Konman pour Fer Disip Avek Liv Konnesans
1 Tou bann Kretyen i annan pour lobzektif ansenny lezot laverite e fer disip tou bann “ki dan sa bon dispozisyon pour lavi eternel.” (Akt 13:48 NW ; Mat. 28:19, 20) Pour ed nou dan nou travay, lorganizasyon Zeova in plas dan nou lanmen en zouti manifik—Liv Konnesans Ki Anmenn ver Lavi Eternel. Son tit i souliny lenportans pour en letid Labib kot lakour vi ki pour ganny lavi eternel nou bezwen aprann konn Zeova, sa sel vre Bondye, ek son garson, Zezi Kri.—Zan 17:3.
2 Avek brosir Ekspekte, liv Konnesans i piblikasyon prensipal ki Lasosyete in fourni pour kondwir bann letid Labib kot lakour. An servan sa liv nou kapab ansenny laverite dan en fason, kler e bref. Sa pou ed nou pour tous leker bann dimoun ki nou pe ansennyen. (Lik 24:32) Byensir, i annan en nesesite pour sa kondikter servi bann bon metod pour ansennyen. Se pour sa, ki sa sipleman in ganny prepare avek en bi pour propoz bann sizesyon ek bann rapel konsernan bann metod pour ansennyen ki’n ganny prouve efektif. Avek disernman, e dapre bann sirkonstans personnel, ou pou kapab progresivman aplik serten oubyen tou bann sizesyon ki’n ganny prezante. Anmas sa sipleman e konsilte li souvan. Diferan pwen dan sa sipleman pour kapab ed ou pour vin pli efektif dan servi liv Konnesans pour fer disip.
3 Diriz en Letid Labib Progresif: Annan en lentere senser e personnel dan sa etidyan, konsider li konman en dimoun ki kapab vin en disip Kretyen e en frer oubyen en ser. Vin en kondikter ki emab, amikal e antouzyasme. Si ou port byen latansyon, ou pou kapab konn sa dimoun—son lavi pase ek son sitiasyon lavi—ki pou ed ou determinen konman pour asiste li pli byen spirityelman. Touzour pare pour donn tou pour byennet sa etidyan.—1 Tesa. 2:8.
4 Enn fwa ki en letid in byen etabli, i pou byen pour etidye bann sapit dan liv Konnesans dan lord. Lefe ki bann sapit sa liv i devlop bann size biblik dan en serten lord ki fer li pli kler, sa pou permet sa etidyan kapab akeyir en konpreansyon progresif lo laverite. Gard sa letid senp e enteresan, afen ki i vivan e ki sa dimoun i vwar son progre dan sa liv.—Rom. 12:11.
5 Konmans sak leson par bann remark bref ki kapab stimil lentere dan sa size. Ou pou remarke ki tit sak sapit i sa tenm, ki pou bezwen ganny devlope. Sak soutit i fer resorti en pwen prensipal, ki pou ed ou gard antet tenm sa sapit. Veye ki ou pa koz tro bokou. Plito, esey fer sa etidyan eksprim li. Baze lo sa ki sa etidyan i deza konnen, demann plizyer kestyon ki anmenn li ver larepons. Sa pou ed li pour rezonnen e retir bann bon konklizyon li menm. (Mat. 17:24-26; Lik 10:25-37; vwar liv Manuel pour l’École, paz 50, paragraf 10.) Swiv pros bann ransennyman dan liv Konnesans. Si ou entrodwir bann detay siplemanter, ou pou kapab elwanye avek bann panse prensipal e letid pou prolonze. (Zan 16:12) Si en kestyon ki pa an akor avek sa size ki pe ganny diskite i souleve, dan plizyer ka ou kapab reponn alafen letid. Eksplik sa etidyan ki laplipar son bann kestyon personnel pou ganny reponn anmezir ki i kontinyen etidye.—Vwar liv Manuel pour l’École, paz 94, paragraf 14.
6 Si sa etidyan i vreman krwar dan lansennyman Trinite, imortalite nanm, lanfer dife oubyen lezot fo lansennyman e ki leksplikasyon dan liv Konnesans pa satisfer li, ou kapab donn li liv Comment Raisonner oubyen lezot piblikasyon ki koz lo sa size. Dir li ki ou pou diskit sa size avek li apre ki i’n reflesir lo sa ki i’n lir.
7 An konmansan e an terminan letid par lapriyer afen pour resers direksyon ek benediksyon Zeova, sa i montre lenportans letid, i permet nou pour prepar nou lespri e port latansyon lo Zeova konman sa vre Ansennyan. (Zan 6:45) Si sa etidyan pe kontinyen fimen, petet i pou neseser pour demann li pour pa fimen pandan letid.—Akt 24:16; Zak 4:3.
