Septanm

Zezi ti konpran santiman Mart ek Mari. Ler i ti vwar zot sagrinasyon apre ki zot ti’n perdi zot frer Lazar dan lanmor, “larm Zezi ti koule.” (Zan 11:32-35) I pa ti plere akoz i ti pou nepli kapab pas letan avek son bon zanmi. Apre tou, i ti konnen ki i ti pou resisit Lazar. O kontrer, Zezi ti plere akoz i ti konnen ki kantite son bann zanmi ti pe soufer akoz lanmor zot frer. I vreman ankourazan pour konnen ki Zezi ti konpran santiman lezot. Byensir, nou pa parfe parey Zezi. Kantmenm sa, nou kontan li parski i ti demontre konpasyon anver lezot. Nou kontan pour konnen ki Zezi pe dirize konman Lerwa dan Rwayonm Bondye. Byento i pou retir tou soufrans. Vi ki Zezi ti deza viv konman en imen lo later, i dan sa pli bon pozisyon pour ed bann imen rekipere apre sa bann douler ek soufrans ki zot in sibir anba dominasyon Satan. Byensir, i en benediksyon pour nou annan en Dirizan ki “kapab konpran nou febles.”​—Ebr. 2:17, 18; 4:15, 16. w19.03 17 ¶12-13

Nou fer nou par pour ed dimoun aprann konn Bondye, me sa bout pli enportan pa nou ki fer. (1 Kor. 3:6, 7) Zeova ki atir dimoun ver li. A lafen dizour, si en dimoun pou aksepte ouswa rezet sa bon nouvel, sa i depan lo son kondisyon leker. (Mat. 13:4-8) Rapel ki laplipar dimoun pa ti aksepte mesaz Zezi menm si i ti sa pli gran Ansenyan ki’n deza egziste! Alor, nou pa devret dekouraze si en kantite dimoun ki nou pe esey ede pa ekout nou mesaz. Nou pou ganny bann bon rezilta ler nou pran an konsiderasyon santiman bann dimoun ki nou zwenn dan predikasyon. Nou pou ganny plis lazwa dan predikasyon. Nou pou vwar ki i annan plis lazwa pour donnen. Osi, nou fer li pli fasil pour bann ki “annan sa bon kondisyon leker pour ganny lavi eternel” aksepte sa bon nouvel. (Akt 13:48) “Alor, tan ki nou annan loportinite, annou fer sa ki byen anver tou dimoun.” (Gal. 6:10) Ler nou fer sa, nou pou zwaye parski nou’n glorifye nou Papa dan lesyel.​—Mat. 5:16. w19.03 25 ¶18-19

Lerwa David ti ekri: “[Zeova] i gran; i merit ganny tou louanz.” (Ps. 145:3) David ti kontan Zeova e sa ti motiv li pour loue Bondye “devan lasanble.” (1 Kron. 29:10-13; Ps. 40:5) Ozordi, nou loue Zeova par fer komanter dan renyon nou kongregasyon. Nou tou nou kontan pour tann bann diferan larepons dan renyon. Nou apresye en larepons ki senp e senser ki en pti zanfan i fer. Nou ganny ankouraze par leksitasyon ki nou tande dan lavwa en dimoun ki pe fer komanter lo en lenformasyon ki i fek aprann. Nou osi admir sa bann ki pran “kouraz” pour donn en larepons, menm si zot kanmi oubyen zot fek konmans aprann nou langaz. (1 Tesa. 2:2, not) Ki mannyer nou kapab montre lapresyasyon pour zot zefor? Apre renyon, nou kapab remersye zot pour zot komanter ankourazan. Nou osi kapab fer en komanter. Koumsa, nou pa zis ganny lankourazman dan renyon me nou osi donn lankourazman.​—Rom. 1:11, 12. w19.01 8 ¶1-2; 9 ¶6

