Desanm

Parfwa nou kapab vwar li difisil pour konpran sa ki Labib i dir. Oubyen i kapab ki Zeova pa reponn nou lapriyer parey nou ti ava kontan. Sa i kapab fer nou konmans annou dout. Si nou inyor nou bann dout, sa i kapab afebli nou lafwa e gat nou lanmitye avek Zeova. (Zak 1:7, 8) Zot menm kapab fer nou perdi nou lespwar pour lavenir. Zapot Pol ti dir ki nou lespwar i parey lank en bato. (Ebr. 6:19) Pandan en tanpet, lank en bato i anpes sa bato fer nofraz. Me sa lank i itil si sa lasenn ki atas avek bato pa kase. Zis parey larouy i fer lasenn en lank fay, nou bann dout i kapab afebli nou lafwa. Ler en dimoun ki annan dout i pas dan problenm, i kapab aret krwar ki Zeova pou akonpli Son bann promes. Si nou napa lafwa, nou napa lespwar. I tre probab ki en dimoun koumsa, pa pou zanmen ere! w21.02 30 ¶14-15

I tre probab ki Abraam ti annan plis ki 70 an ler i ti kit lavil Our ansanm avek son fanmir. (Zen. 11:31–12:4) Pour apepre san-t-an, i ti reste anba latant dan diferan landrwa dan pei Kanaan. Abraam ti mor a laz 175 an. (Zen. 25:7) Me i pa ti vwar lakonplisman promes Zeova pour donn son desandans sa pei ki Zeova ti’n promet. Osi, i pa ti vwar sa lavil, setadir Rwayonm Bondye ganny etablir. Kantmenm sa, Labib i dir ki Abraam ti mor “a en bon laz, vye e satisfe.” (Zen. 25:8, NWT) Menm si Abraam ti fer fas avek en kantite problenm, son lafwa ti reste for e i ti pare pour esper Zeova akonpli son promes. Akoz i ti kapab andire? Parski tou dilon lavi Abraam, Zeova ti protez li e tret li konman en zanmi. (Zen. 15:1; Iza. 41:8; Zak 2:22, 23) Parey Abraam, nou pe esper sa lavil ki annan en fondasyon solid. (Ebr. 11:10) Par kont, nou pa pe esper sa lavil ganny konstrir parski Rwayonm Bondye ti ganny etablir an 1914 e i deza pe diriz lesyel antye. (Rev. 12:7-10) Nou, nou pe espere ziska ki sa Rwayonm i diriz later antye. w20.08 4-5 ¶11-12

Pour ekout byen lezot, nou bezwen annan limilite ek pasyans. I vo lapenn pour ekout byen lezot pour omwen trwa rezon. Premyerman, i pou pli difisil pour annan bann move lopinyon lo lezot dimoun. Dezyenmman, nou kapab konpran santiman nou frer oubyen nou ser, akoz i fer serten keksoz e sa pou ed nou demontre plis konpasyon anver li. Trwazyenmman, ler nou les nou frer oubyen nou ser koze, i kapab aprann en keksoz lo son lekor. Parfwa, nou pa vreman konpran nou prop santiman ziska ler nou koz lo la. Serten nou bann frer oubyen ser i vwar li difisil pour koz lo zot santiman, akoz bann keksoz ki’n ariv zot dan lepase oubyen akoz zot personnalite. I kapab pran letan pour zot santi zot konfortab pour koz avek nou, me nou pou kapab konpran zot vre santiman apre ki zot in koz avek nou. Si nou annan pasyans parey Zeova, zot pou pli pare pour dir nou ki mannyer zot santi. Apre sa, ler zot in pare pour partaz zot santiman avek nou, nou devret ekout zot byen. w20.04 15-16 ¶6-7

Normalman pwason i reste dan bann landrwa ki ideal pour zot e kot i annan en kantite manze. Eski i enportan ki ler en peser i al lapes? En misyonner ki reste lo en zil dan Losean Pasifik ti aprann ki i annan en ler spesifik pour lapes. Ler en frer ti envit li pour al lapes, sa misyonner ti dir sa frer ki i a zwenn li son landmen ne-v-er. Me sa frer ti dir: “Ou pa konpran mwan. Nou pa al lapes ler i bon pour nou me nou al lapes ler pwason i morde.” Pareyman, bann ki ti lapes dimoun dan premye syek ti al dan bann landrwa kot i ti annan dimoun e dan en letan kot sa bann dimoun ti la. Par egzanp, bann disip Zezi ti anons sa bon nouvel kot tanp, dan bann sinagog, kazankaz e dan bazar. (Akt 5:42; 17:17; 18:4) Nou osi nou bezwen konnen kan ki bann dimoun dan nou teritwar i kot lakour. Nou bezwen pare pour aziste nou progranm pour ki nou kapab anons sa bon nouvel avek sa bann dimoun.​—1 Kor. 9:19-23. w20.09 4 ¶8-9

