Ki mannyer mon kapab konmans lir Labib?

Ki ou kapab fer pour ou lektir vin pli enteresan e konman ou kapab benefisye? Remark sa senk sizesyon ki’n ed bokou dimoun.

Rod en bon lanvironnman. Esey rod en landrwa ki trankil. Retir okenn keksoz ki kapab distrer ou pour ou kapab konsantre lo sa ki ou pe lir. En landrwa kot i kler e ki annan sa bon ler fre i kapab ed ou pour pli benefisye avek ou lektir.

Annan en bon leta lespri. Vi ki Labib i sorti kot nou Papa ki dan lesyel, ou pou pli benefisye si ou vin parey en zanfan ki pare pour aprann en keksoz avek son paran. Si ou annan okenn move pwennvi lo Labib, esey met zot dekote pour ou kapab les Bondye ansenny ou.​—Psonm 25:4.

Priye avan ou lir. Dan Labib, i annan bann panse Bondye, alor nou bezwen son led pour konpran sa ki nou pe lir. Bondye i promet pour donn “lespri sen bann ki demann li.” (Lik 11:13) Lespri sen i kapab ed ou pour konpran fason panse Bondye. Avek letan, i pou ed ou konpran “menm bann keksoz profon konsernan Bondye.”​—1 Korentyen 2:10.

Lir pour konpran. Pa zis lir pour fini. Reflesir byen lo sa ki ou pe lir. Demann ou lekor bann kestyon parey: ‘Ki bann kalite mon’n vwar dan sa dimoun? Ki mannyer mon kapab aplik sa dan mon lavi?’

Met bann lobzektif spesifik. Pour ou kapab benefisye avek ou lektir Labib, annan sa lobzektif pour aprann en keksoz ki kapab amelyor ou lavi. Ou kapab met bann lobzektif pour aprann plis lo Bondye li menm, pour vin en pli bon dimoun, en pli bon msye oubyen madanm. Apre, rod bann verse dan Labib ki kapab ed ou atenn sa lobzektif.a

Sa senk sizesyon pou ed ou konmans lir Labib. Me ki mannyer ou kapab fer ou lektir pli enteresan ankor? Sa lot lartik ki swiv i donn bann sizesyon.