Retret i en Loportinite pour fer plis dan Predikasyon
1 Bokou dimoun ki travay dir i priye kan zot pou pran retret pour zot ganny libere avek sa kantite louvraz ek presyon ki zot gannyen dan zot travay. Me tre souvan, retret i fer dimoun pa enterese dan nanryen, annwiye, e vin vye avan ler. Si en dimoun pa pe partisip dan okenn aktivite ki itil, i finalman trouv li pe zis pran traka. En zournal Brezilyen ti dir ki bann travayer ki’n pran retret i eksperyans bann problenm tel parey ‘mekontantman, move tanperaman, mank sekirite, santi zot initil, e menm tonm dan depresyon e santi ki zot lavi napa en bi.’
2 Parkont, bokou Kretyen i vwar sa nouvo faz dan zot lavi konman en loportinite pour fer plis dan bann aktivite spirityel. En frer ki ti konmans fer pionye de semenn apre ki i ti’n ganny 65 an ti dir: “Mon pa’n zanmen deza eksperyans en moman dan mon lavi avek sitan bokou benediksyon ki sa dis dernyen lannen ki mon pe fer pionye.” En koup ti ekri: “Letan pli gou dan nou lavi ti konmans ler nou ti konmans fer pionye.” Wi, pour bokou dimoun, retret i ofer en loportinite ekselan pour fer plis dan predikasyon e rekolte bokou benediksyon sorti kot Zeova.
3 Reste okipe e vin prodiktif: Bokou dimoun ki’n pran zot retret ozordi, ti grandi san sa bann konfor ki nou vwar ozordi. Zot in aprann pour travay dir depi byen zenn. Menm si zot nepli annan sa lafors parey letan zot ti ankor zenn, zot ankor bann travayer byen prodiktif. Dan en teritwar, 22 poursan pionye, setadir anviron 20,000 frer ek ser, i annan omwen 60 an. Sa bann aze i fer en gran kontribisyon dan travay predikasyon. Zot leksperyans ek zot bann bon kalite Kretyen i anrisir zot kongregasyon.—Zak 3:17, 18.
4 Reste okipe dan minister Kretyen i kontribye pour en pli bon lasante e i amelyor kalite lavi. En ser 84 an ki ti konmans fer pionye ler i ti pran retret ti dir: “Vi ki mon annan en kantite letid Labib avek bann dimoun enterese, sa in ed mwan pour reste aktif mantalman. Mon napa en loto, alor mon mars en kantite. Sa i kit mwan an bonn sante.” En koup aze ki fer pionye ti dir: “Servis pionye i gard nou fit mantalman e osi fizikman. Nou toultan ansanm. Nou riy en kantite e nou rezwir lavi.”
5 Servi kot i annan plis Bezwen: Serten Kretyen ki’n pran retret e ki zot sitiasyon finansyel i permet zot deplase, in al servi dan bann landrwa kot i annan en bezwen pour plis proklanmater Rwayonm. Lezot in fer plis dan predikasyon par servi dan en teritwar kot dimoun i koz en lot langaz. Parey zapot Pol, sa bann proklanmater devoue i “fer tousala pour Levanzil, pour [zot] ganny en par dan son bann benediksyon.”—1 Kor. 9:23.
6 En koup ti konmans fer pionye apre ki zot ti’n elve zot de garson. Apre detrwa lannen ki zot ti’n fer pionye, zot ti konmans aprann langaz Sinwan. Aprezan zot dan zot 70 an, e resaman zot in kontan pour vwar sa group Sinwan ki zot in travay avek vin en kongregasyon. Vreman sa bann koup koumsa i en benediksyon!
7 Napa Retret dan Predikasyon: Kantmenm laplipar dimoun i finalman pran retret dan travay, napa retret pour okenn Kretyen dan servis Bondye. Nou tou nou devret kontinyen reste fidel “ziska lafen.” (Mat. 24:13, 14) Byensir, avek laz ki pe antre, serten pa kapab fer otan ki zot ti abitye fer dan servis Zeova. Me pa i ankourazan pour vwar zot pe fer sa ki zot kapab avek tou zot leker! Parol Bondye i asir zot ki Zeova pa pou oubliy zot travay ek lanmour ki zot in montre pour son non.—Lik 21:1-4; Ebr. 6:10.
8 Si ou pe apros laz retret, akoz ou pa priye e mazin lo konman ou kapab byen servi ou sitiasyon ki pe sanze? Avek led Bondye, ou pou kapab vwar ki retret i donn ou en loportinite pour fer plis dan predikasyon, ki anmenn louanz pour Zeova. Sa pou osi donn ou bokou benediksyon.—Ps. 148:12, 13.