Novanm

Vi ki nou pa konn tou keksoz lo sityasyon Zonas, nou kapab krwar ki i pa ti serye oubyen menm ki i ti enfidel. Zeova ti donn li lord pour anons en mesaz zizman dan lavil Niniv. Me olye obei, Zonas ti pran en bato ki ti pe al dan en lot direksyon, “lwen devan prezans [Zeova].” (Zonas 1:1-3) Eski ou ti pou’n donn Zonas en dezyenm sans pour obei lord Zeova? I tre probab ki non. Me, Zeova ti vwar ki Zonas ti merit en lot sans. (Zonas 3:1, 2) Zonas ti montre ki kalite dimoun i ti vreman ete dan son lapriyer. (Zonas 2:1, 2, 9) San dout Zonas ti abitye priy Zeova. Ler i ti dan vant en pwason, i ti fer en lapriyer ki ed nou konpran ki i pa ti zis anvi sove pour pa fer sa ki i ti’n ganny demande pour fer. Son bann parol i montre ki i ti annan limilite, i ti rekonesan e i ti determinen pour obei Zeova. Alor, nou pa sirprann si Zeova pa ti konsantre lo fot ki Zonas ti’n fer. O kontrer, i ti ekout son lapriyer e kontinyen servi li konman profet. I vreman enportan pour en ansyen “ekoute” avan i donn konsey! w20.04 15 ¶4-6

Bann disip dan premye syek ti aksepte bann lansennyman Kretyen e zot ti depan lo lespri sen pour ed zot konpran Parol Bondye. Zot ti fer resers pour ki zot menm zot fer sir ki sa bann lansennyman i sorti dan Lekritir. (Akt 17:11, 12; Ebr. 5:14) Zot lafwa pa ti baze zis lo bann santiman e zot pa ti servi Zeova zis akoz zot ti ere ler zot ti asosye avek lezot frer ek ser. O kontrer, zot lafwa ti baze lo “konnesans egzakt lo Bondye.” (Kol. 1:9, 10) Bann laverite dan Labib pa sanze. (Ps. 119:160) Par egzanp, bann laverite dan Labib pa sanze si en frer oubyen en ser i ofans nou ouswa i fer en pese grav. Osi, sa bann laverite pa sanze ler nou pas dan problenm. Alor, nou bezwen konn byen bann lansennyman Labib e fer sir ki sa bann lansennyman i vre. Zis parey en lank i anpes en bato drive dan movetan, nou lafwa for ki baze lo sa ki Labib i dir, pou ed nou reste fidel ler nou pas dan problenm. w20.07 9 ¶6-7

Zezi i vwar sa ki nou fer pour son bann frer swazir konmsi nou pe fer pour li. (Mat. 25:34-40) Sa fason pli enportan ki nou siport bann frer Kris, i ler nou fer nou mye pour anons sa bon nouvel e fer disip parey Zezi ti dir. (Mat. 28:19, 20) Zis avek led “lezot mouton” ki bann frer Kris i kapab akonpli sa travay predikasyon ki pe ganny fer ozordi. (Zan 10:16) Si ou form parti lezot mouton, sak fwa ou partisip dan predikasyon, ou demontre ou lanmour pour bann frer Kris e osi pour Zezi. Nou osi fer zanmi avek Zeova ek Zezi ler nou fer bann kontribisyon finansyel pour siport sa travay ki zot pe dirize. (Lik 16:9) Par egzanp, nou kapab fer kontribisyon pour sa travay predikasyon dan lemonn antye. Sa kontribisyon i ganny servi pour ed bann ki’n fer fas avek dezas natirel. Nou osi kapab fer kontribisyon pour kouver bann depans dan nou prop kongregasyon e ed bann ki nou konnen i dan bezwen.​—Prov. 19:17. w20.04 24 ¶12-13

Zis parey i ti ganny predir dan sa profesi, lerwa nor pa ti demontre okenn “respe pour Bondye son bann zanset.” Ki mannyer i ti fer sa? Linyon Sovyetik ti anvi detri tou larelizyon. I ti esey fer ki zot nepli annan okenn pouvwar lo dimoun. Alor, apartir 1918, Linyon Sovyetik ti donn en lord ki ti fer bann lekol konmans ansennyen ki Bondye pa egziste. Ki mannyer sa lerwa nor ti “donn laglwar avek bondye bann lavil fortifye”? Gouvernman Linyon Sovyetik ti depans en kantite larzan lo zot larme e zot ti konstri plizyer milye zarm nikleer pour zot kapab vin pli for. Avek letan, lerwa nor ek lerwa sid ti annan ase zarm pwisan pour touy plizyer bilyon dimoun! Lerwa nor in travay ansanm avek lerwa sid pour fer en keksoz enportan. Zot ti “met an plas sa keksoz degoutan ki anmenn destriksyon” setadir Nasyon-z-ini.​—Dan. 11:31. w20.05 6-7 ¶16-17

