Zen

Promes Zezi ti’n bezwen vreman batir bann zapot! Bann zapot pa ti konpletman konpran ki Zezi ti pou mor byento. Me son lanmor pa ti vedir ki zot ti pou napa okenn led. Zeova ti pare pour reponn zot lapriyer e ed zot dan sa travay predikasyon. Sanmenm sa ki i ti fer. Pa bokou letan apre ki Zezi ti’n mor, bann zapot ti sipliy Zeova pour donn zot kouraz e Zeova ti reponn zot lapriyer. (Akt 4:29, 31) I menm parey ozordi. Ler nou andire dan predikasyon, nou reste zanmi avek Zezi. Nou osi kapab asire ki Zeova i pare pour reponn nou lapriyer ler nou demann li led kan nou vwar li difisil pour prese. (Fili. 4:13) Nou vreman rekonesan ki Zeova i reponn nou lapriyer e ki nou annan Zezi konman nou zanmi. Sa bann kado sorti kot Zeova i donn nou lafors pour kontinyen raport fri.​—Zak 1:17. w18.05 14 ¶17-18

Bann frer ti’n kapab demann zot lekor akoz Pol ti’n dir zot ankouraz kanmarad plis ankor. Mwens ki senk an pli tar, en rezon ti vin kler. Dan sa letan, zot ti vwar ki zour zizman Zeova lo Zerizalenm ti pros. Zot ti konpran ki zot ti bezwen sorti dan sa lavil parey Zezi ti’n dir zot fer. (Akt 2:19, 20; Lik 21:20-22) Zour Zeova ti vin dan lannen 70, ler bann Romen ti detri Zerizalenm. Ozordi, nou dan menm sityasyon. Zour Zeova ki “gran e vreman terib” i pros pour arive. (Zoel 2:11) Parol profet Zefanya i osi aplik pour nou letan: “Sa gran zour [Zeova] i pros; i tre pros, i pe arive byen vit.” (Zef. 1:14) Pour sa rezon, nou devret “demontre en lentere senser dan lezot pour ki nou kapab ankouraz kanmarad pour demontre lanmour e fer bann bon aksyon.” (Ebr. 10:24) Nou bezwen demontre plis lentere ankor dan nou bann frer ek ser pour nou kapab ankouraz zot ler zot bezwen lankourazman. w18.04 21-22 ¶1-2

Ki mannyer ou krwar Zozye ti santi ler Zeova ti ankouraz li avan ki i bezwen diriz Son pep pour antre dan Later Promiz? Zeova ti osi ankouraz son pep konman en group. Par egzanp, Zeova ti konnen ki bann Zwif ti pou bezwen ganny ankouraze ler zot ti an egzil Babilonn e i ti donn zot en profesi ankourazan, ki dir: “Pa bezwen per, akoz mon avek ou. Pa bezwen enkyet, akoz mwan menm ou Bondye. Mon pou rann ou for, mon pou ed ou, mon pou soutenir ou avek mon lanmen ki donn laviktwar.” (Iza. 41:10) Pli tar, Zeova ti ankouraz bann Kretyen dan premye syek e i ankouraz nou dan menm fason ozordi. (2 Kor. 1:3, 4) Zeova ti osi ankouraz son Garson. Apre ki Zezi ti batize, i ti tann en lavwa sorti dan lesyel dir: “Sa i mon Garson ki mon kontan ki mon’n aprouve.” (Mat. 3:17) Eski ou kapab imazinen ki mannyer Zezi ti ganny fortifye avek sa bann parol pandan son minister lo later? w18.04 16 ¶3-5

Serten dimoun i kapab mazinen ki Zeova pa ti donn Adan sa laliberte pour fer sa ki i ti anvi. Par kont, zot pa realize ki liberte pour swazir ouswa sa drwa pour swazir ki pour fer, i pa parey avek sa drwa pour deside kwa ki byen e kwa ki mal. Adan ek Ev ti annan sa laliberte pour swazir si zot ti pou obei Bondye ouswa non. Me zis Zeova ki annan drwa deside kwa ki byen e kwa ki mal. Sa “pye dibwa ki donn konnesans lebyen ek lemal” ti donn Adan ek Ev laprev ki sa ti leka. (Zen. 2:9) Par donn Adan ek Ev sa lord pour pa manz fri sa pye dibwa, Zeova ti ansenny zot ki zot ti bezwen obei li pour annan vre laliberte. Malerezman, Adan ek Ev ti swazir pour dezobei Zeova. Eski swa Adan ek Ev ti fer zot ganny plis laliberte parey Satan ti’n dir? Non. Adan ek Ev pa ti ganny plis laliberte ler zot ti esey desid pour zot menm kwa ki byen e kwa ki mal. O kontrer zot ti perdi sa vre laliberte ki Zeova ti’n donn zot. w18.04 5-6 ¶9-12