En fason nou kapab devlop en lanmitye avek Zezi i par siport laranzman lorganizasyon Zeova. Nou vin zanmi pros avek Zezi, ki sef kongregasyon, ler nou korpere avek bann ki i’n apwente pour pran swen avek nou. (Efe. 4:16) Par egzanp, konmela nou pe esey fer sir ki tou Lasal Rwayonm i ganny servi o maksimonm. Pour reisi fer sa, serten kongregasyon in zwenn avek en lot. Dan sa fason, lorganizasyon Zeova pa’n depans bokou larzan kontribisyon. Me sa in fer ki serten proklanmater in bezwen adapte avek bann nouvo sirkonstans. I kapab ki sa bann proklanmater fidel in servi avek en kongregasyon pour plizyer lannen e zot in devlop bann bon lanmitye avek bann frer ek ser dan sa kongregasyon. Me la zot pe ganny demande pour servi dan en nouvo kongregasyon. Zezi i vreman kontan ler i vwar lafason ki sa bann serviter fidel pe swiv sa laranzman! w20.04 24 ¶14

Lerwa nor ek lerwa sid i fer konpetisyon avek kanmarad akoz zot tou le de zot anvi vin sa gouvernman pli pwisan dan lemonn. Par egzanp, apre Dezyenm Lager Mondyal, Linyon Sovyetik ti konmans kontrol en gran parti Lerop. Alor, lerwa sid ti dakor pour zwenn ansanm avek lezot pei pour opoz lerwa nor. Sa lorganizasyon i apel NATO. Lerwa nor ek lerwa sid i depans en kantite larzan pour fer zot larme vin pli for ki pour kanmarad. Zot osi opoz kanmarad par siport lennmi kanmarad dan bann lager tel parey dan Lafrik, Lazi ek Lanmerik Laten. Pandan sa bann dernyen lannen, Larisi avek son bann alye in vin vreman pwisan partou dan lemonn. Zot pe osi opoz lerwa sid atraver Enternet. Sa bann lerwa in akiz kanmarad konmkwa zot servi bann progranm konpiter pour fer zot perdi larzan e andomaz zot sistenm ekonomik e politik. Osi, parey Danyel ti predir, lerwa nor i kontinyen son latak lo pep Bondye.​—Dan. 11:41, NWT. w20.05 13 ¶5-6

“Eski en fanm i kapab oubliy son pti baba ki i pe donn tete?” Sa i en kestyon ki Zeova ti demande dan letan profet Izai. Bondye ti dir son pep: “Menm si i oubliy li, mwan mon pa pou oubliy ou.” (Iza. 49:15) Zeova pa souvan konpar son lekor avek en manman me safwasi i ti fer li. Zeova ti konpar son santiman pour son bann serviter avek sa lanmour ki en manman i annan pour son zanfan, parski i ti anvi ki son bann serviter i konnen ki i kontan zot en kantite. Laplipar manman i santi parey en ser ki apel Jasmin. Jasmin i dir: “Ler ou donn tete ou zanfan, ou form en relasyon spesyal pour larestan zot lavi.” Zeova i konnen ler enn son serviter i aret vin renyon e i aret anons sa bon nouvel. En kantite sa bann frer ek ser ki’n vin inaktif i retourn dan kongregasyon e nou kontan ler zot fer sa! Zeova i anvi zot retournen e nou osi parey.​—1 Pyer 2:25. w20.06 18 ¶1-3

Pa tou trezor ki nou kapab vwar. Anfet, nou pa kapab vwar bann trezor pli presye. Dan Sermon lo Montanny, Zezi ti koz lo bann trezor dan lesyel ki bokou pli enportan ki bann keksoz materyel tel parey larzan. Apre i ti dir: “Kot ou trezor i ete, ou leker pou la osi.” (Mat. 6:19-21) Ler en keksoz i presye pour nou, nou pou fer tou pour ganny li. Nou anmas “trezor dan lesyel” ler nou annan en bon non oubyen repitasyon devan Bondye. Zezi ti eksplike ki sa bann trezor pa kapab ganny detrir, ni ganny vole. Zapot Pol ti ankouraz nou pour “fikse nou regar . . . lo sa ki nou pa vwar.” (2 Kor. 4:17, 18) Bann keksoz ki nou pa vwar i enkli tou bann bon keksoz ki nou pou gannyen dan nouvo lemonn ki Bondye in promet. Eski nou demontre nou lapresyasyon pour sa bann trezor ki nou pa vwar? w20.05 26 ¶1-2

