Novanm

Zeova i ed nou dan diferan fason. I kapab ed ou pour reste kalm ler en dimoun i opoz ou. I kapab osi ed ou pour rapel sa bon verse Labib pour ou partaz avek en dimoun ki anvi ekout ou. I donn ou sa lafors pour kontinyen anons sa bon nouvel menm ler dimoun pa anvi ekout. (Zer. 20:7-9, NWT) Zeova in osi demontre son labonte anver nou par donn nou bann formasyon ki nou bezwen pour anons sa bon nouvel. Dan nou bann renyon lasemenn, nou tann bann bon legzanp lo sa ki nou kapab dir ler nou pe anons sa bon nouvel avek lezot e nou kapab servi sa bann sizesyon dan predikasyon. Premye kou, nou kapab per pour esey en nouvo fason fer me ler nou fer sa, nou kapab vwar ki sa bann sizesyon i mars vreman byen. Dan bann renyon ek lasanble, nou osi ganny ankouraze pour esey diferan metod predikasyon ki nou pa’n deza fer avan. Menm si nou per, ler nou esey sa bann nouvo keksoz, Zeova pou beni nou. w21.08 27 ¶5-6

Dan en let ki i ti ekri bann Korentyen, zapot Pol ti donn zot konsey ferm. Apre ki i ti’n ekri sa let, i ti anvoy Tit kot zot. I ti vreman kontan ler i ti tande ki zot ti’n aksepte son konsey. (2 Kor. 7:6, 7) Bann ansyen i kapab swiv legzanp Pol par pas letan avek bann frer ek ser. En fason pour fer sa, i ariv boner dan renyon koumsa zot kapab fer bann konversasyon ankourazan avek lezot. I pa pran bokou letan pour donn lankourazman en frer ouswa en ser ki bezwen. (Rom. 1:12) En ansyen ki swiv legzanp Pol pour ranforsi lafwa bann serviter Bondye par servi Son Parol pour batir zot e asir zot ki Bondye i kontan zot. I rod loportinite pour felisit zot. Ler en ansyen i donn konsey, i fer sir ki sa konsey i baze lo Parol Bondye. En ansyen i fran e zantiy ler i donn konsey akoz i anvi ki bann frer ek ser i aksepte son konsey.​—Gal. 6:1. w22.03 28-29 ¶11-12

Ozordi Zeova i donn son pep sa lafors ki “pli pwisan” pour zot kapab kontinyen servi li fidelman. En fason ki nou ganny lafors i atraver lapriyer. Dan Efezyen 6:18, Pol i ankouraz nou pour priy Bondye “dan tou lokazyon.” An retour Bondye pou donn nou lafors. Parfwa, nou santi ki nou pa kapab fer fas avek nou problenm e nou pa konnen ki nou pou priy lo la. Me Zeova i anvi nou priye menm si i difisil pour dir li sa ki nou pe santi e sa ki nou pe mazinen. (Rom. 8:26, 27) Zeova i osi donn nou lafors atraver Labib. Pol ti lir Labib pour ganny lafors ek rekonfor e nou osi nou bezwen fer parey. (Rom. 15:4) Anmezir ki nou lir Parol Bondye e medit lo la, Zeova i kapab servi son lespri sen pour ed nou konpran pli byen ki mannyer Labib i kapab ed nou.​—Ebr. 4:12. w21.05 22 ¶8-10

Nou konnen ki i vreman enportan pour ansenny lezot. Me i kapab difisil pour nou fer sa parey nou ti ava kontan fer. I kapab ki nou pa reisi fer sa kantite ki nou ti ava kontan. Par egzanp, serten proklanmater i aze oubyen zot annan en problenm lasante. Eski ou dan sa menm sityasyon? Si wi, rapel ki nou’n aprann ki nou kapab kondwir bann letid Labib par servi nou telefonn oubyen lezot lekipman elektronik. Alor ou kapab kondwir en letid Labib san ki ou bezwen kit ou lakour e sa i kapab pli fasil pour ou. I annan ankor en lot lavantaz. Serten dimoun i anvi etidye Labib me zot pa disponib pandan sa letan ki bann frer ek ser i dan predikasyon. Me i kapab ki zot disponib byen bomaten oubyen tar aswar. Eski ou kapab fer ou disponib pandan sa bann ler? Zezi ti ansenny Nikodenm aswar parski sa i letan ki Nikodenm ti disponib.​—Zan 3:1, 2. w21.07 5 ¶10-11

