Ler ou anvi mor

Adriana ki sorti Brezil, i dir: “Mon ti kontinyen santi koumsa. Alor mon ti mazinen ki i pa vo lapenn kontinyen viv.”

ESKI OU’N deza santi ki i pa vo lapenn kontinyen viv? Alor ou kapab konpran ki mannyer Adriana ti santi. Dokter ti dir ki Adriana i ganny depresyon. Souvan i santi li sagren e ki i pa kapab fer nanryen.

Annou pran legzanp Kaoru, en msye Zaponnen ki ti pran swen avek son paran aze ki ti malad. Kaoru i dir: “Pandan sa bann moman, mon ti anba en kantite presyon dan mon travay. Avek letan, mon ti perdi lapeti e mon pa ti kapab dormi byen. Mon ti konmans mazinen ki tou mon problenm ti pou rezourd si zis mon mor.”

En msye Nizeryen ki apel Ojebode i dir: “Mon ti toultan sagren ki souvandfwa mon ti plere, alor mon ti rod en fason pour touy mon lekor.” Erezman, Ojebode, Kaoru ek Adriana pa ti touy zot lekor. Par kont, tou le lannen i annan plizyer milye dimoun ki touy zot lekor.

KOTE NOU KAPAB GANNY LED?

Laplipar dimoun ki touy zot lekor, i bann zonm akoz bokou zot i tro kanmi pour rod led. Zezi ti dir ki bann dimoun malad i bezwen dokter. (Lik 5:31) Si ou sitan dan depresyon e ki ou santi ki ou nepli anvi viv, ou pa devret onte pour rod led. Bokou dimoun ki ganny depresyon in vwar ki ler zot in rod led medikal sa in ed zot santi pli byen e zot in kapab fer fas avek depresyon. Ojebode, Kaoru ek Adriana in rod led medikal e aprezan zot bokou pli byen.

Pour ed bann dimoun ki ganny depresyon, bann dokter i kapab les zot koz lo zot santiman, donn zot latizann oubyen fer tou le de. Dimoun ki ganny depresyon i osi bezwen sipor zot fanmir ek zanmi ki kontan zot. Me pli bon zanmi ki zot kapab annan i Zeova, ki kapab donn zot sa pli bon led atraver son Parol Labib.

ESKI I ANNAN EN SOLISYON PERMANAN?

Bann dimoun ki ganny depresyon i kapab bezwen ganny led medikal pour en kantite letan e i kapab ki zot bezwen sanz serten zot bann labitid. Me si ou ganny depresyon parey Ojebode, ou kapab annan lespwar ki ou pou annan en meyer lavenir. Ojebode i dir: “Mon vreman anvi la ler sa profesi dan Izai 33:24 i ganny akonplir, kot i dir ki personn pa pou dir ‘Mon malad.’” Parey Ojebode ou kapab ganny rekonforte par promes Bondye ki i pou annan “en nouvo later” kot pou nepli annan “douler.” (Revelasyon 21:1, 4) Sa promes i montre ki personn pa pou soufer mantalman oubyen emosyonnelman. Ou pou “oubliy letan pase. Zot souvenir pa pou zanmen retourn dan lespri [oubyen leker].”—Izai 65:17.

Bann verse Labib ki kapab ed ou

Bondye i konpran ou santiman.

“Mwan menm [Zeova] ou Bondye ki tenir ou par ou lanmen drwat e dir ou: Pa bezwen per, mon la pour sekour ou.”—Izai 41:13.

Zeova i konpran nou santiman plis ki okenn lezot dimoun e i anvi ed nou.

Reflesir lo Parol Bondye.

Profet Eliya ti anvi mor. I ti dir: “Mon’n ganny ase. Aprezan, [Zeova], pran mon lavi.”—1 Lerwa 19:4.

Ojebode i dir: “Ler mon ti reflesir lo Parol Bondye sa ti ed mwan. Mon ti realize ki profet Eliya ti santi egzakteman parey mwan.”

Aprann avek bann legzanp dan Labib.

“Mon’n [Zezi] sipliy Bondye pour ou [Pyer] pour ki ou lafwa pa afebli konpletman.”—Lik 22:32.

Apre ki zapot Pyer ti’n dir ki i pa konn Zezi trwa fwa, i ti vreman dezespere e i ti plere asodlarm. Kaoru i dir: “Ler mon ti reflesir lo sa ki Pyer ti fer e lafason ki Zezi ti reazir anver li, sa in ed mwan vwar ki Zeova ek Zezi ti konpran santiman Pyer. Sa ti ankouraz mwan.”

Ou pou “oubliy letan pase. Zot souvenir pa pou zanmen retourn dan lespri [oubyen leker].”—Izai 65:17