Oktob

Nou pa kapab lir dan leker parey Zeova ek Zezi. Kantmenm sa, nou kapab esey konpran santiman ek bezwen lezot. (2 Kor. 11:29) Kontrerman avek bann dimoun voras dan sa lemonn, nou “pa rod zis [nou] prop lentere, me lentere lezot osi.” (Fili. 2:4) Bann ansyen espesyalman i bezwen pran an konsiderasyon santiman lezot. Zot konnen ki zot bezwen rann kont avek Zeova pour lafason ki zot pran swen avek son bann mouton. (Ebr. 13:17) Pour ed zot bann frer ek ser, bann ansyen i bezwen konpran zot. Ki mannyer bann ansyen i kapab montre ki zot konpran santiman lezot? En ansyen ki senpatiz avek son bann frer ek ser Kretyen i pas letan avek zot. I demann kestyon e apre i ekout atantivman e avek pasyans. Sa i enportan espesyalman si enn sa bann mouton i anvi eksprim son bann panse ek santiman, me i pe vwar li difisil pour eksprim son lekor. (Prov. 20:5, NWT) Ler bann ansyen i kontan pour pas letan avek bann frer ek ser, zot devlop plis konfyans, lanmour ek lanmitye antre zot.​—Akt 20:37. w19.03 17 ¶14-17

Lapresyasyon i parey en bon pla, i pli goute ler ou partaz li avek lezot. Ler nou konnen ki lezot i apresye sa ki nou fer, nou vreman kontan. Kan nou demontre nou lapresyasyon, nou fer lezot osi kontan. Ler nou demontre nou lapresyasyon anver en dimoun, sa dimoun i konnen ki son zefor pour ed nou oubyen pour donn nou sa ki nou ti bezwen ti vreman vo lapenn. Alor, nou lanmitye avek sa dimoun i vin pli for. Parey in ganny mansyonnen dan nou teks pour ozordi, i byen ler nou eksprim nou lapresyasyon anver lezot. Zis mazinen ki mannyer bann ponm annor ki’n ganny mete dan en zoli pannyen annarzan i zoli! Mazin osi ki kantite valer i pou annan! Ki mannyer ou ti pou santi ou si ou ti’n ganny en kado parey? Ler ou eksprim ou lapresyasyon anver lezot, sa osi i annan en kantite valer. Mazin sa: En ponm annor i kapab dire pour bokou letan. Pareyman, ler ou eksprim ou lapresyasyon anver en dimoun, i kapab rapel e kontan sa ki ou’n dir li pour larestan son lavi. w19.02 15 ¶5-6

Ler Adan ek Ev ti manz sa fri ki ti lo sa pye ki donn konnesans lebyen ek lemal, zot ti montre klerman ki zot napa konfyans dan Zeova ek son bann standar. Zot ti deside pour swazir pour zot menm kwa ki byen e kwa ki mal. Me mazin lo sa ki zot ti perdi. Zot ti perdi zot lanmitye avek Zeova. Zot ti perdi sa loportinite pour viv pour touzour e an plis ki sa, zot ti transmet pese ek lanmor avek zot zanfan. (Rom. 5:12) Konpar sa ki Adan ek Ev ti fer avek sa ki en zofisye Etyopyen ti fer ler Filip ti anons sa bon nouvel avek li. Sa zofisye ti sitan apresye sa ki Zeova ek Zezi ti’n fer pour li ki deswit i ti batize. (Akt 8:34-38) Ler nou dedye nou lavi avek Bondye e batize, parey sa zofisye ti fer, nou montre klerman ki nou apresye sa ki Zeova ek Zezi in fer pour nou. Nou osi montre ki nou annan konfyans dan Zeova e rekonnet ki i sa enn ki annan drwa pour deside kwa ki byen e kwa ki mal. w19.03 2 ¶1-2

Ki mannyer bann serviter Zeova i demontre lentegrite? Nou fer sa ler nou kontan Zeova avek tou nou leker e donn li tou nou devosyon. Dan tou desizyon ki nou fer dan nou lavi, lavolonte Bondye i bezwen toultan premye. Dan Labib sa mo “lentegrite” i kapab vedir: konplet, san defo oubyen antye. Par egzanp, bann sakrifis zannimo pour Zeova ti bezwen san defo. (Lev. 22:21, 22) Pep Zeova ti napa drwa ofer en zannimo ki mank en lapat, en zorey, en lizye oubyen enn ki malad. I ti vreman enportan ki sa zannimo i an bonn sante, san defo oubyen antye. (Mal. 1:6-9) Nou kapab konpran akoz sa i sitan enportan pour Zeova. Par egzanp, ler nou aste en fri, en liv oubyen en zouti, nou pa pou pran enn ki’n gate oubyen ki’n kase. Nou pou aste enn ki konplet, san defo oubyen antye. Zeova i santi parey. I anvi ki nou fidel avek li e ki nou kontan li avek tou nou leker, dan en fason konplet e san defo. w19.02 3 ¶3