Sa ki Moiz ti ansenny bann Izraelit ti ranforsi zot lafwa e ankouraz zot, zis parey en pti grenas lapli lo vezetasyon. Ki mannyer nou kapab fer sir ki nou fason ansennyen i parey? Ler nou pe anons sa bon nouvel kazankaz oubyen an piblik, nou kapab servi Labib pour montre dimoun non Bondye, Zeova. Nou kapab montre zot bann piblikasyon, bann zoli video ek lezot keksoz lo nou sit Enternet ki onor Zeova. Ler nou dan travay, kot lekol e pe vwayaze, nou kapab rod bann loportinite pour koz lo nou Bondye e lafason i ete. Nou kapab dir zot konsernan bann keksoz merveye ki Zeova pou fer pour nou e pour later. Ler zot tann sa, sa i kapab fer zot realize pour premye fwa ki kantite Zeova i kontan nou. Ler nou dir lezot laverite lo nou Papa ki kontan nou, nou pe ede sanktifye non Zeova. Nou ed dimoun konpran ki zot in ganny ansennyen bann mansonz lo Bondye. Sa ki nou ansenny dimoun sorti dan Labib i sa pli bon keksoz ki zot kapab aprann parski i soulaz e ankouraz zot.​—Iza. 65:13, 14. w20.06 10 ¶8-9

Ki serten kalite nou bezwen demontre pour nou kapab ed bann ki anvi retourn kot Zeova? Annou vwar serten leson ki nou aprann dan legzanp Zezi lo sa garson ki ti kit lakour son papa. (Lik 15:17-24) Sa garson ti finalman realize ki son aksyon ti bet e i ti retourn dan lakour kot son papa. Son papa ti taye pour al zwenn li e i ti may li. Sa ti reasir sa garson ki son papa ti kontan li. Sa garson ti annan en konsyans sarze e i ti santi ki i nepli merite ganny konsidere konman garson son papa. I ti devid son leker avek son papa e son papa ti konpran son santiman. Apre, sa papa ti montre ki i ti’n aksepte li kot lakour konman son garson ki i kontan. Sa papa ti fer en festen e i ti donn son garson ki ti’n repantir bann zoli lenz. Zeova i parey sa papa dan sa legzanp. I kontan nou bann frer ek ser ki inaktif e i anvi ki zot retourn kot li. Nou kapab ed zot retournen par swiv legzanp Zeova. Nou fer sa ler nou demontre pasyans, lanmour e nou montre ki nou konpran zot santiman. w20.06 25-26 ¶8-9

Zezi ti dir ki serten ti pou aksepte laverite “avek lazwa,” me ki zot lafwa ti pou afebli ler zot pas dan problenm. (Mat. 13:3-6, 20, 21) Petet zot pa ti realize ki bann disip Zezi ti pou fer fas avek bann difikilte. (Mat. 16:24) Oubyen petet zot ti krwar ki ler ou vin en Kretyen, ou pou nepli annan problenm oubyen ki Bondye pou toultan rezourd ou problenm. Me dan sa lemonn, i pou annan problenm. Sirkonstans i kapab sanze e sa i kapab fer nou perdi nou lazwa pour en serten letan. (Ps. 6:6; Ekle. 9:11, NWT) Laplipar nou bann frer ek ser i montre ki zot asire ki zot dan laverite. Akoz nou dir sa? Zot lafwa pa afeblir menm ler en frer oubyen ser i bles zot ouswa zot fer en fot grav. (Ps. 119:165, NWT) Sak fwa ki zot pas dan problenm, zot lafwa pa afebli, o kontrer i vin pli for. (Zak 1:2-4) Nou devret devlop sa kalite lafwa for. w20.07 8 ¶1; 9 ¶4-5

Avan ou konmans lir Labib, demann Zeova pour ed ou vwar ki mannyer ou kapab benefisye avek sa ki ou pe lir. Par egzanp, si ou pe rod konsey lo konman pour fer fas avek en problenm, demann Zeova pour ed ou vwar bann prensip dan son Parol pour ou kapab fer bann bon desizyon. (Fili. 4:6, 7) Zeova in donn nou en abilite merveye. Nou kapab servi nou limazinasyon pour imazin diferan keksoz. Pour fer en resi Labib pli reel pour ou, esey imazin sa senn e met ou dan plas sa dimoun ki ou pe lir lo la. Esey vwar bann keksoz ki sa dimoun ti vwar e esey santi parey i ti santi. Apre, medite. Meditasyon i vedir ki ou reflesir byen lo sa ki ou pe lir e lo ki mannyer sa lenformasyon i aplik pour ou. I ed ou konpran ki mannyer sa ki ou pe lir i relye avek lezot lenformasyon e sa i ed ou konpran pli byen sa topik. Si ou lir Labib e ou pa medite, sa i parey ler ou pe get diferan bout en puzzle lo en latab me ou pa pe azout zot ansanm. Meditasyon i ed ou pour ou kapab vwar sa puzzle antye. w21.03 15 ¶3-5

