Eski ou ti en pionye ordiner?
1. Ki privilez bokou dimoun ti annan me ki serten in bezwen fer?
1 Diran bann lannen ki’n pase, plizyer mil dimoun in ganny sa gran privilez pour “anons” sa bon nouvel konman bann serviter a plen tan. (Akt 5:42) Par kont, serten in bezwen aret fer pionye pour diferan rezon. Si ou’n deza fer pionye ordiner, eski ou’n reevalye ou sirkonstans pour vwar si ou kapab rekonmans sa servis?
2. Akoz bann ki ti fer pionye dan lepase i bezwen reevalye zot sirkonstans?
2 Sirkonstans i sanze: Eski ou ankor dan sa menm sityasyon ki ti fer ou aret fer pionye? Par egzanp, si ou ti aret fer pionye akoz ou pa ti kapab fer sa 90 er-d-tan par mwan, eski ou kapab repran sa servis vi ki aprezan i 70 er-d-tan? Eski ou ankor bezwen travay menm kantite er-d-tan parey avan, oubyen eski ou ankor annan sa bann responsabilite familyal ki ou ti annan kan ou ti aret fer pionye? En ser ki ti aret fer pionye akoz son lasante ti kapab repran sa servis a laz 89 an. I pa ti’n al lopital pour plis ki enn an e i ti santi ki son lasante ti pou permet li pour fer pionye ankor!
3. Ki mannyer bann manm fanmir i kapab korpere pour ed en lot fer pionye?
3 Petet ou pa ti en pionye, me i kapab ki en dimoun dan ou fanmir ti deza enn me i’n arete pour pran swen avek en lot manm fanmir par egzanp en paran aze. (1 Tim. 5:4, 8) Si sa i le ka, eski ou ek lezot manm fanmir i kapab ed plis kot lakour? Akoz zot pa koz lo la ansanm? (Prov. 15:22) Kan bann manm fanmir i korpere pour ed en lot fer pionye zot pou santi ki zot osi zot pe fer zot par dan sa servis.
4. Ki ou kapab fer si i pa posib pour ou repran servis pionye a sa moman?
4 Pa bezwen dekouraze si ou sirkonstans ozordi pa permet ou pour rekonmans fer servis pionye. Ou bonn volonte i fer plezir Zeova. (2 Kor. 8:12) Kontinyen servi sa bann skil ki ou’n aprann kan ou ti pe fer pionye dan ou minister. Eksprim ou dezir dan lapriyer e touzour vey bann loportinite pour sanz ou sirkonstans. (1 Zan 5:14) Petet avek letan, Zeova pou ‘ouver en gran laport’ pour ou fer “en gran travay,” kot ou pou kapab ankor enn fwa eksperyans sa lazwa ki ou ti gannyen kan ou ti fer pionye ordiner!—1 Kor. 16:9.