Disip Zan ki batize, pa ti konpran akoz bann disip Zezi pa ti zennen. Zezi ti dir ki i napa okenn rezon pour zot zennen tan ki i ti ankor la. (Mat. 9:14-17) Kantmenm sa, bann Farizyen ek lezot dimoun ki ti opoz li, ti akiz li parski i pa ti swiv zot bann tradisyon ek koutim. Zot ti ankoler ler i ti geri dimoun zour Saba. (Mark 3:1-6; Zan 9:16) Menm si zot ti fyer pour dir ki zot ti obei Lalwa Saba, zot pa ti vwar li en problenm pour fer biznes dan tanp. Zot ti ankoler ler Zezi ti dir ki sa ki zot ti pe fer i mal. (Mat. 21:12, 13, 15) Bann ki Zezi ti anons sa bon nouvel avek dan sinagog Nazaret, ti ankoler ler Zezi ti servi legzanp sa ki ti arive avek pep Izrael dan lepase, pour dir ki zot ti pe mazin zis zot prop lekor e ki zot ti napa lafwa. (Lik 4:16, 25-30) Alor, en kantite dimoun pa ti aksepte Zezi parski i pa ti fer sa ki zot ti krwar i ti pou fer.​—Mat. 11:16-19. w21.05 5-6 ¶13-14

Zeova i montre nou ki lorgey ek vorasite i danzere. I dir nou sa ki ti arive avek serten son serviter, pour ki nou pa fer menm fot. Ler nou mazin vorasite, i tre probab ki nou pou mazin Satan. Ler Satan ti en lanz, i bezwen ki i ti annan en kantite privilez. Me i ti anvi plis. I ti anvi sa ladorasyon ki zis Zeova ki merit gannyen. Satan i anvi nou vin parey li, alor i esey fer nou anvi plis ki sa ki nou deza annan. Premye fwa ki i ti esey fer sa, i ler i ti koz avek Ev. Zeova ti’n donn Ev ek son msye, en kantite bon keksoz pour zot manze. Zot ti kapab manz “fri dan tou pye dibwa” eksepte enn. (Zen. 2:16, NWT) Me Satan ti fer Ev krwar ki i ti bezwen manz fri dan sa pye dibwa ki i pa ti sipoze manze. Ev pa ti satisfe avek sa ki i ti annan, i ti anvi plis. Nou konnen ki i ti arive apre. Ev ti fer pese e pli tar i ti mor.​—Zen. 3:6, 19. w21.06 14-15 ¶2-3; 17 ¶9

Zeova ti anvi ki Adan ek Ev i fer zanfan e pran swen avek later. Si Adan ek Ev ti’n obei e fer sa ki Zeova ti’n demann zot pour fer, Adan ek Ev ansanm avek zot desandans ti pou form parti fanmir Zeova pour touzour. Adan ek Ev ti annan en plas enportan dan fanmir Zeova. Dan Psonm 8:5 (NWT), David ti dir sa parol konsernan ler Zeova ti kree bann imen: “Ou’n donn li en pozisyon ki en pti pe pli ba ki bann lanz e ou’n met laglwar ek splander lo li konman en kouronn.” Zeova pa’n donn bann imen sa menm pouvwar, lentelizans ek abilite ki bann lanz i annan. (Ps. 103:20) Me bann imen i annan “en pozisyon ki en pti pe pli ba” ki sa bann lanz pwisan. Malerezman, Adan ek Ev ti dezobei Zeova e akoz sa, zot ti nepli form parti fanmir Zeova. Zot dezobeisans ti anmenn bann move konsekans pour zot desandans. Me plan Zeova pa’n sanze. I anvi ki bann imen obeisan i vin son zanfan pour touzour. w21.08 2-3 ¶2-4