8 Ansenny Efektivman An Servan Labib, Ilistrasyon, Kestyon Revizyon: Menm si i’n etidye liv Konnesans plizyer fwa, en ansennyan abil pou revwar sak leson avan al fer letid, par pran konsiderasyon sak etidyan. Sa pou ed li pour prevwar serten kestyon ki sa etidyan i kapab demande. Pour ansenny dan en fason efektif, en ansennyan i bezwen annan en konpreansyon kler lo bann pwen prensipal dan sa sapit. Resers bann teks pour vwar konman i aplikab dan sa size ki pe ganny diskite, e deside ki verse ki pou ganny lir pandan letid. Reflesir byen lo konman ou kapab ansennyen an servan bann ilistrasyon ek bann kestyon revizyon alafen sa sapit.
9 An fezan bon lizaz bann Lekritir, ou pou ed sa etidyan pour apresye ki i pe vreman etidye Labib. (Akt 17:11) An servan bwat “Aprann Servi Byen ou Labib,” lo paz 14 dan liv Konnesans, ansenny li konman pour resers bann sapit ek verse. Montre li konman pour rekonnet bann verse ki’n ganny site dan sa leson. Kan letan i permet resers e lir bann teks ki’n ganny mansyonnen me ki pa’n ganny site. Fer sa etidyan eksplike konman ki sa verse i siport oubyen klarifye sa ki ganny mansyonnen dan paragraf. Met lanfaz lo bann parti pli enportan dan sa bann teks afen ki sa etidyan i kapab konpran bann rezon pour bann pwen prensipal dan sa leson. (Neemya 8:8) An zeneral i pa neseser pour sa ansennyan azout lezot teks apar ki sa bann ki liv i fourni. Eksplik lenportans pour konn bann non liv Labib e kote zot ete dan Labib. Sa etidyan pou kapab benefisye si i lir La Tour de Garde, le 15 Zen 1991, paz 27-30. Liv Konnesans i servi Nouvo Testaman an Kreol Seselwa, me entrodwir li osi avek Traduction du monde nouveau an Angle ou an Franse. Progresivman ou kapab montre li konman pour servi bann diferan karakteristik, tel konman bann referans ek lendeks bann mo Labib.
10 Letid 34 dan liv Manuel pour l’École du ministère théocratique i eksplike ki bann ilistrasyon i ed en dimoun pour reflesir e permet li sezi bann nouvo panse pli fasilman. Bann konparezon i annan pour fer avek lentelizans osi byen ki santiman, afen ki sa mesaz i ganny transmet avek en lafors ki pa souvan posib par bann senp deklarasyon. (Mat. 13:34) Liv Konnesans i kontyen bokou ilistrasyon ki’n ganny fer pour ansennyen, zot senp me zot pwisan. Par egzanp, en ilistrasyon ki ganny servi dan sapit 17 i batir lapresyasyon pour konman, dan en sans spirityel Zeova i fourni nou manze, lenz ek proteksyon atraver kongregasyon Kretyen. Bann ilistrasyon dan liv Konnesans ki an form bann zoli portre i kapab ganny servi pour tous santiman sa dimoun. An egzaminan soutit “Rezireksyon Pou Anmenn Lazwa” lo paz 185, paragraf 18 pou fer plis lefe lo sa etidyan si i regard portre lo paz 86. Sa pou kapab pous li pour konsider rezireksyon konman en realite anba Rwayonm Bondye.
11 Bann etidyan Labib i bezwen progrese spirityelman avek sak leson. Pour sa rezon, ou pa devret oubliye pour poz bann kestyon revizyon dan bwat “Teste Ou Konnesans” ki alafen sak sapit. Esper plis ki en leksplikasyon entelektyel dan sa ki’n ganny etidye. Serten sa bann kestyon i annan pour bi obtenir en larepons personnel ki sorti dan leker. Par egzanp, vwar paz 31, kot sa etidyan i ganny demande: “Ki bann kalite Zeova Bondye ki atir ou partikilyerman?”—2 Kor. 13:5.