Sa dis zonm ti dan en sityasyon terib. Zot ti annan lalep e zot ti napa okenn lespwar ki zot lasante ti pou amelyore a lavenir. Me en zour, dan lwen, zot ti vwar Zezi, sa Gran Ansenyan. Zot ti’n tande ki Zezi ti’n geri tou sort kalite maladi. Alor zot ti kriye: “Ansenyan, Zezi, pran pitye pour nou!” Sa dis zonm ti ganny geri konpletman. San dout, zot tou zot ti apresye labonte ki Zezi ti demontre anver zot. Par kont, enn parmi zot ti fer plis ki zis annan sa santiman lapresyasyon, i ti eksprim son lapresyasyon avek Zezi. Sa Samariten ki ti ganny geri ti santi li oblize pour glorifye Bondye “avek en lavwa for.” (Lik 17:12-19) Nou anvi demontre nou lapresyasyon anver sa bann ki fer dibyen, zis parey sa Samariten. Zeova in kit en legzanp pour nou swiv an sa ki konsern demontre lapresyasyon. En fason ki i fer sa, i par rekonpans sa bann ki fer li plezir. (2 Sam. 22:21; Ps. 13:6, NWT; Mat. 10:40, 41) Labib i dir, parey “bann zanfan ki Bondye i kontan, swiv son legzanp.” (Efe. 5:1) Alor, en rezon enportan akoz nou devret demontre lapresyasyon i akoz nou anvi swiv legzanp Zeova. w19.02 14 ¶1-2, 4

Avek bokou respe, en zenn fiy dan laklas i refize pour partisip dan en lafet oubyen en seremoni ki pa fer plezir Zeova. Ler en garson ki en pe timid pe prese portanport, i tap laport enn son kanmarad lekol ki’n deza koz an mal lo Temwen Zeova. En sef dan travay, i demann en msye ki travay dir pour okip son fanmir, pour fer en keksoz dezonnet e ilegal. Menm si i kapab perdi son travay, sa msye i eksplik son sef ki i bezwen onnet e obei lalwa akoz se sa ki Bondye i ekspekte avek son bann serviter. (Rom. 13:1-4; Ebr. 13:18) Ki sa kalite ki ou’n vwar dan sa trwa dimoun? Petet ou’n remark detrwa, par egzanp kouraz ek lonnekte. Me i annan en lot kalite ki vreman enportan. Sa i lentegrite. Zot tou le trwa, zot in reste fidel avek Zeova. Zot pa’n oule fer okenn konpromi avek bann standar Zeova. Sa trwa dimoun in fer sa akoz zot lentegrite, andotmo akoz zot fidel e san defo. Sirman Zeova i fyer ler i vwar zot pe demontre sa kalite. Nou osi nou anvi fer nou Papa dan lesyel fyer. w19.02 2 ¶1-2

Lalwa Moiz ti sirtou protez sa bann ki pa ti kapab protez zot lekor, parey bann orfelen, bann vev ek bann etranze. Bann ziz an Izrael ti ganny dir: “Ou pa pou priv en etranze ki reste kot ou oubyen en orfelen son drwa. Ou pa pou pran angaz lenz en vev.” (Det. 24:17) Zeova ti demontre labonte ek lentere personnel anver bann dimoun ki pli vilnerab dan kominote. I ti osi pini sa bann ki pa ti tret zot byen. (Egz. 22:22-24) Zeova i oule ki bann ansyen i pran byen swen avek tou sa bann ki anba zot responsabilite avek lanmour. I deteste labi seksyel e i oule ki bann ki pli vilnerab i ganny proteze avek lazistis. (Lev. 18:6-30) Ler nou konvenki ki Zeova i tret nou avek lazistis, nou lanmour pour li i agrandi. Ler nou kontan Bondye ek son bann standar drwat, nou ganny motive pour kontan lezot e tret zot dan en fason zis. w19.02 24-25 ¶22-26

Annou egzamin en legzanp ki pou ed nou vwar ki mannyer nou kapab protez nou lekor kont fason panse Satan. Zeova in ansenny nou ki “imoralite seksyel, [ek] tou sort kalite lenpirte . . . pa devret ni menm ganny mansyonnen parmi [nou].” (Efe. 5:3) Me ki nou pou fer si nou bann koleg travay oubyen kanmarad lekol i konmans koz lo bann keksoz imoral? Nou gardyen, setadir nou konsyans i kapab averti nou. (Rom. 2:15) Me eski nou pou ekout li? Petet, nou kapab ganny tante pour ekout nou bann koleg oubyen pour get bann portre ki zot pe montre. Me la i sa letan pour ferm bann baro lavil, setadir, sanz konversasyon oubyen kit sa landrwa. I demann kouraz pour reziste presyon lezot pour ki nou pa mazin oubyen fer bann move keksoz. Nou kapab asire ki Zeova i vwar nou zefor e i pou donn nou lafors ek lasazes ki nou bezwen pour rezet bann panse Satan.​—2 Kron. 16:9; Iza. 40:29; Zak 1:5. w19.01 18 ¶12-13

