Me

Resaman, bokou dimoun in bezwen sove, kit zot pei e aprezan zot pe viv dan lezot pei konman bann refizye. Ou kapab aprann ki mannyer pour dir bonzour dan zot langaz. An plis ki sa, aprann enn de fraz ki pou kapab fer zot anvi arete e koz avek ou. Apre, ou kapab montre zot bann video ek piblikasyon ki disponib dan zot langaz lo jw.org. Zeova i donn nou egzakteman sa ki nou bezwen pour vin efikas dan predikasyon. Par egzanp, sa ki nou aprann dan Renyon Nou minister ek lavi Kretyen i ed nou pour vin pli konfidan pour fer bann retourn vizit e konmans bann letid Labib. Ou kapab montre ou zanfan konman pour reponn dan zot prop mo. Serten dimoun in ganny atire ver laverite ler zot ti tann bann zanfan eksprim zot lafwa dan en fason senp e senser.​—1 Kor. 14:25. w18.06 22-23 ¶7-9

I byen pour rapel ki nou tou nou pa ti konn Bondye. (Efe. 2:12) Me avek lanmour, Zeova ti atir nou anver li. (Ose. 11:4; Zan 6:44) Apre, Kris in resevwar nou. I’n fer li posib pour nou form parti fanmir Bondye. Menm si nou enparfe, Zezi in resevwar nou, alor nou pa devret zanmen menm mazin pour rezet personn! Pli nou apros ver lafen sa move lemonn, pli dimoun pou vin pli divize e annan plis prezidis ek laenn. (Gal. 5:19-21; 2 Tim. 3:13) Me konman pep Zeova, nou rod “lasazes ki sorti dan lesyel” ki ed nou pour pa fer lapreferans e promot lape. (Zak 3:17, 18) Nou kontan pour fer zanmi avek dimoun sorti dan lezot pei, pour aksepte zot fason fer keksoz e petet menm pour aprann zot langaz. Ler nou fer sa, nou ganny lape ki “parey en larivyer” e lazistis ki “parey bann laroul dan lanmer.”​—Iza. 48:17, 18. w18.06 14 ¶18-19

En solda Romen pa ti kapab al dan batay san son soulye. Sa soulye ti ganny fer avek trwa lepeser lapo zannimo, alor i ti vreman for. Me sa soulye ti osi konfortab, alor en solda ti kapab marse san per ki i ti pou glise. Sa soulye ki bann solda Romen ti mete ti ed zot pour reisi dan lager, tandis ki sa soulye senbolik ki nou mete i ed nou pour “anons sa bon nouvel lape.” (Iza. 52:7; Rom. 10:15) Kantmenm sa, par ler i demann bokou kouraz pour anons sa mesaz. Bo ki annan 20 an, i dir: “Mon ti per pour pres avek bann manrmay dan mon laklas. Mon krwar mon ti en pti pe anbarase. Ler mon mazin lo la, mon ti napa okenn rezon pour santi koumsa. Aprezan mon kontan pres avek lezot zenn mon laz.” En kantite zenn Kretyen in vwar ki zot pli konfortab pour prese si zot prepar davans. w18.05 23-24 ¶9-11

Zezi ti dir son bann zapot: “Mon donn zot mon lape.” (Zan 14:27) Ki mannyer lape Zezi i kapab ed nou pour kontinyen prese? Ler nou kontinyen prese, nou anpe akoz nou konnen ki nou pe fer Zeova ek Zezi ere. (Ps. 149:4; Rom. 5:3, 4; Kol. 3:15) Apre ki Zezi ti’n dir son bann zapot ki i anvi ki zot annan lazwa, i ti eksplike akoz i enportan pour zot demontre lanmour ki pa egois. (Zan 15:11-13) Apre i ti dir: “Mon apel zot zanmi.” Pa i en zoli kado ki nou zanmi avek Zezi! Me ki mannyer bann zapot ti kapab reste zanmi avek li? Zezi ti dir zot “kontinyen raport fri.” (Zan 15:14-16) Andotmo, kontinyen prese. Apepre de-z-an avan sa, Zezi ti’n dir son bann zapot al prese e dir: “Rwayonm lesyel in aprose.” (Mat. 10:7) I pour sa rezon, ki sa zour swar avan i mor, Zezi ti ankouraz son bann disip pour andire dan sa travay predikasyon.​—Mat. 24:13; Mark 3:14. w18.05 13 ¶15-16