Zapot Pol ti’n kapab konsantre lo lepase. I ti’n kapab mazinen ki si i pa ti’n vin en Kretyen ki sitan devoue, i pa ti pou’n ganny arete. I ti’n kapab ankoler avek bann dimoun dan distrik Lazi ki ti’n abandonn li e i ti’n kapab aret annan konfyans dan son bann lezot zanmi. Me Pol pa ti fer sa bann keksoz. Menm si Pol ti konnen ki i ti pe al mor, i pa ti oubliye ki i vreman enportan pour glorifye Zeova. I ti kontinyen mazin lo lafason ki i ti kapab ankouraz lezot. I ti depan lo Zeova par priy souvan. Pol pa ti kontinyen mazin lo bann frer ki ti’n abandonn li. O kontrer i ti dir ki i vreman rekonesan pour lafason ki son bann zanmi ti siport li e ed li. Pol ti osi kontinyen etidye Parol Bondye. (2 Tim. 3:16, 17; 4:13) Pli enportan ankor, i ti asire ki Zeova ek Zezi i kontan li. w21.03 18 ¶17-18

En pe letan apre lannen 100, i ti annan plis fo Kretyen ki ti vin dan kongregasyon Kretyen. Zot ti ansenny bann fo lansennyman relizye e kasyet bann laverite ki dan Parol Bondye. Depi sa letan ziska ver 1870, Bondye ti napa en lorganizasyon lo later. Pandan sa letan, bann fo Kretyen ti pouse parey move zerb dan plantasyon e sa ti fer li difisil pour konnen lekel bann vre Kretyen. (Mat. 13:36-43) Akoz i enportan pour nou konn sa? Parski sa bann lenformasyon i montre ki sa ki nou lir dan Danyel sapit 11 konsernan lerwa nor ek lerwa sid, pa kapab aplik pour bann dirizan oubyen gouvernman ki ti o pouvwar ant lannen 100 ziska 1870. Bondye ti napa okenn lorganizasyon lo later pour zot persekite. Par kont, pa tro bokou letan apre 1870, i ti evidan ki i ti annan en lerwa nor ek en lerwa sid ankor. w20.05 3 ¶5

Zoel ti predir ki en lesen sotrel ti pou anvai pei Izrael e manz tou sa ki zot vwar! (Zoel 1:4, NWT) Pour plizyer lannen, nou ti krwar ki sa profesi ti pe predir ki pep Zeova pou kontinyen sa travay predikasyon parey en lesen sotrel ki pa kapab ganny arete. Nou ti krwar ki sa travay predikasyon ti pou anvai sa “pei” oubyen bann dimoun ki anba kontrol bann sef relizye. Me ler nou reflesir byen lo sa profesi an antye, nou vwar ki nou bezwen konpran li dan en lot fason. Annou vwar sa promes Zeova konsernan sa lesen sotrel: “Mon pou sas bann sotrel ki sorti dan Nor; mon pou sas zot lwen.” (Zoel 2:20) Si sa bann sotrel i reprezant Temwen Zeova ki pe obei lord Zezi pour anons sa bon nouvel e fer disip, akoz Zeova in promet pour sas zot? (Ezek. 33:7-9; Mat. 28:19, 20) I kler ki Zeova pa pe sas son bann serviter fidel me i pe sas en keksoz oubyen en dimoun ki ankoler avek son pep. w20.04 3 ¶3-5

Ki nou devret fer si nou santi ki Zeova pa pe reponn nou lapriyer deswit? Zak i dir ki nou devret “kontinyen demann” Bondye lasazes. Zeova pa pou ankoler ler nou kontinyen demann li lasazes. O kontrer ler nou demann nou Papa ki dan lesyel, lasazes pour andir nou bann problenm, i pou donn nou lasazes “avek zenerozite.” (Ps. 25:12, 13) I vwar nou bann problenm, i pa kontan vwar nou pe soufer e i vreman anvi ed nou. Sa i fer nou vreman zwaye! Me ki mannyer Zeova i donn nou lasazes? Atraver son Parol. (Prov. 2:6) Pour ganny sa lasazes, nou bezwen etidye Parol Bondye ek bann piblikasyon baze lo Labib. Me nou pa devret zis etidye Labib, nou devret fer sa ki Bondye i demann nou pour fer. Zak ti ekri: “Pa zis ekout parol Bondye me met li an pratik osi.” (Zak 1:22) Ler nou aplik bann konsey Bondye, nou vin bann dimoun ki kontan fer lape, ki rezonnab e ki annan bokou pitye. (Zak 3:17) Sa bann kalite i ed nou fer fas avek nou bann problenm, san ki nou perdi nou lazwa. w21.02 29 ¶10-11

