Out

Dan renyon, nou souvan revwar sa ki Zeova ek Zezi in fer pour nou. Avek bokou lapresyasyon, nou esey imit Zezi par lafason ki nou viv nou lavi sak zour. (2 Kor. 5:14, 15) Deplis, nou leker i motiv nou pour loue Zeova akoz i’n donn nou sa ranson. En fason ki nou kapab loue li, i par reponn avek tou nou leker dan renyon. Nou kapab montre ki kantite nou kontan Zeova ek son Garson ler nou pare pour fer bann sakrifis pour zot. Souvandfwa, nou fer diferan kalite sakrifis pour nou kapab asiste renyon. Bokou kongregasyon i annan en renyon a lafen en lazournen travay ler laplipar dimoun i fatige. En lot renyon i ganny fer dan wikenn kan lezot dimoun pe repoze. Eski Zeova i vwar kan nou asiste renyon menm si nou fatige? Byensir! Anfet, pli nou fer zefor oubyen sakrifis pour vin renyon, pli Zeova i apresye lanmour ki nou demontre anver li.​—Mark 12:41-44. w19.01 29 ¶12-13

Zezi li menm ti fer fas avek serten problenm ki bann dimoun otour li ti annan. Par egzanp, i paret ki Zezi ti grandi dan en fanmir pov. Zezi ti aprann pour fer bann travay fizik avek son papa adoptif Zozef. (Mat. 13:55; Mark 6:3) I paret ki Zozef ti mor en pe letan avan ki Zezi ti fini son minister. Alor i tre probab ki Zezi ti konnen ki mannyer en dimoun i santi ler i perdi en dimoun ki i kontan dan lanmor. An plis, Zezi ti dan en fanmir ki ti annan diferan pwennvi relizye, alor i ti kapab konpran santiman en dimoun ki dan sa sityasyon. (Zan 7:5) Sa bann sirkonstans ki Zezi ti pas atraver ek lezot sirkonstans ankor, ti pou’n ed li konpran bann problenm ki dimoun ordiner ti fer fas avek e osi ki mannyer zot ti pou’n santi. Bann mirak ki Zezi ti fer ti espesyalman montre ki i ti pran an konsiderasyon santiman dimoun. Zezi pa ti fer bann mirak zis akoz i ti bezwen fer li. Ler Zezi ti vwar bann dimoun pe soufer, son “leker . . . ti fermal.” (Mat. 20:29-34; Mark 1:40-42) Zezi ti senpatiz avek bann dimoun e i ti anvi ed zot.​—Mark 7:32-35; Lik 7:12-15. w19.03 16 ¶10-11

I ti dernyen zour swar ki Zezi ti lo later. Zis mazin sa kantite presyon ki Zezi ti santi. Eski i ti pou kapab reste fidel parfetman ziska son lanmor? Lavi plizyer bilyon dimoun ti depan lo li. (Rom. 5:18, 19) Pli enportan ankor, repitasyon son Papa ti enplike. (Zob 2:4) Apre, pandan son dernyen repa avek bann zapot ki ti son zanmi pli pros, i ti annan “en gro dispit” ki ti leve antre zot konsernan “lekel parmi zot ki ti pli gran.” Me Zezi pa ti ankoler. O kontrer i ti demontre ladouser. Zezi ti koz avek zot dan en fason zantiy me ferm. Ankor en fwa, i ti eksplik zot ki kalite latitid ki zot devret annan. Apre, i ti felisit son bann zanmi akoz zot ti’n reste fidel avek li. (Lik 22:24-28; Zan 13:1-5, 12-15) Nou kapab imit legzanp Zezi e kontinyen demontre ladouser menm ler nou anba presyon, si nou rapel ki nou tou nou dir oubyen fer keksoz ki irit lezot. (Prov. 12:18; Zak 3:2, 5) Osi, esey koz lo bann bon keksoz ki ou vwar dan lezot.​—Efe. 4:29. w19.02 11-12 ¶16-17

