Desanm

Zezi ti konpar son relasyon avek son bann disip avek sa relasyon ant en berze ek son bann mouton. (Zan 10:14) Sa ti en bon konparezon. Bann mouton i konn zot berze e zot ekout son lavwa. En touris ti vwar sa arive e i ti dir: “Nou ti anvi tir portre bann mouton e nou ti anvi fer zot vin kot nou, me zot pa ti vin kot nou parski zot pa ti konn nou lavwa. Me apre en zenn berze ti vini, i ti kriy zot e zot ti swiv li.” Sa ki ti arive avek sa touris, i fer nou rapel sa ki Zezi ti dir konsernan son bann mouton setadir son bann disip. I ti dir: “Zot pou ekout mon lavwa.” Me Zezi i dan lesyel. Alor, ki mannyer nou kapab ekout li? Nou ekout li ler nou fer bann keksoz ki i ansenny nou pour fer.​—Mat. 7:24, 25. w21.12 16 ¶1-2

Zapot Pol ti en persekiter bann Kretyen, i ti kriyel e antete. Me pli tar, i ti konpran ki sa ki i ti’n fer ti mal e i ti pare pour sanz son latitid ek son personnalite. (1 Tim. 1:12-16) Avek led Zeova, Pol ti vin en berze ki ti annan lanmour, konpasyon ek limilite. I ti annan konfyans ki Zeova ti’n pardonn li. (Rom. 7:21-25) I pa ti ekspekte ki i vin parfe. Plito i ti travay dir pour amelyor son personnalite Kretyen e avek limilite i ti depan lo led Zeova pour akonpli son bann travay. (1 Kor. 9:27; Fili. 4:13) Bann ansyen pa ganny apwente akoz zot parfe. Me Zeova ti ekspekte ki bann ansyen i admet zot fot e devlop sa personnalite Kretyen. (Efe. 4:23, 24) En ansyen i devret servi byen Parol Bondye pour vwar konman i kapab amelyore. Koumsa Zeova pou ed li pour ganny lazwa e vin en bon ansyen.​—Zak 1:25. w22.03 29-30 ¶13-15

Ki nou devret fer si nou realize ki nou’n ziz en frer oubyen ser? Nou devret rapel ki nou bezwen kontan nou bann frer ek ser. (Zak 2:8) Nou devret osi priy Zeova e sipliy li pour ed nou pour aret ziz lezot. Nou kapab azir an armoni avek nou lapriyer par pas letan avek sa dimoun ki nou’n kritike. Nou kapab envit li pour al predikasyon oubyen pour pran en repa ansanm. Anmezir ki nou aprann konn nou frer oubyen ser pli byen, nou kapab esey swiv legzanp Zeova ek Zezi par rod sa ki bon dan li. Dan sa fason, nou montre ki nou pe ekout lord sa bon berze pour aret zize. Zis parey mouton i ekout lavwa zot berze, bann disip Zezi i ekout lavwa Zezi. Ki swa nou form parti “pti troupo” oubyen “lezot mouton,” annou kontinyen ekout e obei lavwa sa bon berze.​—Lik 12:32; Zan 10:11, 14, 16. w21.12 19 ¶11; 21 ¶17-18

Ler Reoboam ti vin lerwa Izrael, pep Izrael ti vin demann li pour tir en pe sa fardo ki son papa Salomon ti’n met lo zot. I ti demann bann zonm aze ki mannyer i ti pou reponn pep Izrael e sa ti en bon desizyon. Bann zonm aze ti dir li, ki si i fer sa ki pep Izrael in demande, zot pou toultan siport li. (1 Rwa. 12:3-7) I paret ki Reoboam pa ti dakor avek sa konsey. Alor i ti demann konsey bann zenn ki ti’n grandi ansanm avek li. Zot ti konsey li pour met plis fardo lo sa pep. (1 Rwa. 12:9-11) Reoboam ti’n kapab demann Zeova ki konsey i devret swiv. O kontrer, i ti fer sa ki sa bann zenn ti dir li. Sa desizyon ti anmenn move konsekans pour Reoboam e pour pep Izrael. Pareyman, i kapab ki parfwa nou ganny konsey ki nou pa anvi tande. Kantmenm sa, si sa konsey i baze lo Parol Bondye, nou devret aksepte. w22.02 9 ¶6

