san defo par konsantre lo lespwar ki Bondye ti pou beni li. I ti konnen ki Bondye ti vwar ki i ti reste fidel e san defo. Menm si i ti pas atraver en kantite leprev, i ti asire ki Zeova ti pou rekonpans li finalman. Sa konfyans ki i ti annan dan Zeova ti ed li pour reste fidel e san defo. Zeova ti sitan kontan ki Zob ti’n reste fidel avek li ki I ti beni li en kantite menm si i ti en dimoun enparfe. (Zob 42:12-17; Zak 5:11) Me Zob pou ganny plis benediksyon ankor a lavenir. Nou Bondye pa’n sanze. (Mal. 3:6) Si nou gard antet ki nou fidelite i annan valer pour Zeova, nou lespwar pour en zoli lavenir pou reste vivan. (1 Tesa. 5:8, 9) Parfwa, ou kapab ganny lenpresyon ki zis ou tousel ki fidel, me ou pa zanmen tousel. Avek ou, i annan plizyer milyon serviter Zeova ki fidel e ki pe gard zot lentegrite partou dan lemonn. Ou pou osi form parti bann msye ek madanm fidel, ki ti annan lafwa, ki ti gard zot lentegrite dan lepase, menm ler zot ti fer fas avek lanmor.​—Ebr. 11:36-38; 12:1. w19.02 7 ¶15-16

Anmezir ki sezon Memoryal i pase, i byen pour demann nou lekor sa bann kestyon: ‘Ki mannyer mon kapab demontre plis lanmour ankor parey Zezi? Eski mon met lentere mon bann frer ek ser Kretyen avan sa ki pour mwan? Eski mon ekspekte tro bokou avek mon bann frer ek ser oubyen mon konn zot limit?’ Annou toultan swiv legzanp Zezi e annan menm “santiman” avek lezot. Byento, nou pou nepli selebre Memoryal lanmor Kris. Ler Zezi i “vini” pandan gran ladetres, i pou rasanble “sa bann ki’n ganny swazir” e anmenn zot dan lesyel. La nou pou aret selebre Memoryal. (1 Kor. 11:26; Mat. 24:31) Menm ler Memoryal pou nepli ganny selebre, nou kapab asire ki pep Zeova pou toultan mazin sa repa senp ki reprezant sa gran limilite, kouraz ek lanmour ki’n ganny demontre par en imen. w19.01 25 ¶17-19

Annou pran legzanp nou lasante. Sa pou ed nou konpran lenportans pour vey byen sa ki nou ete anndan. Premyerman, pour nou reste an bonn sante, nou bezwen annan en bon ladyet e fer legzersis regilyerman. Pareyman, pour nou byen spirityelman, nou bezwen annan en bon ladyet spirityel e fer bann keksoz pour demontre nou lafwa dan Zeova regilyerman. Nou demontre lafwa dan Zeova ler nou aplik sa ki nou aprann e koz lo nou lafwa. (Rom. 10:8-10; Zak 2:26) Dezyenmman, nou kapab paret an bonn sante me anndan nou kapab malad san ki nou realize. Dan menm fason, ler nou get nou routin spirityel, nou kapab krwar ki nou lafwa i for me ki an realite, nou pe les bann move dezir devlop dan nou. (1 Kor. 10:12; Zak 1:14, 15) Pa bliye ki Satan i anvi enfliyans nou avek son fason panse. w19.01 15 ¶4-5

Nou kapab demann nou lekor: ‘Eski mon pe fer parey? Eski mon pe fer sa ki sa bon Samariten ti fer?’ (Lik 10:30-35) ‘Ler lezot i soufer, eski mon kapab fer en keksoz pour ed zot? Par egzanp, dan kongregasyon, eski mon kapab ed bann aze, bann vev ouswa bann zanfan ki zot paran pa servi Zeova? Eski mon kapab “koz dan en fason ki pou konsol bann ki dan depresyon”?’ (1 Tesa. 5:14; Zak 1:27) Ler nou pran pitye pour lezot, nou pe donnen e Zezi ti dir ki donnen i fer nou ere. En lot rezon i akoz nou konnen nou pe fer plezir Zeova. (Akt 20:35; Ebr. 13:16) Lerwa David ti dir sa konsernan en dimoun ki pran pitye: “[Zeova] i protez li, i gard li vivan e rann li ere lo later.” (Ps. 41:1, 2) Si nou pran pitye e demontre konpasyon anver lezot, Zeova osi pou pran pitye pour nou e nou kapab ere pour touzour.​—Zak 2:13. w18.09 18 ¶11-12