Ozordi en kantite serviter Zeova i ganny opoze. Par egzanp, serten i reste dan bann pei kot nou travay i anba restriksyon e zot kapab ganny arete e ganny “anmennen devan bann gouverner ek lerwa” pour kapab rann temwannyaz avek zot. (Mat. 10:17, 18) I annan lezot serviter Zeova ki ganny opoze dan en lot fason. Zot reste dan en pei kot zot lib pour ador Zeova me bann manm zot fanmir ki anvi zot aret servi Zeova i opoz zot. (Mat. 10:32-36) Dan plizyer ka, bann manm fanmir i aret opoz bann frer ek ser ler zot realize ki zot pa kapab fors zot aret servi Zeova. Dan serten ka, bann ki ti opoz bann frer ek ser in vin bann Temwen Zeova devoue. Ler dimoun i opoz ou, pa aret servi Zeova. Demontre kouraz. Zeova pe ed ou avek son lespri sen ki pwisan alor napa nanryen pour ou per. w22.03 16 ¶8

Labib i dir ki Zeova i ay sa bann ki annan “lizye orgeye, lalang ki dir bann mansonz, lanmen ki fer disan koule.” (Prov. 6:16, 17, NWT) I osi “deteste bann dimoun ki vyolan e ki trik lezot.” (Ps. 5:6, NWT) Zeova i sitan ay sa bann latitid ek aksyon ki i ti detri tou bann move dimoun dan letan Noe parski zot ti fer en kantite vyolans. (Zen. 6:13) Osi atraver profet Malaki, Zeova ti dir ki i ay sa bann ki fer bann trik pour divors zot konzwen inosan. Bondye pa aksepte zot ladorasyon e i pou fer zot rann kont pour zot move aksyon. (Mal. 2:13-16; Ebr. 13:4) Zeova i anvi ki nou “deteste sa ki mal.” (Rom. 12:9) Sa mo “deteste” i dekrir en santiman ki for. I vedir vreman ay en keksoz e vwar sa keksoz degoutan. Alor, zis pour mazin fer en keksoz ki Zeova pa kontan, i devret degoutan pour nou. w22.03 5 ¶11-12

Byento, nou pou ganny bokou benediksyon avek nou Papa ki dan lesyel atraver son Rwayonm. Bann ki kontinyen esper Zeova pou ganny bokou benediksyon la konmela e dan nouvo lemonn. Ler pep Bondye pou dan nouvo lemonn, zot pa pou zanmen andir bann problenm ki zot pe fer fas avek ozordi. I pou nepli annan lenzistis ek douler. (Rev. 21:4) Nou pa pou bezwen enkyet konsernan sa ki nou bezwen parski i pou annan ase pour tou dimoun. (Ps. 72:16; Iza. 54:13) Sa pou en gran benediksyon! Depi la konmela, Zeova pe prepar nou pour viv anba son dominasyon par ed nou pour sirmont nou bann move labitid e devlop bann kalite ki fer li plezir. Pa dekouraze e pa aret servi Zeova. Byento, nou pou annan en lavenir merveye. Anmezir nou pe esper sa letan merveye, annou reste zwaye e esper Zeova avek pasyans pour fer bann keksoz ki in dir i pou fer! w21.08 13 ¶17-19

Pa bokou letan apre ki zot ti’n ganny let zapot Pol, sa bann Kretyen ti bezwen kit zot lakour, zot biznes ek zot fanmir ki pa ti Kretyen e zot ti bezwen “konmans sov dan montanny.” (Mat. 24:16) Sa letan, i ti vreman enportan pour zot ed kanmarad. Si depi avan sa zot ti’n aplik konsey Pol pour partaz sa ki zot annan avek lezot, i ti pou pli fasil pour zot viv avek mwens keksoz dan zot nouvo lakour. I kapab ki nou bann frer ek ser pa pou toultan dir nou ler zot bezwen led. Alor, fer li fasil pour lezot demann ou led. San dout, ou konn bann frer ek ser dan ou kongregasyon ki toultan pare pour ed lezot. Zot pa zanmen fer nou santi ki nou pe fatig zot. Nou konnen ki zot toultan pare pour ed nou e nou ti pou kontan vin parey zot. w22.02 23-24 ¶13-15