Zenn, deside konsantre lo fer plezir Zeova e fikse bann lobzektif spirityel. Me en kantite zenn ou laz i zis anvi diverti kontan. I tre probab ki zot pou envit ou pour fer sa ki zot pe fer. To ou tar, ou pou bezwen fer lezot konnen ki kantite i enportan pour ou atenn ou bann lobzektif. Pa bezwen les lezot fer ou oubliy ou bann lobzektif. Alor, ki ou kapab fer pour reste for ler lezot i met presyon lo ou pour fer sa ki zot pe fer? Evit bann sityasyon kot i pou difisil pour reziste presyon. (Prov. 22:3) Mazin lo bann move konsekans ki i annan ler ou fer sa ki mal. Avek limilite, admet ki ou bezwen bann bon konsey. Ekout sa ki ou paran ek lezot frer ek ser eksperyanse dan kongregasyon i dir ou. (1 Pyer 5:5, 6) Eski ou annan ase limilite pour aksepte bon konsey? w18.04 31 ¶14-16

Dan son mesaz pour serten kongregasyon Lazi Miner, Zezi ti eksprim son lapresyasyon pour travay ki son bann disip ti fer. Par egzanp, i ti konmans son mesaz pour kongregasyon Tyatir par dir: “Mon konn sa ki ou fer, ou lanmour, lafwa, ou minister ek landirans e ki tou dernyenman, ou’n fer plis ki o konmansman.” (Rev. 2:19) Zezi pa ti zis mansyonnen ki zot pe fer plis ki oparavan me i ti osi felisit zot pour zot bann bon kalite ki ti motiv zot pour fer sa ki byen. Kantmenm Zezi ti bezwen donn konsey bann Kretyen Tyatir, i ti konmans e termin son mesaz avek bann parol lankourazman. (Rev. 2:27, 28) Zis mazin lotorite ki Zezi i annan konman sef tou bann kongregasyon. I pa bezwen remersye nou pour travay ki nou fer pour li. Kantmenm sa, i fer sir ki i toultan eksprim son lapresyasyon anver nou. Pa sa i en zoli legzanp pour bann ansyen! w19.02 16 ¶10

Dan premye syek, Zeova ti servi konsey direkter pour ankouraz tou Kretyen, enkli bann ki ti pe dirize dan kongregasyon. Zot ti anvoy Pyer ek Zan, ki ti form parti konsey direkter, pour al priy pour bann nouvo Kretyen pour ki zot ganny lespri sen. (Akt 8:5, 14-17) Filip ek sa bann nouvo frer ek ser ti vreman ganny ankouraze avek sa sipor ki konsey direkter ti donn zot! Ozordi, Konsey Direkter Temwen Zeova i donn lankourazman bann Betelit, bann serviter spesyal a plen tan ki fer zot servis dan predikasyon e nou tou. Parey bann frer dan premye syek, nou kontan sa lankourazman ki nou gannyen! Deplis, pour ankouraz bann ki’n kit laverite pour retournen, Konsey Direkter ti lans sa brosir Retourn kot Zeova an 2015. w18.04 20 ¶18-20

Serten dimoun i krwar ki i ti pou pli bon si nou ti annan laliberte san limit. Me eski i ti pou vreman leka? Eski ou kapab imazinen ki mannyer lemonn ti pou ete si i ti napa okenn limit? The World Book Encyclopedia i dir ki lalwa tou bann sosyete ki organize i konplike parski zot bezwen protez e an menm tan limit laliberte bann dimoun. Sa pa toultan fasil. Sanmenm sa nou vwar bokou lalwa e sa kantite avoka ek ziz ki esey eksplik e aplik zot. Alor, pour nou annan vre laliberte nou bezwen fer de keksoz. Premyerman, nou bezwen aksepte laverite ki Zezi ti ansennyen. Dezyenmman, nou bezwen vin son disip. Ler nou fer sa bann keksoz nou pou ganny vre laliberte. Me avek kwa ki nou bezwen ganny libere? Zezi ti dir: “Tou sa ki fer pese i lesklav pese.” I ti osi dir: “Si Garson i liber zot, zot pou vreman lib.”​—Zan 8:34, 36. w18.04 7 ¶13-14

