Amelyor nou abilite pour prese—Form bann etidyan Labib pour devlop bann bon labitid letid

Akoz i enportan: Pour kapab progrese ver matirite spirityel, bann etidyan Labib i bezwen pa zis kontant zot avek bann lansennyman de baz dan Labib me zot bezwen nouri zot lespri ek leker avek bann keksoz pli profon. (Ebr. 5:12–6:1) I demann zefor pour etidye. Sa i enkli relye nouvo lenformasyon avek bann ki nou’n deza konnen e esey vwar bann valer pratik. (Prov. 2:1-6) Kan bann etidyan Labib i aprann pour fer zot prop resers, sa pou ed zot reponn bann kestyon lo Labib par servi nou piblikasyon. Ler zot fer bokou zefor pour aplik sa ki zot in aprann, sa pou fer zot pare pour fer fas avek bann leprev ki bann Kretyen i pas atraver.—Lik 6:47, 48.

Ki mannyer pour fer li:

Met lanfaz lo lenportans pour rod led Zeova dan lapriyer avan sak sesyon letid.—Zan 14:26; 1 Kor. 2:10.
Depi o konmansman, ankouraz ou etidyan pour prepar davans pour son letid Labib. Montre li ou kopi personnel e montre li ki mannyer pour souliny selman bann mo oubyen fraz enportan.
Fer ou etidyan reponn bann kestyon dan son prop mo. Evite demann zis bann kestyon kot ou etidyan i senpleman reponn par lir larepons direkteman dan liv.
Ankouraz ou etidyan pour lir en porsyon Labib toulezour. Montre li sa progranm lektir Labib lo jw.org ki montre dan en fason pratik ki mannyer pour fer li. Pour devlop en bon labitid lir Labib toulezour i demann determinasyon, me sa zefor i vo lapenn.—Ps. 1:2, 3.
Montre ou etidyan ki mannyer pour rod larepons bann kestyon lo Labib par servi Watchtower Library oubyen Watchtower ONLINE LIBRARY. Ed li pour idantifye senbol bann piblikasyon ki souvan ganny servi dan bann renyon kongregasyon.

Esey sa pandan sa mwan:

A lafen en soutit oubyen en sapit, demann ou etidyan Labib pour fer en rezimen lo sa ki i’n fek aprann. Si ou napa en etidyan, esey fer ou menm en rezimen en pasaz dan Labib oubyen en paragraf dan Latour Veyer dan detrwa fraz pour konpran pli byen ler ou lir.