Parmi tou bann dimoun ki’n deza viv, Salomon ti enn bann dimoun pli ris e enn bann dimoun ki ti annan plis pouvwar. I ti deside fer en tes, alor i ti dir dan li menm: “Mon pou teste ou avek bann plezir e fer ou konnen kisisa boner.” (Ekle. 2:1-10) Alor Salomon ti konstri bann gran lakaz deliks, fer plan pour bann zoli zarden e i ti fer nenport kwa ki i ti anvi. Eski i ti ere e satisfe? Ler Salomon ti get tou sa ki i ti’n fer, i ti dir sa ki nou lir dan teks pour ozordi. Eski ou pou aprann en leson atraver sa tes ki Salomon ti fer? Serten dimoun i aprann bann leson dan lavi zis ler zot fer fot e sibir bann move konsekans. Zeova pa anvi ki sa i arive avek ou. I anvi ki ou ekout li e obei li. Sa i demann lafwa, me ou pa pou zanmen regret bann swa ki ou’n fer gras a ou lafwa. Zeova pa pou zanmen oubliy “lanmour ki ou’n demontre pour son non.” (Ebr. 6:10) Alor travay dir pour fer ou lafwa for. Koumsa, ou pou fer bann bon swa dan lavi e ou pou vwar pour ou menm ki ou Papa ki dan lesyel i anvi sa ki pli bon pour ou.​—Ps. 32:8. w18.12 18-19 ¶14-15

En dimoun spirityel i annan lafwa dan Bondye e i esey vwar keksoz parey li. I les Bondye gid li e i determinen pour obei li. (1 Kor. 2:12, 13) David i en bon legzanp en dimoun spirityel. I ti sante: “[Zeova]! Ou menm mon soutyen.” (Ps. 16:5) David ti rekonesan pour son “soutyen,” andotmo pour son bon relasyon avek Bondye e i ti pran refiz dan li. (Ps. 16:1, NWT) Alor i ti kapab dir: “Mon leker i dan lazwa.” Napa nanryen ki ti fer David pli ere ki son bon lanmitye avek Zeova! (Ps. 16:9, 11) Bann dimoun ki konsantre lo larzan oubyen plezir pa zanmen kapab annan menm kantite lazwa ki David ti annan. (1 Tim. 6:9, 10) Si ou devlop lafwa dan Zeova e servi li, ou pou annan en vre bi dan lavi e trouv vre satisfaksyon. Alor, ki ou kapab fer pour fer ou lafwa vin pli for? Ou bezwen pas letan avek Zeova par lir son Parol, obzerv bann zoli keksoz ki i’n kree e reflesi lo son bann kalite, enkli son lanmour pour ou.​—Rom. 1:20. w18.12 22-23 ¶7-8

Pol pa ti pe zis koz an zeneral lo maryaz. I ti pe dir bann Kretyen ki zot bezwen onor maryaz, savedir, vwar maryaz konman presye. Eski koumsa ki ou konsider maryaz, espesyalman ou prop maryaz si ou’n marye? Si ou vwar maryaz konman en keksoz presye, ou pe swiv en bon legzanp. Zezi ti onor maryaz. Ler bann Farizyen ti demann li konsernan divors, i ti mansyonn sa ki Bondye ti dir konsernan sa premye maryaz: “Se pour sa rezon ki en zonm pou kit son papa ek son manman e zot de pou vin en sel pour ki zot nepli de me en sel.” Zezi ti azoute: “Sa ki Bondye in ini ansanm, zonm pa devret separe.” (Mark 10:2-12; Zen. 2:24) Zezi ti dakor ki Bondye ti sa enn ki ti etabli maryaz e ki maryaz i devret permanan. Ler Bondye ti fer sa premye maryaz, i pa ti dir Adan ek Ev ki zot ti kapab divorse. O kontrer, i ti oule ki “zot de” zot reste ini dan maryaz pour touzour. w18.12 9-10 ¶2-4

Ler nou ti konmans aprann laverite, nou ti aprann ki i enportan pour obei bann komannman de baz Zeova. Me anmezir ki nou kontinyen fer progre, nou aprann plis lo son fason panse, setadir, lo sa ki i kontan, sa ki i pa kontan e son fason vwar keksoz e sa i enfliyans nou bann swa personnel ek nou aksyon. Menm si nou kontan pour aprann vwar keksoz parey Zeova, parfwa i difisil pour mazin dan sa fason parski nou enparfe. Par egzanp, nou konn pwennvi Zeova lo lapirte moral, materyalizm, sa travay predikasyon, mal servi disan ek lezot keksoz ankor. Me i kapab difisil pour nou konpran akoz i vwar zot koumsa. Alor ki mannyer nou kapab aprann pour mazin plis parey Zeova? Nou bezwen sanz nou fason panse par etidye Parol Bondye, konpran son fason panse, medit lo zot e travay dir pour annan fason panse Bondye. w18.11 27 ¶2-4