Pour protez nou leker, nou pa devret zis rezet bann move lenfliyans me nou devret pare pour les nou ganny enfliyanse par sa ki bon. Lontan, dan bann lavil ki ganny proteze par en miray, en gardyen ti ferm baro pour anpes bann lennmi antre dan lavil, me normalman i ti ouver baro pour les manze ek lezot provizyon antre. Si baro pa ti zanmen ganny ouver, zabitan sa lavil ti pou mor lafen. Pareyman, nou bezwen ouver nou leker pour les panse Zeova enfliyans nou regilyerman. Nou pou trouv bann panse Zeova dan Labib, alor sak fwa ki nou lir li, nou les bann panse Zeova enfliyans nou fason panse, santiman ek aksyon. Ki mannyer nou kapab pli byen benefisye avek nou lektir Labib? Lapriyer i vreman enportan pour ed nou “vwar klerman bann keksoz merveye” dan son Parol. (Ps. 119:18, NWT) I enportan osi pour medit oubyen reflesi lo sa ki nou lir. Ler nou priye, lir e medite, Parol Bondye pou ariv ‘dan fon nou leker’ e nou pou aprann kontan bann panse Zeova.​—Prov. 4:20-22. w19.01 18 ¶14-15

Zeova i konnen ki nou annan diferan abilite ek sirkonstans, me i vreman apresye bann sakrifis ki nou kapab ofer li. Mazin bann diferan kalite sakrifis ki bann Izraelit ti kapab ofer Zeova. Serten Izraelit ti kapab ofer en mouton oubyen en kabri. Me bann ki ti pov ti kapab ofer “de tourtrel oubyen de pizon.” Si en Izraelit ti napa sa mwayen pour ofer de zwazo, Zeova ti aksepte “en dizyenm mezir lafarin meyer kalite.” (Lev. 5:7, 11) Lafarin ti pli bon marse, me Zeova ti apresye sa sakrifis si zot ti ofer en bon kalite lafarin. Nou Bondye lanmour i ankor santi parey ozordi. Kan nou reponn, i pa ekspekte ki nou tou nou koz byen parey Apolos oubyen koz avek konviksyon parey Pol. (Akt 18:24; 26:28) Zeova i zis anvi ki nou donn li nou meyer e i pa ekspekte ki nou fer plis ki sa ki nou kapab. Rapel sa vev ki ti donn sa de pti sou. I ti annan valer dan lizye Zeova akoz i ti donn tou sa ki i ti kapab.​—Lik 21:1-4. w19.01 8-9 ¶3-5

Konman disip Kris, nou ekspekte ki dimoun pou ay nou. Zezi ti predir ki son bann disip ti pou ganny persekite en kantite pandan bann dernyen zour. (Mat. 24:9; Zan 15:20) Profesi Izai i averti nou ki nou bann lennmi pa pou zis ay nou me zot pou servi diferan zarm kont nou. Sa bann zarm i enkli anbet dimoun lo sa ki Temwen Zeova i fer, koz manti lo nou e persekit nou dan en fason vyolan. (Mat. 5:11) Zeova pa pou anpes nou bann lennmi servi sa bann zarm pour lager kont nou. (Efe. 6:12; Rev. 12:17) Me nou pa devret per. Zeova ti dir ki “tou zarm” ki pou ganny servi kont nou ‘pa pou servi dan nanryen.’ (Iza. 54:17) Zis parey en miray i protez nou kont en gro tanpet, Zeova osi i protez nou kont “lakoler bann lennmi kriyel.” (Iza. 25:4, 5) Nou bann lennmi pa pou zanmen reisi anpes nou servi Zeova. (Iza. 65:17) Zot “pou ganny detrir e zot pou vin en nanryen ditou.”​—Iza. 41:11, 12. w19.01 6-7 ¶13-16