Zeova pa zis annan konpasyon pour son bann serviter ki soufer. I osi pran aksyon pour ed zot. Par egzanp, ler bann Izraelit ti pe soufer dan lesklavaz Lezip, Zeova ti konpran zot soufrans e sa ti pous li pour fer en keksoz pour soulaz zot. Zeova ti dir Moiz: “Mon’n byen war soufrans mon pep . . . e mon’n antann zot kriye . . . Mon konn zot soufrans. Mon’n desann pour delivre zot dan lanmen bann Ezipsyen.” (Egz. 3:7, 8) Vi ki Zeova ti annan konpasyon pour son pep, i ti liber zot dan lesklavaz. Plizyer santenn lannen pli tar, ler bann Izraelit ti dan Later Promiz, zot ti ganny atake avek bann lennmi. Ki Zeova ti fer? I ‘ti pran pitye pour zot devan bann ki ti pe maltret zot.’ Ankor enn fwa, Zeova ti konpran santiman son pep, alor i ti fer en keksoz pour ed zot. I ti anvoy bann ziz pour sov bann Izraelit dan lanmen zot lennmi.​—Ziz 2:16, 18. w19.03 15 ¶4-5

Sa de premye komannman dan sa Dis Komannman ti demann bann Izraelit pour ador zis Zeova tousel e i ti enterdi ador zidol. (Egz. 20:3-6) Sa bann komannman pa ti benefisye Zeova, me plito i ti benefisye pep Izrael. Par kont, ler zot ti ador bann fo bondye sorti dan bann lezot nasyon, zot ti soufer. De lot kote, Zeova ti beni son pep ler zot ti fidel avek li e tret kanmarad dan en fason zis. (1 Rwa. 10:4-9) I pa lafot Zeova ler bann ki dir zot servi li i inyor son bann standar e fer ditor son pep. Kantmenm sa, Zeova i kontan nou e i konnen ler nou soufer akoz lenzistis. I santi nou douler pli byen ki en manman i santi douler son pti baba. Menm si i pa azir deswit, dan son letan apropriye, i pou ziz bann move dimoun pour lafason ki zot in tret lezot. w19.02 22-23 ¶13-15

Sa ki nou aprann dan renyon e sa ki nou lir dan Labib i kapab ed nou pour devlop limilite. Dan bann semenn avan Memoryal, nou renyon i souvandfwa konsantre lo legzanp Zezi e limilite ki i ti demontre par donn son lavi konman en ranson. Nou ganny pouse pour imit son limilite e pour fer lavolonte Zeova, menm ler i difisil pour nou. Nou mazin sa kouraz ki Zezi ti demontre avan son lanmor. I ti konn tre byen ki son bann lennmi ti pou imilye li, fwet li e klout li lo poto. (Mat. 20:17-19) Kantmenm sa, i ti pare pour li mor. Ler son letan ti arive, i ti dir son bann zapot ki ti avek li Zetsemane: “Leve, annou ale. Gete! Sa enn ki pou trai mwan in arive.” (Mat. 26:36, 46) Ler bann zonm arme ti vin aret li, i ti avans devan, idantifye son lekor e donn lord bann solda pour les son bann disip ale. (Zan 18:3-8) Zezi ti demontre en kouraz ekstraordiner! Ozordi, bann Kretyen swazir ek lezot mouton i fer zot mye pour imit legzanp Zezi par demontre kouraz. w19.01 27-28 ¶7-8

