‘Nou Pa Kapab Aret Koze
1 Zezi Kri pe diriz byen pre sa travay predikasyon. (Mat. 28:20; Mark 13:10) Menm si i annan preske sis milyon proklanmater aktif ki pe aport temwannyaz dan 234 pei, nou pa devret prezimen ki nou travay temwannyaz in terminen. Ziska ki Bondye i dir ki sa travay in konplete, ‘nou pa kapab aret koz’ lo sa bann keksoz ki nou’n aprann.—Akt 4:20.
2 Depan lo Lespri Bondye: Satan pe egzers bokou presyon pour dekouraz nou. (Rev. 12:17) Nou prop laser enparfe i osi akable nou avek plizyer problenm. Bann tel keksoz i kapab detourn nou latansyon avek sa travay predikasyon ki tre esansyel. Malgre sa, si nou met konfyans dan Zeova, son lespri pou ed nou fer fas avek nenport ki lobstak.
3 Kan kongregasyon Kretyen premye syek ti ganny severman persekite, bann frer ti priy Bondye pour ed zot pour kontinyen koz son parol avek lardyes. Zeova ti reponn zot lapriyer, anim zot avek son lespri e donn zot zel ek determinasyon ki zot ti bezwen pour kontinyen prese. An rezilta, zot ti kontinyen deklar sa bon nouvel avek lardyes, san redwir zot lentansite.—Akt 4:29, 31; 5:42.
4 Pa Per Parol Demoralizan: Lopinyon zeneral oubyen fo piblisite i kapab entimid nou. Toutfwa, mazin sa deklarasyon ardyese ki Pyer ek lezot zapot ti fer devan konsey Sannedren, rikorde dan Akt 5:29-32. Etan en profeser Lalwa, Gamalyel ti admet ki travay Bondye pa kapab ganny ranverse. I pa ganny akonpli par nou pouvwar. Sa gran travay i ganny soutenir par Bondye, e zis li ki kapab akonpli li!—Zeka. 4:6.
5 Annou enplor Zeova toulezour, afen ki son lespri i a ed nou proklanm sa bon nouvel avek zel. Nou swete dir, parey Zeremi, ki sa mesaz Rwayonm i parey en dife ki pe brile dan nou bann lezo. (Zer. 20:9) Nou pa kapab gard silans!