Abakouk ti viv dan en letan vreman difisil. Bann dimoun otour li ti move e vyolan e sa ti fer li vreman sagren. Partou kot i ti gete, i ti vwar bann Izraelit pe tret zot kanmarad dan en fason ki kriyel e enzis. Abakouk ti mazinen: ‘Kan ki sa bann move keksoz pou arete? Akoz Zeova pe tarde pour fer en keksoz konsernan sa ki pe arive?’ I ti santi ki i pa kapab fer nanryen. Alor i ti sipliy Zeova pour fer en keksoz. I kapab ki Abakouk ti’n konmans mazinen ki Zeova ti nepli enterese avek Son pep ouswa ki I pa ti pou azir. Eski ou’n deza santi parey? Eski Abakouk ti demann sa bann kestyon akoz i ti’n aret annan konfyans dan Zeova ek son bann promes? Non! Abakouk ti pe demann Zeova pour ed li avek son bann dout ek problenm, ki montre ki i pa ti’n perdi lespwar me ki i ti ankor annan konfyans dan Zeova. Abakouk ti enkyet e konfize. I pa ti konpran akoz Zeova ti pe tarde pour azir e akoz I ti pe les li soufer sa kantite. w18.11 16 ¶4-5

Pyer ek Andre ti bann peser, me ler Zezi ti envit zot pour vin son disip, zot ti kit zot biznes lapes. (Mat. 4:18-20) Me sa pa vedir ki ou bezwen kit ou travay ler ou aprann laverite. En dimoun i bezwen travay e pran swen avek son fanmir. (1 Tim. 5:8) Me ler ou aprann laverite, ou fason vwar bann keksoz materyel i sanze. Ou konpran kwa ki vreman enportan dan lavi. Sanmenm ki en fiy ki apel Maria ti fer. Maria ti anvi vin en zwer golf profesyonnel e fer en kantite larzan. Apre i ti konmans etidye Labib e i ti konmans aplik li dan son lavi. Maria ti realize ki i ti pou difisil pour konsantre lo son relasyon avek Zeova e an menm tan lo son karyer dan sport. (Mat. 6:24) Alor i ti deside pour abandonn son lobzektif pour vin en zwer golf profesyonnel. Ozordi, Maria i en pionye e i dir ki i “vreman ere e ki i annan en bi dan lavi.” w18.11 5-6 ¶9-10

Ler Zezi ti annan 30 an, i ti aret fer sarpantye e vin en ansenyan parski i ti konnen ki sa ti sa travay pli enportan ki i ti kapab fer. I ti dir ki enn bann rezon ki Bondye ti’n anvoy li lo later, ti pour li anons sa bon nouvel lo Rwayonm Bondye. (Mat. 20:28; Lik 3:23; 4:43) Tou dilon son lavi, Zezi ti konsantre lo anons sa bon nouvel e i ti anvi ki lezot i fer parey. (Mat. 9:35-38) Laplipar nou pa bann sarpantye, me nou tou nou bann ansenyan ki ansenny lezot sa bon nouvel. Sa travay i sitan enportan ki Bondye i enplike ladan. Anfet, “nou travay ansanm avek Bondye.” (1 Kor. 3:9; 2 Kor. 6:4) Nou dakor avek sa psalmis ki ti dir: “Tou ou parol i laverite.” (Ps. 119:160) Parol Zeova i laverite. I pour sa rezon ki nou anvi asire ki nou pe “servi byen parol laverite” dan predikasyon. (2 Tim. 2:15) Alor nou esey kontinyen amelyor nou abilite pour servi Labib, ki nou zouti prensipal pour ansenny lezot lo Zeova, Zezi e lo Rwayonm. w18.10 9 ¶1-2