Zis parey en artis i servi diferan kouler pour penn en tablo, nou bezwen annan diferan zoli kalite pour devlop limilite. Serten sa bann kalite i lobeisans, ladouser ek kouraz. Zis bann dimoun ki annan limilite ki pou aksepte pour fer lavolonte Bondye. I lavolonte Bondye ki nou devlop ladouser. (Mat. 5:5; Gal. 5:23) Ler nou fer lavolonte Bondye, nou fer Satan vreman ankoler. Alor, menm si nou annan limilite ek ladouser, en kantite dimoun ki form parti lemonn Satan i ay nou. (Zan 15:18, 19) Se pour sa rezon ki nou bezwen kouraz pour reziste Satan. En dimoun ki napa limilite i orgeye, i ankoler vitman e i pa obei Zeova. Sa i dekri Satan vreman byen. Alor, i pa drol ki i ay dimoun ki annan limilite! Vi ki zot annan bann bon kalite ki Satan napa, zot montre ki i vreman move. Pli move ankor, zot montre ki Satan i en manter. Akoz? Malgre nenport kwa ki i dir oubyen fer, i pa kapab anpes bann dimoun ki annan limilite servi Zeova.​—Zob 2:3-5. w19.02 9 ¶3-5

Zeova ti konnen ki bann zabitan Babilonn ti pou per. Babilonn ti pou ganny atake par bann larme Med ek Pers. Zeova ti pou servi sa larme pour delivre son pep Babilonn. (Iza. 41:2-4) Ler bann Babilonnyen ek lezot nasyon ti realize ki zot lennmi ti pros pour atak zot, zot ti ankouraz kanmarad par dir: “Pran kouraz.” Zot ti osi fer plis zidol an krwayan ki sa bann fo bondye ti pou protez zot. (Iza. 41:5-7) Antretan, Zeova ti ed bann Zwif ki ti an egzil pour pa enkyet par dir: “Me ou, Izrael, mon serviter, [ki diferan avek sa bann nasyon ki ador zidol] . . . Pa bezwen enkyet, akoz mwan menm ou Bondye.” (Iza. 41:8-10) Remarke ki Zeova i dir: ‘Mwan menm ou Bondye.’ Atraver sa parol, Zeova ti rasir son bann serviter fidel ki i pa ti’n oubliy zot. I ti dir zot: “Mwan menm ki pou soutenir ou e delivre ou.” San dout, sa parol rekonfortan ti ankouraz bann Zwif ki ti an egzil.​—Iza. 46:3, 4. w19.01 4 ¶8

I annan trwa fwa ki Zeova ti koze dan lesyel. Dan Mark 1:9-11 nou vwar sa premye fwa. Zeova ti dir: “Ou menm mon Garson, sa enn ki mon kontan e ki mon’n aprouve.” Imazinen ki mannyer Zezi ti’n bezwen santi ler i ti antann lavwa son Papa pe dir ki i kontan li e annan konfyans dan li! Parol Zeova ti konfirm trwa keksoz enportan lo Zezi. Premyerman, Zezi i son Garson. Dezyenmman, Zeova i kontan son Garson. Trwazyenmman, Zeova in aprouv son Garson. Ler Zeova ti dir “Ou menm mon Garson,” i ti pe montre ki aprezan son Garson ti annan en nouvo relasyon avek Li. Ler Zezi ti dan lesyel, i ti deza garson Bondye. Par kont, apre son batenm i ti vin Garson Bondye dan en nouvo fason. I ti ganny swazir par lespri sen e i ti annan sa lespwar pour retourn dan lesyel pour ganny apwente konman Lerwa ek Granpret dan Rwayonm Bondye. (Lik 1:31-33; Ebr. 1:8, 9; 2:17) Alor ler Zezi ti batize, nou kapab konpran akoz Zeova ti dir: “Ou menm mon Garson.”​—Lik 3:22. w19.03 8-9 ¶3-4

Depi lontan in annan bann move konsey. Satan ki ti premye pour donn bann imen move konsey. I ti dir Ev ki zot de Adan zot ti pou pli ere si zot desid pour zot menm ki mannyer pour viv zot lavi. (Zen. 3:1-6) Satan ti egois! I ti anvi ki Adan ek Ev e osi tou zot desandans, i obei e ador li e non pa Zeova. Me Zeova ki ti’n donn zot tou sa ki zot ti annan. I ti donn zot en zoli zarden kot zot ti kapab reste, en lekor parfe ki ti kapab dire pour touzour e zot ti annan konpanni kanmarad. Malerezman, Adan ek Ev ti dezobei Bondye. Ler zot ti fer sa, zot ti nepli kapab profit bann keksoz sorti kot sa Enn ki ti donn zot lavi. Sa ti anmenn maler pour zot. Parey bann fler ki’n ganny kase avek en plant, Adan ek Ev ti gradyelman vyeyi e mor. Zot zanfan osi ti soufer e sa i enkli nou. (Rom. 5:12) Laplipar dimoun ozordi i inyor sa ki Bondye i dir e zot zis fer sa ki zot anvi. (Efe. 2:1-3) Ki rezilta sa in anmennen? Rezilta i montre klerman ki sa ki dan teks pour ozordi i vre. w18.12 16 ¶3-4