Lekel ki kapab ede rod bann ki’n elwannyen avek kongregasyon? Nou tou, ki swa nou ansyen, pionye, manm fanmir oubyen proklanmater, nou kapab ede rod zot. Eski en manm ou fanmir oubyen en zanmi in elwannyen avek kongregasyon? Eski ou’n zwenn en inaktif ler ou ti pe fer temwannyaz an piblik oubyen pe anons sa bon nouvel kazankaz? Eksplik sa dimoun ki si i ti a kontan ki bann ansyen i vizit li, ou ti pou kontan pour donn son ladres oubyen nimero telefonn avek bann ansyen. En ansyen ki apel Thomas i dir: “Premyerman, mon demann bann frer ek ser si zot konnen kote bann inaktif i reste. Oubyen mon demann zot si zot rapel okenn dimoun ki nepli asiste bann renyon. Apre, ler mon vizit bann frer ek ser inaktif, mon demann zot konsernan zot zanfan ek lezot manm fanmir. Serten sa bann frer ek ser ti abitye anmenn zot zanfan renyon e i kapab ki zot bann zanfan ti bann proklanmater. Nou kapab ed zot bann zanfan osi pour retourn kot Zeova.” w20.06 24 ¶1; 25 ¶6-7

Vi ki bann imen i kapab rapel e analiz bann keksoz ki’n arive dan lepase, sa i fer ki parmi tou bann kreatir lo later zis nou ki annan sa abilite pour aprann ki mannyer nou devret viv. I pour sa rezon ki nou kapab aprann bann pli bon standar, sanz nou fason panse ek fason viv. (1 Kor. 6:9-11; Kol. 3:9, 10) Anfet, nou kapab antrenn nou konsyans pour rekonnet diferans ant sa ki byen ek sa ki mal. (Ebr. 5:14) Nou kapab aprann pour demontre lanmour, konpasyon ek pitye. Nou osi kapab aprann pour demontre lazistis parey Zeova. En fason nou montre ki nou apresye sa abilite pour rapel, i ler nou esey rapel sak fwa ki Zeova in ed e rekonfort nou dan lepase. Sa pou fer nou annan plis konfyans ki i pou ed nou a lavenir. (Ps. 77:12; 78:4, 7) En lot fason, i ler nou rapel bann bon keksoz ki lezot dimoun i fer pour nou e ler nou demontre lapresyasyon pour sa ki zot fer. Bann serser in trouve ki dimoun ki demontre lapresyasyon i pli ere. w20.05 23 ¶12-13

Mazin lo ki mannyer Moiz ti santi ler i ti dan en trou ros e ti vwar en vizyon laglwar Zeova pe pase. Insight on the Scriptures i dir ki “i tre probab ki avan Zezi i vin lo later, sa ti sa leksperyans pli ekstraordiner ki okenn imen in deza pas ladan.” Moiz ti tann sa bann parol swivan e i tre probab ki sa ti ganny dir par en lanz: “Zeova, Zeova, en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite, i demontre lanmour fidel anver plizyer milye dimoun, i pardonn fot, lofans ek pese.” (Egz. 33:17-23; 34:5-7, NWT) I kapab ki Moiz ti mazin lo sa leksperyans ler i ti servi non Zeova dan teks pour ozordi. Ler nou mazin lo sa non Zeova, nou devret osi mazin lo ki mannyer Zeova i vreman ete. Nou devret reflesir lo son bann kalite, tel parey son pwisans, lasazes, lazistis ek son lanmour. Ler nou reflesir lo sa bann kalite e lo lezot ankor, sa i kapab pous nou pour annan plis respe pour li.​—Ps. 77:11-15. w20.06 8-9 ¶3-4