Ler en msye i swiv legzanp son sef Zezi Kri, i pou pli fasil pour son madanm annan “en gran respe” pour li. (Efe. 5:22-25, 33) Ler en madanm i annan respe pour son msye, i pou esey konpran santiman son msye e tret li avek labonte. Ler bann paran i demontre konsiderasyon anver kanmarad, zot kit en bon legzanp pour zot zanfan. Zot osi bezwen ansenny zot zanfan pour mazin lezot e demontre labonte anver lezot. Par egzanp, bann paran i kapab ansenny zot zanfan pour pa taye dan Lasal Rwayonm. Osi, dan bann rankont, zot kapab dir zot zanfan pour esper bann aze servi manze premye. Nou devret felisit en zanfan ler i fer en keksoz ki montre ki i’n mazin lezot, parey ler i ouver laport pour nou. Sa pou fer sa zanfan santi li byen e pou ed li aprann ki “i annan plis lazwa pour donnen ki pour resevwar.” w18.09 28 ¶5-6

Lenstriksyon ki nou gannyen sorti kot Zezi Kri nou Lerwa ki pe dirize, pou ed nou la konmela e dan lavenir. Esey konsantre lo bann fason ki ou’n benefisye akoz ou’n aziste avek bann sanzman ki’n arive dernyenman. Pandan ladorasyon fanmir, ou kapab diskit lo lafason ki bann sanzman dan renyon ouswa dan predikasyon in ed ou fanmir. Si nou rapel ki ler nou swiv bann lenstriksyon ki sorti kot lorganizasyon Zeova sa i anmenn bann bon rezilta, i pou pli fasil pour swiv sa lenstriksyon e vin ere. Par egzanp, vi ki nou pa enprim sa kantite piblikasyon parey avan, nou pe depans mwens larzan. Osi, vi ki nou servi bann nouvo teknolozi nou kapab pres sa bon nouvel avek plis dimoun. Eski nou kapab servi plis bann piblikasyon dan forma elektronik ek bann video? Sa i en fason ki nou kapab siport Kris ki anvi ki nou byen servi bann resours lorganizasyon. Ler nou swiv lenstriksyon Kris, nou ed nou bann frer ek ser pour annan en lafwa pli for e pour pli ini. w18.10 20-21 ¶17-19

Ler nou demontre tandres parey Zeova, i kapab ki nou pe donn nou bann frer ek ser sa rekonfor ki zot pe priye pour gannyen (2 Kor. 1:3-6) Par kont, pa ekspekte ki ou bann frer ek ser i parfe. Nou bezwen realistik. Si ou ekspekte ki ou bann frer ek ser i parfe, ou pou dezapwente. (Ekle. 7:21, 22) Rapel ki Zeova i realistik dan sa ki i ekspekte avek nou. Alor nou bezwen annan pasyans avek kanmarad. (Efe. 4:2, 32) Nou pa zanmen anvi fer nou bann frer ek ser santi ki zot pa pe fer ase ouswa konpar zot avek lezot. O kontrer, nou ankouraz zot e konsantre lo bann bon keksoz ki zot pe fer. Sa i kapab ed zot pour annan lazwa anmezir ki zot servi Zeova.​—Gal. 6:4. w18.09 12-13 ¶16-17

Pour fer lavolonte Bondye ti parey manze pour Zezi. Ler nou manz manze ki nourisan, sa i fer nou dibyen e nouri nou lekor. Pareyman, ler nou fer lavolonte Bondye, sa i fer nou dibyen e i nouri nou lafwa. Ler nou fer sa ki Zeova i demann nou pour fer, nou montre ki nou saz. (Ps. 107:43) Osi, plizyer bon keksoz i arive avek bann ki annan lasazes. “Napa nanryen pli dezirab ki li. . . . Pour sa enn ki sezi li, lasazes i en pye dibwa ki donn lavi; sa enn ki gard li byen, i ganny deklare byennere.” (Prov. 3:13-18) Zezi ti dir: “Si zot konn sa bann keksoz, ere si zot fer li.” (Zan 13:17) Bann disip Zezi ti pou ere si zot ti kontinyen fer sa ki Zezi ti demann zot pour fer. Zot ti viv dapre son bann lansennyman ek legzanp. w18.09 4 ¶4-5

Menm si Adan ek Ev ti tousel dan zarden Edenn, zot ti’n devret mazin lezot. Akoz? Zeova ti’n donn zot travay pour fer. I ti’n dir zot ranpli later avek zot zanfan e fer later vin en paradi. (Zen. 1:28) Adan ek Ev ti’n devret anvi ki bann zanfan zot gannyen a lavenir, i ere zis parey Zeova ti anvi ki zot tou zot ere. Zot ti pou travay ansanm pour fer later antye vin en paradi. Sa ti pou en gran proze! Bann imen parfe ti pou osi bezwen travay pros avek Zeova pour fer later vin en paradi e akonpli son lavolonte. Dan sa fason, zot ti pou antre dan son repo. (Ebr. 4:11) Zis imazinen ki mannyer sa travay ti pou’n gou e satisfezan! Zeova ti pou’n beni zot en kantite akoz zot ti pou’n mazin lezot e akoz zot ti pou’n pran swen avek lezot. w18.08 15 ¶2; 17 ¶8-9