En dimoun ki annan limilite e ki modes i konsantre lo sa ki bann zenn i deza konnen, olye lo sa ki zot bezwen aprann. I pa pou fer konpetisyon avek zot me i pou vwar zot konman bann koleg travay. Bann frer ek ser aze i rekonnet ki bann ki pli zenn i bann kado sorti kot Zeova e zot rekonesan pour sa. Anmezir ki zot lafors i diminyen, zot rekonesan ki bann ki pli zenn i pare pour travay pour servi kongregasyon. Dan Labib i annan legzanp en dimoun aze ki ti aksepte led avek en dimoun ki ti pli zenn ki li. Sa i Naomi. Apre ki garson Naomi ti’n mor, i ti ankouraz son bel fiy Rit pour retourn kot son fanmir. Me Rit pa ti anvi kit Naomi e i ti al Betleenm avek li. Naomi ti vreman kontan e i ti aksepte led Rit. (Rit 1:7, 8, 18) Sa ti en bon keksoz pour zot tou le de. (Rit 4:13-16, NWT) Bann frer ek ser aze ki annan limilite i swiv legzanp Naomi. w21.09 10-11 ¶9-11

Nou Papa ki dan lesyel i konnen ki sakenn parmi i kapab fer. Petet ou kapab fer plis ki bokou dimoun ki ou konnen e kontan. Ouswa ou pa kapab fer parey lezot petet akoz ou laz, lasante oubyen ou responsabilite. Me pa dekouraze. (Gal. 6:4) Zeova pa pou oubliy sa ki ou’n fer. I pou kontan si ou donn ou meyer avek en bon motivasyon. Zeova i menm vwar sa ki ou anvi fer. Zeova i anvi ki ou zwaye e satisfe avek sa ladorasyon ki ou kapab donn li. Nou deza santi nou anpe parski nou konnen ki Zeova i ed son bann adorater ler zot fer fas avek bann problenm. (Iza. 41:9, 10) Nou annan bon rezon pour zwaye ler nou ador nou Papa ki kontan nou ki “merit laglwar, [ek] loner” sorti kot son kreasyon.​—Rev. 4:11. w22.03 24 ¶16; 25 ¶18

Nou anvi swiv legzanp Zezi me nou pa devret dekouraze si nou pa toultan kapab swiv legzanp Zezi. (Zak 3:2) En dimoun ki pe aprann desinen pa pou desin parey sa dimoun ki pe montre li desinen e ki’n desinen pour plizyer lannen. Me anmezir ki i aprann avek bann fot ki i fer e i fer tou sa ki i kapab pour swiv legzanp son ansenyan, i pou kontinyen amelyore. Pareyman, si nou aplik sa ki nou aprann dan nou letid personnel e nou kontinyen fer tou sa ki nou kapab pour amelyore, nou pou kapab swiv legzanp Zezi pli byen. (Ps. 119:59) En kantite dimoun dan lemonn i mazin zis zot prop lekor. Me bann serviter Zeova pa koumsa. Lefet ki Zezi in met lentere lezot avan sa ki pour li, sa in anmenn bann byenfe pour nou. Alor nou determinen pour swiv son legzanp. (1 Pyer 2:21) Anmezir nou fer nou mye pour swiv legzanp Zezi e met lentere lezot avan, nou pou zwaye parski nou pou pe fer plezir Zeova. w22.02 24 ¶16; 25 ¶18

Ozordi, Zeova i kontinyen donn lenstriksyon son pep atraver son Parol Labib. Si nou pran letan pour medit lo sa ki Zeova pe ansenny nou, nou pou kapab swiv son bann lenstriksyon e fer nou travay predikasyon. (1 Tim. 4:15, 16) Zeova i osi donn lenstriksyon atraver “sa lesklav fidel e pridan.” (Mat. 24:45) Parfwa, i kapab ki sa lesklav i donn lenstriksyon ki nou pa vreman konpran. Par egzanp, nou kapab ganny serten lenstriksyon spesifik pour prepar nou pour en dezas natirel ki nou krwar pa pou arive kot nou reste. Ki nou devret fer si nou santi ki bann lenstriksyon ki nou gannyen i pa tro fer sans? Mazin lo bann resi dan Labib ki nou’n lir. Parfwa, pep Bondye i ganny bann lenstriksyon ki pa paret bon me ki’n sov zot lavi.​—Ziz 7:7; 8:10. w22.03 18-19 ¶15-16