En ser fidel ki apel Yoshiko ti ganny en move nouvel. Son dokter ti dir li ki i annan zis detrwa mwan pour li viv. Ki mannyer i ti reazir? Yoshiko ti rapel enn son verse Labib prefere e sa i teks pour ozordi. Apre sa, dan en fason kalm, i ti dir son dokter ki i pa ti per akoz Zeova ti pe tyonbo son lanmen. Sa mesaz rekonfortan ki ganny trouve dan sa verse ti ed nou ser met tou son konfyans dan Zeova. Sa menm verse i kapab ed nou pour nou pa tro enkyet ler nou pe fer fas avek bann gro leprev. O konmansman, Zeova ti demann Izai pour ekri sa parol pour rekonfort bann Zwif ki ti pou ganny anmennen an egzil Babilonn. Par kont, Zeova ti osi fer sa menm mesaz ganny mete dan Labib pour ki i benefisye pa zis bann Zwif ki ti an egzil me osi tou son bann serviter. (Iza. 40:8; Rom. 15:4) Ozordi, nou pe viv dan “letan vreman difisil” e plis ki zanmen oparavan nou bezwen sa lankourazman ki dan liv Izai.​—2 Tim. 3:1. w19.01 2 ¶1-2

Si en koup i deside separe, zot pou ankor marye e zot pou ankor annan bann difikilte. Zapot Pol ti donn sa rezon pour en koup reste ansanm: “Sa msye ki pa krwar dan Bondye i ganny sanktifye akoz son madanm e sa madanm ki pa krwar dan Bondye i ganny sanktifye akoz sa frer, si non zot zanfan ti pou enpir, me aprezan zot sen.” (1 Kor. 7:14) Plizyer Kretyen ti deside pour reste avek zot konzwen ki pa ti servi Zeova menm si zot sityasyon ti vreman difisil. Pli tar, ler zot konzwen ti vin Temwen Zeova, zot ti vreman kontan ki zot ti’n fer sa sakrifis. (1 Kor. 7:16; 1 Pyer 3:1, 2) Ozordi dan lemonn antye i annan bokou maryaz ki pe reisi dan bann kongregasyon Kretyen. I tre probab ki ou kapab trouv bann koup marye ere dan ou kongregasyon, kot bann msye fidel i kontan zot madanm e zot madanm i annan respe pour zot. Zot tou zot montre ki maryaz i kapab ganny onore.​—Ebr. 13:4. w18.12 14 ¶18-19

Sa mo “Edenn” i vedir “Plezir” e sa zarden ti vreman en bon landrwa. I ti vreman zoli, i ti annan en kantite manze e bann imen ek zannimo ti viv anpe avek kanmarad. (Zen. 1:29-31) Sa mo Ebre pour “zarden” i ganny tradwir konman pa·raʹdei·sos an Grek. Sa Cyclopaedia par M’Clintock and Strong i dir ki ler en Grek i tann sa mo pa·raʹdei·sos, i pou imazin en gran zarden, byen zoli, ranpli avek bann gran pye dibwa ki prodwir en varyete fri. I osi annan bann pti larivyer prop avek zerb pe pouse tou dilon, kot bann antilop ek mouton i kapab manze e i en landrwa proteze kont danze. (Konpar Zenez 2:15, 16.) Zeova ti met Adan ek Ev dan sa kalite zarden, setadir en paradi. Me vi ki zot ti dezobei Zeova, zot ti perdi sa privilez pour zot ek zot zanfan viv dan Paradi. (Zen. 3:23, 24) Menm si i ti nepli annan okenn imen ki ti pe viv dan sa Paradi, i paret ki i ti ankor egziste ziska Deliz ki ti arive dan letan Noe. w18.12 4 ¶3-5