Zezi ti dir ki sa lanmour ki son bann disip i demontre anver kanmarad pou montre ki zot vreman son bann disip. (Zan 13:34, 35) I vre ki sa lanmour ki bann serviter Zeova i demontre i ed nou konnen lekel Son bann serviter, me pour nou kapab annan en lafwa for, i annan lezot keksoz nou bezwen fer. Nou lafwa pa devret baze zis lo lanmour ki i annan parmi pep Bondye. Akoz? Parski si nou lafwa i baze zis lo sa lanmour, nou kapab fasilman perdi li. Par egzanp, nou kapab aret servi Zeova si en frer oubyen ser, petet menm en ansyen oubyen en pionye, i fer en fot grav. Petet osi nou kapab aret servi Zeova si en frer oubyen ser i ofans nou oubyen i vin en aposta e i dir ki sa ki nou krwar ladan, pa vre. Alor, si nou anvi annan en lafwa for, nou lafwa i devret baze lo nou bon relasyon avek Zeova. Si ou annan lafwa dan Bondye akoz sa ki lezot i fer e pa akoz ou annan en relasyon avek Zeova, ou lafwa pa pou for. Lafason ki ou santi konsernan Zeova ek son pep i kapab ed ou pour konmans devlop lafwa. Me i osi vreman enportan pour etidye Labib, konpran sa ki ou pe aprann e fer resers pour ki ou kapab asire ki ou pe aprann laverite lo Zeova. Ou bezwen asire ki Labib pe ansenny ou laverite lo Zeova.​—Rom. 12:2. w20.07 8 ¶2-3

I annan bokou leksperyans ki montre ki bann lanz pe ed nou trouv bann inaktif ki anvi retourn kot Zeova. (Rev. 14:6) Par egzanp, Silvio, en frer inaktif ki sorti Ekwador ti sipliy Zeova pour ed li retourn dan kongregasyon. Anmezir ki i ti pe priye, de ansyen ti ariv kot son lakour. Sa de ansyen ti kontan pour konmans donn li sa led ki i ti bezwen. Nou pou vreman kontan ler nou ed enn ki inaktif pour retourn kot Zeova. Remarke ki Salvador, en pionye ki fer zefor pour ed bann ki inaktif i dir: “Parfwa mon vin emosyonnel ler mon mazin bann inaktif ki’n retourn kot Zeova. Mon vreman kontan ki mon kapab travay ansanm avek Zeova pour ed enn son bann serviter ki vreman presye, pour sorti dan lemonn Satan e pour retourn dan kongregasyon.” Si ou’n elwannyen avek pep Zeova, ou kapab asire ki i ankor kontan ou. I anvi ki ou retourn kot li. Zeova pe esper ou retourn kot li e i pou kontan pour akeyir ou. w20.06 29 ¶16-18

Konman nou “Gran Ansenyan,” Zeova i ansenny nou atraver bann legzanp dan Labib. (Iza. 30:21, NWT) Dan Labib, nou aprann konsernan bann dimoun ki ti annan bann kalite ki ti fer plezir Bondye. Nou osi aprann sa ki ti arive avek bann ki pa ti demontre sa bann zoli kalite. (Ps. 37:37, NWT; 1 Kor. 10:11) Mazin sa ki ti arive avek Lerwa Sail. Ler i ti ankor zenn, i ti en dimoun modes e i ti menm ezite pour pran plis responsabilite. (1 Sam. 9:21; 10:20-22) Me avek letan Sail ti vin arogan e i ti fer bann keksoz ki i pa ti annan drwa fer. I ti konmans azir dan sa fason zis apre ki i ti’n vin lerwa. En fwa, i ti perdi pasyans ler i ti pe esper profet Samyel e i ti ofer en sakrifis menm si i ti napa drwa fer li. Pour fini kont, Sail ti perdi laprouvasyon Zeova e avek letan Zeova ti rezet li konman lerwa. (1 Sam. 13:8-14) I saz pour nou aprann avek sa lavertisman e evite fer bann keksoz ki nou napa drwa fer. w20.08 10 ¶10-11

I vre ki atraver Kris, Zeova in donn kongregasyon “bann zonm konman kado.” (Efe. 4:8) Sa “bann zonm konman kado” i enkli bann manm Konsey Direkter, bann asistan Konsey Direkter, bann manm Komite Biro Brans, bann sirveyan rezyonal, enstrikter bann lekol teokratik, bann ansyen ek serviter kongregasyon. Tou sa bann frer in ganny apwente par lespri sen Zeova pour ranforsi kongregasyon e pour zot pran swen avek bann mouton Zeova ki presye. (1 Pyer 5:2, 3) Bann frer i ganny apwente par lespri sen pour desarz plizyer responsabilite. Zis parey diferan parti lekor, tel parey lanmen ek lipye, i travay ansanm pour byennet lekor antye, sa bann frer i travay dir pour byennet kongregasyon antye. Zot pa esey rod laglwar pour zot menm. O kontrer, zot esey batir e ranforsi zot bann frer ek ser. (1 Tesa. 2:6-8) Nou remersye Zeova pour sa bann frer kalifye ki met lentere lezot avan sa ki pour zot! w20.08 21 ¶5-6