Pandan sa bann dernyen lannen plizyer kongregasyon in zwenn ansanm e sa in fer ki serten kongregasyon in tonm anba en lot rezyon. Si nou ganny demande pour zwenn en nouvo kongregasyon, nou kapab vwar li difisil pour kit nou fanmir ek zanmi. Eski bann ansyen i ganny lenstriksyon sorti kot Bondye pour zot konnen kote pour anvoy sak proklanmater? Non. Sa i kapab fer li pli difisil pour nou swiv sa lenstriksyon ki nou gannyen. Me Zeova i annan konfyans ki bann ansyen i kapab fer sa bann desizyon. Alor nou osi nou bezwen annan konfyans dan zot. Akoz nou devret siport desizyon bann ansyen menm ler sa desizyon ki zot in fer i pa enn ki ou ti ava kontan? Ler nou siport zot desizyon, nou ed pep Bondye pour reste ini ansanm. Ler tou dimoun i siport desizyon ki konsey ansyen i fer, kongregasyon i vin deplizanpli pli for. (Ebr. 13:17) Pli enportan ankor, nou montre Zeova ki nou annan konfyans dan li par siport bann ki i annan konfyans ladan e ki i’n apwente pour pran swen avek nou.​—Akt 20:28. w22.02 4-5 ¶9-10

Si ou en frer, ou kapab esey vin en pli bon orater oubyen ansenyan. Akoz? Parski si ou travay dir pour vin en bon lekter, orater ek ansenyan, ou pou pli kapab ed bann ki pe ekout ou. (1 Tim. 4:15) Esey met sa lobzektif pour etidye e aplik sak leson ki dan sa brosir Amelyor ou abilite pour lir e ansennyen. Etidye sa bann leson enn par enn. Practice regilyerman kot lakour e aplik sa ki ou pe aprann ler ou fer diskour. Rod konsey avek asistan konseye oubyen lezot ansyen “ki travay dir pour ansenny e koz lo parol Bondye.” (1 Tim. 5:17) Konsantre lo aplik sa leson ki dan sa brosir e osi lo ed ou lodyans pour ranforsi zot lafwa oubyen motiv zot pour aplik sa ki zot pe aprann. Ler ou fer sa, ou ek ou lodyans pou ganny plis lazwa. w21.08 24 ¶17

Si nou konsider lezot pli siperyer ki nou, nou pa pou fer konpetisyon avek bann ki annan plis abilite ki nou. O kontrer, nou pou kontan pour zot. Sa i vre sirtou si zot pe servi zot abilite pour loue Zeova. Sa pou fer ki nou tou nou pou promot lape ek linite dan kongregasyon Si nou rekonnet ki i annan serten keksoz ki nou pa kapab fer byen, sa pou anpes nou vin groker. Si nou annan limilite, nou pa pou esey montre ki nou pli meyer ki lezot. O kontrer nou pou aprann avek bann ki annan plis abilite ki nou. Par egzanp, i kapab ki en frer dan kongregasyon i fer bann zoli diskour. Nou kapab demann li ki mannyer i prepar son bann diskour. Si en ser i kwi byen manze, ou kapab demann li bann sizesyon pour ed ou kwi byen manze. w21.07 16 ¶8-9

Dan liv Nonm, nou lir ki Zeova ti donn lord pour touy en Izraelit ki ti pe anmas dibwa zour Saba. Dan dezyenm liv Samyel, nou aprann ki plizyer lannen pli tar, Zeova ti pardonn Lerwa David menm si i ti’n komet adilter ek mert. (Nom. 15:32, 35; 2 Sam. 12:9, 13) Petet nou kapab demande: ‘Akoz Zeova ti pardonn David pour mert ek adilter me i ti fer touy sa zonm ki ti’n fer en keksoz ki pa ti paret sitan grav?’ Labib pa toultan donn tou lenformasyon lo en resi. Par egzanp, nou konnen ki David ti repantir senserman pour sa ki i ti’n fer. (Ps. 51:2-4) Me ki nou pou dir lo sa zonm ki ti kas lalwa Saba? Ki kalite dimoun i ti ete? Eski i ti regrete pour sa ki i ti’n fer? Eski i ti’n dezobei lalwa Zeova dan lepase? Eski i ti’n inyor oubyen pa aksepte bann lavertisman ki i ti’n gannyen oparavan? Labib pa dir. Me nou konn ase konsernan nou Bondye pour nou asire ki “tou sa ki Zeova i fer i drwat.”​—Ps. 145:17, NWT. w22.02 2-3 ¶3-4