Ler en etidyan Labib i ganny led avek lezot dan kongregasyon, i tre probab ki sa pou ed li progrese ziska batenm. Tou proklanmater i kapab ed bann nouvo pour form parti kongregasyon. En pionye i dir: “I annan en koze ki dir: ‘I pran en kominote pour elve en zanfan.’ Mon krwar ki sa i osi aplik pour fer disip. I pran en kongregasyon pour ed en dimoun vin dan laverite.” Sa ki sa pionye i dir, i montre ki manm fanmir, zanmi e ansenyan kot lekol i kapab ed en zanfan grandi pour vin en adilt. Zot fer sa ler zot ankouraz sa zanfan e ansenny li bann leson enportan. Pareyman, bann frer ek ser dan kongregasyon, i kapab donn konsey, ankouraz e vin en bon legzanp pour bann etidyan Labib. Sa i kapab ed zot pour progrese ziska batenm. (Prov. 15:22) Akoz en proklanmater ki pe fer en letid Labib i devret kontan ler lezot proklanmater i ed sa etidyan? Parski lezot proklanmater i kapab ed sa etidyan pour progrese spirityelman. w21.03 8 ¶1-3

Tou Kretyen, ki swa i zenn oubyen vye, i bezwen fer atansyon ki i pa fer krwar i servi Zeova e an menm tan i pe fer sa ki mal. Zapot Zan ti dir ki nou pa kapab viv en lavi imoral e an menm tan viv an armoni avek laverite. (1 Zan 1:6) Si nou anvi fer plezir Zeova, nou bezwen toultan gard antet ki Zeova i vwar tou sa ki nou fer. Menm si lezot dimoun pa vwar sa ki nou pe fer an sekre, Zeova i vwar tou sa ki nou fer. (Ebr. 4:13) Nou pa devret aksepte pwennvi lemonn lo pese. Dan letan zapot Zan, bann aposta ti esey fer dimoun krwar ki zot kapab volonterman fer keksoz ki mal e an menm tan kontinyen reste zanmi Bondye. Ozordi, nou pe viv parmi bann dimoun ki annan sa menm pwennvi. En kantite dimoun i dir ki zot krwar dan Bondye me zot pa aksepte pwennvi Zeova lo pese, sirtou ler i annan pour fer avek sèks. I annan serten konportman seksyel ki Zeova i vwar konman pese me sa bann dimoun i dir ki en dimoun i annan drwa fer sa bann keksoz si li i anvi. w20.07 22 ¶7-8

Eski ou defann ou bann ser spirityel ler i neseser? Meton serten proklanmater i remarke ki en ser ki son msye pa Temwen Zeova i souvan ariv tar renyon e i ale zis konman renyon i fini. Zot osi remarke ki sa ser pa toultan anmenn son bann zanfan renyon. Alor, zot kritik li akoz zot krwar ki sa ser i devret met son lipye ater e dir son msye ki i devret les son bann zanfan vin renyon avek li. Par kont, zot pa realize ki sa ser pe fer sa ki i kapab. Sa ser pa kapab vreman kontrol son plan e pa li ki fer bann desizyon final konsernan son bann zanfan. Si ou felisit sa ser pour tou sa travay ki i fer e ou dir avek lezot kwa ki i pe fer byen, ou kapab fer lezot aret kritik li. Bann ansyen i konnen ki Zeova i anvi ki bann ser i ganny trete dan en bon fason. (Zak 1:27) Alor zot swiv legzanp Zezi e zot rezonnab. Zot kapab fer sa ler zot demontre labonte e zot konpran bann ser olye fer bann lareg. (Mat. 15:22-28) Ler bann ansyen i fer zefor pour ed bann ser, zot fer sa bann ser santi ki Zeova ek son lorganizasyon i kontan zot. w20.09 24-25 ¶17-19

Profet Danyel ti demontre limilite e i ti toultan rod gidans Zeova. Par egzanp, ler Zeova ti servi li pour enterpret rev Neboukadnezar, Danyel pa ti dir ki i’n enterpret sa rev li tousel. Plito, i ti donn tou loner ek laglwar Zeova. (Dan. 2:26-28) Ki nou kapab aprann avek sa? Si bann frer ek ser i kontan nou bann diskour oubyen si nou annan bann bon leksperyans dan predikasyon, nou bezwen donn tou laglwar Zeova. Avek limilite, nou bezwen admet ki nou pa kapab fer sa bann keksoz san led Zeova. (Fili. 4:13) Ler nou fer sa, nou pe osi swiv bon legzanp Zezi. Zezi ti depan lo Zeova. (Zan 5:19, 30) I pa ti zanmen esey pran plas son Papa. Filipyen 2:6 i dir nou ki Zezi “pa ti zanmen mazinen pour pran plas Bondye e fer li vin egal avek li.” Zezi ti konnen ki i ti annan son limit e i ti respekte lotorite son Papa. w20.08 11 ¶12-13