En rezon ki nou anons sa bon nouvel i parski dimoun pe “ganny maltrete e rezete” e zot vreman bezwen aprann laverite konsernan Rwayonm Bondye. (Mat. 9:36) Zeova i anvi ki tou sort kalite dimoun i ganny konnesans egzakt lo laverite pour zot kapab ganny sove. (1 Tim. 2:4) Ler nou reflesir lo ki mannyer sa travay predikasyon i kapab ede pour sov lavi dimoun, sa pou motiv nou pour anons sa bon nouvel. (Romen 10:13-15; 1 Tim. 4:16) Nou osi bezwen annan sa bon lekipman e nou bezwen konnen ki mannyer pour servi sa lekipman. Nou osi nou bezwen annan bann bon zouti pour nou kapab anons sa bon nouvel e konnen ki mannyer pour servi sa bann zouti. Zezi ti dir son bann disip ki mannyer pour anons sa bon nouvel. I ti dir zot ki pour anmennen, kote pour ale e ki pour dir. (Mat. 10:5-7; Lik 10:1-11) Ozordi, lorganizasyon Zeova i donn nou bann Zouti predikasyon ki byen efikas. Lorganizasyon i montre nou ki mannyer pour servi sa bann zouti. Sa formasyon ki lorganizasyon i donn nou i ed nou pour vin pli konfidan dan predikasyon e nou aprann ki mannyer pour vin bann pli bon ansenyan.​—2 Tim. 2:15. w20.09 4 ¶6-7, 10

Eski ou kapab imazinen ki kantite zapot Zan ti kontan ler i ti tande ki bann ki i ti’n ede pour aprann laverite ti pe kontinyen servi Zeova fidelman? Zot ti fer fas avek en kantite problenm e Zan ti pe travay dir pour ranforsi lafwa sa bann Kretyen fidel, ki ti parey son bann zanfan. Pareyman, nou kontan ler nou zanfan oubyen bann ki nou ede pour aprann laverite, i dedye zot lavi avek Zeova e zot kontinyen servi Zeova. (3 Zan 3) Ver lannen 98, Zeova ti enspir Zan pour ekri trwa let. Sa bann let ti ganny ekrir pour ankouraz bann Kretyen fidel pour kontinyen annan lafwa dan Zezi e pour kontinyen viv an armoni avek laverite. Zan ti enkyet konsernan move lenfliyans ki bann fo ansenyan ti annan lo kongregasyon. (1 Zan 2:18, 19, 26) Sa bann aposta ti dir ki zot konn Bondye me zot pa ti obei Son bann komannman. w20.07 20 ¶1-3

Nou anvi anons sa bon nouvel avek otan dimoun posib parski nou annan lafwa dan sa mesaz. Sa i akoz nou annan konfyans dan bann promes ki dan Labib. (Ps. 119:42, NWT; Iza. 40:8) Nou’n vwar bann profesi Labib ganny akonplir dan nou letan. Nou’n osi vwar lafason ki dimoun in sanz zot lavi ler zot in aplik bann konsey Labib. Tou sa bann keksoz i fer nou pli asire ki sa bon nouvel Rwayonm i en mesaz ki tou dimoun i bezwen tande. Nou osi annan lafwa dan Zeova, sa Enn ki’n donn nou sa mesaz ki nou anonse. Nou osi annan lafwa dan Zezi, sa enn ki Zeova in apwente konman Lerwa dan Son Rwayonm. Nenport keksoz ki arive avek nou, Zeova pou toultan nou refiz ek lafors. (Ps. 46:1-3, NWT) Osi, nou annan konfyans ki Zezi i dan lesyel pe servi sa pouvwar ek lotorite ki Zeova in donn li pour diriz sa travay predikasyon. (Mat. 28:18-20) Lafwa i fer nou pli asire ki Zeova pou beni nou bann zefor. w20.09 12 ¶15-17

Parfwa, bann ser i kapab bezwen en dimoun pour koz pour zot ler zot dan en problenm. (Iza. 1:17, NWT) Par egzanp, en vev oubyen en ser ki’n divorse i kapab bezwen en dimoun pour ed li pour fer serten keksoz ki son msye ti abitye fer. En ser aze i kapab bezwen led pour koz avek dokter. Oubyen en ser pionye ki fer bann lezot travay dan lorganizasyon Zeova i kapab bezwen en dimoun pour defann li si lezot dimoun i kritik li akoz i pa pas bokou letan dan predikasyon parey lezot pionye. Annou vwar legzanp Zezi. Zezi ti pare pour defann son bann ser spirityel ler lezot pa ti konpran zot. Par egzanp, ler Mart ti kritik Mari, Zezi ti defann li. (Lik 10:38-42) I ti osi defann Mari, ler lezot ti kritik Mari akoz zot ti krwar ki i’n fer en move desizyon. (Mark 14:3-9) Zezi ti konn lentansyon Mari e i ti felisit li. I ti osi dir ki sa ki Mari ti’n fer ti pou ganny rakonte “nenport kote dan lemonn kot sa bon nouvel i ganny anonse.” w20.09 24 ¶15-16