Zapot Pol ti en zonm entelizan, byen edike e i ti koz Ebre ek Grek. (Akt 5:34; 21:37, 39; 22:2, 3) Me i ti rezet lasazes sa lemonn e fer son desizyon baze lo Parol Bondye. (Akt 17:2; 1 Kor. 2:6, 7) Sa ti fer ki i ti annan en bon minister e i ti enpasyan pour sa rekonpans ki ti pou dire pour touzour. (2 Tim. 4:8) I kler ki fason panse Bondye i bokou pli siperyer ki pour sa lemonn. Si nou swiv bann standar Bondye, nou pou vreman ere e reisi dan lavi. Me Zeova pa pou fors nou pour mazin parey li. “Lesklav fidel e pridan” e ni menm bann ansyen pa kontrol nou panse. (Mat. 24:45; 2 Kor. 1:24) Sakenn parmi nou i responsab pour aziste nou prop fason panse pour nou kapab vwar keksoz parey Zeova. w18.11 24 ¶12-13

Atraver profet Izai, Bondye ti predir ki ler bann Izraelit ti pou retourn dan zot pei, i ti pou annan lape dan zot pei. Personn pa ti pou per pangar zot ganny atake avek bann zannimo ouswa dimoun. Zenn konman vye ti pou an sekirite. (Iza. 11:6-9; 35:5-10; 51:3) Izai ti osi predir ki, “parey delo sale i ranpli losean, konnesans [Zeova] pou ranpli” later antye, pa zis nasyon Izrael. I kler ki sa ti pou ariv a lavenir. Izai ti osi predir ki bann Izraelit ki retournen sorti Babilonn pa ti pou ganny atake avek zannimo ouswa dimoun. I ti dir ki zot pei ti pou prodwir en kantite bon manze parski i ti pou annan bokou delo zis parey dan zarden Edenn. (Zen. 2:10-14; Zer. 31:12) Eski sa profesi ti pou ganny akonplir zis dan letan sa bann Izraelit? Remarke ki sa profesi ti osi dir ki bann aveg, bann ki bwete ek bann sourd ti pou ganny geri. Me sa pa ti arive avek bann Izraelit ki ti retournen sorti Babilonn. O kontrer, Bondye ti pe montre ki i ti pou geri tou maladi a lavenir. w18.12 5 ¶11-12

Nou anvi kontinyen reste dan laverite, setadir viv an armoni avek laverite pour touzour. Kwa ki kapab ed nou pour pli determinen pour kontinyen viv an armoni avek laverite? Kontinyen etidye Labib e reflesi o profon lo sa ki ou aprann. Fer sir ki sa i form parti ou progranm. Pli ou etidye, pli ou pou kontan laverite e vin determinen pour pa zanmen kit laverite. Proverb 23:23, (NWT) i dir nou “aste laverite” e osi “aste lasazes, disiplin ek konprenezon.” I pa ase pour zis konn laverite ki dan Labib. Nou bezwen aplik li dan nou lavi. Ler nou ganny konprenezon, nou azout bann keksoz ki nou’n aprann avek bann keksoz ki nou deza konnen. Lasazes i pous nou pour aplik sa ki nou konnen. Par ler, laverite i disiplin nou par montre nou bann sanzman ki nou bezwen fer. Nou bezwen vitman aksepte sa disiplin ki Labib i dir i vo plis ki larzan.​—Prov. 8:10. w18.11 10 ¶3; 13 ¶13-14

