Asiste Renyon regilyerman i en Priyorite
1 Bann fanmiy Kretyen i fer li en priyorite pour asiste bann renyon regilyerman. Me bann aktivite dan lavi toulezour i kapab vin en problenm. Eski bann travay ki annan pour fer kot lakour, travay profann ouswa devwar lekol in konmans pran letan ki ou ti’n met dekote pour ador Zeova? Vwar keksoz parey Zeova i vwar pou ed nou mentenir nou bann priyorite.—1 Sam. 24:6; 26:11.
2 Par fer ekspre, en zonm Izraelit pa ti konsider pwennvi Zeova ler i ti anmas dibwa dan en zour Saba. Petet i ti mazinen ki i ti pe fer sa pour son fanmiy ouswa sa ti zis en pti keksoz. Me dapre zizman ki ti ganny donnen, Zeova ti montre ki fer bann aktivite dan lavi toulezour pandan letan ki’n ganny rezerve pour ladorasyon i en keksoz grav.—Nom. 15:32-36.
3 Fer fas avek sa Problenm: Pour bokou dimoun, zot bezwen lite pour anpes zot travay enterfer avek asiste renyon. Serten in kapab sirmont sa problenm par koz avek zot anplwayer, sanz ler travay avek zot koleg, rod en travay pli apropriye, ouswa senplifye zot lavi. Sirman, ler nou fer sa bann sakrifis an faver vre ladorasyon i fer Bondye plezir.—Ebr. 13:16.
4 Devwar lekol i kapab osi kree en problenm. En zenn ti dir: “Mon fer en pe mon devwar lekol avan al renyon e mon fer larestan ler mon retournen.” Si zanfan pa’n fini fer tou zot devwar lekol zour ki annan renyon, serten paran in eksplik bann ansennyan ki asiste renyon i en priyorite pour zot fanmiy.
5 Byen korpere avek kanmarad e fer en bon plan i de keksoz enportan pour akonpli bann travay lakour pour kapab prepare pour asiste bann renyon aler konman en fanmiy. (Prov. 20:18) Menm bann pli zenn i kapab aprann ki mannyer pour met zot lenz e pare pour al renyon dan en ler spesifik. Par zot prop legzanp, bann paran i kapab montre zot zanfan akoz renyon i enportan.—Prov. 20:7.
6 Anmezir ki bann presyon sa sistenm ki nou pe viv ladan i ogmante, i tre enportan ki nou asiste bann renyon regilyerman. Annou kontinyen vwar keksoz parey Zeova i vwar e fer asiste renyon regilyerman vin en priyorite.—Ebr. 10:24, 25.