En bon berze ti konpran ki bann mouton i kapab perdi e si en mouton ti kit troupo, sa berze pa ti pini li. Annou vwar ki Bondye ti fer pour ed serten son bann serviter ki ti elwannyen avek li pour en pe letan. Sa pou en bon legzanp pour nou. Profet Zonas ti dezobeir Zeova e i pa ti al Niniv. Kantmenm sa, Zeova pa ti abandonn Zonas. Parey en bon berze, Zeova ti sov li e ed li pour ganny sa lafors ki i ti bezwen pour fer sa travay ki Zeova ti’n dir li fer. (Zonas 2:7; 3:1, 2) Pli tar Bondye ti fer pouse en plant pour ed Zonas konpran valer lavi sak dimoun. (Zonas 4:10, 11) Ki leson nou aprann? Bann ansyen pa devret vitman abandonn bann ki’n vin inaktif. Plito, zot devret esey konpran kwa ki’n fer sa mouton elwannyen avek troupo. Ler sa mouton i retourn kot Zeova, zot bezwen kontinyen demontre lanmour ek lentere pour li. w20.06 20-21 ¶10-12

Apre ki Linyon Sovyetik ti aret egziste an 1991, pep Bondye ki ti anba son dominasyon ti ganny laliberte pour en serten letan. Danyel ti dir ki sa letan laliberte ti konmsi zot in ganny “en pe led.” Sa i fer ki zot ti lib pour anons sa bon nouvel e i pa ti tarde pour annan plizyer santenn milye proklanmater dan bann pei ki ti form parti Linyon Sovyetik. Me avek letan, Larisi avek son bann alye ti vin lerwa nor. Pour ki en gouvernman i vin lerwa nor oubyen lerwa sid, i bezwen fer trwa keksoz: (1) annan en gran lenfliyans lo pep Bondye, (2) montre par son aksyon ki i lennmi Zeova ek son pep e (3) zot fer konpetisyon avek kanmarad. Larisi ek son bann alye in atak pep Bondye par restrikte sa travay predikasyon e persekit plizyer santenn milye nou frer ek ser. Zot bann aksyon i montre ki zot ay Zeova ek son pep. Zot esey vin pli pwisan ki lerwa sid, Pouvwar Mondyal Angle e Ameriken. w20.05 12-13 ¶3-4

Si nou anvi fer disip, nou bezwen kapab ansenny byen. Nou pe fer letid Labib avek plizyer milyon dimoun partou dan lemonn. Nou kontan sa ki nou ansennyen sorti dan Parol Bondye. Alor, i kapab ki nou anvi koz en kantite lo la. Par kont, ki swa nou pe kondwir Letid Latour Veyer, Letid Labib kongregasyon oubyen nou pe fer letid avek en dimoun, nou pa devret koz tro bokou. Pour sa ansenyan kapab byen servi Labib pour ansennyen, i bezwen annan kontrol lo son lekor e pa esey eksplik tou sa ki i konnen lo en verse Labib oubyen lo en topik. (Zan 16:12) Si ou konpar sa ki ou ti konnen ler ou ti batize avek sa ki ou konnen la konmela, ou pou realize ki ler ou ti batize ou ti konn zis bann lansennyman de baz ki dan Labib. (Ebr. 6:1) I’n pran ou plizyer lannen pour aprann tou sa ki ou konnen ozordi, alor pa esey ansenny en nouvo etidyan tou keksoz en sel kou. w20.10 14-15 ¶2-4

Zeova ti swazir bann bon paran pour Zezi. (Mat. 1:18-23; Lik 1:26-38) Bann parol senser ki Mari ti dir in ganny ekrir dan Labib e i montre ki i ti vreman kontan Zeova ek son Parol. (Lik 1:46-55) Osi, lafason ki Zozef ti obei bann lenstriksyon ki Zeova ti donn li, i montre ki i ti kontan Bondye e i ti anvi fer Li plezir. (Mat. 1:24) Zeova pa ti swazir bann dimoun ris pour vin paran Zezi. Sakrifis ki Zozef ek Mari ti ofer apre nesans Zezi ti montre ki zot ti pov. (Lik 2:24) I tre probab ki zot ti napa bokou larzan oubyen keksoz materyel, vi ki avek letan zot ti annan set oubyen plis zanfan. (Mat. 13:55, 56) Zeova ti protez Zezi kont plizyer danze me I pa ti protez li kont tou problenm ki i ti rankontre. (Mat. 2:13-15) Par egzanp, Zezi ti annan fanmir ki o konmansman pa ti aksepte li konman Mesi. (Mark 3:21; Zan 7:5) Osi, i kapab ki Zozef ti mor ler Zezi ti ankor zenn e sa ti’n kapab difisil pour li. w20.10 27 ¶4-6