I ti annan en provizyon dan Lalwa Moiz pour anpes en dimoun ganny akize pour en krim ki i pa’n komet. Sa dimoun ki ti ganny akize ti annan sa drwa pour konnen lekel ki pe akiz li. (Det. 19:16-19; 25:1) I ti bezwen annan omwen de temwen pour donn laprev pour ki sa dimoun ti ganny trouve koupab. (Det. 17:6; 19:15) Ki ti pou arive si i ti annan zis en temwen ki ti’n vwar en Izraelit fer en keksoz mal? Sa Izraelit pa ti devret mazinen ki i pa ti pou ganny pini pour sa keksoz mal ki i ti’n fer. Zeova ti’n vwar sa ki i ti fer. Napa nanryen ki Zeova i fer ki enzis e sa i en legzanp parfe pour nou swiv. I rekonpans bann ki fidelman swiv son bann standar me i pini bann ki abiz zot lotorite. (2 Sam. 22:21-23; Ezek. 9:9, 10) Serten i kapab fer sa ki mal e i paret ki zot pa pe ganny pini, me dan son letan apropriye, Zeova pou ziz zot. (Prov. 28:13) Si zot pa repantir, zot pou aprann ki “i en keksoz efreyan pour tonm dan lanmen sa Bondye vivan.”​—Ebr. 10:30, 31. w19.02 23-24 ¶20-21

Nou kapab asire ki Moiz ti lev son regar ver Zeova pour ganny son gidans. Labib i dir nou ki i ti “kontinyen reste ferm konmsi i ti pe vwar sa Enn ki envizib.” (Ebr. 11:24-27) Mwens ki de mwan apre ki bann Izraelit ti kit Lezip e menm avan ki zot ti ariv kot Montanny Sinai, en keksoz serye ti arive. Bann dimoun ti konmans konplent akoz ti napa delo. Zot ti konmans mirmire kont Moiz e vin sitan ankoler ki “Moiz ti kriy ver [Zeova], ‘Ki mon pou fer avek sa pep? Zot pre pour saboul mwan avek ros.’” (Egz. 17:4) Zeova ti donn Moiz bann lenstriksyon kler. Zeova ti dir li pran son baton e tap lo ros montanny Oreb. Labib i dir: “Moiz ti fer sa devan bann ansyen dan Izrael.” Delo ti sorti dan sa ros, bann Izraelit ti annan dekwa pour bwar e sa problenm ti ganny rezourd.​—Egz. 17:5, 6. w18.07 10 ¶4-5

Zeova i osi servi kongregasyon pour batir nou avek son lanmour. Ler nou kontan nou bann frer ek ser, nou prouve ki nou kontan Zeova. Nou fer tou sa ki nou kapab pour ed nou bann frer ek ser konnen ki zot annan valer e ki Zeova i kontan zot. (1 Zan 4:19-21) Zapot Pol ti ekri: “Kontinyen ankouraz kanmarad e batir kanmarad zis parey zot pe deza fer li.” (1 Tesa. 5:11) Pa zis bann ansyen ki kapab fer sa. Sakenn parmi nou i kapab imit Zeova ek Zezi par rekonfort nou bann frer ek ser. (Rom. 15:1, 2) I kapab ki serten dan kongregasyon ki soufer akoz bann gro depresyon ouswa lenkyetid pou bezwen swen medikal profesyonnel ek latizann. (Lik 5:31) Bann ansyen ek lezot dan kongregasyon i realize ki menm si zot pa bann dokter kalifye, sa led ek rekonfor ki zot kapab donnen i vreman enportan. Tou dimoun dan kongregasyon i kapab “koz dan en fason ki pou konsol bann ki dan depresyon, siport bann ki feb, annan pasyans anver tou dimoun.”​—1 Tesa. 5:14. w18.09 11 ¶10-11

Nou devlop plis konfyans dan Zeova ler nou aprann konn li pli byen. Sa sel fason ki nou kapab vreman konn Bondye, i par lir Labib atantivman e apre medit lo sa ki nou lir. I annan bann resi dan Labib ki montre ki mannyer Zeova ti protez son pep dan lepase. Sa bann resi i asir nou ki Zeova pou pran swen avek nou la konmela. Annou vwar en legzanp dan liv Izai ki montre ki mannyer Zeova i protez nou. I konpar Zeova avek en berze e son bann serviter avek bann pti mouton. Izai i dir sa lo Zeova: “I pou rasanble bann mouton dan son lebra e anmenn zot lo son leker.” (Iza. 40:11) Ler nou santi ki Zeova in anmay nou dan son lebra for, nou pa per akoz nou santi son proteksyon e nou pa enkyet. Pour ki ou pa tro enkyet menm si ou rankontre leprev, medit lo sa parol rekonfortan ki trouve dan teks pour ozordi. Sa pou ankouraz ou ler ou fer fas avek leprev a lavenir. w19.01 7 ¶17-18