Zenn, Zeova i kontan laliberte e i ti kree ou pour kontan laliberte ou osi. Me i anvi ki ou servi ou laliberte dan en fason saz ki pou protez ou. Petet serten ou kanmarad i get pornografi, komet imoralite seksyel, riske zot lavi par fer bann sport danzere ouswa abiz lalkol oubyen drog. Premye kou, sa bann keksoz i kapab paret gou ouswa eksitan, me zot souvandfwa anmenn bann move konsekans, parey maladi, adiksyon e menm lanmor. (Gal. 6:7, 8) Bann zenn ki fer sa bann keksoz i kapab mazinen ki zot lib, me sa i pa leka. (Tit 3:3) De lot kote, lobeisans anver Zeova i bon pour nou. I bon pour nou lasante e i fer nou vreman lib. (Ps. 19:7-11) Ler ou servi ou laliberte dan en fason saz, setadir, ler ou swazir pour obei bann lalwa ek prensip parfe Bondye, ou montre Bondye ek ou paran ki ou en dimoun responsab. I tre probab ki ou paran pou annan plis konfyans dan ou e donn ou plis laliberte.​—Rom. 8:21. w18.12 19 ¶16-17

Ler Adan ti fer pese, en kantite keksoz ti sanze. Enn sa bann sanzman i ki bann imen ti konmans mor e sa sanzman ti afekte maryaz. Zapot Pol ti eksplik bann Kretyen ki lanmor i termin en maryaz e ki sa konzwen ki ankor vivan i lib pour remarye. (Rom. 7:1-3) Sa Lalwa ki Bondye ti donn pep Izrael ti donn bann detay lo maryaz. Par egzanp, en zonm Izraelit ti ganny drwa annan plis ki en madanm. Sa koutim ti la menm avan ki Bondye ti donn Lalwa. Par kont, Lalwa ti protez bann madanm ek zanfan pour ki zot pa ganny mal trete. Par egzanp, si en zonm Izraelit ti marye avek en lesklav e pli tar marye avek en dezyenm madanm, i ti ankor bezwen pran swen avek son premye madanm parey i ti fer avan. Bondye ti ekspekte ki sa msye i kontinyen protez e pran swen avek son premye madanm. (Egz. 21:9, 10) Nou pa anba Lalwa Moiz ozordi. Me Lalwa i montre nou ki Bondye i vwar maryaz konman en keksoz vreman presye. Sirman sa i ed nou pour onor maryaz. w18.12 9 ¶3; 10 ¶5-6

Apre ki Abakouk ti’n dir Zeova konsernan son bann lenkyetid, petet i ti’n mazinen ki mannyer Zeova pou reazir. Konman en Papa lanmour, Zeova ti konpran ki mannyer Abakouk ti santi. I ti konnen ki Abakouk ti pe soufer e pe sipliye pour ganny led. Alor Zeova pa ti repros Abakouk, me i ti dir li sa ki I ti pou fer byento avek bann Zwif enfidel. Anfet, i kapab ki Abakouk ti sa premye dimoun ki Zeova ti fer konnen ki bann Zwif enfidel ti pou ganny zot pinisyon tre byento. Zeova ti eksplik Abakouk ki I ti pare pour pran aksyon. I ti pou pini bann dimoun Zida ki ti move e vyolan. Ler Zeova ti dir ki sa ti pou ariv “dan zot letan,” i ti pe montre ki sa zizman ti pou ariv pandan ki Abakouk ti ankor vivan oubyen pandan ki bann Izraelit otour li ti ankor vivan. Abakouk pa ti’n ekspekte sa larepons ditou. w18.11 17 ¶7-8

Ki mannyer ou konsider tou sa bann dimoun ki pa ankor aprann laverite? Zapot Pol ti pres avek bann Zwif ki ti deza konn serten keksoz lo Zeova. Me i ti osi pres avek bann ki ti ador bann fo bondye. Lo premye vwayaz misyonner ki Pol ti fer, i ti al avek Barnabas dan lavil Lis. Bann Likaonyen ki ti reste laba ti tret Pol ek Barnabas parey bann superhero e zot ti apel zot Zous ek Ermes, ki ti non zot bann fo bondye. Eski Pol ek Barnabas ti pran sa konman en konpliman? Eski zot ti konsider sa konman en bon sanzman, vi ki zot ti’n ganny persekite dan sa de dernyen lavil ki zot ti’n vizite? Eski zot ti mazinen ki tou sa latansyon ti pou ed plis dimoun pour tann sa bon nouvel? Non! Zot pa ti kontan sa ditou e zot ti kriye: “Akoz zot pe fer sa? Nou osi nou bann zonm ki annan menm febles parey zot.”​—Akt 14:8-15. w18.09 4-5 ¶8-9