Avek konfidans, Zezi ti dir sa parol ki dan teks pour ozordi. Zezi ti konnen ki son lavenir ti depan lo Zeova e i ti asire ki son Papa pa ti pou oubliy li. Ki nou kapab aprann avek sa ki Zezi ti dir? Reste fidel avek Zeova menm si ou lavi i an danze. Pour fer sa, ou bezwen “met ou konfyans dan [Zeova] avek tou ou leker.” (Prov. 3:5) Annou vwar legzanp en Temwen Zeova, ki apel Joshua. I ti annan 15 an e i ti pe soufer avek en maladi grav. Me kantmenm sa, i ti refize pour aksepte okenn tretman ki ti pou kas lalwa Zeova. Pa bokou letan avan i mor, i ti dir son manman: “Manmi, Zeova pou pran swen avek mwan. . . . Mon kapab dir ou avek lasirans, ki mon konnen ki Zeova pou resisit mwan. I konn sa ki dan mon leker e mon vreman kontan li.” Sakenn parmi nou i devret demann nou lekor: ‘Si mon lafwa i ganny teste par en keksoz ki kapab touy mwan, eski mon pou reste fidel avek Zeova e annan konfyans ki i pa pou oubliy mwan?’ w21.04 12 ¶15-16

Pep Zeova i ganny lafors atraver sa travay predikasyon. Ler nou anons sa bon nouvel avek lezot nou santi nou byen ki swa dimoun i ekoute oubyen non. Serten frer ek ser i kapab santi ki akoz zot sirkonstans zot pa kapab fer bokou dan predikasyon. Si ou santi koumsa, rapel ki Zeova i kontan ler ou donn ou meyer. Zeova i vwar e i apresye ki serten parmi nou i anvi anons sa bon nouvel me nou pa kapab kit nou lakour. Alor i donn sa loportinite pour anons sa bon nouvel avek bann ki pran swen avek nou ouswa avek bann dokter ek ners. Si nou konpar sa ki nou pe fer la konmela avek sa ki nou ti fer dan lepase petet nou pou dekouraze. Me si nou vwar lafason ki Zeova pe ed nou la konmela, nou pou ganny sa lafors ki nou bezwen pour fer fas avek nou bann problenm avek lazwa. Nou pa konnen ki lagrenn laverite ki nou plante ki kapab pran rasin e konmans pouse.​—Ekle. 11:6. w21.05 24-25 ¶14-17

Zeova ti donn Lerwa David en kantite keksoz. I ti fer li vin lerwa, i ti donn li larises e i ti fer li ranport laviktwar dan bann lager. David ti rekonesan e i ti dir ki kado Bondye ti “tro bokou pour rakonte.” (Ps. 40:5, NWT) Me apre David ti vin voras e ti anvi plis ki sa ki Zeova ti’n donn li. David ti annan plizyer madanm me i ti konmans anvi en madanm ki ti’n marye. Menm si Zeova ti’n dir ki sa i mal. Sa madanm ti apel Bat-Seba e son msye ti apel Ourya. David ti annan relasyon seksyel avek Bat-Seba e i ti tonm ansent. Sa ki David ti fer ti vreman mal me apre sa i ti fer en keksoz pli mal ankor. David ti fer Ourya ganny touye. (2 Sam. 11:2-15) Ki David ti pe mazinen? Eski i ti krwar ki Zeova pa vwar li? Menm si David ti’n servi Zeova pour en kantite letan, i ti vin voras e sa ti fer li soufer en kantite. Pli tar David ti konfes son pese e i ti repantir. I ti rekonesan ki Zeova ti’n pardonn li.​—2 Sam. 12:7-13. w21.06 17 ¶10

Petet nou krwar ki nou pa kapab kondwir en letid Labib. I kapab ki nou santi ki nou devret annan plis konnesans ek abilite konman en ansenyan avan ki nou konmans etidye Labib avek en dimoun. Si i koumsa ki ou santi, annou vwar trwa keksoz ki pou konvenk ou ki ou kapab kondwir en letid Labib. Premyerman, Zeova i konsider ou kalifye pour ansenny lezot. Dezyenmman, Zezi ki annan “tou lotorite dan lesyel e lo later,” in donn ou lord pour ansennyen. (Mat. 28:18) Trwazyenmman, ou kapab depan lo lezot pour ed ou. Zezi ti depan lo sa ki son Papa ti ansenny li pour dir, alor ou osi ou kapab fer parey. (Zan 8:28; 12:49) An plis ou kapab demann ou sirveyan group predikasyon, en pionye eksperyanse oubyen en lot proklanmater eksperyanse pour ed ou konmans en letid Labib. En fason ki ou kapab aprann pour vin en pli bon ansennyen i ler ou asiste en letid Labib ki enn sa bann proklanmater pe fer. w21.07 6 ¶12