Serten ki pe tay lo sa semen ki anmenn ver lavi pe fer fas avek bann problenm ki lezot pa konnen. Si ou annan serten problenm lasante e ou santi ki lezot pa konpran ou, petet ou kapab ganny ankouraze avek legzanp Mefiboset. (2 Sam. 4:4) I ti bezwen fer fas avek son dezabilite e Lerwa David ti mal ziz li. Kantmenm sa, i pa ti ankoler. I ti apresye bann bon keksoz ki ti arive avek li. I ti rekonesan pour tou sa ki David ti’n fer pour li dan lepase. (2 Sam. 9:6-10) Alor, ler David ti mal ziz li, Mefiboset ti konpran akoz David ti’n azir dan sa fason. I pa ti les fot David fer li ankoler. Osi, i pa ti blanm Zeova pour sa ki David in fer. Mefiboset ti konsantre lo sa ki i kapab fer pour siport lerwa ki Zeova in swazir. (2 Sam. 16:1-4; 19:24-30) Zeova in met legzanp Mefiboset dan Labib pour ki nou kapab aprann avek son legzanp.​—Rom. 15:4. w20.04 26 ¶3; 30 ¶18-19

Serten dan kongregasyon i kapab ganny apwente konman misyonner, pionye spesyal oubyen pionye ordiner. Zot in deside pour anons sa bon nouvel e fer disip a plen tan. Menm si laplipar bann ki servi Zeova a plen tan napa en kantite larzan oubyen keksoz materyel, Zeova in donn zot en kantite bon keksoz. (Mark 10:29, 30) Nou apresye sa bann frer ek ser e nou kontan ki zot form parti kongregasyon! Eski zis bann frer ki’n ganny apwente ek bann serviter a plen tan ki annan en plas dan kongregasyon? Non. Tou sa ki anons sa bon nouvel i enportan pour Bondye e pour kongregasyon. (Rom. 10:15; 1 Kor. 3:6-8) Anfet, en lobzektif enportan ki kongregasyon i annan, i pour fer dimoun vin disip nou Senyer Zezi. (Mat. 28:19, 20; 1 Tim. 2:4) Tou sa ki anons sa bon nouvel, ki swa bann ki’n batize ouswa bann ki pa ankor batize, i esey fer sa travay pour fer disip en priyorite.​—Mat. 24:14. w20.08 21 ¶7-8

Parey nou vwar dan teks pour ozordi, ler nou fer fas avek bann difikilte, Zezi pou siport nou. Sa ki Zezi ti dir i kapab ankouraz nou. Akoz? Parski i annan bann zour ki difisil pour nou andire. Par egzanp, ler en dimoun ki nou kontan i mor, sa i fer nou sagren pa zis pour detrwa zour me i tre probab ki nou pou sagren pour detrwa lannen. Serten i annan bann zour ki difisil parski laz in antre. I annan lezot dimoun ki fer fas avek bann zour difisil parski zot ganny depresyon. Kantmenm sa, nou ganny lafors pour andire parski nou konnen ki Zezi i avek nou “tou le zour,” enkli bann zour pli difisil dan nou lavi. (Mat. 11:28-30) Parol Bondye i asir nou ki Zeova pou servi son bann lanz pour ed nou. (Ebr. 1:7, 14) Par egzanp, bann lanz i ed e gid nou ler nou pe anons “sa bon nouvel Rwayonm” avek dimoun sorti dan “tou nasyon, tribi [ek] langaz.”​—Mat. 24:13, 14; Rev. 14:6. w20.11 13-14 ¶6-7

Nou anvi ki nou etidyan i konpran ki sa ki i pe aprann i sorti dan Labib. (1 Tesa. 2:13) Ki mannyer nou kapab fer sa? Ankouraz sa etidyan pour koz lo sa ki i pe aprann. Olye toultan eksplik bann verse Labib avek sa etidyan, demann li pour eksplik serten sa bann verse avek ou. Ed sa etidyan vwar ki mannyer Parol Bondye i aplik pour li personnelman. Demann li bann kestyon ki pou ed li eksprim sa ki i pe mazinen e santi konsernan bann verse ki i lir. (Lik 10:25-28) Par egzanp, demann li: “Ki mannyer sa verse in ed ou vwar enn bann kalite ki Zeova i annan?” “Ki mannyer sa ki ou pe aprann dan Labib i kapab ed ou?” “Ki mannyer ou santi konsernan sa ki ou’n fek aprann?” Sa ki pli enportan i pa lakantite ki en etidyan i konnen me lakantite ki i kontan e aplik sa ki i konnen. Servi Labib pour ansennyen. Si ou anvi vin en pli bon ansenyan, ou bezwen annan limilite. w20.10 15-16 ¶5-6

