LO KOUVERTIR | KI MANNYER MON KAPAB BENEFISYE LER MON LIR LABIB?
Akfer lir Labib?
“Mon ti krwar ki Labib ti pou difisil pour konpran.”—Jovy
“Mon ti krwar ki i ti pou boring.”—Queennie
“Ler mon ti get groser ki Labib i ete, i pa ti donn mwan lanvi lir.”—Ezekiel
Eski ou’n deza mazin pour lir Labib me ou pa’n fer li akoz ou santi parey zot? Pour bokou dimoun, i paret tro difisil pour lir Labib. Me ki ou ti pou fer si ou ti aprann ki Labib i kapab ed ou annan en lavi gou e satisfezan? Si ou ti aprann ki i annan keksoz ki ou kapab fer pour ki ou lektir i vin pli enteresan, eski ou ti pou pare pour gete si Labib i kapab ed ou?
Annou vwar ki serten dimoun in dir ler zot ti konmans lir Labib e ki mannyer zot in benefisye.
Ezekiel, ki dan son 20 an i dir: “Dan lepase, mon ti parey en dimoun ki ti pe dray en loto san konnen kote mon pe ale. Me apre ki mon’n lir Labib, mon konnen ki mon anvi dan lavi. Dan Labib, i annan bann konsey pratik ki mon kapab servi toulezour.”
Frieda, ki osi dan son 20 an i eksplike: “Mon ti abitye ankoler vitman. Me mon lektir Labib in ed mwan pour kontrol mon lekor. Sa in ed mwan pour vin en dimoun pli kalm e aprezan mon annan plis zanmi.”
Eunice, en madanm ki dan son 50 an i dir: “Labib pe ed mwan sanz mon bann move labitid pour mwan vin en pli bon dimoun.”
Tou sa bann dimoun ek plizyer lezot ankor in aprann ki lir Labib i kapab ed ou viv en lavi pli gou. (Izai 48:17, 18) An plis ki sa, Labib i kapab ed ou (1) fer bann bon desizyon, (2) fer bann bon zanmi, (3) fer fas avek presyon e (4) pli enportan, konn laverite lo Bondye. Bann konsey ki dan Labib i sorti kot Bondye e i bon pour nou. Bondye pa zanmen donn move konsey.
Alor, i enportan ki ou konmans lir Labib. Kwa ki kapab ed ou konmans lir Labib e fer ou lektir pli enteresan?