Ler nou aprann laverite e konmans viv dapre bann standar Labib, nou bezwen pare pour aziste nou fason panse ek aksyon. Zapot Pyer ti ekri: “Konman bann zanfan obeisan, aret viv dapre bann dezir ki zot ti annan ler zot ti ankor dan linyorans.” Apre i ti azoute: “Vin sen dan tou zot kondwit.” (1 Pyer 1:14, 15) Dan lavil Korent dan letan lontan, en kantite dimoun ti pe viv en lavi imoral. Bann ki ti pe reste laba ti bezwen fer bann gran sanzman pour zot kapab vin pir dan lizye Zeova. Ozordi osi, bokou dimoun i fer sa bann sanzman ler zot aprann laverite. Pyer ti dekrir sa sanzman ler i ti ekri: “Oparavan, zot in pas ase letan pour fer parey dimoun lezot nasyon ler zot ti pe pratik vis, pasyon san kontrol, bwar tro bokou, parti san kontrol, parti bwar ek ladorasyon zidol ki detestab.”​—1 Pyer 4:3. w18.11 7 ¶13

Ki mannyer nou kapab trouv bann dimoun ki “annan sa bon kondisyon leker pour ganny lavi eternel”? Bann Kretyen dan premye syek ti bezwen prese parski sa ti sa sel fason pour trouv sa bann dimoun. Zezi ti dir son bann disip: “Dan nenport ki lavil oubyen vilaz kot zot arive, rode lekel ki merite pour ekout zot mesaz.” (Mat. 10:11) Nou bezwen fer parey ozordi. Byensir, si bann dimoun i orgeye, pa senser oubyen pa vreman enterese dan Bondye, nou pa ekspekte ki zot pou ekout sa bon nouvel. Nou pe rod bann dimoun ki senser, ki annan limilite e ki vreman anvi konn laverite. Nou kapab konpar sa travay pour rod bann dimoun avek sa ki Zezi ti bezwen fer ler i ti en sarpantye. Premyerman, Zezi ti bezwen rod sa dibwa apropriye avan ki i ti kapab fer en meb, en laport, en zoug oubyen lezot keksoz. Apre i ti kapab pran son bwat zouti, servi son abilite e fer sa keksoz. Pareyman ozordi, nou bezwen premyerman rod bann dimoun senser e apre nou kapab servi nou bann zouti ek abilite pour ed zot vin bann disip.​—Mat. 28:19, 20. w18.10 10 ¶3-4

Filip sa predikater i en bon legzanp en dimoun ki ti reste konsantre lo son minister malgre nenport ki fason son lavi ti sanze. I ti annan en letan kot i ti pe byen desarz en nouvo responsabilite Zerizalenm. (Akt 6:1-6) Me apre tou keksoz ti sanze. Apre ki Etyenn ti’n ganny touye, bann Kretyen ti ganny persekite severman e zot ti sove e kit Zerizalenm. Vi ki Filip ti anvi reste okipe dan servis Zeova, i ti al lavil Samari kot dimoun ti bezwen tann sa bon nouvel. (Mat. 10:5; Akt 8:1) Filip ti pare pour al nenport landrwa kot lespri sen Bondye ti diriz li. Alor Zeova ti servi li pour pres dan bann landrwa kot dimoun pa ti ankor tann sa bon nouvel. En kantite Zwif ti mepriz bann Samariten e pa tret zot byen. Me Filip pa ti annan prezidis e avek devouman i ti anons sa bon nouvel avek bann Samariten. “Tou dimoun dan lafoul” ti ekout li! (Akt 8:6-8) Filip ti reste okipe dan son minister e Zeova ti kontinyen beni li ek son fanmir.​—Akt 21:8, 9. w18.10 25 ¶14-16

En zour ler Zezi ti dan rezyon Dekapol, bann dimoun ti “anmenn kot li en zonm sourd ki pa ti kapab koz byen.” (Mark 7:31-35) Zezi ti geri li, me pa devan lezot. Akoz? Vi ki sa zonm ti sourd, i tre probab ki i pa ti santi li konfortab dan bann gran lafoul. Zezi ti konpran son santiman e i “ti anmenn li a lekar” dan en landrwa kot i ti napa personn otour li e i ti geri li. Byensir, nou pa kapab fer mirak, me nou devret mazin bezwen ek santiman nou bann frer ek ser e demontre labonte anver zot. Zezi ti konpran lafason ki sa zonm sourd ti santi e i ti tret li avek labonte. Pareyman, nou devret demontre konsiderasyon pour bann aze ek bann ki annan dezabilite. Laspe pli enportan dan kongregasyon Kretyen se lanmour, pa si nou pe fer keksoz pli vit posib oubyen dan sa pli bon fason. (Zan 13:34, 35) Lanmour i fer nou fer tou sa ki nou kapab pour ed nou bann frer ek ser ki pli aze ouswa ki annan dezabilite pour al renyon ek predikasyon. Nou ed zot menm si i pa tonm byen pour nou ouswa menm si zot pa kapab fer bokou.​—Mat. 13:23. w18.09 29 ¶7-8