En dimoun ki modes pa ekspekte fer plis ki sa ki i kapab fer. Sa pou fer ki i pou zwaye e i pou kontinyen travay dir. Nou kapab konpar en dimoun ki modes avek en dimoun ki pe dray en transpor dan montanny. Sa drayver i bezwen sanz son gir pour li kapab kontinyen mont sa montanny. I tre probab ki i pou al pli dousman me i pou kontinyen monte. Pareyman, en dimoun ki modes i konnen kan in ler pour fer bann sanzman e pa fer tro bokou, pour li kapab kontinyen servi Zeova e ed lezot. (Fili. 4:5) Annou vwar legzanp Barzilay. I ti annan 80 an ler Lerwa David ti envit li pour form parti lakour rwayal. Barzilay ti en dimoun modes alor i ti refiz sa plas ki Lerwa ti’n donn li. Barzilay ti konnen ki i pa ti pou kapab fer bokou. Alor i ti sizere ki Kimam ki pli zenn ki li, i al dan son plas. (2 Sam. 19:35-37, NWT) Parey Barzilay, bann frer pli aze i kontan pour donn bann ki pli zenn sa loportinite pour fer bann travay dan kongregasyon. w21.09 10 ¶6-7

Eski ou vwar li difisil pour konsider Zeova konman en Papa ki kontan ou? Serten parmi nou i santi koumsa. Si nou papa pa ti tret nou dan en bon fason, i kapab difisil pour vwar Zeova konman en Papa ki kontan nou. I vreman rekonfortan pour konnen ki Zeova i konpran nou santiman. I anvi vin pros avek nou. I pour sa rezon ki son Parol i ankouraz nou: “Vin pros avek Bondye e i pou vin pros avek zot.” (Zak 4:8) Zeova i kontan nou e i dir ki i pou vin sa pli bon Papa ki nou kapab annan. Zezi i kapab ed nou pou vin pli pros avek Zeova. Zezi i konn Zeova tre byen e i imit son bann kalite parfetman. I pour sa rezon ki i ti dir: “Sa ki’n vwar mwan in vwar mon Papa osi.” (Zan 14:9) Parey en gran frer, Zezi i ansenny nou ki mannyer pour demontre respe e obei nou Papa, ki mannyer pour evite fer keksoz ki pa fer li plezir e ki mannyer pour ganny son laprouvasyon. Zezi i osi ed nou pour konpran ki Zeova i vreman bon e i kontan nou. w21.09 21 ¶4-5

Pep Zeova i ador sa sel vre Bondye ansanm dan linite. Zeova in konfye bann ansyen en responsabilite vreman enportan pour gard kongregasyon prop. Si en Kretyen i fer en pese grav, Zeova i ekspekte ki bann ansyen i rode si sa dimoun i kapab reste dan kongregasyon. Enn bann keksoz ki zot bezwen rode i si sa dimoun i regrete pour sa ki i’n fer. I kapab dir ki i’n regrete me eski i vreman ay sa ki i’n fer? Eski i determinen pour pa fer ankor sa pese? Si en rezon akoz i ti fer sa pese, i akoz i ti annan move frekantasyon, eski i pare pour aret frekant sa bann dimoun? Bann ansyen i priy Zeova, zot konsider tou bann lenformasyon e sa ki Labib i dir. Zot osi egzamin lafason ki sa dimoun ki’n fer sa pese i santi konsernan sa ki i’n fer. Apre, bann ansyen i deside si sa dimoun i kapab reste dan kongregasyon. Dan serten ka, sa dimoun i bezwen ganny ekskli dan kongregasyon.​—1 Kor. 5:11-13. w22.02 5 ¶11-12

Ki swa nou’n batize pour zis detrwa zour oubyen pour plizyer lannen, nou tou nou anvi annan sa kalite personnalite ki Zeova i kontan. Pour reisi fer sa, nou bezwen kontrol sa ki nou mazinen. Akoz? Parski sa ki nou mazinen i annan en gran lefe lo nou personnalite. Si nou toultan pe mazin pour fer plezir nou lekor, nou pou dir e fer bann move keksoz. (Efe. 4:17-19) Me si nou mazin lo bann bon keksoz, i tre probab ki nou pou dir e fer bann keksoz ki fer plezir Zeova. (Gal. 5:16) Par kont, nou pa kapab toultan anpes bann move panse antre dan nou lespri. Me nou kapab swazir pour pa fer sa bann keksoz. Avan nou batize, nou bezwen aret koz e azir dan en fason ki Zeova pa kontan. Sa i sa premye keksoz ki nou bezwen fer pour debaras nou avek sa vye personnalite. I osi sa keksoz pli enportan. Me pour nou kapab vreman fer plezir Zeova, nou bezwen osi devlop sa nouvo personnalite. w22.03 8 ¶1-2

