Lekol Minister Teokratik 2015 i ed nou pour amelyor nou lansennyman

¹ Sa psalmis David ti ekrir: “Les bann parol ki sorti dan mon labous ek meditasyon ki sorti dan mon leker vin en keksoz agreab pour ou, O Zeova mon Ros e mon Liberater.” (Ps. 19:14) Nou osi nou anvi ki nou parol i fer plezir Zeova akoz nou apresye nou privilez pour koz lo laverite dan kongregasyon e dan predikasyon. Lekol Minister Teokratik i en fason ki Zeova i form nou pour prese. Sa formasyon i ganny donnen sak semenn dan plis ki 111,000 kongregasyon dan lemonn antye. I ed bann frer ek ser dan lemonn antye ki annan diferan ran sosyal pour vin bann predikater ki ase kalifye e ki kapab ansenny avek konviksyon, bon zizman ek lardyes.​—Akt 19:8; Kol. 4:6.

² Bann size dan progranm lekol pour 2015 pou sorti dan “An Introduction to God’s Word” ek “Glossary of Bible Terms,” ki dan nouvo edisyon New World Translation e osi liv Insight on the Scriptures Volim 1. An plis, i annan bann azisteman lo lakantite letan ki pwen enteresan lo lektir Labib ek Ekspoze No. 1 i sipoze dire. Sa bann paragraf ki swiv pou montre bann sanzman ek bann lenstriksyon lo lafason ki bann size lekol i devret ganny fer.

³ Pwen enteresan lo lektir Labib: Bann frer ki fer sa size pou annan de minit pour egzamin zis en pwen enteresan e fer en laplikasyon pratik baze lo lektir pour lasemenn. Si sa frer i fer en bon preparasyon, sa pwen pou reisi ganny eksplike dapre sa kantite letan ki’n ganny donnen. Apre sa, kongregasyon pou annan sis minit kot sak dimoun i kapab donn en larepons dan 30 segonn oubyen mwens lo bann pwen enteresan ki zot in trouve dan lektir pour lasemenn. I demann bon preparasyon ek disiplin pour fer en komanter ki efikas dan 30 segonn, me sa i en bon formasyon pour nou. I osi permet lezot pour fer komanter lo sa ki zot in aprann ler zot in fer zot resers personnel.

⁴ Ekspoze No. 1: Lakantite letan pour lektir Labib i aprezan trwa minit oubyen mwens e i pou kouver mwens lenformasyon. Sa bann ki ganny lektir pour fer i devret lir aotvwa plizyer fwa e port latansyon lo prononsyasyon e lir korekteman pour kapab fer resorti klerman bann nide. Lefet ki lir i annan en rol enportan dan nou ladorasyon, alor tou pep Zeova i devret fer zefor pour lir byen. Pa nou vreman kontan ki bokou parmi nou bann zanfan i lir byen! Bann paran i merite ganny felisite pour zot zefor ki ranpli avek lanmour pour ed zot zanfan vin bann bon lekter.

⁵ Ekspoze No. 2: Sa i en ekspoze senk minit ki ganny fer par en ser. Tenm sa ekspoze i devret ganny servi. Kan en ekspoze i baze lo lenformasyon lo New World Translation, i devret aplik li avek en laspe predikasyon ki adapte avek teritwar kongregasyon. Kan sa size i baze lo en personnaz dan Labib oubyen en lekspresyon ki ganny trouve dan liv Insight on the Scriptures, Volim 1, sa zelev i devret devlop sa tenm ki i’n ganny donnen e swazir bann verse apropriye pour li servi e montre kwa ki nou kapab aprann avek legzanp sa bann personnaz dan Labib. Bann verse an plis ki relye avek sa tenm i kapab ganny enkli. Sirveyan lekol pou donn li en asistan.

⁶ Ekspoze No. 3: Sa i en ekspoze senk minit ki ganny fer par en frer oubyen en ser. Ler i ganny donnen avek en ser, sa ser i merit toultan prezant sa ekspoze parey Ekspoze No. 2. Ler i ganny donnen avek en frer, sa frer i devret prezant sa lenformasyon ki baze lo liv Insight konman en diskour. Sa zelev i devret devlop sa tenm ki i’n ganny donnen e swazir bann verse apropriye pour li servi e montre kwa ki nou kapab aprann avek legzanp sa bann personnaz dan Labib.

⁷ En nouvo laspe dan Ekspoze No. 3 pour bann frer: Kan lenformasyon i baze lo New World Translation, sa i devret ganny prezante konman en demonstrasyon Ladorasyon Fanmir oubyen predikasyon. Normalman, sirveyan lekol pou donn sa zelev en asistan ek en senn. Sa asistan i devret en manm dan fanmir sa zelev oubyen en frer dan kongregasyon. I kapab enkli lezot verse ki fer resorti bann prensip Labib ki al ansanm avek sa ekspoze. Tanzantan, sa ekspoze i kapab ganny prezante par en ansyen. Bann ansyen i kapab swazir zot prop asistan ek senn. Byensir i pou en lankourazman pour kongregasyon vwar bann ansyen pe montre sa lar pour ansennyen avek en manm son fanmir oubyen avek en lot frer.

⁸ Konsey: Sirveyan lekol pou bezwen servi de minit apre Ekspoze sak zelev pour felisit li e osi donn konsey pozitif baze lo liv Benefisye atraver Ledikasyon Lekol Minister Teokratik. Kan sa sirveyan lekol i entrodwir sa zelev i pa pou anons sa pwen ki sa zelev pe travay lo la. Apre ekspoze sa zelev, sa sirveyan lekol i devret felisit li senserman, anons sa pwen ki i ti pe travay lo la e dir spesifikman akoz ki sa zelev in travay byen lo sa pwen, oubyen zantiman eksplike akoz i ti pou itil pour sa zelev travay en pe plis lo sa pwen.

⁹ Sa form konsey pour sak zelev i trouve dan liv Lekol Minister Teokratik lo paz 79-81. Apre ki en zelev in fini fer son ekspoze, sirveyan lekol pou ekri bann koreksyon apropriye dan liv sa zelev e an prive demann sa zelev si i’n fer sa legzersis lo sa pwen ki i’n ganny donnen pour travay lo la. Felisitasyon ek bann sizesyon itil i kapab ganny donnen avek sa zelev apre renyon oubyen en lot ler. Konsey ki sak zelev i gannyen dan lekol i devret ganny pran konman en loportinite pour ed li progrese spirityelman.​—1 Tim. 4:15.

¹⁰ Si en zelev i depas letan, sa sirveyan lekol oubyen en asistan i devret pare pour fer en siny, ki swa sonn en pti laklos oubyen fer en pti tape pour endike dan en fason diskre ki letan in fini. Sa zelev i devret montre ki i’n rekonnet sa siny par fini son fraz e kit lestrad.​—Vwar liv Lekol Minister paz 282 par. 4.

¹¹ Tou bann ki ranpli bann kondisyon de baz i ganny ankouraze pour antre dan Lekol Minister Teokratik. (Vwar liv Lekol Minister paz 282 par. 6) Ledikasyon ki sa lekol i donnen in permet pep Zeova pour pres e ansenny bon nouvel Rwayonm avek konviksyon, dinyite ek lanmour. San dout Zeova i zwaye pour ganny loue par tou bann ki pe benefisye en kantite atraver sa ledikasyon teokratik!​—Ps. 148:12, 13; Iza. 50:4.