Aranz ou lanmitye avek Zeova

TOU le lannen, i annan en kantite dimoun ki revin Temwen Zeova. Ou kapab asire ki sak fwa enn i retournen, i annan bokou “lazwa dan lesyel.” (Lik 15:7, 10) Si ou’n revin Temwen Zeova, ou kapab asire ki Zeova, Zezi ek bann lanz i vreman kontan ki ou form parti kongregasyon ankor. Me anmezir ki ou aranz ou lanmitye avek Zeova, ou kapab fer fas avek bann difikilte. Ki serten difikilte ou kapab fer fas avek e kwa ki kapab ed ou?

KI BANN DIFIKILTE OU KAPAB FER FAS AVEK?

En kantite frer ek ser i ankor santi zot dekouraze menm apre ki zot in retourn dan kongregasyon. Petet ou konpran ki mannyer Lerwa David ti santi. Menm apre ki i ti’n ganny pardonnen pour son bann pese, i ti dir: “Mon bann fot i sitan bokou.” (Ps. 40:12, NWT; 65:3, NWT) Apre ki en dimoun i retourn kot Zeova, i kapab ki pour plizyer lannen i santi li koupab oubyen onte. Isabelle, ki ti’n ganny ekskli dan kongregasyon pour plis ki 20 an, i dir: “I ti difisil pour mwan aksepte ki Zeova i kapab pardonn mwan.”a Si ou dekouraze, ou kapab perdi ou lanmitye avek Zeova ankor. (Prov. 24:10, NWT) Pa les sa arive avek ou.

Serten i enkyet ki zot pa pou kapab fer tou sa ki i neseser pour annan en lanmitye pros avek Zeova ankor. Apre ki Antoine ti retourn dan kongregasyon, i ti dir: “I ti konmsi mon ti’n oubliy tou keksoz ki mon ti fer e aprann ler mon ti ankor en Temwen Zeova.” Vi ki zot santi koumsa, zot pa donn zot meyer dan zot servis pour Zeova.

Par egzanp, si siklonn in andomaz lakaz en dimoun, i kapab ki sa dimoun i dekouraze ler i mazin sa kantite letan ki i pou bezwen e sa kantite travay ki i pou bezwen fer pour rekonstri son lakaz. Pareyman, si ou’n fer en pese grav e ou nepli annan en bon lanmitye avek Zeova, petet ou santi ki ou pou bezwen fer bokou zefor pour aranz ou lanmitye avek Zeova. Me ou kapab ganny led.

Zeova i dir nou: “Aprezan, vini annou aranz keksoz antre nou.” (Iza. 1:18, NWT) Ou’n deza fer en kantite zefor pour “aranz keksoz.” Zeova i kontan ou pour sa zefor ki ou’n fer. Zis mazin sa: Ou’n retourn kot Zeova, sa i fer ki Zeova i kapab servi ou legzanp pour montre ki Satan i en manter.—Prov. 27:11, NWT.

Vi ki ou’n retourn kot Zeova, ou’n fer sa zefor pour vin pli pros avek Zeova e Zeova i promet ki i pou vin pros avek ou. (Zak 4:8) I byen pour lezot vwar ki ou’n retourn dan kongregasyon. Me ou bezwen fer en lot keksoz. Ou bezwen kontinyen ranforsi ou lanmour pour Zeova, ki ou Papa ek ou Zanmi. Ki mannyer ou kapab fer sa?

MET BANN LOBZEKTIF KI OU KAPAB ATENN

Esey met bann lobzektif ki ou kapab atenn. I tre probab ki ou ankor rapel bann laverite de baz ki ou’n aprann konsernan Zeova ek son promes pour lavenir. Me ou bezwen repran ou bann bon labitid. Par egzanp, pour anons sa bon nouvel e asiste renyon regilyerman e pour pas letan avek ou bann frer ek ser. Annou vwar sa bann lobzektif swivan.

Koz avek Zeova souvan. Ou Papa i konpran ki i kapab difisil pour ou koz avek li dan lapriyer si ou kontinyen santi ou koupab konsernan sa ki ou’n fer. (Rom. 8:26) Alor, “persevere dan lapriyer” e dir Zeova ki kantite ou anvi vin son zanmi. (Rom. 12:12) Andrej i dir: “Mon ti santi mwan vreman koupab e onte. Me sak fwa mon ti fini priye, mon ti santi mwan pli byen e pli anpe.” Si ou pa konnen ki ou pou dir dan ou lapriyer, reflesir lo bann lapriyer ki Lerwa David ti fer apre ki i ti’n repantir. Sa bann lapriyer i dan Psonm 51 ek Psonm 65.

Etidye Labib regilyerman. Sa pou ed ou pour annan en lafwa for e pour annan plis lanmour pour Zeova. (Ps. 19:7-11, NWT) Felipe i dir: “Mon pa ti lir e etidye Labib regilyerman, sa ti afebli mon lafwa e mon ti dezapwent Zeova. Mon pa ti anvi repet menm fot alor mon ti fer sir ki mon fer mon letid personnel regilyerman.” Ou osi ou kapab fer parey. Si ou bezwen led pour swazir en topik pour ou etidye, demann en zanmi ki annan en bon lanmitye avek Zeova, pour ed ou.