Nou kapab asire ki sa travay predikasyon pou fini zis a tan. Annou vwar sa ki ti arive dan letan Noe. Zeova ti montre ki i toultan fer keksoz dan sa pli bon moman. Apepre 120 an avan Deliz, Zeova ti deside kan ki Deliz ti pou konmanse. Plizyer lannen pli tar, Zeova ti dir Noe konstri lars. Noe ti kontinyen travay dir pour apepre 40 oubyen 50 an avan Deliz i konmanse. Menm si dimoun pa ti ekout li, i ti kontinyen averti zot ziska ki Zeova ti dir ki i ti’n ariv ler pour antre dan lars. Apre, dan sa moman ki Zeova ti’n swazir, “[Zeova] ti ferm laport deryer Noe.” (Zen. 6:3, NWT; 7:1, 2, 16) Byento, Zeova pou dir nou ki in ler pour aret anons sa bon nouvel Rwayonm. Apre sa, i pou detri lemonn Satan e i pou etablir en nouvo lemonn avek zis bann dimoun ki obei Li. Ziska ki sa i arive, annou swiv legzanp Noe ek lezot serviter Zeova ki pa’n les zot lanmen repoze. Annou osi reste konsantre, annan pasyans e gard en lafwa for dan Zeova ek son bann promes. w20.09 13 ¶18-19

Si i pa ti kler lekel ki annan lotorite, i ti pou annan dezord dan fanmir Zeova e personn pa ti pou ere. Par egzanp, personn pa ti pou konnen lekel ki pou fer desizyon final e lekel ki pou fer sa ki’n ganny deside. Si i bon pour bann zonm annan lotorite dan fanmir, akoz i annan sitan en kantite madanm ki santi ki zot msye i tret zot dan en fason kriyel? Sa i akoz en kantite msye i inyor bann standar Zeova pour lafanmir e zot swazir pour swiv bann koutim ouswa tradisyon. I kapab osi ki zot pa tret zot madanm byen parski zot anvi satisfer zot bann dezir egois. Par egzanp, en msye i kapab domin lo son madanm zis pour montre ki i pli enportan ki son madanm oubyen pour montre lezot ki i en “vre zonm.” Petet i mazinen ki i pa pou kapab fors son madanm pour kontan li me i kapab fer son madanm per li. I kapab servi sa lafreyer pour kontrol son madanm. I mal pour bann msye mazin koumsa e fer sa bann keksoz. Zot pa respekte bann madanm parey i fodre e sa ki zot fer i lekontrer avek sa ki Zeova i anvi.​—Efe. 5:25, 28. w21.02 3 ¶6-7

Ler ou enkyet konsernan en problenm, ou kapab priy Zeova pour ganny led. Zeova i kapab reponn ou lapriyer par donn ou “lape Bondye ki depas tou sa ki [ou] kapab konpran.” (Fili. 4:6, 7) Zeova pou servi son lespri sen ki pwisan pour donn ou lape lespri e pour kalme bann panse ki fatig ou. (Gal. 5:22) Ler ou priy Zeova, devid ou leker avek li. Dir li ou problenm e eksplik li ki mannyer ou pe santi konsernan sa problenm. Si i posib pour rezourd sa problenm, demann li lasazes pour ou konnen ki ou pou fer e demann li sa lafors pour ou fer li. Si i napa nanryen ki ou kapab fer pour rezourd sa problenm, demann Zeova pour ed ou pour pa tro enkyet. Ler ou spesifik dan ou lapriyer, ou pou vwar pli byen ki mannyer Zeova i reponn ou lapriyer. Si Zeova pa reponn ou lapriyer deswit, pa aret priye. Zeova pa zis anvi ki ou spesifik dan ou lapriyer me i osi anvi ki ou kontinyen priy li.​—Lik 11:8-10. w21.01 3 ¶6-7