Kwa ki annan plis valer dan ou lavi? Konman pep Zeova, sa keksoz ki annan plis valer pour nou i nou relasyon avek li. Nou pa pou zanmen sanz li pour okenn lezot keksoz. Laverite ki dan Labib osi i annan en gran valer pour nou, parski sa i ed nou pour vin zanmi Zeova. (Kol. 1:9, 10) Zeova i nou Gran Enstrikter ki ansenny nou bokou laverite presye ki dan son Parol, Labib. I ansenny nou lenportans son non e i dir nou lo son bann zoli kalite. I dir nou ki i sitan kontan nou ki i ti anvoy son Garson byenneme pour mor pour nou. Zeova i ansenny nou konsernan sa Rwayonm dirize par Kris. I donn nou lespwar pour viv dan Paradi lo later. Zeova i ansenny nou ki mannyer nou devret viv nou lavi. Sa bann laverite i parey en trezor pour nou, parski zot ed nou pour vin pros avek nou Kreater e donn nou en bi dan lavi. w18.11 3 ¶1-2

Bann dimoun ki anbet lezot imen pa kapab anbet Zeova. Labib i dir ki “tou keksoz i touni e o kler devan” Bondye. (Ebr. 4:13) I annan legzanp Ananyas ek Safira ki ti esey anbet bann zapot. Zot ti vann en bout later e apre donn zis en porsyon sa larzan avek bann zapot. Ananyas ek Safira ti anvi enpresyonn lezot dan kongregasyon, alor zot ti dir bann zapot ki zot ti’n donn tou sa larzan. Me Zeova ti konnen ki zot pe koz manti e i ti pini zot. (Akt 5:1-10) Ki mannyer Zeova i santi konsernan bann dimoun ki koz manti? Tou dimoun ki koz manti avek en move lentansyon e ki pa repantir, pou ganny zete dan “lak dife,” zis parey Satan. Andotmo, zot pou ganny detrir pour touzour. (Rev. 20:10; 21:8; Ps. 5:6) Nou konnen ki Zeova “pa parey zonm pour li koz manti” e ki i “enposib pour li koz manti.” (Nom. 23:19; Ebr. 6:18) “[Zeova] i deteste . . . en labous mansonz.” (Prov. 6:16, 17) Si nou anvi fer li plezir, nou bezwen koz laverite. w18.10 5-6 ¶10-13

Ki ou ti pou fer si ou anplwayer i demann ou pour kontribye pour en selebrasyon ki annan pour fer avek fo larelizyon? Dan plas espere ziska ki en keksoz koumsa i arive, i ti pou bon pour nou medite depi la konmela lo lafason ki Zeova i vwar sa bann keksoz. Koumsa, si nou vwar nou dan sa sityasyon, i pou pli fasil pour nou fer e dir sa ki byen. Ler nou medit lo fason panse Zeova, sa i osi kapab ed nou pour reste fidel avek li si nou bezwen swen medikal irzan. Byensir, nou determinen pour pa aksepte en transfizyon disan ouswa son kat konponan prensipal. (Akt 15:28, 29) Me i annan bann prosedir ki enkli disan ki sak Kretyen i bezwen fer son prop desizyon baze lo bann prensip Labib. Ki sa pli bon moman pour deside ki pour fer? Eski i ler nou dan lopital, petet dan douler e anba presyon pour fer en desizyon la pour la? Non. La ki sa moman pour fer resers, ranpli en dokiman medikal legal ki eksplik klerman sa ki nou anvi e koz avek nou dokter. w18.11 28 ¶5; 30-31 ¶15-16

Zeova i en berze ki kontan e pran swen avek son pep. I gard zot sen e sof e protez zot kont zot lennmi. Sa i reasir e rekonfort nou en kantite anmezir ki nou ariv pli pros avek lafen sa lemonn. Zeova pou kontinyen pran swen avek son pep pandan gran ladetres ki pe vini byento. (Rev. 7:9, 10) Alor, ki swa pep Bondye i zenn ouswa aze, an bonn sante ouswa annan dezabilite, zot pa pou panik oubyen per pandan gran ladetres. Anfet, zot pou fer lekontrer! Zot pou rapel parol Zezi ki dir: “Debout drwat e lev zot latet akoz zot delivrans pe aprose.” (Lik 21:28) Menm ler zot ganny atake avek Gog, en group nasyon ki pwisan, pep Bondye pou annan konfyans ki Zeova pou protez zot. (Ezek. 38:2, 14-16) Akoz? Parski zot konnen ki Zeova pa zanmen sanze. Ankor enn fwa i pou prouve ki i en Sover ki annan lanmour e ki pran swen avek son pep.​—Iza. 26:20. w18.09 26 ¶15-16

