Kan ki nou devret retournen pour vizit bann ki enterese?
1. Fer disip i enplik kwa?
1 Pour fer disip nou bezwen retournen pour vizit nenport dimoun ki anvi aprann lo sa laranzman ki Zeova in fer pour en Rwayonm. (Mat. 28:19, 20) Pli bon moman pour fer retourn vizit i souvan depan lo nou progranm e osi lo progranm sa enn ki enterese. Akoz nou bezwen pa tarde pour retournen apre nou premye vizit?
2, 3. Akoz nou devret esey retournen osito posib?
2 Akoz nou pa devret tarde pour retournen? Lafen sa sistenm i pros e sa travay pour anons sa “Bon Nouvel Rwayonm” i pros pour ariv ver son lafen. (Mat. 24:14; 1 Pyer 4:7) Se pour sa rezon alor ki nou bezwen ekout sa lavertisman pour averti bann ki enterese par ‘anons Laparol e ensiste dan tou lokazyon’ pandan ki nou ankor dan sa “Zour delivrans.” Sa i enkli fer retourn vizit osito posib pour kontinyen devlop sa lentere ki zot in demontre.—2 Kor. 6:1, 2; 2 Tim. 4:2.
3 Satan i determinen pour detrir sa lagrenn ki nou’n kapab semen dan leker en dimoun ki enterese. (Mark 4:14, 15) Souvan bann ki’n demontre lentere i ganny sikannen avek zot manm fanmir, koleg travay ek lezot dimoun. Si nou retournen deswit pour vizit zot, sa pou permet nou gard sa pti dife alimen avan ki lezot i reisi tenny li.
4. Ki mannyer nou kapab fer laranzman lo premye vizit pour retournen?
4 Fer laranzman: Avan kit en lakour lo ou premye vizit, fer en bon laranzman pour ou retournen. Soulev en kestyon ki ou pou reponn lo ou prosen vizit. I enportan ki ou gard en bon rikord konsernan sa premye vizit ek laranzman ki ou’n fer pour retournen. Ou kapab demann sa met lakour pour ou retournen son lannmen oubyen detrwa zour apre si ou progranm i permet ou pour fer li. Si sa premye vizit ki ou fer i dan wikenn e sa dimoun ki enterese i travay dan lasemenn, petet i pou dakor pour ou retournen son wikenn swivan. Ler ou fer laranzman pour retournen, fer sir ou retournen.—Mat. 5:37.
5. Ler nou pa tarde pour retournen, ki mannyer sa i ed nou akonplir travay pour fer disip ki Zezi in donn nou?
5 Nou annan bann bon rezon pour retournen pour vizit bann ki enterese osito posib. Alor fer laranzman e retournen deswit, parski “letan i kourt.” (1 Kor. 7:29) Si nou retournen osito posib pour vizit bann ki demontre lentere dan sa mesaz Rwayonm, nou zefor pou pli efikas.