“Tou Keksoz i Devret pour Ledifikasyon”
1 Dan relasyon avek nou bann frer, nou devret fer sa ki byen pour zot ledifikasyon. Savedir nou santi nou konsernen pour protez zot lentere spirityel. Si nou angaze dan serten travay profann dan ki promosyon en prodwir oubyen en servis i enplike, nou bezwen pran prekosyon ki okenn keksoz ki nou fer, pa fer tonbe nou bann frer.—2 Kor. 6:3; Fili. 1:9, l0.
2 Serten ki’n vin enplike dan divers antrepriz, i target bann konpanyon Kretyen konman bann kliyan potansyel. Serten lorganizasyon komers i ankouraz zot bann reprezantan pour konsider tou dimoun konman enn ki kapab vin kliyan—enkli bann ki dan menm larelizyon avek zot. Serten frer in organiz bann gran renyon pour bann Temwen avek bi pour ankouraz zot pour angaz dan en lantrepriz komersyal. Lezot i promot zot lantrepriz an donan bann konpanyon Kretyen ki pa’n demann nanryen, bann lobze, brosir, lenformasyon lo Internet oubyen kaset. Eski i ti a apropriye pour en Kretyen servi son bann kontak teokratik pour profit lo son bann frer spirityel? Non!—1 Kor. 10:23, 24, 31-33.
3 Bann Frer i Devret Fer Atansyon: Sa pa vedir ki en Kretyen pa kapab fer biznes avek en frer. Sa i en zafer personnel. Sepandan, serten i inisye bann proze komers ki ankouraz vorasite e zot ensit bann konpanyon Kretyen pour vin zot partner ou envestiser. Plizyer sa bann lantrepriz i faid, ki kout bann partisipan en gran sonm larzan. Menm si bann ki’n zwenn lantrepriz i’n kapab ganny motive par en dezir pour ganny larzan vitman, sa organizater pa devret santi li san repros si lantrepriz i faid. I devret egzamin davans e an detay konman byennet spirityel e fizik son bann frer i kapab ganny afekte si sa lenvestisman pa reisi. Bann ki annan responsabilite teokratik i devret sirtou pridan an se ki konsern zot bann tantativ profann akoz lezot i kapab get zot avek respe e plas en gran konfyans dan zot. I ti a mal pour abiz lo sa konfyans. Si en frer i perdi respe lezot, i kapab perdi son bann privilez dan servis sakre.
4 Nou lobzektif i devret ki ‘tou keksoz i pour ledifikasyon.’ (1 Kor. 14:26) Nou devret evit okenn keksoz ki entrodwir bann aktivite komersyal dan kongregasyon oubyen ki promot zot. Bann tel keksoz napa nanryen pour fer avek nou bann rezon Biblik pour rasanble ansanm.—Ebre 10:24, 25.