Ozordi, dan bann kongregasyon i annan bann koup marye ek bann fanmir. I osi annan plizyer frer ek ser selibater. Ki mannyer nou devret vwar sa bann frer ek ser selibater? Annou vwar ki mannyer Zezi i konsider bann selibater. Ler Zezi ti lo later, i pa ti marye. I ti reste selibater e i ti servi son letan pour konsantre lo son servis. Zezi pa ti zanmen ansennyen ki i ti neseser pour en Kretyen marye oubyen pour li reste selibater. Par kont, i ti dir ki serten Kretyen ti pou swazir pour pa marye. (Vwar not letid dan nwtsty dan Matye 19:12.) Zezi ti annan respe pour bann selibater. I pa ti krwar ki bann selibater ti pli enferyer oubyen ki i ti annan en keksoz mal avek zot. Parey Zezi, zapot Pol ti reste selibater pandan son minister. Pol pa ti zanmen ansennyen ki i ti mal pour en Kretyen marye. I ti rekonnet ki sa ti en desizyon personnel. w20.08 28 ¶7-8

Zapot Zan ti viv lontan e i ti eksperyans bokou keksoz eksitan. I ti osi pas dan bokou difikilte ki ti’n kapab afebli son lafwa. Me i ti toultan fer tou sa ki i ti kapab pour obei bann lord Zezi, ki enkli kontan son bann frer ek ser. Sa ti fer Zan asire ki Zeova ek Zezi ti kontan li e ki zot ti pou donn li sa lafors pour fer fas avek okenn difikilte. (Zan 14:15-17; 15:10) Satan ek son lemonn pa ti kapab anpes Zan montre par sa ki i ti dir e fer ki i ti kontan son bann frer ek ser. Parey Zan, nou viv dan en lemonn dirize par Satan, ki pa kontan personn. (1 Zan 3:1, 10) Satan i anvi ki nou aret kontan nou bann frer ek ser. Me si nou pa les li, i pa pou kapab fer sa. Nou devret determinen pour kontan nou bann frer ek ser e pour montre par sa ki nou dir e fer ki nou kontan zot. Ler nou demontre sa kalite lanmour, nou pou annan sa lazwa pour form parti fanmir Bondye e nou lavi pou pli ere.​—1 Zan 4:7. w21.01 13 ¶18-19

I kapab difisil pour viv dan sa lemonn ki ganny kontrole par Satan e parfwa nou pa konnen ki pour fer. (2 Tim. 3:1) Me nou pa bezwen enkyet ouswa per. Zeova i konnen ki nou pe pas ladan. Ler nou bezwen led, Zeova i promet ki i pou soutenir nou avek son lanmen drwat. (Iza. 41:10, 13) Nou asire ki Zeova pou ed nou e sa ki nou aprann dan Labib i kapab donn nou sa lafors ki nou bezwen pour fer fas avek nenport problenm. Nou bann video, lanrezistreman odyo e sa seri lartik “Imit zot lafwa,” i kapab ede pour fer bann resi dan Labib vin pli reel pour ou. Avan ou get sa bann video, ekout sa bann lanrezistreman odyo oubyen lir en lartik, demann Zeova pour ed ou vwar bann leson ki ou kapab met an pratik. Esey met ou dan plas sa dimoun ki ou pe lir lo la. Medit lo sa ki sa bann serviter fidel ti fer e lo lafason ki Zeova ti ed zot sirmont zot problenm. Apre aplik bann leson ki ou’n aprann. Remersye Zeova pour led ki i pe deza donn ou. Montre ki ou apresye sa led par rod loportinite pour ankouraz e siport lezot. w21.03 19 ¶22-23

Si ou en koup marye e ou anvi annan zanfan, demann ou lekor: ‘Eski nou bann dimoun ki annan limilite, ki kontan Zeova ek son Parol? Eski parey Zozef ek Mari, Zeova ti’n kapab swazir nou pour pran swen avek en pti baba ki presye?’ (Ps. 127:4, NWT) Si ou deza en paran, demann ou lekor: ‘Eski mon pe ansenny mon zanfan ki i enportan pour travay dir?’ (Ekle. 3:12, 13) ‘Eski mon fer mon mye pour protez mon zanfan kont bann danze ki zot kapab rankontre?’ (Prov. 22:3) Ou pa kapab protez ou zanfan kont tou problenm ki zot gannyen. Avek lanmour, ou kapab prepar zot pour bann problenm ki zot pou rankontre dan lavi par kontinyen ansenny zot ki mannyer pour rod konsey dan Labib. (Prov. 2:1-6) Par egzanp, si en manm fanmir i aret servi Zeova, servi Parol Bondye pour ed ou zanfan konpran akoz i enportan pour reste fidel avek Zeova. (Ps. 31:23) Oubyen, si en dimoun ki ou kontan i mor, montre ou zanfan bann verse Labib ki kapab ed li pour sirmont son sagrinasyon e ganny lape.​—2 Kor. 1:3, 4; 2 Tim. 3:16. w20.10 27 ¶7