Nou kontan pas letan avek bann dimoun ki pran an konsiderasyon nou santiman ek byennet. Zot esey met zot lekor dan nou plas pour konpran sa ki nou pe panse e santi. Zot mazin davans lo sa ki nou bezwen e zot ofer zot led, parfwa, menm avan ki nou demann zot. Nou apresye bann dimoun ki demontre ki zot annan “menm . . . santiman” ki nou nou annan. Konman Kretyen, nou tou nou anvi konpran santiman kanmarad. Me pa toultan ki i fasil pour fer sa. Akoz? En rezon i akoz nou enparfe. (Rom. 3:23) Laplipar ditan nou tant pour mazin zis nou prop lekor. Alor nou bezwen fer bokou zefor pour mazin lezot. Osi, kekfwa serten parmi nou i vwar li difisil pour konpran santiman lezot akoz lafason ki nou’n ganny elve ouswa sa ki nou’n pas atraver dan lepase. Finalman, i kapab ki nou ganny enfliyanse par latitid bann dimoun otour nou. Dan sa bann dernyen zour, en kantite dimoun pa pran an konsiderasyon santiman lezot. O kontrer, zot “zis kontan zot prop lekor.” (2 Tim. 3:1, 2, not) Me si nou swiv legzanp Zeova ek son Garson Zezi Kri, nou pou pli byen konpran santiman lezot. w19.03 14 ¶1-3

Sa dernyen komannman dan sa Dis Komannman i defann dimoun vin groker oubyen anvi keksoz ki pour lezot. (Det. 5:21; Rom. 7:7) Zeova ti donn sa lalwa pour ansenny en leson enportan: Son pep i devret vey byen zot leker, sa i vedir vey zot panse, santiman ek rezonnman. I konnen ki bann move aksyon i konmans avek bann move panse ek santiman. Par egzanp, Lerwa David ti tonm dan sa latrap. An zeneral, i ti en bon dimoun. Me en zour, i ti anvi madanm en lot zonm. Sa move dezir ti fer li fer pese. (Zak 1:14, 15) David ti fer adilter, i ti esey anbet msye sa madanm e apre i ti fer touy li. (2 Sam. 11:2-4; 12:7-11) Zeova i vwar plis ki zis laparans en dimoun. I vwar sa ki nou vreman ete dan nou leker. (1 Sam. 16:7) Napa okenn panse, santiman ek okenn aksyon ki kasyet devan li. I rod sa ki bon dan nou e i ankouraz nou. I oule ki nou rekonnet e osi kontrol nou bann move panse avan ki zot vin bann move aksyon.​—2 Kron. 16:9; Mat. 5:27-30. w19.02 22 ¶9, 11

Labib i montre ki Moiz “ti en zonm avek bokou limilite, plis ki nenport ki zonm lo later.” (Nom. 12:3) Eski sa i vedir ki i ti fay, pa kapab fer desizyon e per pour fer fas avek bann ki ti opoz li? Petet, koumsanmenm ki serten pou dekri en dimoun ki annan limilite. Me sa pa vre. Moiz ti en serviter Zeova ki ti for, i ti determinen e i ti annan kouraz. Avek led Zeova, i pa ti per pour al kot sa dirizan Ezipsyen ki ti pwisan, i ti diriz apepre 3 milyon dimoun dan dezer e i ti ed nasyon Izrael pour ganny laviktwar lo zot lennmi. I vre ki nou pa pou pas dan menm problenm parey Moiz, me sak zour, nou rankontre dimoun oubyen sityasyon ki fer li difisil pour demontre limilite. Toudmenm, nou annan bon rezon pour devlop sa kalite. Zeova i promet ki “bann dimoun ki annan limilite pou ganny donnen later.” (Ps. 37:11, NWT) Eski ou ti pou dir ki ou annan limilite? Eski lezot ti pou dir ki ou annan sa kalite? w19.02 8 ¶1-2

Zeova in donn bann imen en keksoz spesyal. Sa i nou konsyans. Ki mannyer nou konnen ki Adan ek Ev ti annan en konsyans? Apre ki zot ti’n dezobei Bondye, zot ti al kasyet pour li pa vwar zot. Zot konsyans ti sarze. Nou konsyans i sa abilite ki ed nou konnen kwa ki byen e kwa ki mal e ki kapab gid nou dan lavi. En dimoun ki son konsyans pa’n ganny byen antrennen i parey en bato ki son konpa in kase. Divan ek kouran i kapab trenn sa bato dan en move direksyon. Me en konpa ki mars byen pou ed sa kaptenn gard sa bato dan sa bon direksyon. Pareyman, si nou byen antrenn nou konsyans, i kapab vin en bon gid pour nou. Si nou konsyans pa ganny byen antrennen, i pa pou kapab averti nou pour anpes nou fer sa ki mal. (1 Tim. 4:1, 2) I menm kapab fer nou krwar ki “sa ki mal [i] byen.” w18.06 15-16 ¶1-3