Lafen sa move lemonn i vreman pros. Alor plis ki zanmen oparavan nou bezwen annan konfyans dan fason fer Zeova. Akoz? I kapab ki pandan gran ladetres, nou pou ganny bann lenstriksyon ki pou paret drol, difisil pour konpran ouswa pa fer sans. Byensir, Zeova pa pou koz avek nou personnelman. I tre probab ki i pou donn lenstriksyon atraver son lorganizasyon. Pandan gran ladetres, i pa pou sa moman pour annan dout konsernan bann lenstriksyon ouswa pour demande, ‘Eski sa lenstriksyon i sorti kot Zeova oubyen eski i pwennvi bann frer ki pe dirize?’ Eski ou pou annan konfyans dan Zeova ek son lorganizasyon pandan sa letan enportan? Lafason ki ou vwar bann lenstriksyon sorti kot lorganizasyon Bondye la konmela, pou ed ou reponn sa kestyon. Si ou annan konfyans dan bann lenstriksyon ki ou gannyen ozordi e ou obei, i tre probab ki ou pou fer parey pandan gran ladetres. w22.02 6 ¶15

Gideonn ti’n kapab vin orgeye parski Zeova ti’n ed li ek son 300 zonm pour ranport laviktwar dan en batay. Pli tar, bann zonm sorti dan tribi Efraim ti vin zwenn li, pa pour felisit li me pour fer kankan avek li. Parski Gideonn pa ti’n envit zot ler li ek son 300 zonm ti pe al lager kont bann lennmi Bondye. (Ziz 8:1) Gideonn ti fer zot rapel ki mannyer Zeova in beni zot. Sa ki Gideonn ti dir “ti kalme zot lakoler.” (Ziz 8: 3) Gideonn ti pare pour demontre limilite pour gard lape parmi pep Bondye. Atraver legzanp bann zonm sorti dan tribi Efraim, nou aprann ki nou pa devret konsantre lo onor nou prop lekor me lo onor Zeova. Konman bann sef fanmir ek ansyen, nou kapab aprann en leson avek legzanp Gideonn. Si en dimoun i ankoler akoz en keksoz ki nou’n fer, nou devret esey konpran akoz sa dimoun i ankoler. Nou kapab osi felisit sa dimoun pour sa ki i’n fer byen. Pour fer sa nou bezwen annan limilite. Me i pli enportan pour annan en bon lanmitye avek nou frer oubyen ser olye montre ki nou annan rezon. w21.07 16-17 ¶10-12

Zeova in onor nou par kree nou dan son resanblans. Sa i fer ki nou kapab demontre son bann zoli kalite. Par egzanp, nou kapab demontre lanmour, konpasyon, fidelite ek ladrwatir. (Ps. 86:15; 145:17) Ler nou devlop sa bann kalite, nou onor Zeova e nou montre ki nou rekonesan anver li. (1 Pyer 1:14-16) Ler nou fer bann keksoz ki fer plezir nou Papa ki dan lesyel, nou ere. Vi ki nou annan bann kalite ki Zeova i annan, nou kapab vin bann dimoun ki i anvi dan son fanmir. Zeova in prepar en zoli landrwa pour nou reste. Zeova ti prepar later pour bann imen bokou letan avan i ti kree sa premye zonm. (Zob 38:4-6, NWT; Zer. 10:12, NWT) Vi ki Zeova i zenere, i’n kree en kantite bon keksoz pour fer nou ere. (Ps. 104:14, 15, 24) Parfwa i ti pran letan pour reflesir lo sa ki i ti’n kree e i ti “vwar ki sa ti bon.”​—Zen. 1:10, 12, 31. w21.08 3 ¶5-6

Nou tou nou annan sa responsabilite pour anons sa bon nouvel e fer disip. (Mat. 28:19, 20; Rom. 10:14) Eski ou ti pou kontan amelyor ou abilite dan sa travay enportan? Etidye sa brosir Ansennyen e apre, met bann lobzektif spesifik ki pou ed ou aplik sa ki ou pe aprann. Ou pa devret oubliye ki enn bann lobzektif pli enportan ki ou kapab annan i pour ou devlop bann kalite ki fer plezir Bondye. (Kol. 3:12; 2 Pyer 1:5-8) Nou tou, nou ti pou kontan fer plis pour Zeova. Dan nouvo lemonn nou pou kapab fer tou sa ki nou ti pou kontan pour Zeova. Me pour le moman si nou servi tou loportinite ki nou annan dan servis Zeova, nou kapab annan plis lazwa e nou pa pou tro dezapwente. Pli enportan ankor, nou pou onor Zeova nou “Bondye ere.” (1 Tim. 1:11) Alor annou trouv lazwa dan sa ki nou deza pe fer! w21.08 25 ¶18-20