Ki ou kapab fer si dimoun i fann bann mansonz lo ou? Sanmenm sa ki ti arive avek Zezi ek Zan ki batize. (Mat. 11:18, 19) Ki Zezi ti fer? I pa ti servi tou son letan ek lenerzi pour konvenk dimoun ki sa bann zistwar ti fo. O kontrer, i ti ankouraz bann dimoun pour analiz bann lenformasyon pour zot menm. I ti anvi ki zot konsantre lo sa ki i ti fer e ansennyen. Zezi ti dir: “Lasazes en dimoun i ganny prouve drwat par son aksyon.” (Mat. 11:19, not) Nou kapab aprann en leson enportan avek Zezi. Par ler, dimoun i kapab dir bann keksoz ki pa neseser oubyen negatif lo nou e petet nou per ki sa pou gat nou repitasyon. Me nou fason viv i kapab ed lezot pour vwar ki kalite dimoun nou vreman ete. Parey nou’n aprann avek legzanp Zezi, nou bon kondwit i kapab prouve ki bann keksoz ki pa konpletman vre ki dimoun i rakonte lo nou ek zot bann fo lakizasyon, i zis bann mansonz. w18.08 6-7 ¶11-13

Kaen, Salomon ek bann Izraelit ti annan sa loportinite pour repantir e sanz zot konportman. (Akt 3:19) I kler ki Zeova pa abandonn son pep fasilman zis akoz zot in fer en fot. Mazin lo ki mannyer i ti pardonn Aaron. Ozordi, vi ki Zeova i kontan nou, i donn nou bann lavertisman pour protez nou kont fer sa ki mal. I servi Labib, nou bann piblikasyon e menm lezot Kretyen. Ler nou ekout bann lavertisman Zeova, nou kapab asire ki i pou pran pitye pour nou. I annan en rezon akoz Zeova i demontre labonte ekstraordiner. (2 Kor. 6:1) Sa i donn nou sa loportinite “pour rezet bann kondwit ki dezonor Bondye ek bann dezir sa lemonn.” (Tit 2:11-14) Dan sa lemonn, i pou toultan annan bann sityasyon ki teste nou fidelite avek Zeova. Reste determinen pour reste konpletman lo kote Zeova! w18.07 20 ¶20-21

Ki mannyer nou kapab telman anvi ganny rekonnet par Zeova ki nou pa pou anvi ganny rekonnet par sa lemonn? Nou bezwen konsantre lo de laverite enportan. Premyerman, Zeova i toultan montre ki i rekonnet bann ki servi li fidelman. (Ebr. 6:10; 11:6) Zeova i konsider tou son bann serviter fidel konman presye, alor i santi ki i ti pou “enzis” pour inyor okenn parmi zot. “I konn semen sa enn ki drwat” e i konnen ki mannyer pour sov zot. (Ps. 1:6, NWT; 2 Pyer 2:9) Dezyenmman, Zeova i kapab montre ki i rekonnet nou dan bann fason ki nou pa’n zanmen ekspekte. Si dimoun i fer keksoz zis pour ganny felisite par lezot, Zeova pa pou rekonpans zot. Akoz non? Parski parey Zezi ti dir, ler zot ganny felisite avek lezot, sa i zot rekonpans. (Mat. 6:1-5) De lot kote, Zeova i “vwar” bann ki pa ganny onore pour dibyen ki zot fer pour lezot. I remark sa ki zot fer e i rekonpans oubyen beni zot. w18.07 5 ¶8, 10

Pyer pa ti konpran sa ki sa lavwa ti pe esey dir li. A sa menm moman, bann zonm ki Korney ti’n anvoye ti ariv kot li. Lespri sen ti dir Pyer al kot lakour Korney, alor i ti al avek sa bann zonm. Si Pyer ti’n ziz “par laparans,” i pa ti pou’n zanmen al kot lakour Korney. Bann Zwif pa ti zanmen al kot lakour bann non Zwif. Alor, akoz Pyer ti ale? Menm si i ti annan bann prezidis anver bann non Zwif, sa vizyon ki i ti’n gannyen e sa ki lespri sen ti’n dir li ti sanz son fason panse. Apre ki Pyer ti’n ekout Korney, i ti dir: “La aprezan mon vreman konpran ki Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.” (Akt 10:34, 35) Sa nouvo konprenezon ti eksitan pour Pyer e i ti pou annan en lefe lo tou Kretyen. w18.08 10 ¶3-4