Eski ou annan okenn lobzektif ki ou pe esey atenn? Petet ou annan lobzektif pour lir Labib toulezour oubyen pour amelyor bann komanter ouswa prezantasyon ki ou fer dan renyon. Ouswa petet ou pe esey servi Labib pli byen dan predikasyon. Ki mannyer ou santi ler ou remarke ki ou pe amelyore ouswa ler lezot i dir ou ki ou pe amelyore? I tre probab ki ou santi ou vreman kontan e ou annan rezon pour santi koumsa! Akoz? Parski ou pe fer sa ki Zeova i anvi ou fer, zis parey Zezi ti fer. (Prov. 27:11) Ler ou konsantre lo ou servis pour Zeova, ou pe fer en travay ki pou fer ou ere e donn ou en bi dan lavi. Pol ti donn sa konsey: “Reste ferm, solid, toultan annan bokou keksoz pour fer dan travay Senyer, rapel byen ki zot travay pour Senyer i pa anven.” (1 Kor. 15:58) Me ler dimoun i konsantre lo bann lobzektif ki sa lemonn i ofer, tel parey fer larzan ouswa vin en dimoun renonmen, zot pa vreman ere. Menm si zot reisi, souvandfwa zot santi zot vid anndan.​—Lik 9:25. w18.12 18 ¶12-13

David ti pe refer avek en letan kot tou dimoun lo later ti pou obei bann prensip drwat Bondye. (2 Pyer 3:13) Sa profesi dan Izai 65:22 i dir: “Lavi mon pep pou dire parey en pye dibwa.” Sa i montre ki dimoun ki servi Zeova dan son nouvo lemonn pou viv pour plizyer milye lannen. Revelasyon 21:1-4 i dir ki Bondye pou beni limanite e enn parmi sa bann benediksyon i, “pou nepli annan ni lanmor.” Adan ek Ev ti perdi sa privilez pour viv pour touzour dan Paradi, me later pou revin en Paradi. Parey Bondye in promet, i pou beni bann dimoun ki lo later. David ti dir ki bann ki annan limilite ek bann ki drwat pou reste lo later e viv lo la pour touzour. (Ps. 37:11, NWT) Bann profesi dan liv Izai i ed nou pour esper avek enpasyans sa letan kot nou pou profit lavi dan en zoli paradi lo later. (Iza. 11:6-9; 35:5-10; 65:21-23) Kan ki sa pou arive? Ler sa promes ki Zezi ti fer avek sa kriminel i ganny akonplir. (Lik 23:43) Ou osi ou pou kapab viv dan sa Paradi. w18.12 8 ¶22-23

Eski nou kapab konpletman evit bann nide sa lemonn? Non, nou pou ganny ekspoze avek serten bann nide sa lemonn parski nou pa kapab literalman sorti dan sa lemonn. (1 Kor. 5:9, 10) Menm ler nou dan predikasyon, nou pou tann bann dimoun pe eksprim bann move nide ek bann fo krwayans. Me menm si nou pa kapab konpletman evit bann move nide, nou pa bezwen kontinyen mazin lo zot ouswa aksepte zot. Parey Zezi, nou devret vitman rezet bann panse ki Satan ti pou kontan nou annan. Nou kapab protez nou lekor par evit bann keksoz initil ki ekspoz nou avek panse sa lemonn. Par egzanp, nou devret swazir byen nou zanmi. Labib i averti ki si nou vin zanmi avek dimoun ki pa ador Zeova, nou pou konmans mazin parey zot. (Prov. 13:20; 1 Kor. 15:12, 32, 33) Osi, ler nou rezet bann divertisman ki promot sa teori lo evolisyon, vyolans ouswa imoralite, nou evite anpwazonn nou lespri avek bann nide ki “anpes dimoun konn Bondye.”​—2 Kor. 10:5. w18.11 25 ¶16-17

Ki mannyer nou kapab vin pli determinen pour kontinyen mars dan laverite setadir viv an armoni avek laverite? En fason i ler nou fer nou maksimonm pour ansenny laverite ki dan Labib avek lezot. Labib i ganny konpare avek en lepe. Zis parey en bon solda ti tyonbo for son lepe, nou osi nou bezwen tyonbo for Parol Bondye. (Efe. 6:17) Nou tou nou kapab vin bann pli bon ansenyan, “ki servi byen parol laverite.” (2 Tim. 2:15) Ler nou servi Labib pour ansenny lezot, nou aprann e kontan laverite plis ankor. Nou vin pli determinen ankor pour kontinyen viv an armoni avek laverite. Laverite i en kado presye sorti kot Zeova. I fer li posib pour nou annan en relasyon pros avek nou Papa ki dan lesyel. Sa i sa keksoz pli presye ki nou kapab annan. Zeova in deza ansenny nou en kantite, me sa i zis konmansman! I’n promet ki i pou kontinyen ansenny nou pour touzour. Alor, apresye sa laverite parey ou ti pou apresye en perl ki annan gran valer. Kontinyen “aste laverite e pa zanmen vann li.”​—Prov. 23:23, NWT. w18.11 9 ¶2; 13-14 ¶15-17