Bann paran i esey ansenny zot zanfan bann bon prensip. Si bann zanfan i swazir pour viv dapre bann bon prensip ki zot paran in ansenny zot, i annan plis sans ki zot pou fer bann bon desizyon e evit en kantite problenm, traka ek regre. Parey en bon paran, Zeova i anvi ki son bann zanfan i ganny sa pli bon lavi posib. (Iza. 48:18) Alor i ansenny nou bann prensip de baz konsernan moralite e ki mannyer nou devret tret lezot. I envit nou pour aprann vwar keksoz parey li e pour viv dapre son bann prensip. Sa pa priv nou. O kontrer, i fer nou pli saz e ed nou fer bann pli bon desizyon. (Ps. 92:5; Prov. 2:1-5; Iza. 55:9) Nou ankor kapab swazir sa ki nou prefere, me nou pou fer bann swa ki fer nou ere. (Ps. 1:2, 3) Ler nou annan menm fason panse avek Zeova, sa i benefisye nou dan plizyer fason! w18.11 23 ¶7-8

Pour kontinyen viv an armoni avek laverite, nou bezwen fer sir ki nou pa les bann dimoun ki pa servi Zeova enfliyans nou. Ler nou ti aprann laverite, nou relasyon avek nou fanmir ek zanmi ki pa Temwen ti sanze. Petet serten ti respekte nou nouvo krwayans, tandis ki lezot ti opoz nou. Nou fanmir, koleg travay ek kanmarad lekol i kapab esey fer nou partisip dan zot bann selebrasyon. Kwa ki kapab ed nou pour reziste presyon pour partisip dan bann koutim ek lafet ki pa fer plezir Zeova? Nou bezwen gard antet bann rezon akoz Zeova pa aksepte sa bann lafet. Nou kapab fer resers dan nou bann piblikasyon pour nou rapel ki mannyer serten sa bann lafet ti konmanse. Ler nou medit lo bann rezon ki Labib i donnen pour nou pa selebre sa bann lafet, nou asire ki nou pe viv an armoni avek sa ki “akseptab pour Senyer.” (Efe. 5:10) Si nou annan konfyans dan Zeova ek son Parol, nou pa pou trakas nou avek sa ki lezot i mazinen.​—Prov. 29:25. w18.11 12-13 ¶10, 12

Ler bann sanzman i ariv en sel kou dan lavi, nou kapab sitan enkyet ki nou mazin zis nou problenm. Sa ti’n kapab arive avek Zozef. Me olye fer sa, i ti swazir pour fer son mye dan sa sityasyon. Zis parey Zozef ti’n travay dir pour Potifar, i ti travay dir dan prizon pour fer nenport kwa ki zofisye prizon ti donn li pour fer. (Zen. 39:21, 22) Parey Zozef, nou kapab vwar nou dan en sityasyon ki nou pa vreman kapab kontrole. Me si nou annan pasyans e fer nou mye, Zeova pou beni nou. (Ps. 37:5, NWT) Menm ler nou santi nou konfize e enkyet, nou pa pou “dezespere.” (2 Kor. 4:8; not) Zeova pou avek nou, espesyalman si nou reste konsantre lo nou minister. w18.10 24-25 ¶11, 13

Ki mannyer ou santi ler en dimoun ki ou konnen e ki ou annan respe pour li i oubliy ou non oubyen pli pir ankor, i pa rekonnet ou? Sa i kapab vreman dekourazan. Akoz? Parski nou tou nou anvi ganny aksepte par lezot. Sa i en keksoz normal. Me nou anvi ki zot fer plis ki zis idantifye lekel nou. Nou anvi ki zot konnen ki kalite dimoun nou ete e ki bann keksoz ki nou’n akonpli. (Nom. 11:16, NWT; Zob 31:6, NWT) Me si nou pa fer atansyon, sa lanvi pour ganny apresye par lezot ki en keksoz normal, i kapab vin tro for. Lemonn Satan i kapab fer nou anvi vin en dimoun popiler e enportan. Si sa i arive, nou montre ki nou pa rekonnet e ador Zeova, nou Papa ki dan lesyel, parey i merite.​—Rev. 4:11. w18.07 3 ¶1-2

