Ini dan Lazwa avek Zeova ek son Garson
Levennman pli enportan dan Lannen pou ganny komemore le 28 Mars
1 Par komemor Repa Senyer apre soley kouse le 28 Mars, 2002, nou demontre ki nou ini dan lazwa avek Zeova Bondye ek Zezi Kri. Pandan sa lokazyon vreman spesyal, bann larestan Kretyen swazir pou rezwir sa “par” spesyal ki zot annan avek lezot eritye Rwayonm, avek Papa e avek son Garson. (1 Zan 1:3, NW; Efe. 1:11, 12) Plizyer milyon “lezot mouton” pou medit lo sa loportinite inik ki zot annan pour ini avek Zeova ek son Garson, annan menm leker ek lespri ansanm avek zot pour akonpli travay Bondye!—Zan 10:16.
2 Travay ansanm dan en Relasyon pros: Zeova ek Zezi in toultan ini dan lazwa. Zot in rezwir lasosyasyon etrwat pour en peryod letan enfini avan kreasyon zonm. (Mik. 5:2) En relasyon entim ti alor devlope ant zot de. Konman lasazes personnifye, sa garson premye ne dan son legzistans pre-imen ti kapab dir: “Mon ti vin sa enn aki [Zeova] ti partikilyerman atase avek zour apre zour, mon ti rezwir toultan devan li.” (Prov. 8:30) Pas plizyer lannen dan en relasyon entim avek Sours lanmour ti annan en lefe profon lo Garson Bondye!—1 Zan 4:8.
3 Avek bezwen limanite pour delivrans antet, Zeova ti swazir son sel Garson, ki ti vreman kontan imen, pour fourni sa sakrifis ranson, ki ofer nou sa sel lespwar. (Prov. 8:31) Zis parey Zeova ek son Garson i ini pour realiz en sel plan, nou reste ini avek zot e avek kanmarad dan en profon lanmour, e fer lavolonte Bondye dan lazwa.
4 Montre nou Lapresyasyon profon: Nou kapab demontre nou lapresyasyon senser pour lanmour Zeova ek sakrifis son Garson par asiste Memoryal e ekout atantivman e avek respe. Bann pwen ki pou ganny fer resorti i bon legzanp Zezi, son fidelite ziska lanmor pour fourni sa ranson, ek son dominasyon konman Lerwa dan Rwayonm ki Bondye in etabli, osi byen ki bann benediksyon ki sa Rwayonm pou anmenn pour limanite. Nou pou osi ganny rapel sa nesesite pour manifeste nou lafwa kontinyelman, travay avek zel an armoni avek lavolonte Zeova konman “bann konpanyon travay dan laverite.”—3 Zan 8; Zak 2:17.
5 Ed lezot pour partisip avek nou: Konsey bann ansyen i devret fer en zefor spesyal pour ankouraz tou Temwen ki inaktif dan teritwar pour asiste Memoryal lanmor Kris. (Mat. 18:12, 13) Fer en lalis bann ki bezwen ganny vizite pour pa mank personn e ki tou i ganny envite personnelman.
6 Eski ou konn lezot dimoun ki kapab asiste Memoryal? Pran linisyativ pour batir zot lapresyasyon pour sa lokazyon. Kordyalman envit zot, e fer zot santi zot alez. Annou fer nou mye pour envit tou nou bann etidyan Labib ek lezot dimoun ki enterese osi byen ki manm nou fanmiy ek bann dimoun ki nou konnen, pour sa levennman pli enportan sa lannen. Benefis sa ranson i ankor disponib pour tou sa ki aprann ‘sa valer bokou pli siperyer ki annan dan konnesans nou Senyer Kris Zezi.’ (Fili. 3:8) Bann ki demontre lafwa dan sakrifis Kris i kapab ganny sa lespwar ferm lavi eternel.—Zan 3:16.
7 Pa zanmen sou estim sa lefe ki Memoryal i kapab annan lo bann ki senser. De zan pase lo zil Papua New Guinea, 11 dimoun ki ti enterese ti vwayaz dan en pti bato pour 17 er-d-tan dan move tan pour asiste Memoryal. Akoz? Zot ti dir: “Nou ti anvi selebre Memoryal Kris avek lezot nou bann konpanyon ki ador Zeova; alor ti vo lapenn fer sa vwayaz.” Mazin zel ki ti ganny demontre par bann ki ti enterese ek zot lapresyasyon pour ini dan lazwa avek Zeova, son Garson ek lasosyasyon bann frer!
8 Ofer tou bann ki enterese en letid Labib. Ankouraz zot pour asiste bann renyon kongregasyon regilyerman e pour partaz laverite ki zot pe aprann avek lezot. Ed zot pour ‘mars dan lalimyer’ e pour “pratik laverite” par aplik bann prensip Labib dan zot lavi. (1 Zan 1:6, 7) Ed zot pour devlop en relasyon entim avek Zeova e pour kontinyen seri sa privilez pour ini ansanm pour fer son lavolonte.
9 Pa i en privilez merveye pour ini dan lazwa ‘dan en menm lespri e konbat ansanm pour lafwa dan levanzil’! (Fili. 1:27, 28) Annou esper avek enpasyans nou rasanbleman agreab ansanm le 28 Mars pour Memoryal, e annou toultan annan rekonesans anver Zeova ek son Garson!—Lik 22:19.