Amelyor nou abilite pour prese—Prepar pour en retourn vizit
Akoz i enportan: Kan nou zwenn en dimoun ki’n montre lentere, byensir nou ti pou anvi retourn kot li pour ki nou kapab aroz sa lagrenn laverite ki nou’n plante. (1 Kor. 3:6) Pour prepar pour nou prosen vizit i enportan ki avan nou ale, nou demann sa dimoun kan i ti a kontan nou retournen. An plis ki sa, i pou byen si nou kit en kestyon ki nou pou diskite dan nou prosen vizit. Sa pou fer sa met lakour pare pour esper ou prosen vizit e si larepons sa kestyon i dan sa piblikasyon ki ou ti kit avek li, i pou pli anvi lir li. En bon preparasyon pour sa prosen konversasyon i osi fer li pli fasil pour retournen akoz sa size ki pou ganny diskite in fini ganny swazir. Deplis, sa met lakour pou deza konnen lo kwa ki pou ganny diskite. Kan nou revwar li, nou kapab dir li ki nou’n retournen pour reponn sa kestyon ki nou ti kit avek li lo dernyen vizit. Apre konmans diskit lo sa kestyon.
Ki mannyer pour fer li:
• Kan ou pe prepar ou prezantasyon portanport, prepar osi en kestyon ki ou kapab kit avek sa dimoun pour prosen vizit. I kapab baze lo en topik ki dan sa piblikasyon ki ou pe ofer sa zour, oubyen i kapab en kestyon ki ganny reponn dan enn nou piblikasyon letid, ki ou kapab entrodwir kan ou retournen.
• A lafen ou konversasyon avek en dimoun ki’n montre lentere, fer li konnen ki ou ti a kontan koz avek li ankor e apre kit sa kestyon ki ou ti’n prepare pour li. Dan serten teritwar dimoun i vreman okipe e zot ezite pour dir nou kan pour retournen. Si i leka, ou kapab demann li: “Ou toultan kot lakour sa ler? [Les sa dimoun reponn.] Mon ti pou kontan pase semenn prosen pour reponn sa kestyon . . . Si ler mon vini ou okipe, ou a zis fer mon konnen.”
• Gard ou parol si ou’n promet sa met lakour ki ou pou retournen tel ler. (Mat. 5:37) A lafen sa retourn vizit fer en bon preparasyon pour sa prosen vizit.
Esey sa pandan sa mwan:
• Kan ou pe prepar ou prezantasyon, prepar osi en kestyon ki ou kapab kit avek sa dimoun pour prosen vizit. Partaz sa ki ou’n prepare avek sa proklanmater ki ou pe travay avek.