Nou pa sirprann ki Satan ek son bann demon i enfliyans bann dimoun ki annan pouvwar pour koz “mansonz.” (1 Tim. 4:1, 2) I pli pir ankor ler bann sef relizye i koz manti. Akoz? Parski si en dimoun i krwar zot bann fo lansennyman e fer bann keksoz ki Bondye i deteste, sa dimoun i kapab perdi sa loportinite pour viv pour touzour. (Ose. 4:9) Ler Zezi ti lo later i ti konnen ki bann sef relizye ti pe anbet bann dimoun. I pa ti ezite pour dir zot: “Maler lo zot, profeser lalwa ek Farizyen, ipokrit! akoz zot vwayaz lo lanmer ek later pour konverti en dimoun e ler i’n konverti, zot fer li riske ganny zete dan Zeenn,” setadir, destriksyon eternel. (Mat. 23:15; not) Zezi ti dir ki sa bann sef fo larelizyon ti zis parey zot papa Dyab, ki en “mertriye.”​—Zan 8:44. w18.10 4 ¶5-6

Ki Zezi ti pe esey dir? I ti azoute: “Zot devret kontan e dan lazwa, parski zot rekonpans i gran dan lesyel, akoz koumsanmenm ki zot ti persekit bann profet avan zot.” (Mat. 5:12) Ler bann zapot ti ganny bate e ganny lord pour aret prese, “zot ti kit Sannedren byen kontan.” Byensir, zot pa ti kontan sa bate. Me zot ti ere “akoz zot ti’n ganny konsidere diny pour ganny maltrete o non Zezi.” (Akt 5:41) Ozordi, pep Zeova osi i andir avek lazwa ler zot ganny persekite o non Zezi. (Zak 1:2-4) Parey bann zapot, nou pa kontan soufer ouswa ganny persekite. Me si nou reste fidel avek Zeova, i pou donn nou sa kouraz ki nou bezwen pour andire. Ler nou fer plezir Zeova, “sa Bondye ere,” nou kapab ere menm si nou ganny persekite ouswa nou fanmir i opoz nou.​—1 Tim. 1:11. w18.09 20 ¶18-20

Nou pe viv dan “bann dernyen zour” e en kantite dimoun pe telman soufer ki zot anvi abandonnen. (2 Tim. 3:1-5) Plis ki wit san mil dimoun i komet swisid tou le lannen, ki vedir en dimoun tou le 40 segonn. Malerezman, menm serten nou bann frer ek ser in santi koumsa e zot in pran zot prop lavi. Ozordi, en kantite nou bann frer ek ser pe fer fas avek bann sityasyon difisil e zot bezwen nou lanmour. Serten pe ganny sikannen oubyen persekite. Lezot pe ganny bouli ouswa pe ganny malparle dan zot landrwa travay e zot bezwen fer fas avek tousala. Oubyen zot senpleman epwize parski zot bezwen fer bann gran zournen travay ouswa zot annan bann travay ki met en ta presyon lo zot. I osi annan lezot ki annan bann problenm grav dan lafanmir. Petet zot in marye avek en dimoun ki pa servi Zeova e ki toultan kritik zot. Sa bann sityasyon ek lezot kalite presyon i fer ki bokou i santi ki zot nepli annan lafors e petet zot in menm konmans mazinen ki zot napa okenn valer. w18.09 9 ¶3, 5

Bann paran Kretyen i kapab travay avek Zeova ler zot ed zot zanfan pour annan bann lobzektif dan servis Zeova. En kantite paran in fer sa. Akoz sa, zot bann garson ek fiy in pli tar deside servi Zeova a plen tan, menm lwen avek lakour. Serten pe servi konman misyonner, lezot konman pionye kot i annan en gran bezwen pour plis proklanmater e lezot pe servi dan Betel. Byensir, ler bann zanfan i lwen, bann paran pa kapab pas sa kantite letan ki zot ti ava kontan avek zot. Me zot pa mazin zis zot prop lentere, o kontrer zot ankouraz zot zanfan pour kontinyen servi Zeova nenport landrwa kot zot ete. Akoz? Parski zot vreman kontan ki zot zanfan pe met Zeova premye dan zot lavi. Plizyer parmi sa bann paran i annan menm santiman avek Ana ki ti dir ki i “pret” son garson Samyel avek Zeova. Zot santi ki i en gran loner pour travay avek Zeova dan sa fason.​—1 Sam. 1:28. w18.08 22 ¶4