Nou bezwen rekonnet e rezet bann panse sa lemonn ki ganny promote dan bann fason ki pa sitan evidan. Par egzanp, serten rapor dan nouvel i ganny prezante dan en fason ki siport serten lopinyon politik. Osi, serten bilten dan nouvel i promot bann lobzektif ek lakonplisman ki sa lemonn i admire. Serten film ek liv i promot sa fason panse ki mwan ek mon fanmir ki pas avan e zot fer sa fason panse paret rezonnab, atiran e menm byen. Par kont, sa bann pwennvi pa pran kont sa ki Labib i dir. Labib i dir ki nou ek nou fanmir pou vreman ere ler nou kontan Zeova plis ki tou. (Mat. 22:36-39) Sa pa vedir ki i mal pour profit bann bon divertisman. Me nou devret demann nou lekor: ‘Eski mon rekonnet bann panse lemonn menm ler zot ganny promote endirekteman? Eski mon pe protez mon zanfan ek mon lekor kont serten progranm televizyon ek serten liv? Eski mon ed mon zanfan pour annan pwennvi Zeova lo keksoz pour ki zot pa ganny enfliyanse par bann nide sa lemonn ki zot tande e vwar?’ w18.11 25-26 ¶18-19

Zeova i montre ki i avek nou akoz i vreman enterese avek nou e i kontan nou en kantite. Remarke ki mannyer Zeova i eksprim son santiman anver nou. Zeova i dir: “Ou annan gran valer pour mwan. Ou presye pour mwan e mon kontan ou.” (Iza. 43:4) Napa nanryen dan liniver ki kapab fer Zeova aret kontan son bann serviter. I pou toultan fidel avek nou. (Iza. 54:10) Zeova pa promet pour tir bann problenm ki fer nou lavi difisil, me i pa pou les nou noye dan “larivyer” setadir dan nou problenm. Osi, Zeova pa pou les “dife” bril nou, setadir i pa pou les bann leprev anpes nou servi li. I promet ki i pou avek nou e i pou ed nou “travers” sa bann leprev. Ki Zeova pou fer? I pou ed nou kontrol nou lafreyer pour ki nou reste fidel anver li menm si nou fer fas avek lanmor. (Iza. 41:13; 43:2) Ler nou met nou konfyans dan sa promes Zeova, “Mon pou avek ou,” nou osi nou pou annan kouraz e nou pou annan lafors pour andir leprev. w19.01 3 ¶4-6

Si ou en zenn, i kapab ki bann ansenyan, konseye kot lekol ouswa lezot dimoun i dir ou ki ou bezwen fer letid avanse oubyen rod en karyer ki pou ed ou fer en kantite larzan. Me konsey ki Zeova i donnen i diferan. Byensir, i anvi ki ou travay dir lekol pour ou kapab ganny en travay e siport ou lekor. (Kol. 3:23) I osi konnen ki ler ou zenn, ou bezwen fer bann desizyon enportan ki pou annan en lefe lo ou lavenir. Alor, i donn bann prensip pour gid e ed ou viv dan en fason ki pou fer li plezir pandan sa bann dernyen zour. (Mat. 24:14) Zeova i konnen ki pou arive dan lavenir e i konn egzakteman ki lafen sa lemonn i pros. (Iza. 46:10; Mat. 24:3, 36) Zeova i osi konn ou. I konnen kwa ki pou fer ou ere e kwa ki pou fer ou malere. Konsey imen i kapab paret bon, me si i pa baze lo Parol Bondye, i pa en konsey ki saz. w18.12 15 ¶1-2

Plito, “bann dimoun ki annan limilite pou ganny donnen later e zot pou trouv bokou plezir dan labondans lape.” David ti osi predir: “Bann dimoun drwat pou ganny donnen later e zot pou reste lo la pour touzour.” (Ps. 37:11, 29, NWT; 2 Sam. 23:2) Ki lefe ou krwar sa bann promes ti annan lo bann dimoun ki ti anvi fer lavolonte Bondye? Sa ti donn zot en rezon pour krwar ki en zour zis bann dimoun drwat ki ti pou reste lo later e ki later ti pou revin en paradi parey zarden Edenn. Avek letan, laplipar Izraelit ki ti swadizan pe servi Zeova ti rezet li ek vre ladorasyon. Alor Bondye ti permet bann Babilonnyen pour konkerir son pep, detri zot landrwa e pran en kantite parmi zot konman prizonnyen. (2 Kron. 36:15-21; Zer. 4:22-27) Me bann profet Bondye ti predir ki son pep ti pou retourn dan zot pei apre 70 an. Sa bann profesi ti vin vre. Me sa bann profesi i osi annan sinifikasyon pour nou ozordi. Zot donn nou rezon pour krwar ki a lavenir i pou annan en paradi lo later. w18.12 5 ¶9-10