Tou serviter Zeova i presye pour li ek Zezi. (Gal. 2:20) Nou vreman kontan nou bann frer ek ser, alor nou bezwen tret zot avek tandres. Nou “rod bann keksoz ki promot lape e bann keksoz ki batir kanmarad.” (Rom. 14:19) Nou enpasyan pour viv dan Paradi kot personn pa pou dekouraze! I pou nepli annan maladi ek lager. Dimoun pou nepli mor akoz pese ki nou’n erite e i pou nepli annan persekisyon, problenm lafanmir ouswa bann dezapwentman dan lavi. A lafen sa mil an, tou dimoun pou parfe. Bann ki reste fidel dan sa tes final pou ganny adopte par Zeova konman son bann zanfan lo later e zot pou ganny “laglwar ek laliberte bann zanfan Bondye.” (Rom. 8:21) Alor nou tou, annou demontre lanmour ki batir e ed lezot pour sirviv e antre dan nouvo lemonn Bondye. w18.09 11 ¶10; 13 ¶18

Ler nou etidye Parol Bondye, nou bezwen fer plis ki lir bann lenformasyon vitman vitman ouswa souliny larepons bann kestyon. Nou mazin lo ki sa lenformasyon i ansenny nou lo Zeova, lo sa ki i fer e ki mannyer i vwar keksoz. Nou esey konpran akoz Zeova i dir nou fer en keksoz e evite fer en lot keksoz. Nou osi mazin lo sa ki nou bezwen sanze dan nou lavi e dan nou fason panse. Byensir, petet i pa posib pour medit lo tou sa bann pwen sak fwa nou etidye. Me i bon pour pas letan pour medit lo sa ki ou lir. Petet ou kapab pran lanmwatye sa letan ki ou pe etidye pour ou medite. (1 Tim. 4:15) Ler nou regilyerman medit lo Parol Bondye, ‘nou menm nou fer sir’ ki fason panse Zeova i parfe. Sa i vedir ki nou pe konvenk nou lekor. Nou konmans konpran lafason ki Zeova i vwar keksoz e avek letan nou aksepte son pwennvi. Alor nou sanz nou fason panse e konmans mazin dan en nouvo fason. (Rom. 12:2) Gradyelman, nou fer fason panse Zeova vin nou fason panse. w18.11 28 ¶5-6

Pol ti dir ki li ek lezot Kretyen dan premye syek ti “travay ansanm avek Bondye” parski zot ti prese e ansenny dimoun laverite. (1 Kor. 3:6) Ozordi, nou osi nou kapab “travay ansanm avek Bondye” par zenerezman donn nou letan, lenerzi ek keksoz materyel dan sa travay predikasyon ki Bondye in donn nou pour fer. Sa i en gran loner! Ler nou pe prese e ansenny lezot, si nou zenere e donn bokou letan ek lenerzi, sa pou donn nou bokou lazwa. Sanmenm ki en kantite frer ek ser ki annan sa loportinite pour fer bann letid Labib i dir. Nou vreman kontan pour vwar nou bann letid eksite ler zot konpran sa ki Labib i dir, devlop vre lafwa, fer bann sanzman dan zot lavi e konmans koz avek lezot lo sa ki zot pe aprann. Zezi osi ti byen kontan ler sa 70 disip ki i ti’n anvoy prese ti “retournen dan lazwa” akoz zot ti’n ganny bann bon leksperyans.​—Lik 10:17-21. w18.08 18 ¶11-12

Si nou konmans depan lo nou prop konprenezon, sa i kapab vin en problenm pour nou. Nou kapab konmans krwar ki nou konpran en sityasyon menm si nou napa tou lenformasyon egzakt. I osi kapab difisil pour analiz en sityasyon korekteman ler i annan pour fer avek en frer oubyen ser ki nou pa tro byen avek. Si nou kontinyen mazin lo nou bann dezakor, nou kapab konmans mefye li. Apre, si nou tann en keksoz negatif lo li, i kapab ki nou pou anvi krwar ki sa i vre, menm si napa okenn laprev. Ki nou aprann avek sa? Si nou les bann santiman negatif anver nou bann frer ek ser devlope dan nou leker, sa i kapab fer nou tir bann move konklizyon ki pa baze lo bann lenformasyon egzakt. (1 Tim. 6:4, 5) Nou pa devret les bann move santiman parey gro ker ek zalouzi reste dan nou leker. Pa zanmen oubliye ki Zeova i anvi ki nou kontan nou frer ek ser e pardonn zot avek tou nou leker.​—Kol. 3:12-14. w18.08 7 ¶15; 8 ¶18