Si ou’n grandi dan en fanmir ki Temwen Zeova, i tre probab ki depi byen zenn ou’n aprann konsernan Zeova. Ou’n aprann ki Zeova i Kreater, ki i annan bann zoli kalite e ki i anvi fer later vin en paradi. (Zen. 1:1; Akt 17:24-27) En kantite dimoun pa krwar ki Bondye i egziste ouswa ki i’n kree tou keksoz. O kontrer zot krwar ki lavi ti konmanse par azar pour vin bann form lavi pli konplike. Serten sa bann dimoun i annan gran ledikasyon. Zot dir ki lasyans in prouve ki sa ki Labib i dir pa vre e ki dimoun ki krwar dan en Kreater, i bann dimoun ki napa ledikasyon ouswa ki fasilman ganny anbete. Nenport kantite letan ki nou en Temwen Zeova, nou bezwen kontinyen ranforsi nou lafwa. Si nou fer sa, nou pa pou ganny anbete par “bann filozofi ek fo rezonnman” ki dimoun i dir pou kontredir Parol Bondye.​—Kol. 2:8. w21.08 14 ¶1-3

Abel, Noe, Abraam ek Zob ti demontre respe ek lanmour pour Zeova par obei Bondye, annan lafwa dan li e ofer bann sakrifis pour li. I kler ki zot ti fer zot mye pour onor Zeova e Zeova ti aksepte zot ladorasyon. Pli tar, Zeova ti donn Lalwa Moiz avek bann desandans Abraam. Sa bann lalwa ti enkli bann lenstriksyon lo lafason ki Zeova ti ekspekte bann Izraelit i ador li. Apre lanmor ek rezireksyon Zezi, Zeova ti nepli ekspekte ki dimoun i obei Lalwa Moiz. (Rom. 10:4) Bann Kretyen ti pou obei en nouvo lalwa, sa i “lalwa Kris.” (Gal. 6:2) Zot ti pou fer sa par swiv legzanp Zezi e obei son bann lansennyman olye swiv bann lenstriksyon lo kwa ki zot ti bezwen fer oubyen pa fer. Ozordi osi, bann Kretyen pe fer zot mye pour obei Kris pour ki zot fer plezir Zeova e “reganny lafors.”​—Mat. 11:29. w22.03 20-21 ¶4-5

Zeova i ekout lapriyer son bann zanfan. Zeova ti tann lapriyer ki son Garson ti fer ler i ti lo later. I ti tann Zezi priy konsernan bann desizyon enportan parey ler i ti swazir son 12 zapot. (Lik 6:12, 13) Zeova ti osi tann lapriyer ki Zezi ti fer ler i ti enkyet. Zis avan Zida ti trai Zezi, Zezi ti priy son Papa konsernan bann keksoz ki ti pe al ariv li. Zeova pa ti zis tann lapriyer Zezi me i ti osi anvoy en lanz pour fortifye son Garson ki i kontan. (Lik 22:41-44) Ozordi Zeova i osi ekout nou lapriyer e i reponn zot dan sa pli bon moman e dan sa pli bon fason posib. (Ps. 116:1, 2) En ser ki reste Lenn ti vwar ki mannyer Zeova ti reponn son bann lapriyer. I ti pe soufer akoz i ti enkyet en kantite e i ti priy Zeova konsernan son problenm. I dir: “Sa progranm Televizyon JW Me 2019, konsernan sa ki nou kapab fer ler nou enkyet, ti zis bon pour mwan. I ti larepons mon bann lapriyer.” w21.09 21-22 ¶6-7

Eski ou kapab imazinen ki mannyer i ti difisil pour sa bann Kretyen dan premye syek kit tou sa ki zot ti annan deryer e konmans en nouvo lavi dan en nouvo landrwa? Zot ti bezwen annan lafwa pour zot kapab depan lo Zeova pour ganny sa ki zot ti bezwen pour viv. Me i ti annan en lot keksoz ki ti kapab ed zot. Senk an avan ki bann Romen ti anserkle Zerizalenm, zapot Pol ti donn bann Kretyen Ebre serten bon konsey. I ti dir: “Montre dan zot fason viv ki zot pa kontan larzan e kontant zot avek sa ki zot annan. Parski i’n dir: ‘Mon pa pou zanmen kit ou e mon pa pou zanmen abandonn ou.’ Pour sa rezon, pran kouraz e dir: ‘Zeova i mon led, mon pa pou per. Ki dimoun i kapab fer mwan?’” (Ebr. 13:5, 6) San dout, bann ki ti ekout konsey Pol ti vwar li pli fasil pour kontant zot avek pli ptigin keksoz materyel dan zot nouvo lakour. Zot ti asire ki Zeova ti pou donn zot sa ki zot bezwen pour viv. w22.01 4 ¶7, 9