Eski ou’n deza santi ou tousel e ki i napa personn pour ed ou fer fas avek ou problenm? Bokou dimoun in santi koumsa, enkli bann serviter Zeova. (1 Rwa. 19:14) Si sa i arive avek ou, rapel sa promes Zeova: “Mon pa pou zanmen kit ou e mon pa pou zanmen abandonn ou.” Alor, nou kapab annan konfyans e dir: “Zeova i mon led, mon pa pou per.” (Ebr. 13:5, 6) Zapot Pol ti ekri sa bann parol ver lannen 61 pour bann Kretyen ki ti reste Zide. Son bann parol i fer nou mazin sa ki en psalmis ti dir dan Psonm 118:5-7 (NWT). Parey sa psalmis, Pol ti konnen ki Zeova i son Led parski Zeova in ed li plizyer fwa. Par egzanp, apepre de-z-an avan ki Pol i ekri son let pour bann Ebre, i ti pas dan en tanpet terib ler i ti pe vwayaze lo lanmer. (Akt 27:4, 15, 20) Pandan bann lannen avan sa vwayaz e tou dilon sa vwayaz, Zeova ti ed Pol dan diferan fason. w20.11 12 ¶1-2

Akoz i pa saz pour kontinyen mazinen ki nou lavi ti pli gou dan lepase? Sa kalite fason panse i kapab fer nou rapel zis bann bon keksoz. Par egzanp, annou vwar legzanp bann Izraelit dan letan lontan. Apre ki bann Izraelit ti’n kit Lezip, zot pa ti tarde pour oubliye ki zot lavi ti vreman difisil ler zot ti Lezip. O kontrer, zot ti konsantre zis lo manze ki zot ti gannyen laba. Zot ti dir: “Nou mazin sa pwason ki nou ti abitye manz pour nanryen Lezip, osi kokonm, melon, pwaro, zonnyon ek lay!” (Nom. 11:5, NWT) Me eski sa bann manze ti vreman “pour nanryen”? Non. Bann Izraelit ti pey ser pour sa manze parski sa letan, zot ti pe soufer konman lesklav Lezip. (Egz. 1:13, 14; 3:6-9) Malerezman, zot ti oubliy tou sa bann soufrans e zot ti anvi reviv lepase. Zot ti swazir pour konsantre lo bann bon moman dan lepase dan plas konsantre lo bann bon keksoz ki Zeova ti’n fek fer pour zot. Zeova ti vreman pa kontan zot latitid.​—Nom. 11:10. w20.11 25 ¶5-6

I kapab ki parfwa nou mazinen ki lavi i kourt e i “ranpli avek traka.” (Zob 14:1) Alor nou kapab konpran si sa i fer nou dekouraze. Bokou serviter Zeova dan Labib ti santi koumsa. Serten ti menm anvi mor. (1 Rwa. 19:2-4; Zob 3:1-3, 11; 7:15, 16) Me plizyer fwa Zeova in rekonfort zot e ankouraz zot. Zot leksperyans in ganny ekrir dan Labib pour rekonfort e ansenny nou. (Rom. 15:4) Annou vwar legzanp Zozef garson Zakob. Dan zis en ptigin letan, lavi Zozef ti sanz konpletman. I ti nepli kot son papa ki ti kontan li. I ti vin en senp lesklav Lezip e i ti pe travay pour en zonm ki pa ti konn Zeova. (Zen. 37:3, 4, 21-28; 39:1) Apre sa, madanm Potifar ti dir ki Zozef ti’n esey vyol li. Potifar pa ti rode si sa ti vre. O kontrer i ti fer met Zozef dan prizon e zot ti anmar son lipye avek lasenn. (Zen. 39:14-20; Ps. 105:17, 18) Zozef ti annan rezon pour li dekouraze! w20.12 16-17 ¶1-4

Zezi ti dir ki sa i devret enn bann keksoz pli enportan ki nou priy lo la. Ki Zezi ti pe esey dir? Ler nou sanktifye en keksoz sa i vedir ki nou fer li sen, prop oubyen pir. Me serten i kapab demande, ‘Eski pa non Zeova i deza sen, prop e pir?’ Pour nou kapab reponn sa kestyon, nou bezwen reflesir lo kwa ki enplike dan en non. En non pa zis en mo ki’n ganny ekrir lo papye oubyen ki ganny prononse. Labib i dir: “Pli vomye en bon repitasyon ki bokou larises.” (Prov. 22:1, NWT; Ekle. 7:1, NWT) Akoz en non i sitan enportan? Parski i enplik en repitasyon setadir lafason ki lezot i vwar sa enn ki annan sa non. Alor, i pa lafason ki en non i ganny ekrir oubyen ganny prononse ki enportan. Sa ki pli enportan i sa ki lezot i mazinen ler zot vwar oubyen zot tann sa non. Ler dimoun i dir bann mansonz lo Zeova, zot pe esey sali son repitasyon. Ler zot sali son repitasyon, zot pe sali son non. w20.06 3 ¶5-7

