Ler ou annan en maladi grav

“Ler mon ti konnen ki mon ganny kanser poumon ek trip, mon ti santi konmsi mon’n ganny en santans lanmor. Me ler mon ti sorti lopital mon ti dir dan mon menm, ‘oke i pa sa ki mon ti pe ekspekte me mon bezwen rod en fason pour fer fas avek sa sityasyon.’”—Linda, ki annan 71 an.

“Mon ti soufer avek en maladi ki afekte mon bann nerf lo kote gos mon figir. Par ler, sa douler ti sitan for ki mon ti tonm dan depresyon. Souvan mon ti santi mwan tousel e menm mazin touy mon lekor.”—Elise, ki annan 49 an.

En msye malad dan wiltyer antoure ek bann dimoun ki kontan li

SI OU oubyen en dimoun ki ou kontan i dekouver i ganny en maladi grav ki menm kapab kout son lavi, pa sa pou fer ou tris! An plis ki sa maladi, ou bezwen fer fas avek bann diferan santiman. Lafreyer ek lenkyetid i kapab ogmante ler ou strese akoz bann randevou dokter, ler i difisil pour ganny ouswa aste tretman oubyen akoz move lefe bann latizann. Tou sa lenkyetid ek presyon i difisil pour siporte ler ou ganny en maladi grav.

Kote nou kapab ganny led? Bokou dimoun i vwar ki zot ganny sa pli bon rekonfor ler zot priy Bondye e lir Labib. Zot in osi ganny led avek fanmir ek zanmi.

SA KI SERTEN DIMOUN IN FER

Robert ki annan 58 an i dir: “Ler ou annan lafwa dan Bondye, i pou ed ou fer fas avek en maladi grav. Priy Zeova e dir li ki mannyer ou santi. Demann li son lespri sen. Demann li lafors pour ou reste pozitif pour ankouraz ou fanmir e reste kalm anmezir ki ou fer fas avek ou maladi.

“I vreman ankourazan ler ou fanmir i siport ou. Toulezour enn ant zot i telefonnen e demann mwan ‘konman ou sava?’ Tou mon bann zanmi ti ankouraz mwan. Sa ti ed mwan vwar ki i vo lapenn kontinyen viv.”

Si ou pe al vizit enn ou zanmi ki malad, gard antet sa ki Linda i dir: “San dout sa dimoun malad i anvi viv en lavi normal e par ler i pa anvi koz lo son maladi. Alor koz lo bann keksoz ki zot abitye koz lo la.”

Avek led Bondye, rekonfor sorti dan Labib e osi sipor fanmir ek zanmi ki kontan ou, ou asire ki i vo lapenn kontinyen viv menm ler ou pe fer fas avek en maladi grav.

Bann verse Labib ki kapab ed ou

Depan lo Bondye.

“Mon ti apel [Zeova] e i ti reponn mwan. In delivre mwan dan tou mon lafreyer. Kan en malere i kriye, [Zeova] i antann li.”—Psonm 34:4, 6.

Linda ki nou’n koz lo la pli boner, i dir: “Ler mon priye, mon pa zanmen demande pour mwan byen. Plito, mon toultan priye pour Bondye ed mwan vin for e ed mwan fer fas avek mon maladi.”

Parol Bondye i kapab ed ou vin pli for.

“Personn pa pou dir: Mon malad!”—Izai 33:24.

Ou pou ganny ankouraze ler ou reflesir lo bann promes Bondye pour lavenir.

Demann led avek fanmir ek zanmi.

“En zanmi i fidel dan tou sirkonstans; en frer i la pour partaz son difikilte.”—Proverb 17:17.

Elise ki nou’n koz lo la avan i donn en zoli konsey: “Pa bezwen izol ou lekor, les ou bann zanmi ed ou. I kapab annan letan ki ou santi ou tousel e ki Bondye pa pe ekout ou, me pa izol ou lekor.”