Ler nou mazin en dimoun ki demontre konpasyon, i kapab ki nou mazin en dimoun ki demontre labonte, ki zenere e ki pran pitye pour lezot. I kapab ki nou osi mazin sa legzanp ki Zezi ti donnen konsernan en bon Samariten. Sa zonm ki ti sorti dan en lot nasyon ti “pran pitye pour” en Zwif ki ti’n ganny bate e vole. Sa Samariten ti pran pitye pour sa Zwif e i ti pran swen avek li. (Lik 10:29-37) Sa legzanp i ansenny nou konsernan konpasyon ouswa pitye, ki en zoli kalite ki nou Bondye i annan. Bondye i demontre konpasyon parski i kontan nou. Toulezour i demontre konpasyon anver nou dan diferan fason. I annan en lot fason ki en dimoun i kapab demontre konpasyon. En dimoun ki demontre konpasyon i kapab deside pour pa pini en dimoun ki devret ganny pini. Zeova i fer sanmenm anver nou. En psalmis ti dir: “I pa’n tret nou dapre nou bann pese.” (Ps. 103:10) Me i annan lezot fwa ki Zeova i disiplin en dimoun ki’n fer en pese grav dan en fason ki sever. w21.10 8 ¶1-2

Zeova i demontre lanmour fidel anver zis bann ki annan en bon lanmitye avek li e sa i son bann serviter. Nou kapab konpran sa, atraver sa ki Lerwa David ek profet Danyel ti dir. Par egzanp, David ti dir: “Kontinyen demontre lanmour fidel avek bann ki konn ou.” “Lanmour fidel Zeova i eternel anver bann ki annan gran respe pour li.” Danyel ti dir: “O Zeova sa vre Bondye, ki demontre lanmour fidel anver bann ki kontan li e ki obei son bann komannman.” (Ps. 36:10, NWT; 103:17, NWT; Dan. 9:4, NWT) Dapre sa bann verse, Zeova i demontre lanmour fidel anver son bann serviter parski zot konn li, zot annan en gran respe pour li, zot kontan li e zot obei son bann komannman. Zeova i demontre lanmour fidel anver zis bann ki ador li dan sa fason ki li i oule. Avan ki nou ti vin en serviter Zeova, Zeova ti kontan nou parey i kontan tou dimoun. (Ps. 104:14) Me konman son bann serviter, Zeova i osi demontre lanmour fidel anver nou. w21.11 4 ¶8-9

Nenport keksoz ki dimoun i esey fer nou fer, nou determinen pour obei parol Zezi. Ozordi, en kantite dimoun i kontan pour ekout bann paster ki popiler. Zot sitan admir sa bann paster ki i konmsi zot pe ador sa bann paster. En kantite dimoun i al zot lanmes, aste zot bann liv, donn zot ek zot bann lorganizasyon en kantite larzan. Serten dimoun i krwar tou sa ki sa bann paster i dir. Zot kontan pour vwar sa bann paster zis parey zot ti pou kontan pour vwar Zezi si i ti lo later. Me bann ki ador Zeova dan sa bon fason napa okenn sef lo later. Menm si nou annan respe pour bann ki pe dirize dan lorganizasyon Temwen Zeova, nou aksepte sa lansennyman Zezi ki dir: “Zot tou zot frer.” (Mat. 23:8-10) Nou pa ador zonm, ki swa zot bann sef relizye oubyen dirizan politik. Nou pa siport zot bann lobzektif. O kontrer nou reste separe avek sa lemonn. Dan sa fason, nou vreman diferan avek lezot larelizyon ki dir ki zot Kretyen.​—Zan 18:36. w21.10 20 ¶6-7