I pa fasil pour bann ansyen konnen si en dimoun ki’n fer en pese grav in repantir senserman. Akoz non? Bann ansyen pa kapab lir dan leker, alor zot esey rod levidans ki sa frer oubyen ser in vreman aprann pour ay sa ki i’n fer. Bann ansyen pou bezwen vwar levidans ki son fason panse, son santiman ek son konportman in vreman sanze. I kapab pran en kantite letan pour sa zonm fer bann sanzman ki montre ki i’n repantir senserman. Pour en dimoun ki’n ganny ekskli montre ki i’n repantir senserman, i pou bezwen asiste renyon regilyerman, swiv konsey bann ansyen pour priye e pour etidye Labib regilyerman. I pou osi fer bokou zefor pour evit bann keksoz ki kapab fer li fer pese ankor. Si i fer bokou zefor pour revin zanmi Zeova, i kapab asire ki Zeova pou pardonn li e ki bann ansyen pou ed li form parti kongregasyon ankor. w21.10 6 ¶16-18

Zezi i kontan Zeova en kantite. Sa i fer ki ler Zezi ti dan lesyel e ler i ti lo later, i ti ador zis Zeova. (Lik 4:8) I ti ansenny son bann disip pour fer parey. Ni Zezi, ni son bann disip fidel pa ti servi stati ler zot ti ador Bondye. Bondye i envizib, alor napa nanryen ki zonm pou kapab fer ki pou resanble li. (Iza. 46:5, NWT) Me ki Labib i dir konsernan fer bann stati pour bann swadizan sen e priy avek zot? Bondye ti donn pep Izrael sa Dis Komannman e sa ki nou lir dan nou teks pour ozordi i dezyenm parmi sa Dis Komannman. Sa bann parol i montre ki Zeova pa oule nou ador zidol. Bann istoryen i dir ki dan letan bann zapot, bann Kretyen ti ador zis Bondye. Ozordi Temwen Zeova i swiv legzanp sa bann Kretyen dan premye syek. w21.10 19-20 ¶5-6

Zezi ti’n averti bann Kretyen ki ti reste Zide ki en zour, lavil Zerizalenm ti pou ganny “antoure avek bann kan larme.” (Lik 21:20-24) Ler sa ti pou arive, zot ti pou bezwen “sov dan montanny.” Si zot ti kit sa lavil, zot pa ti pou mor me zot ti pou bezwen kit en kantite keksoz deryer. Detrwa lannen pase, en Latour Veyer ti dir: “Zot ti kit zot plantasyon ek lakour. Zot pa ti ni menm pran bann keksoz materyel dan zot lakaz. Zot ti annan konfyans ki Zeova ti pou protez e ed zot. Alor zot ti met ladorasyon Zeova avan okenn keksoz ki ti kapab paret enportan.” I ti osi dir: “Dan lavenir nou kapab fer fas avek bann problenm ki pou montre ki degre bann keksoz materyel i enportan pour nou. Eski sa bann keksoz i pli enportan oubyen eski lefet ki Zeova pou sov bann ki lo son kote, i sa keksoz pli enportan pour nou? Ler lafen i arive, i kapab ki nou pou bezwen andir bann difikilte e fer bann sakrifis. Nou pou bezwen pare pour fer tou sa ki neseser.” w22.01 4 ¶7-8

Pa bokou letan apre ki bann Izraelit ti’n kit Lezip, Zeova ti koz avek Moiz konsernan son non ek son bann kalite. Zeova ti dir: “Zeova, Zeova, en Bondye ki annan pitye ek konpasyon, i pa ankoler vitman e i annan en kantite lanmour fidel ek laverite, i demontre lanmour fidel anver plizyer milye dimoun, i pardonn fot, lofans ek pese.” (Egz. 34:6, 7, NWT) Atraver sa bann zoli parol, Zeova ti dir Moiz en keksoz vreman spesyal konsernan Son lanmour fidel. Ki Zeova ti dir? Zeova pa ti zis dir ki i annan lanmour fidel, me i ti dir ki i annan “en kantite lanmour fidel.” Sa i ganny mansyonnen ankor sis fwa dan Labib. (Nom. 14:18, NWT; Nee. 9:17, NWT; Ps. 86:15, NWT; 103:8, NWT; Zoel 2:13, NWT; Zon. 4:2, NWT) Dan tou sa bann verse sa lekspresyon i refer zis avek Zeova. I pa zanmen refer avek bann imen. Dan Labib, Zeova i dir ki i annan en kantite lanmour fidel. w21.11 2-3 ¶3-4