Bokou konsey ki lemonn i donnen i al kont sa ki Labib i dir. Me eski serten konsey sa lemonn i pli itil ozordi ki konsey Labib? Zezi ti dir: “Lasazes en dimoun i ganny rekonnet par son aksyon.” (Mat. 11:19) Menm si lemonn in fer bokou progre dan teknolozi, i pa’n kapab rezourd bann gro problenm ki anpes nou ere, tel parey lager, rasizm ek krim. An plis, menm si sa lemonn i vwar imoralite seksyel akseptab, en kantite dimoun i admet ki sa i detri bann fanmir, anmenn bann problenm lasante ek lezot move konsekans. Me ki nou pou dir lo konsey Zeova? Bann Kretyen ki’n aksepte pwennvi Zeova i annan en fanmir pli ere, zot pli an bonn sante e zot annan bann bon relasyon avek bann frer ek ser partou dan lemonn. (Iza. 2:4; Akt 10:34, 35; 1 Kor. 6:9-11) Sa i klerman montre ki fason panse Zeova i pli siperyer ki pour sa lemonn. w18.11 23 ¶8-10

I vre ki nou esey nou mye pour annan en bon relasyon avek nou fanmir e pour tret zot avek labonte. Me nou pa kapab inyor bann standar Zeova zis pour fer zot plezir. Nou bann zanmi pros i devret bann dimoun ki kontan Zeova. Pour kontinyen viv an armoni avek laverite, nou bezwen sen oubyen pir dan lizye Zeova. (Iza. 35:8; 1 Pyer 1:14-16) Ler nou ti aprann laverite, nou ti fer bann sanzman dan nou lavi pour nou kapab swiv bann standar Labib. Serten ti fer bann gran sanzman. Me nou ankor bezwen fer atansyon ki nou pa zanmen fer lesanz nou lavi pir pour en lavi imoral. Kwa ki kapab ed nou reziste ler nou ganny tante pour fer en keksoz imoral? Mazin lo sa ki Zeova in fer pour ou kapab vin sen. I ti donn lavi son Garson byenneme, Zezi Kri! (1 Pyer 1:18, 19) Pour ed nou reste pir dan lizye Zeova, nou bezwen toultan rapel ki kantite valer ranson Zezi i annan. w18.11 12 ¶10-11

En kantite ki dan servis a plen tan i dir ki reste konsantre dan zot minister i ed zot reste zwaye e pozitif menm ler zot sirkonstans i sanze. Pareyman, si nou fer nou mye dan nou sirkonstans e met tou nou konfyans dan Zeova, nou pou kapab gard nou lape lespri malgre nenport kwa ki arive. Avek letan, petet nou pou realize ki lafason ki nou’n aziste avek en sanzman in aktyelman ranforsi nou lanmitye avek Zeova. Dan sa lemonn, nou lavi i kapab sanz en sel kou. Nou kapab ganny en lot responsabilite dan servis Zeova, devlop bann problenm lasante oubyen bezwen pran swen avek nou fanmir dan en nouvo fason. Me malgre nenport kwa ki arive, annan konfyans ki Zeova i enterese avek ou e i pou ed ou dan sa moman apropriye. (Ebr. 4:16; 1 Pyer 5:6, 7) Pour le moman, fer ou mye dan ou sityasyon. Priy ou Papa Zeova e aprann pour depan lo li konpletman. Dan sa fason, malgre nenport ki fason ou sirkonstans i sanze, ou pou toultan annan lape lespri ki sorti kot Zeova. w18.10 25 ¶17; 26 ¶19; 27 ¶22

Dan Labib, nou aprann ki mannyer Zeova i demontre konsiderasyon anver son pep. Par egzanp, dan 1 Samyel 3:1-18, remark lafason ki Zeova ti ed Samyel ler i ti ankor zenn pour pas en mesaz zizman avek Granpret Eli. Dapre Lalwa Zeova, bann zanfan ti bezwen annan respe pour bann dimoun aze, espesyalman bann ki ti annan lotorite. (Egz. 22:28; Lev. 19:32) Alor i difisil pour mazinen ki en zenn garson parey Samyel ti pou al kot Eli bomaten e annan lardyes pour dir li mesaz zizman Bondye. Labib i dir nou ki Samyel “ti per pour rakont son vizyon avek Eli.” Par kont, Bondye ti fer Eli konpran ki Li ki ti pe kriy Samyel. Alor, Eli ti dir Samyel pa kasyet nanryen ki Bondye ti’n dir li. Samyel ti obei e “rakont li tou.” Eli ti’n deza ganny dir en mesaz en pe parey. (1 Sam. 2:27-36) Sa resi i montre nou lasazes Zeova e ki degre i demontre konsiderasyon anver lezot. w18.09 21 ¶2; 22 ¶4-5