Vi ki Zeova in kree bann imen, nou tou nou pour li. (Ps. 100:3; Rev. 4:11) Me parmi tou bann dimoun ki’n deza viv, Bondye in swazir serten pour vin pour li dan en fason spesyal. Par egzanp, Psonm 135 i dir ki bann adorater fidel Zeova dan letan lontan Izrael ti “son byen personnel.” (Ps. 135:4) Osea osi ti profetize ki serten non Zwif ti pou vin pep Zeova. (Ose. 2:23) Sa profesi ti ganny akonplir ler Zeova ti konmans swazir bann dimoun ki pa ti Izraelit pour diriz ansanm avek Kris dan lesyel. (Akt 10:45; Rom. 9:23-26) Bann ki ti ganny swazir par lespri sen ti ganny apele “en nasyon sen.” “Zot en pep ki’n vin zis pour” Zeova. (1 Pyer 2:9, 10) Me ki nou pou dir lo bann Kretyen fidel ozordi ki annan lespwar pour viv pour touzour lo later? Zeova i osi apel zot “mon pep” ek “sa bann ki mon’n swazir.”​—Iza. 65:22. w18.07 21 ¶1-2

Bann vre Kretyen i imit Zezi ki’n kit en legzanp parfe lo lafason ki en imen i kapab demontre zenerozite. (Mat. 20:28) Alor nou kapab demann nou lekor, ‘Eski mon kapab swiv legzanp Zezi pli byen?’ (1 Pyer 2:21) Zeova i kontan ler nou swiv legzanp parfe ki li ek Zezi in kite pour nou. Nou fer sa ler nou demontre lentere dan dimoun e rod bann fason pour ed zot. Zezi ti montre ki kantite i enportan pour fer sa ler i ti rakont zistwar sa bon Samariten. (Lik 10:29-37) I ti ansenny son bann disip ki zot bezwen ed lezot, san pran kont lekel zot e kote zot sorti. Eski ou rapel akoz Zezi ti rakont sa zistwar? En zonm Zwif ti’n demann li: “Lekel vreman ki mon prosen?” Larepons Zezi i ansenny nou ki nou devret zenere parey sa Samariten si nou anvi fer Zeova kontan. w18.08 16 ¶5-6

Eski Zeova ti kontinyen montre ki i ti rekonnet Mari vi ki Mari ti fidelman elve e pran swen avek Zezi? Wi. Bondye ti fer sir ki serten keksoz ki Mari ti dir e fer ti ganny rikorde dan Labib. I paret ki Mari pa ti kapab akonpanny Zezi pandan sa trwa-z-an edmi ki i ti fer son travay predikasyon. Petet i ti bezwen reste Nazaret akoz i ti en vev. Alor i pa ti ganny sans profit bann zoli leksperyans parey lezot. Me ler Zezi ti mor, Mari ti avek li. (Zan 19:26) Pli tar, Mari ti Zerizalenm avek bann disip Zezi avan ki zot ti ganny lespri sen zour Lapannkot. (Akt 1:13, 14) I tre probab ki i ti ganny swazir par lespri sen ansanm avek lezot disip. Si sa i leka, i vedir ki i’n ganny sa loportinite pour avek Zezi dan lesyel pour touzour. Pa sa i en zoli rekonpans pour son servis fidel! w18.07 6 ¶11; 7 ¶14

Zezi ti servi bann prensip pour ansenny son bann disip ki bann latitid ek aksyon i annan konsekans. Par egzanp, i ti ansennyen ki lakoler i kapab fer en dimoun vin vyolan e ki bann panse imoral i kapab fer en dimoun fer adilter. (Mat. 5:21, 22, 27, 28) Ler nou les bann prensip Zeova gid nou, nou pou annan en konsyans ki’n ganny byen antrennen e nou pou fer bann swa ki anmenn loner lo Bondye. Menm ler bann Kretyen i servi Labib pour antrenn zot konsyans, zot kapab tonm lo diferan konklizyon konsernan serten topik. Par egzanp si zot pou bwar lalkol oubyen non. Labib pa dir ki i mal pour bwar lalkol me i averti nou ki nou pa devret bwar tro bokou oubyen ziska nou sou. (Prov. 20:1; 1 Tim. 3:8) Eski sa i vedir ki tan ki en Kretyen pa bwar tro bokou i pa bezwen mazin lo okenn lezot keksoz ler i fer son desizyon? Non. Menm si son konsyans i permet li pour bwar, i ankor bezwen mazin konsyans lezot. w18.06 18 ¶10-11