Dan sa mesaz ki Noe ti anonse avan Deliz, i bezwen ki i ti osi averti bann dimoun lo sa destriksyon ki ti pe vini. Zezi ti dir: “Parey dan letan avan Deliz, dimoun ti pe manze e bwar, bann zonm ti pe marye e bann madanm ti pe ganny donnen an maryaz, ziska zour ki Noe ti antre dan lars e zot pa ti pran kont nanryen ziska ki Deliz ti vini e balye zot tou. I pou parey ler Garson zonm pou la.” (Mat. 24:38, 39) Menm si bann dimoun pa ti ekout Noe, i ti fidelman anons sa mesaz lavertisman ki Zeova ti’n donn li. Ozordi, nou anons sa mesaz lo Rwayonm pour donn dimoun sa loportinite pour aprann sa ki Bondye pou fer pour limanite a lavenir. Parey Zeova, nou vreman anvi ki bann dimoun i ekout sa mesaz pour “ki zot viv.” (Ezek. 18:23) Ler nou pres kazankaz e dan bann landrwa piblik, nou averti maksimonm dimoun posib ki Rwayonm Bondye pou vini e detri sa move lemonn.​—Ezek. 3:18, 19; Dan. 2:44; Rev. 14:6, 7. w18.05 11 ¶8-9

Ki ou devret fer si nou travay i ganny enterdi kot ou reste e lotorite i aret ou e kestyonn ou lo ou bann frer ek ser? Eski ou devret dir zot tou keksoz ki ou konnen? Ki Zezi ti fer ler en gouverner Romen ti kestyonn li? Zezi ti aplik sa prensip Labib ki dir ki i annan “en letan pour reste trankil e en letan pour koze” e parfwa i pa ti dir nanryen! (Ekle. 3:1, 7; Mat. 27:11-14) Si nou dan en sityasyon parey, nou bezwen pridan pour ki nou pa met nou bann frer ek ser an danze. (Prov. 10:19; 11:12) Ki ou pou fer si ou bon zanmi oubyen ou fanmir in fer en pese grav e ou ou konnen? “Dir laverite.” Ou annan sa responsabilite pour dir bann ansyen tou laverite san kasyet nanryen. Bann ansyen i annan sa drwa pour konn tou lenformasyon egzakt pour ki zot kapab trouv sa pli bon fason pour ed sa dimoun repar son relasyon avek Zeova.​—Zak 5:14, 15. w18.10 7-8 ¶17-18

Ki mannyer nou kapab batir lezot avek lanmour? En fason ki nou kapab fer li i ekout byen. (Zak 1:19) Nou demontre lanmour ler nou ekout en frer oubyen ser e esey konpran son santiman. Zantiman demann bann kestyon ki pou ed ou konpran ki mannyer ou frer oubyen ser i santi. I pou konnen ki ou vreman enterese avek li, menm atraver lekspresyon lo ou figir. Ler i pe koze, demontre pasyans e les li eksprim son lekor san enteronp li. Si ou ekout byen, ou kapab pli byen konpran li e sa i kapab ed li pour annan konfyans dan ou. Apre sa, i pou pli fasil pour li ekout ou anmezir ki ou esey ed li. Ler ou annan en lentere senser dan lezot, ou kapab vin vreman rekonfortan pour zot. w18.09 11 ¶10; 12 ¶13

I pran letan pour en dimoun ekout mesaz Rwayonm, lir Labib ek bann piblikasyon baze lo Labib, etidye Labib avek Temwen Zeova, prepar pour nou bann renyon e al sa bann renyon. Pour fer tou sa bann keksoz, nou bezwen pran sa letan ki nou ti’n kapab servi pour fer lezot aktivite ki mwen enportan. (Efe. 5:15, 16, not) Konbyen letan i pran pour aprann bann laverite de baz ki dan Labib? I diferan pour sak dimoun. Nou pa pou zanmen kapab fini aprann lo lasazes Zeova, lo sa ki i fer e lo sa ki i’n fer. (Rom. 11:33) Sa premye nimero Latour Veyer ti konpar laverite avek “en senp pti fler” e dir: “Pa bezwen satisfe avek zis en fler laverite. Si enn ti ase, i pa ti pou’n annan lezot. Kontinyen anmase e rod plis ankor.” Menm si nou viv pour touzour, i pou toultan annan plis pour aprann lo Zeova. Me i enportan ki nou servi letan ki nou annan pour aprann otan ki nou kapab. w18.11 5 ¶7