Nou bann problenm i kapab fer nou sitan enkyet ki nou pa kapab mazin okenn lezot keksoz. Par egzanp, nou kapab trakase ki nou pa pou ganny ase larzan pour aste bann keksoz ki nou bezwen. Oubyen ki nou pou malad e mank travay ouswa menm perdi nou travay. Nou kapab osi enkyet ki nou pa pou reste fidel si nou ganny tante pour dezobei lalwa Bondye. Byento, Satan pou fer bann ki anba son kontrol atak pep Bondye, alor nou kapab enkyet lo ki nou pou fer ler zot atak nou. Nou kapab demande, ‘Eski i mal pour mwan enkyet konsernan sa bann keksoz?’ Nou konnen ki Zezi ti dir son bann disip: “Aret trakase.” (Mat. 6:25) Eski Zezi ti pe esey dir ki nou pa devret enkyet ditou? Non. Apre tou, i ti annan serten serviter Zeova dan lepase ki ti enkyet. Me zot pa ti perdi laprouvasyon Zeova. (1 Rwa. 19:4) An realite, Zezi ti pe rekonfort nou. I pa ti oule ki nou vin sitan enkyet konsernan bann keksoz ki nou bezwen ki nou servis pour Zeova pa vin sa keksoz pli enportan dan nou lavi. w21.01 3 ¶4-5

En msye i bezwen rann kont avek Zeova ek Zezi pour lafason ki i tret son fanmir. (1 Pyer 3:7) Zeova i Sef son fanmir dan lesyel e lo later, i annan sa lotorite pour fer bann lalwa lo ki mannyer son bann zanfan i devret azir e i osi kapab fer sir ki zot obei sa bann lalwa. (Iza. 33:22, NWT) Konman sef kongregasyon, Zezi osi i annan drwa pour fer lalwa e pour fer sir ki nou swiv sa bann lalwa. (Gal. 6:2; Kol. 1:18-20) Zis parey Zeova ek Zezi, en sef fanmir i annan sa lotorite pour fer desizyon pour son fanmir. (Rom. 7:2; Efe. 6:4) Me son lotorite i annan limit. Par egzanp, son bann lareg i devret baze lo bann prensip ki trouve dan Parol Bondye. (Prov. 3:5, 6) En sef fanmir napa drwa pour fer lareg pour bann ki pa form parti son fanmir. (Rom. 14:4) Osi ler son bann garson ek fiy i grandi e kit lakour, zot kontinyen annan respe pour li me i nepli zot sef.​—Mat. 19:5. w21.02 2-3 ¶3-5

En fason enportan ki en sef fanmir i montre ki i kontan son fanmir, i ler i donn zot sa ki zot bezwen pour viv. Me i bezwen rapel ki i bokou pli enportan pour li ek son fanmir annan en bon lanmitye avek Zeova. (Mat. 5:3) Ler Zezi ti pe mor lo poto, i ti anvi fer sir ki ti annan en dimoun ki ti pou pran swen avek Mari. Menm si Zezi ti pe soufer en kantite, i ti demann zapot Zan pour pran swen avek Mari. (Zan 19:26, 27) En frer ki en sef fanmir i kapab annan plizyer responsabilite enportan. Kot son travay i bezwen travay dir pour ki son kondwit i anmenn loner pour Zeova. (Efe. 6:5, 6; Tit 2:9, 10) I kapab annan bann responsabilite dan kongregasyon, parey pour ankouraz e pran swen avek bann frer ek ser e osi pour diriz sa travay predikasyon. An menm tan, i enportan ki i regilyerman etidye Labib avek son madanm ek son zanfan. Zot pou vreman apresye tou sa ki i fer pour ed zot reste an bonn sante e ere. Zot pou osi apresye tou sa ki i fer pour ed zot kontinyen servi Zeova.​—Efe. 5:28, 29; 6:4. w21.01 12 ¶15, 17