Zezi ti averti son bann disip pour evit “lelven,” ki reprezant lansennyman, bann Farizyen, Sadiseen ek bann siporter parti Erod. (Mat. 16:6, 12) I osi enteresan pour note ki Zezi ti donn sa lavertisman pa lontan apre ki bann dimoun ti anvi fer li vin lerwa. Souvandfwa, ler bann larelizyon i pran kote dan bann zafer politik, sa i anmenn vyolans. Zezi ti ansenny son bann disip pour kontinyen pa pran kote. Sa i en rezon akoz bann sef pret ek bann Farizyen ti anvi touy Zezi. Zot ti per ki bann dimoun ti pou ekout li e aret swiv zot. Si sa ti arive zot ti pou nepli annan kontrol dan bann zafer relizye ek politik. Zot ti dir: “Si nou les li, zot tou zot pou annan lafwa dan li e bann Romen pou vini e pran nou tanp ek nou nasyon.” (Zan 11:48) Alor Granpret Kaif ti fer plan pour touy Zezi.​—Zan 11:49-53; 18:14. w18.06 7 ¶12-13

En kalite labwet ki Satan i servi se sa lanvi pour konn plis lo bann keksoz ki annan pour fer avek demon. Ozordi, i esey servi fo larelizyon ek divertisman pour fer dimoun enterese dan bann demon. Bann film, zwe video ek lezot kalite divertisman i kapab donn sa lenpresyon ki bann keksoz ki annan pour fer avek demon i gou. Ki mannyer nou kapab evite pran sa labwet? Nou pa devret ekspekte ki lorganizasyon Bondye i donn nou en lalis bann bon ek move divertisman. Nou bezwen aprann servi nou konsyans pour ki nou kapab fer bann bon swa baze lo bann prensip Zeova. (Ebr. 5:14) Osi, si nou lanmour pour Bondye i “san lipokrizi,” nou pou fer bann bon swa. En ipokrit i dir en keksoz me i fer lekontrer avek sa ki i’n dir. Alor ler nou swazir divertisman, nou kapab demann nou lekor: ‘Eski mon pe aplik menm prensip ki mon dir lezot swiv? Ki mon bann letid Labib ouswa bann dimoun ki mon koz avek dan predikasyon pou mazinen si zot vwar bann divertisman ki mon swazir?’ Ler nou aplik menm prensip ki nou ankouraz lezot pour aplike, i pli fasil pour nou rezet labwet Satan.​—1 Zan 3:18. w18.05 18 ¶13

Ki mannyer nou kapab imit Pol? Premyerman, nou bezwen vreman anvi ed sa bann ki “annan sa bon kondisyon leker pour ganny lavi eternel.” Dezyenmman, nou sipliy Zeova pour ed bann dimoun senser pour ekoute ler nou anons sa mesaz lo Rwayonm avek zot. (Akt 13:48; 16:14) Sanmenm ki Silvana, ki’n fer pionye pour preski 30 an, in fer. I dir, “Avan mon al kot en lakaz dan mon teritwar, mon priy Zeova e demann li pour donn mwan en latitid pozitif.” Nou osi priye ki bann lanz i ed nou pour trouv bann dimoun ki pare pour ekoute. (Mat. 10:11-13; Rev. 14:6) Robert, ki’n fer pionye pour plis ki 30 an, i dir, “Pour travay ansanm avek bann lanz ki konn sa ki pe pase dan lavi bann met lakour i eksitan.” Trwazyenmman, nou esey vwar sa ki bon dan dimoun ek zot potansyel pour servi Zeova. Carl, en ansyen, i dir, “Mon rod okenn pti detay dan sa dimoun ki montre ki i senser, petet en sourir, en regar zantiy ouswa en kestyon senser.” Si nou fer sa bann keksoz, nou pou “prodwir fri avek landirans” parey Pol ti fer. w18.05 6 ¶13; 7 ¶15

Nou kontan pour tande ki bann ki nou’n ede dan lepase pe kontinyen reste fidel. Zapot Zan ti ekri: “Napa en pli gran lazwa ki ler mon tande ki mon bann zanfan pe kontinyen viv an armoni avek laverite.” (3 Zan 4) En kantite pionye i vreman zwaye ler zot tande ki en dimoun ki zot ti ede pour konn laverite dan lepase pe kontinyen servi Zeova fidelman e petet pe menm fer pionye. Alor si bann pionye i santi zot dekouraze, nou kapab rapel zot dibyen ki zot in fer pour ed lezot. Plizyer sirveyan rezyonal in dir ki zot ek zot madanm ti ganny ankouraze ler zot ti ganny en not remersiman apre ki zot ti’n vizit en kongregasyon. Sa i osi vre pour bann ansyen, misyonner, pionye ek Betelit ki pe servi Zeova fidelman. Ler nou remersye zot, nou kapab pe ankouraz zot plis ki nou realize. w18.04 24-25 ¶14-15