Ozordi, en kantite dimoun i koz manti. Sa lartik “Why We Lie” ki’n ganny ekrir par Y. Bhattacharjee, i dir ki “koz manti in ganny rekonnet konman en tre ki byen anrasinen dan bann imen.” Andotmo, bann dimoun i krwar ki i normal e natirel pour koz manti. Souvandfwa dimoun i koz manti pour protez zot lekor, petet pour kasyet bann fot oubyen krim ki zot in fer. Zot osi koz manti pour fer larzan oubyen pour benefisye zot lekor dan en kek fason. Sa lartik i osi dir ki serten dimoun pa vwar li mal pour koz manti avek “bann dimoun ki zot pa konnen, zot koleg travay, zot zanmi ek bann dimoun ki zot kontan.” Ki konsekans sa bann mansonz in anmennen? Dimoun i nepli annan konfyans dan kanmarad e sa i gat bann relasyon. David ti priy Zeova: “Ou kontan laverite ki dan fon leker.” (Ps. 51:6) David ti konnen ki sa ki enportan, i sa ki nou ete anndan. A tou moman, bann vre Kretyen i “koz laverite avek [zot] prosen.”​—Zek. 8:16. w18.10 4 ¶4; 5 ¶9-10; 8 ¶19

I posib ki i ti annan plis ki trwa milyon Izraelit ki ti kit Lezip lannen 1513 avan Kris. Dan sa group i ti annan bann zanfan, bann aze e i tre probab ki serten ti malad oubyen annan dezabilite. En gran group koumsa ti bezwen en Lider ki enterese avek zot e ki konpran zot. Sa ti egzakteman rol ki Zeova ti zwe atraver Moiz. Sa ti fer ki bann Izraelit ti santi zot an sekirite anmezir zot ti kit sa sel landrwa ki zot ti’n reste. (Ps. 78:52) Ki mannyer Zeova ti fer son pep santi zot sen e sof e an sekirite? Ler nasyon Izrael ti kit Lezip, i ti organiz zot “parey bann solda ki pe al lager.” (Egz. 13:18, NWT) Vi ki zot ti’n ganny organize dan sa fason, zot ti kapab vwar ki zot Bondye ti pe kontrol sa sityasyon. “Lizour, [Zeova ti osi] gid zot par nyaz e lannwit, par dife” pour fer zot rapel ki i ti avek zot pour gid e protez zot.​—Ps. 78:14. w18.09 24 ¶11-12

Dan letan Labib, serten serviter fidel Bondye ti santi zot sitan mal akoz zot bann problenm ki zot ti anvi mor. Par egzanp, Zob ti telman pe soufer ki i pa ti anvi kontinyen viv e i ti dir: “Mon degout mon lavi.” (Zob 10:1) Zonas ti telman dezapwente ki i ti dir: “[Zeova] mon demann ou pran mon lavi. Plito mon mor ki kontinyen viv konmsa.” (Zon. 4:3) Profet Eliya ti santi li telman dezespere ki i ti dir: “Mon’n ganny ase. Aprezan, [Zeova], pran mon lavi.” (1 Rwa. 19:4) Me Zeova ti kontan sa bann serviter fidel e i ti anvi ki zot viv. I pa ti repros zot akoz zot ti santi koumsa. O kontrer, i ti ed zot pour reganny sa dezir pour viv pour ki zot kapab kontinyen servi li fidelman. w18.09 9 ¶4

