Ler ou konzwen i tronp ou

“Ler mon msye ti dir ki i pe kit mwan pour al avek en madanm pli zenn, mon ti anvi mor. Sa ti vreman fermal espesyalman ler mon mazinen ki kantite sakrifis mon’n fer pour li.”—Maria, Lespanny.

“Ler mon madanm ti kit mwan, i ti konmsi en keksoz ti’n mor avek mwan. Nou bann rev, nou plan ek bann keksoz ki nou ti anvi pour lavenir ti’n ganny detri. I ti annan serten zour mon ti krwar ki tou ti oke me apre mon ti retonm dan depresyon.”—Bill, Lespanny.

I VREMAN fermal ler en dimoun pa fidel avek son konzwen. I vre ki serten in kapab pardonnen e zot in kapab aranz zot maryaz.a Me menm si sa de dimoun i reste ansanm oubyen non, sa konzwen ki’n reste fidel i toultan soufer en kantite. Me ki mannyer sa enn ki’n reste fidel i kapab fer fas avek son bann santiman?

BANN VERSE LABIB KI KAPAB ED OU

Menm si sa konzwen ki’n reste fidel ti vreman sagren, zot in ganny rekonforte par bann verse Labib. Zot in aprann ki Bondye i vwar zot soufrans e i konpran zot santiman.—Malaki 2:13-16.

“Ler mon leker i ranpli avek traka, ou vin rekonfort mwan.”—Psonm 94:19.

Bill i dir: “Ler mon ti lir sa verse, i ti konmsi mon ti kapab vwar Zeova pe rekonfort mwan parey en papa ki ranpli avek konpasyon.”

“Ou fidel anver sa enn ki fidel.”—Psonm 18:25.

Carmen, ki son msye ti’n tronp li pour plizyer mwan, i dir: “Mon msye pa ti’n fidel. Me mon ti annan konfyans ki Zeova ti pou fidel avek mwan. Zeova pa pou zanmen dezapwent mwan.”

“Pa bezwen trakas pour nanryen, me dan tou sirkonstans, fer Bondye konn zot bann demann dan lapriyer ek siplikasyon . . . e ki lape Bondye ki depas tou sa ki nou kapab konpran i protez zot leker.”—Filipyen 4:6, 7.

Sasha i dir: “Mon ti lir sa bann verse plizyer fwa. Anmezir ki mon ti kontinyen priye, Bondye ti donn mwan lape lespri.”

Tou sa bann dimoun ki’n ganny mansyonnen dan sa lartik, parfwa ti santi ki i pa vo lapenn kontinyen viv. Me zot ti annan konfyans dan Zeova e zot ti ganny ankouraze par bann verse Labib ki zot ti lir. Bill i dir ki ler i ti paret ki tou keksoz ti’n fini, son lafwa ti ed li vwar ki i vo lapenn kontinyen viv. I ti osi dir ki Bondye ti pe ed li menm si i ti paret ki i ti pe mars dan en vale fernwanr.—Psonm 23:4.

a Pour plis lenformasyon lo si ou kapab pardonnen oubyen non, vwar Awake le 22 Avril 1999 an Angle, ki annan pour tit “When a Mate Is Unfaithful.”

Sa ki serten dimoun in fer

Lir e reflesir lo bann verse rekonfortan.

Bill i dir: “Ler mon ti lir liv Zob ek Psonm, mon ti souliny tou bann verse ki ti aplik pour mon sityasyon. Mon ti realize ki sa bann ekriven Labib ti’n eksperyans sa bann douler ek lenkyetid ki mon ti pe pas ladan.”

Ekout bann lanmizik ki kapab rekonfort ou.

Carmen i dir: “Ler mon pa ti kapab dormi aswar, mon ti ekout lanmizik. Sa ti rekonfort mwan bokou.” Daniel li i dir: “Mon ti aprann ki mannyer pour zwe gitar e sa ti donn mwan lape lespri.”

Koz lo ou bann santiman.

Daniel i dir: “Mon pa ti abitye koz lo mon bann santiman. Me mon ti annan bann bon zanmi e mon ti koz avek zot toulezour. Mon ti ekri zot bann let e koz avek zot pour dir zot mon bann santiman. Sa ti vreman ed mwan.” Sasha i dir: “Led ki mon ti gannyen avek mon fanmir ti vreman enportan. Mon manman ti toultan la pour mwan. Si mon ti anvi koze, i ti la pour ekout mwan. Mon papa ti fer mwan santi ki i kontan mwan e ki mon ti an sekirite. I ti ed mwan rekipere dousman dousman.”

Kontinyen priye.

Carmen i dir: “Mon ti priye toultan. Mon ti santi ki Bondye ti la avek mwan, pe ekout mwan e ed mwan. Pandan sa bann moman vreman difisil, mon ti vin pli pros avek Bondye.”