En Travay ki Bondye i donn son Sipor
1 Parmi bann serviter Bondye ozordi, pa tou ki annan gran ledikasyon, larises, ouswa ki enportan dan sa sistenm ki nou pe viv ladan. Pour sa rezon, serten dimoun i rezet nou travay predikasyon akoz zot krwar ki i napa lenportans. (Iza. 53:3) Me sa travay edikasyonnel lo Labib ki nou fer in rekonfort e donn lespwar plizyer milyon dimoun atraver lemonn. Ki mannyer bann dimoun senp in ganny bann bon rezilta koumsa? Se selman akoz zot annan sipor Bondye. (Mat. 28:19, 20; Akt 1:8) Zapot Pol ti eksplike: “Bondye in swazir sa ki paret feb pour lemonn pour fer onte bann for.”—1 Kor. 1:26-29.
2 Laplipar zapot ek lezot Kretyen premye syek ti bann dimoun “senp san gran ledikasyon.” (Akt 4:13) Me zot ti pres sa bon nouvel avek lardyes, e Zeova ti beni zot zefor. Malgre bann difikilte ek lopozisyon, “Parol Senyer ti fannen avek gran pisans.” Napa okenn keksoz ki ti pou kapab aret sa travay akoz Bondye ti donn son sipor. (Akt 5:38, 39; 19:20) I parey dan nou letan. Ni menm lopozisyon sever par bann dirizan ki annan pouvwar pa’n kapab anpes sa bon nouvel fannen.—Iza. 54:17.
3 Tou Loner i al pour Bondye: Vi ki nou privilezye pour servi konman bann minis Bondye, eski sa i donn nou rezon pour fer vantar? Pa ditou. Ler i ti pe refer avek minister Kretyen, Pol ti ekrir: “Sa trezor, nou pe anmenn li dan bann vaz later, pour montre ki sa pisans ki napa son parey i ava sorti kot Bondye e non pa kot nou.” (2 Kor. 4:7) Pol ti rekonnet ki i ti kapab akonpli son minister gras a lafors ki Bondye ti donn li.—Efe. 6:19, 20; Fili. 4:13.
4 Pareyman, nou osi nou rekonnet ki parski nou “ganny led sorti kot Bondye” ki travay predikasyon pe ganny akonpli. (Akt 26:22, NW) Par sa travay predikasyon ki pe ganny fer atraver lemonn, Zeova pe servi nou dan en fason remarkab pour sekwe bann nasyon—en siny zizman destriktif ki pe vini byento. (Aga. 2:7) Pa nou privilezye pour vin ‘konpanyon travay Bondye’ dan sa gran rekolt spirityel!—1 Kor. 3:6-9.