Bann msye i bezwen konpran e demontre konsiderasyon anver zot madanm. (1 Pyer 3:7) En msye ki konpran son madanm i konnen ki menm si zot diferan dan plizyer fason, i pa pli meyer ki son madanm. (Zen. 2:18) I pran an konsiderasyon santiman son madanm e tret li avek dinyite ek loner. En msye ki pran an konsiderasyon santiman son madanm pa pou zanmen rod latraksyon avek lezot madanm ouswa montre en lentere ki pa apropriye dan zot, ki swa an personn, lo rezo sosyal ouswa lo Enternet. (Zob 31:1) I pa servi rezo sosyal pour rod latraksyon e i pa al lo bann sit Enternet ki pa apropriye. I reste fidel avek son madanm parski i kontan li e i kontan Zeova e i ay sa ki mal.​—Ps. 19:14; 97:10. w18.09 28 ¶3-4

Akoz i difisil pour aplik sa ki nou aprann dan Parol Bondye? En rezon, se ki nou bezwen annan limilite pour fer sa ki byen. Dan sa “bann dernyen zour” i difisil pour kontinyen annan limilite parski en kantite dimoun otour nou i “egois, kontan larzan, vantar, arogan” e zot “napa en kontrol lo zot lekor.” (2 Tim. 3:1-3) Konman bann serviter Bondye, nou konnen ki sa kalite latitid pa bon, me i kapab paret ki sa bann ki azir dan sa fason pe reisi e ki zot pe vreman profit lavi. (Ps. 37:1; 73:3) Nou menm kapab mazinen: ‘Eski i vo lapenn fer zefor pour met lentere lezot avan sa ki pour mwan? Eski dimoun pou ankor annan respe pour mwan si mon demontre limilite?’ Si nou les latitid egois sa lemonn enfliyans nou, sa i kapab gat sa bon relasyon ki nou annan avek nou bann frer ek ser e fer li difisil pour lezot rekonnet ki nou bann Kretyen. Me ler nou etidye legzanp bann serviter Bondye ki ti annan limilite e imit zot, nou pou ganny bann bon rezilta. w18.09 3 ¶1

I ti annan en letan kot Zeova ti konpletman tousel. Apre i ti deside pour donn sa kado lavi avek bann lanz dan lesyel ek bann imen lo later. Zeova, “sa Bondye ere” i kontan pour donn bann bon keksoz. (1 Tim. 1:11; Zak 1:17) Vi ki Zeova i anvi ki nou osi nou ere, i montre nou ki mannyer pour demontre zenerozite. (Rom. 1:20) Bondye ti fer imen dan son resanblans. (Zen. 1:27) Sa i vedir ki Zeova ti kree nou avek bann kalite ki li i annan. Pour nou vreman ere e ganny benediksyon Zeova, nou bezwen swiv son legzanp. Nou bezwen demontre lentere dan lezot dimoun e donn zenerezman. (Fili. 2:3, 4; Zak 1:5) Akoz? Parski Zeova in kree nou dan sa fason. Menm si nou enparfe, nou kapab imit Zeova e demontre zenerozite nou osi. Zeova i oule ki nou imit li, alor i kontan ler nou zenere.​—Efe. 5:1. w18.08 15-16 ¶1-2, 4

Bann disip Kris i montre ki zot ekout li par aplik son parol. Zot pa ganny distrer par bann “traka lavi.” (Lik 21:34) O kontrer, zot fer li en priyorite pour obei bann komannman Zezi menm ler i difisil. Malgre tou zot leprev, nou bann frer ek ser i reste fidel avek Zeova menm si zot pe soufer. En lot fason ki nou montre ki nou pe ekout Zezi, i ler nou korpere avek bann ki i’n apwente pour diriz nou. (Ebr. 13:7, 17) Dan sa detrwa dernyen lannen, lorganizasyon Bondye in fer plizyer azisteman. Nou’n ganny bann nouvo zouti pour servi dan predikasyon e nou fason prese osi in sanze. Lafason ki nou renyon lasemenn i ganny fer in sanze e nou annan bann nouvo lenstriksyon lo ki mannyer pour mentenir nou Lasal Rwayonm. Pa nou vreman apresye sa bann lenstriksyon byen planifye ki ganny donnen avek lanmour! Nou kapab asire ki Zeova pou beni zefor ki nou fer pour swiv bann lenstriksyon ki son lorganizasyon i donn nou dan sa moman apropriye. w19.03 10-11 ¶11-12