Imazinen ki mannyer bann Izraelit ti santi ler Zeova ti dir zot sa ki dan nou teks pour ozordi. Nou konnen ki sakenn parmi nou i osi presye pour Zeova. Labib i promet: “Bondye i . . . koman en gerye ki donn laviktwar. I dan gran lazwa akoz ou.” (Zef. 3:16, 17) Zeova i promet pour fortifye e rekonfort son pep malgre nenport ki problenm ki zot pe pas atraver. I ti dir: “Ou pou ganny gate e ganny pran dan lebra. Ou pou ganny dorlote lo son zenou. Parey en manman i konsol son zanfan, mwan osi mon pou konsol ou.” (Iza. 66:12, 13) Zis mazinen ki mannyer en pti baba i santi li an sekirite ler son manman i pran li oubyen zwe avek li! Zeova i vreman kontan ou e i anvi ki ou santi ou an sekirite. Pa zanmen doute ki ou vreman presye pour Zeova.​—Zer. 31:3. w18.09 9-10 ¶6-7

Dan lepase, bann Izraelit ti annan diferan loportinite pour port zot volonter. (Egz. 36:2; Nee. 11:2) Ozordi, ou osi ou annan en kantite loportinite pour donn volonterman ou letan, keksoz materyel ek ou bann abilite pour ed ou bann frer ek ser. Ler ou fer sa, ou pou vreman zwaye e Zeova pou beni ou. Souvandfwa, bann ki volonter pour travay lo bann proze konstriksyon i fer bann nouvo zanmi. En ser ki apel Margie in travay lo bann proze konstriksyon Lasal Rwayonm pour 18 an. Lo sa bann proze, i’n demontre lentere dan bann zenn ser e ede pour form zot. I dir ki sa i en bon fason pour bann volonter ankouraz kanmarad. (Rom. 1:12) Anfet, ler i ti fer fas avek bann difikilte dan son lavi, sa bann zanmi ki i’n fer lo sa bann proze ti ankouraz li. Eski ou’n deza port ou volonter pour travay lo en proze konstriksyon? w18.08 24 ¶9, 11

Ler Pol ti ekri sa, i tre probab ki Timote ti annan apepre 30 an. Pourtan, Pol ti’n donn li bann responsabilite vreman enportan. Ki leson nou kapab aprann? Nou pa devret ziz bann zenn frer par zot laz. Mazin lo legzanp Zezi. Ler i ti’n ariv 33 an i ti’n deza fer en kantite keksoz! Dan serten kiltir, dimoun napa respe pour bann zenn onm. Alor, i kapab arive ki serten ansyen pa rekomann en zenn onm pour servi konman serviter kongregasyon ouswa ansyen, menm si i kalifye. Me Labib pa dir ki en frer i bezwen annan en serten laz avan ki i ganny apwente konman serviter kongregasyon oubyen ansyen.​—1 Tim. 3:1-10, 12, 13; Tit 1:5-9. w18.08 13-14 ¶15-16

Pour fer bann bon desizyon, nou bezwen bann lenformasyon egzakt. Alor, nou bezwen fer byen atansyon ler nou pe swazir sa ki nou lir. (Fili. 4:8, 9) Nou pa devret gat nou letan lo bann sit Enternet ki annan bann fo nouvel ouswa pe lir bann imel ki fann rimer. Nou bezwen sirtou evite al lo bann sit Enternet kot bann aposta i promot zot nide. Zot anvi afebli lafwa pep Bondye e detourn laverite. Bann fo lenformasyon i kapab fer nou fer bann move desizyon. Pa zanmen krwar ki bann fo lenformasyon pa pou annan en move lefe lo ou. Dan letan Moiz, 12 espyon ti al dan Later Promiz. Ler zot ti retournen, dis parmi zot ti dir bann keksoz negatif. (Nom. 13:25-33) Zot ti egzazere lo sa ki zot ti’n vwar e sa ti fer pep Zeova per e dekouraze. (Nom. 14:1-4, 6-10) Dan plas rod lenformasyon egzakt e met konfyans dan Zeova, bann dimoun ti swazir pour krwar sa bann keksoz negatif ki ti’n ganny rakonte. w18.08 4 ¶4-5