Revin zanmi avek ou bann frer ek ser dan kongregasyon. Serten ki retourn dan kongregasyon i per ki lezot pou ankoler avek zot. Larissa i dir: “Mon ti vreman onte. Mon ti santi ki mon ti’n bles e dezapwent mon bann frer ek ser. Mon ti santi koumsa pour en kantite letan.” Ou kapab asire ki bann ansyen ek lezot frer ek ser i anvi ed ou aranz ou lanmitye avek Zeova. (Vwar sa bwat “Ki bann ansyen i kapab fer?”) Zot kontan ki ou’n retourn dan kongregasyon e zot anvi ki ou ere!—Prov. 17:17, NWT.

Kwa ki kapab ed ou pour vin pli pros avek bann frer ek ser? Asiste tou renyon e partisip dan predikasyon regilyerman. Ki mannyer sa pou ed ou? Felix i dir: “Bann frer ek ser ti vreman anvi mon retournen. Mon ti santi ki zot kontan mwan. Zot tou zot ti ed mwan pour santi ki mon form parti kongregasyon ankor, ki Zeova in pardonn mwan e ki mon kapab kontinyen servi Zeova.”—Vwar sa bwat “Ki ou kapab fer?”

PA ABANDONNEN!

Anmezir ki ou pe esey aranz ou lanmitye avek Zeova, Satan pou kontinyen fer ou ganny plis problenm pour esey afeblir ou lafwa. (Lik 4:13) Kontinyen ranforsi ou lanmitye avek Zeova, parski sa pou ed ou reste for.

Zeova i fer sa promes konsernan son bann mouton: “Sa mouton ki’n perdi mon pou rode, sa enn ki’n elwannyen, mon pou retourn avek li, sa enn ki’n ganny blese, mon pou bande e sa enn ki fay mon pou fortifye.” (Ezek. 34:16, NWT) Zeova in ed en kantite frer ek ser pour aranz zot lanmitye avek li. Ou kapab asire ki i anvi ed ou pour annan en lanmitye for avek li.

Ki bann ansyen i kapab fer?

Bann ansyen i kapab fer en kantite pour ed bann frer ek ser ki’n retourn dan kongregasyon pour aranz zot lanmitye avek Zeova. Annou vwar ki zot kapab fer pour ed sa bann frer ek ser.

Reasir zot. Zapot Pol ti konnen ki en dimoun ki’n retourn kot Zeova i kapab ‘sitan tris e dekouraze.’ (2 Kor. 2:7) Souvan i kapab santi li koupab e onte. Pol ti ankouraz kongregasyon pour “pardonn e rekonfort li.” Bann ansyen i bezwen reasir bann frer ek ser ki’n retourn dan kongregasyon ki Zeova i kontan zot e ki bann frer ek ser osi i kontan zot. Ler bann ansyen i kontinyen felisit e ed zot, sa i kapab ed zot pour pa dekouraze.

Priy avek zot. “Siplikasyon en zonm drwat i annan bokou lefe.” (Zak 5:16) Larissa, ki’n ganny mansyonnen pli boner, i dir: “Mon ti koz avek bann ansyen lo mon bann dout ek lenkyetid. Zot ti priy avek mwan e pour mwan. Apre mon ti konpran ki bann ansyen pa ti ankoler avek mwan. Zot ti anvi ed mwan aranz mon lanmitye avek Zeova.” Theo i dir: “Lapriyer bann ansyen ti fer mwan asire ki Zeova i vreman kontan mwan e i vwar sa ki bon dan mwan, pa zis sa ki move.”

Vin zot zanmi. Bann frer ek ser ki’n retourn dan kongregasyon i bezwen zanmi. En ansyen ki apel Justin i dir: “Otan ki ou kapab, travay avek zot dan predikasyon e pli enportan ankor, vizit zot kot zot lakour. I vreman enportan pour vin zot zanmi.” En lot ansyen ki apel Henry i dir: “Si bann frer ek ser dan kongregasyon i vwar bann ansyen pe fer zanmi avek en frer oubyen en ser ki’n retourn dan kongregasyon, zot pou esey fer parey.”

Ed zot pour etidye. En Kretyen ki matir spirityelman i kapab ed en frer oubyen en ser ki’n retourn dan kongregasyon pour annan en bon progranm pour etidye Labib. En ansyen ki apel Darko i dir: “Mon kontan koz avek zot lo bann keksoz ankourazan ki mon’n vwar dan mon letid personnel e pour montre zot ki kantite mon kontan pour etidye Labib. Mon osi fer laranzman pour etidye en lartik ankourazan avek zot.” En lot ansyen ki apel Clayton i dir: “Mon ankouraz zot pour rod bann resi dan Labib konsernan bann dimoun ki’n pas dan en keksoz ki en pe parey sa ki pour zot e pour vwar ki zot kapab aprann.”

Vin en bon berze pour zot. Bann frer ek ser ki ganny ekskli i vwar bann ansyen konman bann ziz. Me aprezan ki zot in retournen, zot bezwen vwar bann ansyen konman bann berze. (Zer. 23:4, NWT) Bann ansyen i bezwen pare pour ekout zot e felisit zot. Tanzantan, koz avek zot. Remark sa ki en ansyen ki apel Marcus i fer ler i fer vizit pastoral: “Nou koz avek zot lo en verse, nou felisit zot e nou reasir zot ki nou kontan ki zot in fer bokou zefor pour retourn dan kongregasyon e ki Zeova i kontan li osi. A lafen sak vizit, nou met randevou pour en lot vizit.”

a Bann non dan sa lartik in sanze.