Nou pa zanmen kapab annan konfyans dan en zistwar ki pa konpletman vre! Nou kapab aprann avek sa ki ti arive avek bann Izraelit ki ti reste lo kote was Larivyer Zourden dan letan Zozye. (Zoz. 22:9-34) Zot ti tande ki bann Izraelit ki reste lo kote les ti’n konstri en gran lotel. Sa lenformasyon ti vre, me i pa ti konplet. Sa ti fer ki bann Izraelit ki reste lo kote was ti krwar ki zot bann frer ki reste lo kote les ti’n rebel kont Zeova. (Zoz. 22:9-12) Me avan ki bann Izraelit lo kote was ti atake, zot ti anvoy serten zonm pour al rod lenformasyon egzakt. Ki sa bann zonm ti dekouver? Sa lotel pa ti’n ganny fer pour ofer sakrifis avek bann fo bondye me konman en moniman pour fer tou dimoun konnen ki zot ador Zeova. Bann Izraelit ti’n bezwen kontan ki zot pa ti’n al lager avek zot frer me ki zot ti’n pran letan pour rod tou lenformasyon egzakt. w18.08 6 ¶9-10

Parey Pol ti fer resorti, menm bann ki ador Zeova i kapab fer sa ki mal. Petet zot menm krwar ki zot ankor annan laprouvasyon Zeova. Me ler en dimoun i anvi vin zanmi Zeova ouswa dir ki i fidel avek Zeova, sa pa neseserman vedir ki i annan laprouvasyon Zeova. (1 Kor. 10:1-5) Ler Moiz pa ti desann sorti lo Montanny Sinai a sa moman ki bann Izraelit ti pe ekspekte, zot ti konmans enkyet. Si lafen sa lemonn pa’n vin a sa moman ki nou ti pe ekspekte, nou osi nou kapab konmans enkyet. Nou kapab konmans krwar ki sa lavenir merveye ki Zeova in promet i tro lwen dan lavenir ouswa zis en rev e nou kapab konmans konsantre lo sa ki nou nou anvi olye lo sa ki Zeova i anvi. Si nou pa fer atansyon, nou kapab ganny antrennen lwen avek Zeova e fer bann keksoz ki nou pa ti pou’n zanmen mazinen nou ti pou fer. w18.07 19-20 ¶17-18

Zeova i kapab konn nou personnelman. Me ki nou bezwen fer pour vin zanmi Zeova? Nou bezwen kontan li e dedye nou lavi avek li. (1 Kor. 8:3) Par kont, nou bezwen gard nou lanmitye ki presye avek nou Papa ki dan lesyel. Parey bann Kretyen Galasi dan premye syek, nou bezwen aret vin lesklav “bann keksoz initil e san valer” ki dan sa lemonn, enkli bann loportinite ki i ofer nou pour ganny sikse ek popilarite. (Gal. 4:9) Sa bann Kretyen Galasi ti konn Bondye e Bondye ti konn zot. Me Pol ti dir ki sa bann menm frer ek ser ti “pe retourn ankor” ver bann keksoz ki ti napa valer. Andotmo, i ti pe demann zot: ‘Akoz ou’n retourn ankor ver bann menm keksoz bet e initil e revin zot lesklav?’ w18.07 4 ¶5-6

Nou pa bezwen kas lalwa Bondye e sibir bann konsekans pour nou kapab aprann kwa ki byen e kwa ki mal. Nou kapab aprann avek fot ki lezot ti fer dan lepase. Sa bann legzanp i dan Labib. Sa konnesans oubyen lenstriksyon i sorti kot Bondye e i sa pli bon lenstriksyon ki nou kapab gannyen! Par egzanp, zis mazinen ki kantite David ti soufer apre ki i ti dezobei Zeova e fer imoralite seksyel avek Bat-Seba. (2 Sam. 12:7-14) Ler ou lir sa resi dan Labib, demann ou lekor: ‘Ki mannyer David ti’n kapab evit sa bann problenm? Ki mon ti pou fer dan sa menm sityasyon? Si mon ti ganny tante pour fer imoralite seksyel, eski mon ti pou fer parey David oubyen parey Zozef?’ (Zen. 39:11-15) Si nou mazin byen lo bann move konsekans pese, nou pou deplizanpli “ay sa ki mal.”​—Amos 5:15. w18.06 17 ¶5, 7