Nou reste lwen avek bann keksoz ki Bondye pa kontan. Me ki nou devret fer si nou dan en sityasyon kot i napa en lalwa spesifik dan Labib? Ki mannyer nou pou konnen ki Bondye i anvi nou fer? Si nou’n les Labib antrenn nou konsyans, nou pou fer en desizyon saz. Vi ki Zeova i kontan nou, i’n donn nou bann prensip ki kapab ed nou konsyans deside si en keksoz i byen oubyen mal. Zeova i eksplike: “Mwan [Zeova], ou Bondye. Mon ansenny ou pour ou prop dibyen; mon kondwir ou lo semen ki ou devre swiv.” (Iza. 48:17, 18) Ler nou mazin seryezman lo bann prensip Labib e les zot tous nou leker, nou kapab koriz e aziste nou konsyans. Sa i fer li pli fasil pour nou fer bann desizyon saz. En prensip i en laverite de baz ki ed nou pour reflesi pour nou kapab fer bann bon desizyon. Ler nou konn bann prensip Zeova, sa i ed nou pour konpran son fason panse e akoz i’n donn nou serten lalwa. w18.06 16 ¶5; 17-18 ¶8-10

Bann siporter parti Erod ti bann dimoun ki ti an faver bann nide politik ki Erod ti annan. Zot ti swete ki si Zezi ti dir ki zot pa devret pey sa taks, zot ti pou kapab akiz li konmkwa i en lennmi Lanpir Romen. De lot kote, si Zezi ti dir ki zot ti bezwen pey sa taks, i kapab ki dimoun ti pou aret swiv li. Alor, ki Zezi ti fer? Zezi ti fer byen atansyon pour kontinyen pa pran kote dan sa zafer. Zezi ti konnen ki en kantite kolekter taks ti koronpi, me pa sa ki i ti konsantre lo la. O kontrer, i ti konsantre lo Rwayonm Bondye ki vre solisyon bann problenm limanite. Zezi in kit en legzanp pour nou. Nou pa devret pran kote dan okenn zafer politik, menm si i paret ki en kote i byen e zis e lot kote i paret mal e enzis. Bann Kretyen i konsantre lo Rwayonm Bondye e lo sa ki Bondye i dir i byen. I pour sa rezon ki nou pa form e eksprim bann lopinyon konsernan bann lenzistis ouswa koz kont bann sistenm politik. (Mat. 6:33) En kantite Temwen Zeova in reisi rezet bann lopinyon politik ki ti’n anrasinen dan zot leker. w18.06 6 ¶9-11

An plis ki servi imoralite seksyel pour tant sa bann lanz, i kapab ki Satan ti osi promet zot ki zot ti pou ganny pouvwar lo tou imen. Dan sa fason, i kapab ki Satan ti pe esey enterfer avek lakonplisman profesi Zeova konsernan ‘desandans sa fanm.’ (Zen. 3:15) Me Zeova ti anpes li reisi. I ti anmenn Deliz ki ti kas okenn plan ki Satan ek son bann demon ti’n kapab annan. Imoralite seksyel ek lorgey i bann kalite labwet ki mars byen. Bann lanz ki ti pran kote avek Satan ti’n pas plizyer lannen dan lesyel avek Bondye li menm! Kantmenm sa, en kantite zot ti les bann move dezir devlope dan zot leker e sa bann dezir ti vin vreman for. Nou bezwen toultan rapel ki menm si nou’n servi Zeova pour en bon pe letan, bann move dezir i kapab pran rasin dan nou leker. (1 Kor. 10:12) Se pour sa rezon ki nou devret toultan egzamin nou leker e retir okenn panse imoral ek lorgey ki kapab fer nou vin egois!​—Gal. 5:26; Kol. 3:5. w18.05 24-25 ¶11-12