Laplipar dimoun i annan serten bon kalite dan zot. An plis, bann ki pa ador Zeova pa toultan fer bann move keksoz. Petet ou konn serten dimoun koumsa. Eski sa i vedir ki zot bann bon frekantasyon? Be, ki mannyer zot afekte ou relasyon avek Zeova? Eski zot ed ou pour vin pli pros avek Bondye? Kwa ki vreman enportan pour sa bann dimoun? Ki zot koz lo la? Eski zot koz zis lo lanmod, larzan, lekipman elektronik, divertisman ek lezot keksoz parey? Eski zot abitye kritik lezot? Eski zot kontan fer bann dyok sal? Zezi ti donn sa lavertisman: “Labous i koz sa ki deborde dan leker.” (Mat. 12:34) Si ou realize ki bann dimoun ki ou pas letan avek pe gat ou relasyon avek Zeova, pran aksyon! Koup lakantite letan ki ou pase avek zot e si i neseser, met en lafen avek sa lanmitye.​—Prov. 13:20. w18.07 18 ¶11

Ler Moiz ti annan 80 an, Zeova ti donn li sa responsabilite pour liber nasyon Izrael ki ti dan lesklavaz Lezip. (Egz. 3:10) Moiz ti donn leskiz plizyer fwa. Me Zeova ti demontre pasyans anver Moiz e i ti menm donn li pouvwar pour fer bann mirak. (Egz. 4:2-9, 21) Zeova ti’n kapab servi son pwisans pour fer Moiz per e obei li. O kontrer, Zeova ti demontre pasyans ek labonte e asir son serviter ki ti modes e annan limilite ki i ti pou avek li. Eski sa fason fer ti marse? Wi! Moiz ti vin en gran lider pour pep Bondye. I ti esey demontre ladouser ek konsiderasyon anver lezot, zis parey Zeova ti fer avek li. Si ou annan serten lotorite lo lezot, i vreman enportan ki ou imit Zeova par demontre konsiderasyon, labonte ek pasyans anver ou madanm, zanfan ek bann dan kongregasyon. (Kol. 3:19-21; 1 Pyer 5:1-3) Si ou imit Zeova ek Zezi Kri ki sa pli gran Moiz, ou pou fer li fasil pour lezot vin koz avek ou e ou pou kapab ankouraz zot.​—Mat. 11:28, 29. w18.09 23-24 ¶7-10

Nou kapab rafresi nou bann frer ek ser par demontre labonte e tret zot dan en fason agreab. Sa i fer kongregasyon pli ini. Eski ou kapab fer zefor pour aprann konn pli byen bann frer ek ser dan ou kongregasyon? (2 Kor. 6:11-13; not) Ou lalimyer i kapab briye nenport ki landrwa ou ete. Ou labonte i kapab ed ou vwazen pour anvi aprann plis lo Zeova. Demann ou lekor: ‘Ki mon bann vwazen i panse lo mwan? Eski mon lakour i prop e annord? Eski i fer nou vwazinaz pli zoli? Eski mon ed mon bann vwazen?’ Demann lezot Temwen ki lefe zot labonte ek bon legzanp in annan lo zot fanmir, vwazen, koleg travay oubyen kanmarad lekol.​—Efe. 5:9. w18.06 24 ¶13-14

Sanmenm sa ki bann dimoun ki ti touy disip Etyenn ti krwar. (Akt 6:8, 12; 7:54-60) Tou dilon listwar imen, plizyer dimoun relizye in komet bann krim terib, tel parey mert e apre zot dir ki zot in fer li pour Bondye. Me an realite, sa ki zot in fer i kont bann lalwa Bondye. (Egz. 20:13) I kler ki zot konsyans pa’n gid zot byen! Alor ki mannyer nou kapab fer sir ki nou konsyans i mars byen? Bann lalwa ek prensip dan Labib i “itil pour ansennyen, pour reprimande, pour remet keksoz drwat, pour disiplinen dapre ladrwatir Bondye.” (2 Tim. 3:16) Nou bezwen etidye Labib regilyerman, reflesi byen lo sa ki i dir e aplik li dan nou lavi. Pli nou fer sa, pli nou fason panse pou vin parey avek sa ki pour Zeova. Apre nou kapab asire ki nou konsyans pou gid nou byen. w18.06 16-17 ¶3-4