Bann ki travay ansanm avek Bondye i byen koni konman bann dimoun ki demontre lospitalite. Dan Labib, sa mo Grek ki ganny servi pour “lospitalite” i vedir “lanmour anver bann etranze.” (Ebr. 13:2, not) Dan Parol Bondye, nou kapab lir lo bann legzanp ki ansenny nou lo lafason ki nou kapab demontre sa kalite lanmour. (Zen. 18:1-5) Nou kapab e nou devret ed lezot sak fwa nou annan en loportinite pour fer li, ki swa zot “nou bann frer ek ser dan lafwa” ouswa non. (Gal. 6:10) Eski ou kapab travay avek Zeova par demontre lospitalite anver bann serviter a plen tan ki bezwen en landrwa reste? (3 Zan 5, 8) Ler nou fer sa, sa i benefisye zot e nou osi. Dapre Labib, ler nou fer sa nou pe “ankouraz kanmarad.” (Rom. 1:11, 12) Parol Bondye i ankouraz bann zonm dan kongregasyon pour travay avek Zeova par servi lezot konman serviter kongregasyon ek ansyen. (1 Tim. 3:1, 8, 9; 1 Pyer 5:2, 3) Bann ki fer sa i anvi ed lezot dan bann fason pratik e osi ed zot avek zot ladorasyon pour Zeova. (Akt 6:1-4) Osi, bann frer ki’n ede dan kongregasyon pour fer bann keksoz ki neseser i dir ki zot ganny bokou lazwa. w18.08 23 ¶6-7; 24 ¶10

Menm si Timote ti annan serten lotorite lo bann frer pli aze ki li, i ti bezwen toultan demontre konpasyon ek respe anver zot. Ki arive si en dimoun ki pli aze i volonterman fer pese oubyen promot en keksoz ki Zeova pa kontan? Zeova pa pou toler en dimoun ki’n fer pese volonterman, menm si sa dimoun i pli vye e bokou dimoun i annan respe pour li. Vwar sa prensip ki dan Izai 65:20 (NWT): “Sa enn ki fer pese pou ganny modi menm si i annan san-t-an.” Dan en vizyon ki Ezekyel ti gannyen nou trouv menm prensip. (Ezek. 9:5-7) Alor, i pli enportan pour nou annan respe pour Zeova, Ansyen bann Zour. (Dan. 7:9, 10, 13, 14) Ler nou annan respe pour Zeova, nou pou ganny sa kouraz ki neseser pour koriz en dimoun ki bezwen led, nenport ki laz ki i annan.​—Gal. 6:1. w18.08 13 ¶13-14

Nou tou nou bezwen aprann pour analiz lenformasyon e servi sa lenformasyon pour tir sa bon konklizyon. (Prov. 3:21-23; 8:4, 5, NWT) Si non, i pou fasil pour Satan ek son lemonn detourn nou fason panse. (Efe. 5:6; Kol. 2:8) Byensir, pour arive tir sa bon konklizyon, nou bezwen rod bann lenformasyon egzakt. Ozordi, nou ganny bonbarde avek en ta lenformasyon. Nou ganny sa bann lenformasyon atraver Enternet, televizyon ek lezot medya. I osi kapab arive ki dimoun i anvoy nou en kantite imel ek mesaz lo nou telefonn oubyen nou tann en kantite zistwar avek nou bann zanmi. Parfwa, i paret ki nou pa zanmen aret ganny sa bann lenformasyon. Alor nou bezwen fer byen atansyon. I tre probab ki nou bann zanmi pa pe fer li an mal, me i annan lezot dimoun ki fann bann fo lenformasyon oubyen detourn bann lenformasyon par ekspre. w18.08 3 ¶1, 3

Zeova ti swazir Mari, en zenn fiy ki ti annan limilite, pour vin manman son Garson, Zezi. Mari ti viv dan en pti lavil ki apel Nazaret, ki byen lwen avek Zerizalenm ek son zoli tanp. (Lik 1:26-33) Nou kapab vwar ki i ti en zanmi pros Zeova atraver sa ki i ti dir pli tar avek son fanmir Elizabet. (Lik 1:46-55) Zeova ti’n obzerv Mari e i ti beni li dan en fason ki i pa ti pe ekspekte parski Mari ti fidel avek li. Ler Zezi ti ne, avek lekel Zeova ti dir konsernan son nesans? Pa avek okenn zofisye enportan oubyen bann dirizan Zerizalenm ek Betleenm. O kontrer, i ti anvoy bann lanz kot bann senp berze ki ti pe vey mouton dan lakanpanny an deor Betleenm. (Lik 2:8-14) Apre, sa bann berze ti al vizit sa pti baba ki ti’n fek ne. (Lik 2:15-17) I bezwen ki Mari ek Zozef ti sirprann pour vwar Zezi ganny onore dan sa fason. w18.07 6 ¶11-12