Ler dimoun i vwar bann lenzistis pe arive o tour zot, souvandfwa sa i fer zot partisip plis dan bann zafer politik. Dan letan Zezi, pey taks ti en keksoz ki ti fer dimoun pran kote dan politik. I ti annan en kantite diferan taks pour peye, tel parey pour bann posesyon, later ek lakaz. An plis, bann kolekter taks ti vreman koronpi e sa ti fer problenm pli grav. Parfwa zot ti pey bann zofisye gouvernman pour zot ganny sa pozisyon e apre zot ti servi zot pouvwar pour fer en kantite larzan. Zase ki ti sef kolekter taks Zeriko, ti vin ris akoz i ti fer bann dimoun pey en ta larzan. (Lik 19:2, 8). Bann lennmi Zezi ti esey fer li pran kote dan sa zafer pey taks. Zot ti demann li konsernan “taks Sezar” ki ti en taks lavaler en denye ki tou bann Zwif ti bezwen peye. (Mat. 22:16-18) Bann Zwif ti vreman ay sa taks akoz i ti fer zot rapel ki gouvernman Romen ki ti pe kontrol zot. w18.06 5-6 ¶8-10

Bann ki swazir pour pran kote Satan i toultan ganny bann move rezilta. Napa bann vre byenfe. (Zob 21:7-17; Gal. 6:8) Akoz i enportan pour nou konnen ki Satan i kontrol sa lemonn? I ed nou pour annan sa pwennvi apropriye lo bann gouvernman e motiv nou pour pres sa bon nouvel. Nou konnen ki Zeova i anvi nou annan respe pour bann gouvernman. (1 Pyer 2:17) I ekspekte ki nou obei zot bann lalwa o tan ki sa bann lalwa pa al kont son bann standar. (Rom. 13:1-4) Me nou osi konnen ki nou pa devret pran okenn kote dan bann zafer politik e ki nou pa devret zanmen siport okenn parti politik ouswa dirizan imen. (Zan 17:15, 16; 18:36) Vi ki nou realize ki Satan pe esey kasyet non Zeova e sali Son repitasyon, nou fer tou sa ki nou kapab pour ansenny dimoun laverite lo nou Bondye. Nou fyer pour port son non e pour servi sa non. I pli enportan pour nou kontan Bondye ki kontan larzan oubyen bann keksoz materyel.​—Iza. 43:10; 1 Tim. 6:6-10. w18.05 17-18 ¶8-9

Ler i annan problenm dan maryaz, eski separasyon i akseptab? Labib pa spesifye bann rezon ki en koup i kapab separe. Pol ti ekri: “Si en madanm i annan en msye ki pa krwar dan Bondye e sa msye i dakor pour reste avek li, pa fodre i kit son msye.” (1 Kor. 7:12, 13) Sa i ankor aplikab ozordi. Par kont, in annan serten ka kot “en msye ki pa krwar dan Bondye” in montre ki i pa “dakor pour reste avek” son madanm. Par egzanp, petet i abiz son madanm fizikman ziska ki son madanm i santi ki son lasante ek lavi i an danze. I kapab ki i refize okip bezwen materyel son madanm ek lafanmir oubyen i fer li difisil pour son madanm servi Bondye. Dan sa bann ka, en madanm Kretyen i kapab deside ki malgre sa ki son msye i dir, son msye pa “dakor pour reste avek” li e ki zot bezwen separe. Me lezot Kretyen dan menm sityasyon in deside pour reste avek zot konzwen. Zot in andire e esey travay pour amelyor zot maryaz. w18.12 13 ¶14, 16; 14 ¶17

Dan legzanp sa fermye ki ti senm lagrenn ki trouve dan Lik 8:5-8, 11-15, Zezi ti eksplike ki sa lagrenn i “parol Bondye” oubyen sa mesaz lo Rwayonm Bondye. Sa later i reprezant leker en dimoun. Sa lagrenn ki ti tonm lo bon later ti fer rasin, zermen e “ti raport fri 100 fwa plis.” Zis parey sa tiz dible dan legzanp Zezi pa prodwir bann nouvo tiz dible me bann nouvo lagrenn, nou osi nou pa prodwir bann nouvo disip me bann nouvo lagrenn. Ki mannyer nou fer sa? Sak fwa nou koz lo Rwayonm Bondye avek lezot, i konmsi sa lagrenn ki ti ganny plante dan nou leker pe miltipliye e pe ganny senmen. (Lik 6:45; 8:1) Alor o tan ki nou kontinyen anons sa mesaz lo Rwayonm Bondye, nou “prodwir fri avek landirans.” w18.05 5-6 ¶10-11