Pol ti dekouraze akoz bann Zwif pa ti aksepte sa mesaz lo Rwayonm. Par kont, Pol pa ti zanmen aret anons sa mesaz avek zot. I ti eksplik lafason ki i ti santi konsernan sa bann Zwif ler i ti dir: “Sa ki mon anvi avek tou mon leker e ki mon pe sipliy Bondye, se ki bann Zwif i ganny sove. Parski mon kapab dir sa dan zot faver ki zot annan devouman pour Bondye me pa dapre konnesans egzakt.” (Rom. 10:1, 2) Pol ti dir, “Mon anvi avek tou mon leker.” Sa i montre nou ki i ti vreman anvi ki bann Zwif i ganny sove e sa ti motiv li pour anons sa mesaz avek zot. (Rom. 11:13, 14) Pol ti sipliy Zeova pour ed sak Zwif pour aksepte sa mesaz lo Rwayonm. Pol ti dir: “Zot annan devouman pour Bondye.” Pol ti vwar sa ki bon dan dimoun ek zot potansyel pour servi Zeova. I ti konnen ki sa bann Zwif devoue ti kapab vin bann disip Kris devoue, zis parey li. w18.05 4 ¶4; 6-7 ¶13-14

Nou tou nou devret fer zefor pour konn sa ki lezot i bezwen pour nou kapab ed zot. Pol ti ekri bann Kretyen Ebre: “Fortifye bann ki’n bes lebra oubyen bann ki zot zenou pe tranble. Kontinyen mars lo sa bon semen, pour ki sa enn ki pe bwete pa vin pli pir, me i a ganny geri.” (Ebr. 12:12, 13) Nou tou nou kapab batir e ankouraz kanmarad par sa ki nou dir, menm bann zenn. Pol ti ekri: “Vi ki zot ankouraz kanmarad akoz zot ini dan Kris, vi ki zot rekonfort kanmarad akoz lanmour, vi ki zot konsernen pour kanmarad, vi ki zot annan lafeksyon ek konpasyon pour kanmarad alor, ranpli mon leker avek lazwa par annan en menm fason panse e en menm lanmour, konpletman ini avek en sel panse antet. Pa fer nanryen avek en leta lespri dispit oubyen egois, me avek limilite konsider lezot pli siperyer ki zot. Deplis, pa rod zis zot prop lentere, me lentere lezot osi.”​—Fili. 2:1-4. w18.04 23 ¶10; 24 ¶12

Rezon ki Zeova in servi Zezi pour liber nou dan lesklavaz pese ek lanmor i pour nou kapab servi nou lavi antye pour servi Li. Sa pli bon fason pour servi nou laliberte i ler nou servi nou letan ek lenerzi pour servi Zeova plennman. Sa pou protez nou par anpes bann lobzektif sa lemonn ek bann dezir personnel vin sa keksoz pli enportan dan nou lavi. (Gal. 5:16) Mazin lo sa ki Noe ek son fanmir ti fer. Zot ti viv dan en lemonn vyolan e imoral. Me zot pa ti annan menm lobzektif avek bann dimoun otour zot e zot pa ti partisip dan bann aktivite ki sa bann dimoun ti fer. Zot ti swazir pour reste okipe dan sa travay ki Zeova ti’n donn zot pour fer. Zot ti konstri lars, anmas manze pour zot ek bann zannimo e averti lezot lo sa Deliz. “Noe ti fer tou sa ki Bondye ti’n dir li.” (Zen. 6:22) Sa ti fer ki Noe ek son fanmir ti sirviv lafen sa move lemonn ki zot ti pe viv ladan sa letan.​—Ebr. 11:7. w18.04 11 ¶8; 12 ¶11-12

Satan ek bann demon i osi servi fo larelizyon ek lemonn komers pour anbet “dimoun lo later antye,” setadir tou limanite. (Rev. 12:9) Satan i servi fo larelizyon pour propaz bann mansonz lo Zeova e i’n menm esey kasyet non Bondye. (Zer. 23:26, 27) Sa in fer ki serten dimoun senser ki krwar ki zot pe ador Bondye pe aktyelman ador bann demon. (1 Kor. 10:20; 2 Kor. 11:13-15) Satan i osi servi sa lemonn komers pour propaz bann mansonz, tel parey ki larzan ek keksoz materyel i fer dimoun ere. (Prov. 18:11) Bann ki krwar sa mansonz i pas tou zot lavi pe servi “Larises” plito ki Bondye. (Mat. 6:24) Menm si zot ti deza kontan Bondye, zot lanmour pour bann keksoz materyel i vin telman for ki zot lanmour pour Bondye i disparet.​—Mat. 13:22; 1 Zan 2:15, 16. w18.05 22-23 ¶6-7