Salomon ti dezobei sa lalwa. Pour fini kont, i ti annan 700 madanm ek 300 konkibin! (1 Rwa. 11:3) Plizyer parmi sa bann madanm ti bann etranze ki ti ador bann fo bondye. Alor Salomon ti osi dezobei sa lalwa ki Bondye ti’n donnen pour pa marye avek bann madanm etranze. (Det. 7:3, 4) Ptitapti, Salomon ti perdi son lanmour pour bann lalwa Zeova. Finalman, i ti fer bann keksoz vreman mal. I ti konstri bann lotel pour fo bondye Astoret ek fo bondye Kemos e apre i ti ador sa bann fo bondye ansanm avek son bann madanm. Salomon ti menm konstri sa bann lotel lo montanny ki ti zis anfas avek Zerizalenm kot i ti’n konstri tanp Zeova! (1 Rwa. 11:5-8; 2 Rwa. 23:13) Petet Salomon ti’n anbet son lekor pour krwar ki Zeova ti pou inyor tou sa bann keksoz mal ki i ti pe fer tan ki i ti ofer bann sakrifis kot tanp. Me Zeova pa zanmen inyor pese. w18.07 16-17 ¶7-9

Ki “bann dart alimen” Satan i kapab anvoy lo ou? Petet i servi bann mansonz lo Zeova pour atak ou. Satan i anvi ki ou santi ki Zeova pa kontan ou e ki personn pa enterese avek ou. Ida ki annan 19 an, i dir: “Souvandfwa mon’n santi ki Zeova pa pros avek mwan e ki i pa anvi vin mon Zanmi.” Ki i fer ler i santi koumsa? I dir: “Bann renyon i fer mon lafwa vin pli for. Mon ti abitye zis asize e pa reponn akoz mon ti krwar ki personn pa anvi tann sa ki mon annan pour dir. Me aprezan mon prepar byen pour bann renyon e mon esey reponn de ou trwa fwa.” Boukliye en solda i toultan reste menm grander. Me parey nou’n aprann avek leksperyans Ida, nou lafwa pa koumsa. Nou lafwa i kapab agrandi ouswa diminyen, vin pli for oubyen afebli. Nou ki fer sa swa. (Mat. 14:31; 2 Tesa. 1:3) Pour ki nou “boukliye lafwa” i protez nou, nou bezwen kontinyen fer li vin pli gran e pli for! w18.05 25 ¶12-14

I ti apre sa tranblemandter ki sa gard prizon ti sanz son latitid e demann led. (Akt 16:25-34) Pareyman, serten dimoun ki pa anvi ekout mesaz Labib i kapab sanz zot latitid e rod led ler en maler i arive dan zot lavi. Petet zot in perdi zot travay. Lezot i kapab dan lapenn akoz zot annan en maladi grav oubyen akoz en dimoun ki pros avek zot in mor. Zot kapab konmans demann kestyon lo lavi, bann kestyon ki zot pa’n zanmen mazin lo la avan. Zot menm kapab demande, ‘Ki mon bezwen fer pour ganny sove?’ Petet zot pou anvi ekout nou mesaz lespwar pour premye fwa dan zot lavi. Alor si nou fidelman kontinyen anons sa mesaz, nou pou disponib ler dimoun i pare pour aksepte sa mesaz rekonfor ki nou anmennen.​—Iza. 61:1. w18.05 12 ¶10-12

Ozordi, Satan in avegle lespri laplipar dimoun e zot pa realize ki zot lesklav fo larelizyon, bann keksoz materyel ek sistenm politik. (2 Kor. 4:4) Parey Zezi, nou annan sa privilez pour ed lezot aprann konn e ador Zeova, sa Bondye laliberte. (Mat. 28:19, 20) I pa fasil pres avek lezot. Dan serten landrwa, dimoun pa enterese pour aprann konn Bondye e serten i menm ankoler ler nou pres avek zot. Me vi ki Zeova in donn nou lord pour prese, nou devret demann nou lekor, ‘Eski mon kapab servi mon laliberte pour fer plis dan servis Zeova?’ I ankourazan ki en kantite parmi pep Bondye in realize ki lafen sa lemonn i vreman pros e zot in deside pour senplifye zot lavi e konmans servis pionye. (1 Kor. 9:19, 23) Serten i fer pionye kot zot reste, tandis ki lezot i al servi dan bann kongregasyon ki bezwen led. Pa i merveye ki en kantite pe servi zot laliberte pour servi Zeova dan sa fason!​—Ps. 110:3. w18.04 13 ¶13-14