Akoz Zeova ti ankoler avek Salomon? Labib i dir: “Akoz son leker ti’n detournen avek [Zeova] . . . , ki ti’n aparet de fwa avek li, e ki ti’n donn li lord spesifik konsernan sa bann keksoz ki fodre pa i al ver lezot bondye; me i pa ti obei lord ki [Zeova] ti’n ordonnen.” Pour fini kont, i ti perdi laprouvasyon ek sipor Bondye. Zeova pa ti les bann desandans Salomon diriz lo nasyon Izrael antye e zot ti ganny bann gro problenm pour plizyer santenn lannen. (1 Rwa. 11:9-13) Si nou swazir bann zanmi ki pa konpran ouswa respekte bann standar Bondye, zot kapab enfliyans nou fason panse e gat nou relasyon avek Zeova. I kapab ki zot form parti kongregasyon, me zot napa en bon relasyon avek Zeova. Ouswa i kapab ki zot bann dimoun ki pa ador Zeova, tel parey nou fanmir, vwazen, koleg travay oubyen kanmarad lekol. Si bann dimoun ki nou pas letan avek pa viv dapre bann standar Zeova, zot kapab telman enfliyans nou ki nou perdi nou bon relasyon avek Bondye. w18.07 17 ¶9-10

Satan i servi bann film ek progranm televizyon pour propaz son fason panse. Par egzanp, Satan i konnen ki dimoun i kontan bann zistwar dan bann film oubyen progranm televizyon. Me Satan i servi sa pour fer nou panse, azir e annan menm santiman ki li. Zezi ti rakont bann zistwar pour ansennyen. Par egzanp, i ti rakont legzanp sa bon Samariten ek sa garson perdi ki ti gaspiy son leritaz. (Mat. 13:34; Lik 10:29-37; 15:11-32) Me bann ki anba lenfliyans Satan i kapab osi servi bann zistwar pour sali nou lespri. Nou bezwen annan en pwennvi balanse. Nou kapab detann oubyen menm aprann serten keksoz dan bann film oubyen progranm televizyon san ki sa i annan en move lefe lo nou fason panse. Me nou bezwen fer byen atansyon. Ler nou pe swazir nou divertisman, i byen pour nou demann nou lekor, ‘Eski sa film oubyen progranm televizyon i ansenny mwan ki i normal pour satisfer mon bann move dezir?’ (Gal. 5:19-21; Efe. 2:1-3) Ki ou devret fer si ou remarke ki en progranm televizyon pe promot fason panse Satan? Reste lwen, zis parey ou ti pou reste lwen avek en dimoun ki annan en maladi kontazye. w19.01 15-16 ¶6-7

Zis parey en kask i protez laservel en solda, nou “lespwar pour ganny sove,” i protez nou fason panse. (1 Tesa. 5:8; Prov. 3:21, NWT) Ki mannyer Satan ti kapab trik nou pour tir nou kask lo nou latet? Mazin lo sa ki i ti esey fer avek Zezi. Satan ti konnen ki Zezi ti pou vin dirizan limanite. Me avan sa i arive, Zezi ti pou bezwen soufer e mor. Apre, i ti pou bezwen espere ziska ki Zeova i fer li vin Lerwa. Alor Satan ti ofer li sa sans pour dirize pli boner. Satan ti promet Zezi ki si i ti ador li zis en fwa, i ti kapab vin dirizan sa lemonn deswit. (Lik 4:5-7, not) Satan i osi konnen ki Zeova in promet pour donn nou bann keksoz merveye dan nouvo lemonn. Me nou bezwen esper sa promes vin en realite e antretan, nou kapab ganny bokou problenm. Alor Satan i ofer nou en lavi konfortab la konmela menm. I oule ki nou met nou prop konfor premye e Rwayonm Bondye dezyenm.​—Mat. 6:31-33. w18.05 25 ¶15-17

Zeova i oule ki ou ere ler ou ankor zenn. Reste konsantre lo ou bann lobzektif spirityel e swiv konsey Zeova dan tou ou plan ek desizyon. Pli ou fer sa boner dan ou lavi, pli boner ou pou eksperyans lafason ki Zeova i gid, protez e beni ou. Mazin lo tou bann bon konsey ki i donn ou dan son Parol e aplik sa konsey: “Pandan ki ou ankor zenn, pa oubliy ou Kreater.” (Ekle. 12:1) Zenn, zot vreman merit ganny felisite parski zot konsantre lo servi Zeova. Zot fikse bann lobzektif spirityel e vwar sa travay predikasyon konman enn bann keksoz pli enportan dan zot lavi. Deplis, zot pa les sa lemonn fer zot oubliy zot bann lobzektif. Zot kapab asire ki tou sa zefor ki zot fer pa anven. Zot annan bann frer ek ser ki kontan zot e siport zot. Alor “konfye ou travay avek [Zeova], e ou ava realiz ou bann proze.” w18.04 31-32 ¶17, 19