Zezi pa ti dir ki sa ti pou enposib. I ti osi dir: “Ere zot ki pov, parski Rwayonm Bondye i pour zot.” (Lik 6:20) Me sa pa ti vedir ki tou dimoun pov ti pou ekout Zezi e ganny bann benediksyon spesyal. I ti annan en kantite dimoun pov ki pa ti swiv Zezi. Nou pa kapab ziz relasyon en dimoun avek Zeova dapre bann keksoz materyel ki i annan. Parmi pep Bondye, i annan bann frer ek ser ki ris ek bann ki pov. Me zot tou zot kontan Zeova e servi li avek en leker konplet. Labib i demann bann dimoun ris pour “pa met zot konfyans dan larises ki tanporer, me plito pour met zot konfyans dan Bondye.” (1 Tim. 6:17-19) Parol Bondye i osi averti tou serviter Zeova, ki swa zot ris ouswa pov, ki i danzere pour kontan larzan. (1 Tim. 6:9, 10) Ler nou vwar nou bann frer ek ser parey Zeova i vwar zot, nou pa pou ziz zot dapre sa ki zot annan ouswa napa. w18.08 12-13 ¶11-12

Nou anvi montre Zeova ki kantite nou rekonesan ki nou pour li konman son pep. Nou konnen ki ler nou ti dedye nou lavi avek li, sa ti sa pli bon swa ki nou ti’n kapab fer. Alor nou determinen pour evit tou keksoz ki Zeova i deteste. Nou osi kontan e respekte nou bann frer ek ser parski zot osi zot pour Zeova. (Rom. 12:10) Labib i promet: “[Zeova] pa pou abandonn son pep.” (Ps. 94:14) Sa i en garanti. Nenport kwa ki arive, Zeova pou avek nou. Menm si nou mor, i pa pou oubliy nou. (Rom. 8:38, 39) “Ki swa nou viv ouswa nou mor, nou pour Zeova.” (Rom. 14:8) Nou pe esper sa letan kot Zeova pou resisit tou son bann zanmi fidel ki’n mor. (Mat. 22:32) Menm ozordi nou annan en kantite zoli kado sorti kot nou Papa. Parey Labib i dir, “byennere sa nasyon ki annan [Zeova] konman son Bondye! I byennere sa pep ki SENYER in swazir pour son patrimwann!”​—Ps. 33:12. w18.07 26 ¶18-19

Serten i kapab mazinen ki sa bann keksoz tel parey ledikasyon, metye ouswa karyer i personnel, alor zot devret annan sa laliberte pour swazir sa ki zot anvi, tan ki sa pa fatig zot konsyans. Zot kapab pe mazin parol Pol: “Mon pa oule ki mon laliberte i ganny zize par konsyans en lot dimoun.” (1 Kor. 10:29) Menm si nou annan sa laliberte pour fer sa bann swa personnel, nou devret rapel ki nou laliberte i annan limit e ki tou nou desizyon i annan konsekans. Sanmenm sa Pol ti dir sa parol ki dan teks pour ozordi. Alor menm si nou annan sa laliberte pour fer bann swa dan bann keksoz personnel, sa ki nou anvi i pa sa keksoz pli enportan. w18.04 12 ¶10

En Kretyen ozordi i kapab dir ki i ador Zeova me kan an realite i pe fer bann keksoz ki Zeova pa kontan. (Zid 11) Petet i aktif dan predikasyon e asiste renyon regilyerman. Me an menm tan, i kapab ki i pe pli mazin lo bann keksoz imoral ki i anvi fer, lo satisfer son vorasite oubyen lo son bann santiman laenn. (1 Zan 2:15-17; 3:15) Sa bann panse i kapab fer li fer pese. I kapab ki lezot dimoun pa konn sa ki nou panse ouswa fer, me Zeova i konnen. I konnen si nou pa konpletman lo son kote. (Zer. 17:9, 10, NWT) Menm ler nou fer bann fot, Zeova pa abandonn nou fasilman. Si nou pe al dan en move direksyon, Zeova i donn nou sa lenvitasyon: “Retourn kot mwan.” Zeova i konpran ki nou annan bann febles ki nou bezwen lager avek. Me i anvi ki nou reste ferm e opoz sa ki mal. (Iza. 55:7) Si nou fer sa, i promet ki i pou ed nou e donn nou sa lafors ki nou bezwen pour sirmont nou bann move dezir.​—Zen. 4:7. w18.07 16 ¶5-6