12 Form Bann Etidyan pour Prepare pour Letid: En etidyan ki lir son leson a lavans, souliny bann repons, e mazinen konman i pou eksprim zot dan son prop term, pou fer bann progre spirityel pli vitman. Par ou legzanp ek lankourazman, ou kapab form li pour prepare pour letid. Montre li ou liv dan ki ou’n souliny bann mo ek bann fraz prensipal. Montre li konman pour trouv bann larepons direk dan bann kestyon ki’n ganny enprimen. Ou kapab ed li an preparan en sapit ansanm. Ankouraz li pour eksprim li dan son prop term. Se la ki ou pou remarke si i konpran sa size ki zot pe etidye. Si i lir larepons dan liv, ou kapab stimil son kapasite pour rezonnen par demann li konman i pou eksplik sa pwen avek en lot dimoun dan son prop term.
13 Ankouraz sa etidyan pour resers bann verse ki pa’n ganny site pandan ki i pe fer son preparasyon dan lasemenn, lefe ki petet zot pa pou ganny letan pandan letid. Felisit li pour bann zefor ki i’n fer pour prepar son letid. (2 Pyer 1:5; vwar La Tour de Garde le 15 Out, 1993, paz 3-14, pour plis sizesyon lo kwa ki kapab ganny fer par ansennyan ek etidyan afen ki sa etidyan i kapab aprann plis pandan letid.) Dan sa fason sa etidyan pe ganny formen pour bann renyon kongregasyon e pour fer bann komanter enteresan. I pou pe aprann konman pour devlop bann bon labitid letid personnel, ki pou prepar li pour kontinyen progrese dan laverite enn fwa ki i’n termin letid dan liv Konnesans.—1 Tim. 4:15; 1 Pyer 2:2.
14 Diriz bann Etidyan Ver Dedikasyon ek Batenm: Apre ki i’n kouver liv Konnesans, en etidyan ki annan en leker senser i kapab fer en dedikasyon avek Bondye e kalifye pour batize. (Konpar Akt 8:27-39; 16:25-34.) Toutfwa, avan ki en dimoun i annan en dezir pour fer en dedikasyon, i bezwen devlop en profon latasman avek Zeova. (Ps. 73:25-28) Toudilon letid, sers bann loportinite pour batir son lapresyasyon pour bann kalite Zeova. Eksprim ou santiman senser pour Bondye. Ed etidyan pour reflesir lo bann fason ki i kapab devlop bann relasyon personnel avek Zeova. I pou servi Bondye fidelman si i arive vreman konn e kontan Li, akoz latasman avek Bondye i lye avek fason ki nou konsider Bondye.—1 Tim. 4:7, 8; vwar Manuel pour l’École, paz 75, paragraf 11.
15 Fer tou zefor pour tous leker ou etidyan. (Ps. 119:11; Akt 16:14; Rom. 10:10) I neseser ki i trouve konman ki laverite i tous li personnelman e deside ki i devret fer avek sa ki’n aprann. (Rom. 12:2) Eski i krwar dan sa lansennyman ki i’n gannyen semenn apre semenn? (1 Tesa. 2:13) Pour ou konnen, ou kapab poz li bann kestyon lopinyon, tel konman: Ki ou santi konsernan sa? Konman ki ou kapab aplik sa dan ou lavi? Par son larepons ou pou kapab rekonnet dan ki domenn ou kapab ed li, afen ki ou tous son leker. (Lik 8:15; vwar Manuel pour l’École, paz 52, paragraf 11.) Bann komanter pour bann portre lo paz 172 ek 174 dan liv Konnesans i demande: “Eski ou’n dedye ou lavi avek Bondye dan lapriyer?” e “Kwa ki anpes ou batize?” Sa bann kestyon i kapab motiv sa etidyan pour fer aksyon.
16 Kan en proklanmater i deside pour batize, swiv bann prosedir dan La Tour de Garde le 15 Zanvye, 1996, paz 17, paragraf 9. Liv Konnesans in ganny prepare avek lobzektif pour permet sa etidyan reponn bann “Kestyon pour bann ki dezire batize.” Sa bann kestyon ki bann ansyen pou egzamin avek li, i ganny trouve dan sa pti liv Bann Lansennyman Elemanter Labib. Si ou’n met lanfaz lo larepons bann kestyon dan liv Konnesans, sa etidyan i devret byen ekipe pour bann diferan antretyen ki i pou gannyen avek bann ansyen dan preparasyon pour son batenm.
17 Anmenmtan ki ou pe esey ou mye pour fer disip an servan liv Konnesans, touzour priy Zeova, sa enn “ki fer pouse,” pour ki i beni bann zefor ki ou fer pour tous leker bann dimoun avek sa bon nouvel Rwayonm. (1 Kor. 3:5-7) Fotespere ou eksperyans sa lazwa pour ansenny lezot pour konpran, kontan e azir an armoni avek sa konnesans ki anmenn ver lavi eternel!