Pol ti pare pour ‘depans tou sa ki i annan e donn tou son lavi’ pour son bann frer. I ti prouve par son aksyon ki i ti pare pour fer son mye pour zot. (2 Kor. 12:15) Parey Pol, bann ansyen i devret ankouraz e rekonfort lezot pa zis par sa ki zot dir, me osi par sa ki zot fer. Sa i montre ki zot vreman enterese avek nou. (1 Kor. 14:3) Par ler, bann ansyen i bezwen donn bann frer konsey pour batir zot. Bann ansyen i kapab aprann avek bann legzanp dan Labib lo ki mannyer pour fer sa dan en fason ankourazan. Zezi in kit en bon legzanp lo konman pour donn konsey ler i ti anvoy bann mesaz pour bann kongregasyon Lazi Miner apre ki i ti’n mor e resisite. I ti annan konsey serye pour kongregasyon Efez, Perganm ek Tyatir. Me avan ki i ti donn konsey, i ti felisit zot pour tou bon keksoz ki zot ti pe fer. (Rev. 2:1-5, 12, 13, 18, 19) Bann ansyen i esey imit Zezi dan lafason ki zot donn konsey. w18.04 22 ¶8-9

Paran, nou asire ki zot fer tou sa ki zot kapab pour protez zot zanfan kont bann maladi. Zot gard zot lakour prop e zot zet tou keksoz ki kapab fer zot oubyen zot zanfan malad. Pareyman, ou devret protez ou zanfan e vey byen bann film, progranm televizyon, zwe elektronik ek sit Enternet ki ti kapab afekte ou zanfan e propaz fason panse Satan. Zeova in donn ou lotorite pour pran swen avek lasante spirityel ou zanfan. (Prov. 1:8) Alor, pa bezwen per pour etabli bann lareg kot lakour ki baze lo bann standar Labib. Dir ou zanfan sa ki zot annan drwa gete e sa ki zot pa kapab gete. Ed zot pour konpran akoz ou’n fer sa desizyon. (Mat. 5:37) Anmezir ki ou zanfan i vin pli gran, ed zot pour servi zot abilite pour konpran sa ki byen ek sa ki mal dapre bann standar Zeova. (Ebr. 5:14) Pa bliye, ou zanfan pou aprann en kantite atraver sa ki ou fer.​—Det. 6:6, 7; Rom. 2:21. w19.01 17 ¶8

Zenn, en fason pour fer sa i ler ou fer zanmi avek bann frer ek ser aze. Demann zot kwa ki’n ed zot pour kontinyen servi Zeova tou sa bann lannen. Zot kapab ed ou pour aprann bann leson enportan. Sa pou ankouraz zot e ou osi ou pou benefisye! Nou tou, ki swa nou zenn ouswa aze, nou kapab byen resevwar bann dimoun ki vin kot nou Lasal Rwayonm. Si ou ganny demande pour fer bann renyon predikasyon, ou kapab ed bann aze pour kontinyen fer zot lalimyer briye. Fer sir ki zot annan bann teritwar apropriye. Fer laranzman pour bann zenn travay avek zot. Bann frer ek ser aze ek bann ki annan problenm lasante i souvandfwa santi zot dekouraze akoz zot pa kapab pres menm kantite parey zot ti fer avan. Me zot pou santi zot bokou pli byen ler zot konnen ki ou annan zot lentere aker e konpran zot sityasyon. Nenport ki laz zot annan oubyen ki kantite letan zot in dan laverite, ou labonte i kapab ankouraz zot pour kontinyen pres avek devouman.​—Lev. 19:32. w18.06 23-24 ¶10-12

Nou pa devret zanmen oubliye ki Zeova in liber nou dan lesklavaz pese ek lanmor. Ranson i fer li posib pour nou servi nou Bondye avek en konsyans kler e sa i donn nou vre lazwa. (Ps. 40:8) Nou pa devret zis dir ki nou rekonesan anver Zeova, me nou devret osi fer atansyon ki nou pa mal servi nou laliberte. Par egzanp, zapot Pyer ti averti nou ki nou pa devret servi nou laliberte konman en leskiz pour fer sa ki mal. Sa lavertisman i fer nou rapel sa ki ti arive avek bann Izraelit dan dezer. Ozordi osi nou bezwen sa lavertisman, petet menm plis ki avan. Satan ek son lemonn i ofer bokou keksoz dezirab pour mete, manze, bwar e detann nou avek. Bann piblisiter i servi bann zoli dimoun pour fer nou krwar ki nou bezwen aste bann keksoz ki nou pa vreman bezwen. I kapab vreman fasil pour sa lemonn anbet nou e fer nou mal servi nou laliberte. w18.04 11 ¶7-8