Tou Kretyen ki anvi vin sen, i devret fer sir ki personn oubyen okenn keksoz pa vin pli enportan ki zot lanmitye avek Bondye. Vi ki nou Temwen Zeova, nou determinen pour pa fer okenn keksoz ki kapab sali oubyen anmenn laont lo non Zeova ki sen. (Lev. 19:12; Iza. 57:15) Bann Izraelit ti montre ki zot aksepte Zeova konman zot Bondye par obei son bann lalwa. Levitik 18:4 i dir: “Zot devret obei mon bann lalwa, swiv mon bann lareg e viv an armoni avek zot. Mwan mon Zeova zot Bondye.” Dan Levitik sapit 19 i annan serten sa “bann lareg” ki Zeova ti donn bann Izraelit. Par egzanp, verse 5-8, 21, 22 i koz lo bann sakrifis zannimo. Bann Izraelit ti bezwen fer sa bann sakrifis dan en fason ki pa ti pou “mank respe pour en keksoz sen ki pour Zeova.” Sa bann verse i devret motiv nou pour anvi fer Zeova plezir e pour ofer li bann sakrifis avek nou labous parey Ebre 13:15 i ankouraz nou pour fer. w21.12 5-6 ¶14-15

Bann koup ki’n fek marye i kapab benefisye avek leksperyans lezot koup ki’n aprann pour depan lo Zeova. I annan serten koup ki’n servi Zeova a plen tan pour plizyer lannen. Si ou pe mazin konsernan ou bann lobzektif, ou kapab demann zot konsey. Sa i en fason pour montre ki ou annan konfyans dan Zeova. (Prov. 22:17, 19) Rapel ki maryaz i en kado sorti kot Zeova. (Mat. 19:5, 6) I oule ki bann koup ki’n marye i kontan sa kado. Bann koup ki’n fek marye, reflesir lo sa ki zot pe fer avek zot lavi. Eski zot pe fer tou sa ki zot kapab pour montre Zeova ki kantite zot apresye sa bann kado ki i’n donn zot? Koz avek Zeova dan lapriyer. Rod bann prensip dan son Parol ki aplik pour ou. Apre swiv sa konsey ki Zeova i donn ou. Si ou fer ou servis pour Zeova vin sa keksoz pli enportan dan ou maryaz, ou kapab asire ki ou pou ere! w21.11 19 ¶16, 18

Zak ti annan en lopinyon rezonnab lo son lekor. Zak pa ti krwar ki i ti pli enportan ki lezot Kretyen akoz i ti frer Zezi oubyen akoz i ti annan bann responsabilite enportan. I ti refer avek lezot Kretyen konman ‘son bann frer ki i kontan.’ (Zak 1:16, 19; 2:5) I pa ti esey fer lezot krwar ki i ti parfe. Ki leson nou aprann? Rapel ki nou tou nou fer pese. Nou pa devret krwar ki nou pli enportan ki nou etidyan Labib. Akoz non? Si nou fer nou etidyan Labib krwar ki nou pa fer fot, i kapab dekouraze parski i kapab krwar ki i pa pou zanmen kapab obei Bondye parfetman. Me ler nou onnet e nou admet ki i pa’n toultan fasil pour nou aplik bann prensip Labib e ler nou eksplik lafason ki Zeova in ed nou sirmont nou bann difikilte, nou pou ed nou etidyan krwar ki li osi i kapab servi Zeova. w22.01 11-12 ¶13-14

Pli nou annan menm fason panse avek Zezi, pli nou pou azir parey li e nou pou pli kapab devlop sa nouvo personnalite. (Ebr. 1:3) Nou kapab mazinen: ‘Zezi i parfe. Mon pa pou zanmen kapab fer parey li!’ Si ou santi koumsa, reflesir lo sa bann keksoz swivan. Premyerman, ou’n ganny kree dan resanblans Zeova ek Zezi. Alor, ou kapab swazir pour swiv zot legzanp e ou kapab reisi fer li menm si ou pa fer li egzakteman parey zot. (Zen. 1:26) Dezyenmman, lespri sen Bondye i sa lafors pli pwisan dan liniver. Avek led lespri sen, ou kapab fer bann keksoz ki ou pa ti pou zanmen kapab fer lo ou menm. Trwazyenmman, Zeova pa ekspekte ki ou demontre bann kalite ki form parti fri lespri sen dan en fason parfe la konmela. Anfet, nou Papa ki kontan nou pou donn bann ki annan sa lespwar pour viv pour touzour lo later 1,000 an pour zot vin parfe. (Rev. 20:1-3) Me antretan, Zeova i anvi ki nou fer nou mye e depan lo li pour ganny led. w22.03 9 ¶5-6