Bann solda Romen ti servi bann lepe ki ti apepre 50 santimet (20 pous) longer. Sa bann solda ti servi byen zot lepe parski toulezour zot ti fer lantrennman pour aprann servi li pli byen. Zapot Pol ti dir ki Parol Bondye i parey en lepe. Zeova in donn nou sa lepe. Me nou bezwen aprann pour servi li byen pour defann nou lafwa oubyen pour aziste nou fason panse. (2 Kor. 10:4, 5; 2 Tim. 2:15) Nou pa bezwen per Satan ek bann demon. I vre ki zot pwisan, me zot pa pli pwisan ki Zeova. Deplis, zot pa pou viv pour touzour. Zot pou ganny anprizonnen e zot pa pou kapab fer ditor personn pandan Renny Mil an Zezi Kri e apre sa, zot pou ganny detrir. (Rev. 20:1-3, 7-10) Nou konn nou lennmi, bann riz ki i servi ek sa lobzektif ki i annan. Avek led Zeova, nou kapab reziste li! w18.05 25 ¶15, 19-21

Adan ti konnen ki bann serpan pa kapab koze. Alor ler i ti aprann ki en serpan ti’n koz avek Ev, petet i ti realize ki en lanz ki ti’n koze. (Zen. 3:1-6) Adan ek Ev pa ti konnen lekel sa lanz. Par kont, Adan ti swazir pour pran kote avek sa etranze e rebel kont son Papa dan lesyel ki ti kontan li. (1 Tim. 2:14) Deswit, Zeova ti konmans donn plis lenformasyon konsernan sa move lennmi e promet ki sa lennmi ti pou ganny detrir pli tar. Me Zeova ti averti ki antretan, sa lanz ki ti’n koz atraver sa serpan ti pou opoz tou bann ki kontan Bondye. (Zen. 3:15) Zeova pa’n zanmen dir nou non sa lanz ki ti rebel kont li. Apre sa rebelyon dan zarden Edenn, 2,500 an ti pase avan ki Zeova ti fer konnen lekel sa rebel.​—Zob 1:6. w18.05 15-16 ¶1-2

Eski ou’n deza dekouraze akoz dimoun dan ou teritwar pa oule ekout sa mesaz lo Rwayonm? Si wi, ou pou konpran lafason ki zapot Pol ti santi. I ti anons sa mesaz pour apepre 30 an e i ti ed en kantite dimoun pour vin Kretyen. (Akt 14:21; 2 Kor. 3:2, 3) Kantmenm sa, i pa ti kapab ed en kantite Zwif pour vin Kretyen. O kontrer, laplipar zot ti refize ekout Pol e serten ti menm persekit li. (Akt 14:19; 17:1, 4, 5, 13) Ki mannyer zot reaksyon ti fer Pol santi? I ti dir: “Mon dan en gran latristes e mon leker i kontinyelman fermal.” (Rom. 9:1-3) Akoz i ti santi koumsa? Parski i ti vreman kontan predikasyon ek bann dimoun. Pol ti vreman enterese avek bann Zwif e i ti sagren ler zot pa ti aksepte konpasyon Bondye. Parey Pol, nou anons mesaz Labib avek dimoun parski nou enterese avek zot e anvi ed zot.​—Mat. 22:39; 1 Kor. 11:1. w18.05 4 ¶4-5

Pol ti fer kler ki menm bann ki responsab pour ankouraz lezot, zot osi zot bezwen ganny ankouraze. I ti ekri son bann frer Ronm: “Mon vreman anvi vwar zot pour ed zot spirityelman pour ki zot reste ferm oubyen plito ki nou kapab ankouraz kanmarad par nou lafwa, zot par mon lafwa e mwan par zot lafwa.” (Rom. 1:11, 12) Alor, menm zapot Pol ti bezwen lankourazman par ler. (Rom. 15:30-32) Ozordi, nou kapab ankouraz bann ki pe servi Zeova a plen tan. Lekel ankor ki merit ganny ankouraze? Nou kapab ankouraz sa kantite frer ek ser ki’n swazir pour reste selibater parski zot anvi obei Zeova e marye “selman avek en disip Senyer.” (1 Kor. 7:39) Bann Kretyen ki pe andir persekisyon oubyen ki pe fer fas avek maladi i osi bezwen ganny ankouraze.​—2 Tesa. 1:3-5. w18.04 22 ¶3-5