Bann koup marye i kapab aprann avek legzanp zapot Pyer ek son madanm. Apepre enn an apre ki zapot Pyer ti’n zwenn Zezi, i ti bezwen fer en desizyon enportan. Pyer ti annan biznes lapes e sa ti ed li pour pran swen avek son fanmir. Alor, ler Zezi ti envit Pyer pour vin son disip, Pyer ti bezwen mazin son madanm ler i ti fer son desizyon. (Lik 5:1-11) Pyer ti deside pour al anons sa bon nouvel ansanm avek Zezi e nou kapab asire ki madanm Pyer ti siport son desizyon. Labib i dir ki apre ki Zezi ti’n resisite, madanm Pyer ti al avek Pyer lo serten son bann vwayaz. (1 Kor. 9:5) Vi ki madanm Pyer ti en bon madanm Kretyen, Pyer ti kapab donn konsey bann msye ek madanm Kretyen. (1 Pyer 3:1-7) Pyer ek son madanm ti annan konfyans dan promes Zeova ki I ti pou pran swen avek zot si zot met Rwayonm premye dan zot lavi.​—Mat. 6:31-34. w21.11 18 ¶14

Zapot Pol ti kontan bann frer ek ser. I ti travay vreman dir pour ed zot. (Akt 20:31) Alor bann frer ek ser ti kontan Pol en kantite. En fwa, ler bann ansyen sorti Efez ti aprann ki zot pa ti pou vwar li ankor, zot tou zot ti “plere en bon pe.” (Akt 20:37) Pareyman, bann ansyen ki travay dir i kontan nou en kantite e fer tou sa ki zot kapab pour ed nou. (Fili. 2:16, 17) Me parfwa, bann ansyen i pas dan bokou difikilte. Kwa ki kapab ed zot pour sirmont sa bann difikilte? Bann ansyen i kapab swiv legzanp Pol. I pa ti parey bann lanz. Pol ti en zonm enparfe e parfwa i ti lite pour fer sa ki byen. (Rom. 7:18-20) I ti osi fer fas avek plizyer problenm. Me Pol pa ti abandonnen oubyen perdi son lazwa. Par imit Pol, bann ansyen i kapab sirmont zot bann difikilte ki zot fer fas avek e kontinyen gard zot lazwa anmenn tan ki zot kontinyen servi Zeova. w22.03 26 ¶1-2

Levitik 19:3 i koz konsernan obei lalwa Saba. Bann Kretyen pa anba Lalwa Moiz, alor nou pa bezwen obei lalwa Saba ki ti ganny fer sak semenn. Kantmenm sa, nou kapab aprann en kantite keksoz konsernan lafason ki bann Izraelit ti obei lalwa Saba e bann byenfe ki zot ti gannyen ler zot ti fer sa. Pandan Saba, bann Izraelit pa ti travay, zot ti repoze e ador Bondye. I pour sa rezon ki zour Saba, Zezi ti al dan sinagog pour lir Parol Bondye. (Egz. 31:12-15; Lik 4:16-18) Sa lord ki Zeova ti’n donn bann Izraelit dan Levitik 19:3 pour “obei lalwa konsernan [son] bann saba,” i devret motiv nou pour fer letan sak zour pour ador Bondye. Eski ou santi ki ou devret fer plis zefor pour obei sa lord? Si ou fer letan pour ador Zeova regilyerman, ou pou devlop en lanmitye pros avek Zeova e sa i vreman enportan pour ou kapab vin sen. w21.12 5 ¶13