Lapriyer pa sa sel fason ki kapab ed nou pour ranforsi nou lanmitye avek Zeova. Ler nou etidye Parol Bondye e nou asiste renyon dan kongregasyon, sa i osi kapab ed nou vin pli pros avek Zeova. Eski i annan okenn keksoz ki ou kapab fer pour servi byen sa letan ki ou etidye e ki ou asiste renyon? Demann ou lekor: ‘Kwa ki distrer mwan pandan renyon oubyen ler mon pe etidye Labib?’ Eski pandan sa bann moman dimoun i telefonn ou, anvoy ou email ouswa bann mesaz lo ou telefonn oubyen lo bann lezot lekipman elektronik? Ler ou remarke ki ou pe konmans mazin lezot keksoz pandan ki ou pe etidye ouswa pandan ki ou dan renyon, demann Zeova pour ed ou konsantre. Petet ou pa kapab aret mazin ou problenm e konsantre lo Parol Bondye me i vreman enportan ki ou fer sa. Priy Zeova e demann li pour donn ou sa lape ki pou protez ou leker ‘ek lespri.’​—Fili. 4:6, 7. w22.01 29-30 ¶12-14

Lerwa Ouzya pa ti aksepte konsey. I ti antre dan en landrwa dan tanp kot zis bann pret ki ti annan drwa pour antre, pour li ofer lansan. Bann pret Zeova ti dir li: “I pa apropriye pour ou Ouzya, pour bril lansan pour Zeova! Zis bann pret ki devret bril lansan.” Ki mannyer Ouzya ti reazir? “Ouzya . . . ti pran en gran lakoler.” Si i ti’n aksepte sa konsey e kit tanp deswit, petet Zeova ti pou’n pardonn li. Me akoz i pa ti aksepte sa konsey? I kler ki i ti krwar ki konman lerwa, i ti annan drwa pour fer sa ki i anvi. Me Zeova pa ti vwar keksoz koumsa. Vi ki Ouzya ti’n fer keksoz ki i ti napa drwa fer, Zeova ti donn li lalep e i “ti ganny lalep ziska zour son lanmor.” (2 Kron. 26:16-21) Sa ki ti arive avek Ouzya i montre ki nenport ki privilez nou annan, si nou pa aksepte konsey ki sorti dan Labib, nou pou perdi laprouvasyon Zeova. w22.02 9 ¶7

Normalman en dimoun ki ankor annan “sa vye personnalite,” i mazin e azir dapre bann dezir son lekor enparfe. (Kol. 3:9) I kapab ki i egois, i ankoler vitman, pa rekonesan e orgeye. I kapab kontan get bann keksoz ki annan pour fer avek pornografi e bann film vyolan oubyen imoral. San dout, i annan bann zoli kalite e i santi li koupab pour sa bann move keksoz ki i dir oubyen fer. Me i pa anvi sanz son fason panse e aret fer sa ki i pe fer. (Gal. 5:19-21; 2 Tim. 3:2-5) Nou enparfe, alor personn pa kapab konpletman tir tou bann move panse ek dezir dan nou leker ek lespri. Parfwa, nou pou dir oubyen fer en keksoz ki nou pou regrete. (Zer. 17:9; Zak 3:2) Me ler nou debaras nou avek sa vye personnalite, nou nepli ganny kontrole par bann move latitid ek bann move pratik. Nou vin en lot kalite dimoun.​—Iza. 55:7. w22.03 3 ¶4-5

Bann ansyen, zot devret vwar bann bon kalite ki zot frer ek ser i annan. Zot enparfe me sakenn ant zot i annan bann bon kalite ki nou kapab admire. I vre ki tanzantan bann ansyen i bezwen ed bann frer ek ser pour sanz zot fason panse. Parey zapot Pol, bann ansyen pa devret konsantre lo move parol ek aksyon en dimoun. Me plito, zot devret konsantre lo lanmour ki sa dimoun i annan pour Zeova, son fidelite pour servi Bondye e son abilite pour fer sa ki byen. Bann ansyen ki annan en bon pwennvi lo bann frer ek ser dan kongregasyon i ed zot pour santi ki i annan lanmour dan kongregasyon. Rapel ki Zeova pa pe demann zot pour vin parfe. Me i pe demann zot pour reste fidel. (1 Kor. 4:2) Ou kapab asire ki Bondye i apresye sa ki ou fer pour li. Zeova pa pou zanmen “oubliy sa ki zot in fer e lanmour ki zot in demontre pour son non par servi e kontinyen servi bann sen.”​—Ebr. 6:10. w22.03 31 ¶19, 21