Labib i dekri sa ki en madanm debouryer i kapab fer. Par egzanp, i kapab diriz travay ki ganny fer kot lakour, aste e revann later e fer biznes. (Prov. 31:15, 16, 18) I pa en lesklav ki napa drwa donn son lopinyon. O kontrer, son msye i annan konfyans dan li e i ekout son bann nide. (Prov. 31:11, 26, NWT) Ler en zonm i demontre sa kalite respe anver son madanm, son madanm pou ere e i pou obei li. Menm si Zezi ti fer bann gran keksoz, i pa santi ki i pe abes li ler i aksepte lotorite Zeova. (1 Kor. 15:28; Fili. 2:5, 6) Par egzanp, en madanm debouryer ki swiv Zezi, pa pou santi li enferyer ler i aksepte lotorite son msye. I pou siport son msye pa zis akoz i kontan son msye me akoz i kontan e annan respe pour Zeova. Menm si en madanm Kretyen i aksepte lotorite son msye, i pa pou siport son msye si i demann li pour kas bann lalwa oubyen bann prensip Labib. w21.02 11 ¶14-15; 12 ¶19

Bann serviter Zeova in kapab andire ler zot ganny persekite parski zot kontan Bondye. Par egzanp, ler lakour siprenm bann Zwif ti donn lord bann zapot pour aret anons sa bon nouvel, zot lanmour pour Bondye ti ed zot pour “obei Bondye plito ki zonm.” (Akt 5:29; 1 Zan 5:3) Ozordi nou bann frer ek ser i annan sa menm lanmour e sa i ed zot pour kontinyen reste fidel ler bann gouvernman pwisan e kriyel i persekit zot. Alor, ler dimoun dan lemonn i ay nou, olye dekouraze nou vwar li konman en privilez pour andire. (Akt 5:41; Rom. 5:4, 5) Enn bann keksoz pli difisil pour andire, i ler nou fanmir i opoz nou. I kapab ki ler nou fanmir i remarke ki nou anvi aprann konn Zeova, zot krwar ki nou pe ganny anbete oubyen ki nou fou. (Konpar Mark 3:21.) Sa i kapab fer zot opoz nou. Me zot reaksyon pa devret sirprann nou parski Zezi ti dir: “Lennmi en dimoun pou dan son prop lakour.”​—Mat. 10:36. w21.03 21 ¶6-7

Ler ou akonpanny en proklanmater lo son letid Labib, ekout byen ler sa ansenyan ek sa etidyan pe koze. Koumsa ou pou kapab ede si i neseser. Byensir, ou bezwen reflesir byen avan ou koze. Par egzanp, ou pa pou koz tro bokou. Ou pa pou enteronp sa ansenyan ler i pe eksplik en keksoz e ou pa konmans koz lo en lot topik. Me avek en pti komanter, legzanp oubyen kestyon, ou kapab ede pour fer sa pwen ki pe ganny diskite pli kler pour sa etidyan. Parfwa ou kapab santi ki ou napa bokou keksoz pour dir lo sa size. Me si ou felisit sa etidyan e demontre lentere dan li, ou pou kapab ed li progrese. Si ou krwar i pou ed sa etidyan, ou kapab an bref rakont sa etidyan ki mannyer ou’n aprann laverite, ki mannyer ou’n sirmont en problenm oubyen ki mannyer Zeova in ed ou dan ou lavi. (Ps. 78:4, 7) Ou leksperyans i kapab sanmenm ki sa etidyan ti bezwen tande. I kapab fer son lafwa vin pli for oubyen ankouraz li pour kontinyen progrese ziska batenm. w21.03 10 ¶9-10

Lekel ki devret ganny onore si nou ganny bann bon rezilta dan predikasyon? Pol ti reponn sa kestyon. I ti dir sa konsernan kongregasyon Korent: “Mwan mon’n plante, Apolos in aroze, me Bondye ki’n kontinyen fer pouse. Alor, se pa sa enn ki plante ouswa sa enn ki aroze ki enportan, me se Bondye ki fer pouse ki enportan.” (1 Kor. 3:6, 7) Parey Pol, nou devret toultan donn loner Zeova pour tou bon rezilta ki nou gannyen dan predikasyon. Ki mannyer nou kapab demontre nou lapresyasyon pour sa privilez ki nou annan pour “travay ansanm” avek Bondye, Kris ek bann lanz? (2 Kor. 6:1) Nou kapab fer sa ler nou fer tou sa ki nou kapab pour anons sa bon nouvel avek lezot. Nou pa devret zis plant lagrenn laverite me nou devret osi aroz zot. Ler en dimoun i demontre lentere, nou anvi fer nou mye pour retourn kot sa dimoun pour koz avek li pour esey konmans en letid Labib. Anmezir ki sa letid i progrese, nou kontan ler nou vwar Zeova pe ed sa etidyan pour sanz son fason panse ek son santiman. w20.05 30 ¶14, 16, 17; 31 ¶18