Ler Zezi ti lo later, i ti pas letan avek tou sort kalite dimoun. I ti manz avek bann dimoun ris e bann ki ti annan o pozisyon. Me i ti osi pas bokou letan avek bann dimoun pov e bann ki pa ti ganny trete byen. An plis, i ti demontre konpasyon anver bann dimoun ki ti ganny vwar konman “bann ki annan en move lavi.” Sa ti fer serten dimoun orgeye pa aksepte Zezi. Zot ti demann son bann disip: “Akoz zot manze e bwar avek bann kolekter taks ek bann ki annan en move lavi?” Me Zezi ti dir zot sa parol ki dan teks pour ozordi. (Lik 5:29-31) Bokou letan avan ki Mesi i vin lo later, profet Izai ti’n predir ki dimoun pa ti pou aksepte li. Sa profesi i dir: “I ti ganny meprize e dimoun ti evit li . . . I ti konmsi son figir ti’n ganny kasyet avek nou. I ti ganny meprize e nou ti konsider li konman en nanryen ditou.” (Iza. 53:3, NWT) Dapre sa profesi, dimoun ti pou “evit” Mesi, alor bann Zwif dan premye syek ti’n devret ekspekte ki dimoun pa aksepte Zezi. w21.05 8-9 ¶3-4

Serten Kretyen dan premye syek ti tarde aplik konsey. (Zak 1:22) Lezot ti fer lapreferans pour bann ki ris. (Zak 2:1-3) I ti annan lezot ankor ki ti vwar li difisil pour zot vey sa ki zot dir. (Zak 3:8-10) Sa bann Kretyen ti annan bann problenm grav me Zak ti krwar ki zot ti kapab sanze. I ti donn zot konsey dan en fason zantiy me fran e i ti ankouraz bann ki ti bezwen led pour demann bann ansyen pour ed zot fer bann sanzman neseser. (Zak 5:13, 14) Ki leson nou aprann? Nou bezwen realistik me gard en pwennvi pozitif lo lezot. I kapab difisil pour serten etidyan Labib aplik bann konsey ki dan Labib. (Zak 4:1-4) I kapab pran letan pour zot aret bann move labitid e pour devlop bann kalite Kretyen. Nou devret annan kouraz pour dir nou etidyan Labib kote zot devret amelyore. Nou bezwen osi reste pozitif e annan konfyans ki Zeova pou atir bann dimoun ki annan limilite anver li e i pou donn zot sa lafors pour fer bann sanzman dan zot lavi.​—Zak 4:10. w22.01 11 ¶11-12

Tou Kretyen i bezwen demontre konpasyon parey Zeova. Akoz? En rezon i akoz Zeova pa pou ekout bann ki pa demontre konpasyon anver lezot. Personn pa anvi ki Zeova i refize ekout son lapriyer. Alor nou pa devret vin en dimoun ki annan en leker dir. Olye refize ekout en frer oubyen en ser ki pe soufer, nou toultan pare pour ekoute ler “en malere i kriy osekour.” Pareyman, nou fer nou mye pour ekout sa konsey ki dan sa verse Labib ki dir: “Sa enn ki napa pitye pou ganny zize san pitye.” (Zak 2:13) Nou tou nou bezwen ki lezot i demontre konpasyon anver nou, alor si nou gard sa antet, i tre probab ki nou pou demontre konpasyon anver lezot. Nou sirtou anvi demontre konpasyon ler en dimoun ki’n ganny ekskli dan kongregasyon i revin en Temwen Zeova. Bann legzanp dan Labib bann serviter ki ti bon e annan pitye i kapab ed nou pour demontre konpasyon e pour evite azir dan en fason ki dir. w21.10 12 ¶16-17

Sa zour swar avan Zezi i mor, avan i fini son minister, Zezi ti rod en landrwa trankil pour li kapab medite e priye. I ti al dan zarden Zetsemane. Ler i ti laba, Zezi ti donn son bann disip en konsey enportan konsernan lapriyer. I ti vreman tar ler zot ti ariv dan zarden Zetsemane e petet minwi ti’n sonnen. Zezi ti demann son bann zapot pour “kontinyen veye” e li i ti al priye. (Mat. 26:37-39) Me pandan ki Zezi ti pe priye, son bann zapot ti tonm dormi. Ler Zezi ti vwar zot pe dormi, i ti demann zot ankor enn fwa pour “kontinyen veye e kontinyen priye.” (Mat. 26:40, 41) I ti realize ki zot ti anba en kantite presyon e zot ti fatige. Alor, avek konpasyon i ti dir ki “lekor enparfe i feb.” Apre sa, Zezi ti al ankor de fwa pour li priye e sak fwa ler i ti retournen, i ti vwar son bann disip pe dormi olye priye.​—Mat. 26:42-45. w22.01 28 ¶10-11