2 | “Rekonfor ki Lekritir i donn nou”

LABIB I DIR: “Tou bann keksoz ki’n ganny ekrir dan lepase ti ganny ekrir pour ansenny nou pour ki atraver nou landirans ek rekonfor ki Lekritir i donn nou, nou kapab annan lespwar.”—ROMEN 15:4.

Ki sa i vedir?

Dan Labib, i annan bann panse rekonfortan ki kapab ed nou ler nou pe mazin bann panse negatif. Sa mesaz ki dan Labib i osi donn nou lespwar ki byento nou pou nepli annan bann douler emosyonnel.

Ki mannyer sa i kapab ede?

Parfwa, nou tou nou santi nou sagren me bann ki pe soufer avek depresyon oubyen lenkyetid, zot toultan santi sa douler emosyonnel. Ki mannyer Labib i kapab ede?

Dan Labib, i annan bokou panse pozitif ki kapab ranplas bann panse negatif. (Filipyen 4:8) I kapab ed nou pour mazin bann panse pozitif e rekonfortan ki pou ed nou kontrol nou lemosyon.—Psonm 94:18, 19.
Labib i kapab ed nou pour aret mazinen ki nou napa valer.—Lik 12:6, 7.
Plizyer verse Labib i reasir nou ki nou pa tousel e ki Bondye, nou Kreater, i konpran nou bann santiman.—Psonm 34:18; 1 Zan 3:19, 20.
Labib i promet ki Bondye pou retir bann move souvenir. (Izai 65:17; Revelasyon 21:4) Ler nou pe soufer avek bann move panse ek bann move santiman, sa promes i kapab donn nou lafors pour andire.

Lafason ki Labib pe ed Jessica

Lafason ki depresyon i afekte mwan

“Ler mon ti annan 25 an, mon ti annan en problenm emosyonnel (nervous breakdown) e dokter ti dir ki mon annan en gro depresyon. Tanzantan, bann move souvenir ki mon ti pas ladan dan lepase ti revin dan mon lespri, ki mon pa ti kapab kontrole e sa ti fer mwan soufer. Bann dokter ti ed mwan konpran ki mon depresyon ti relye avek tou sa bann move keksoz ki’n ariv mwan dan lepase e ki mon ti pe kontinyen mazin lo la. Apard ki bann tretman, mon ti osi bezwen terapi pour ed mwan vwar e konpran ki sa ki mon ti pe mazinen i pa ti bon pour mon lasante.”

Lafason ki Labib i ed mwan

“Ler mon ti vreman dan depresyon, mon ti ganny panic attacks, mon ti enkyet en kantite e mon pa ti ganny sonmey. Souvan dan lannwit, mon ti mazin bann keksoz ki mon pa ti kapab kontrole. Parey Psonm 94:19 i dir, Bondye i kapab rekonfort e soulaz nou ler bann lenkyetid i anvair nou. Alor mon ti kit mon Labib ek en notebook ki annan bann verse ankourazan o bor mon lili. Ler mon pa ti ganny sonmey, mon ti lir bann verse Labib e les Parol Bondye rekonfort mwan.

“Labib i ed nou annan bann panse pozitif ki parey avek pour Bondye. Dan lepase, mon ti asire ki dimoun pa ti kontan mwan e ki mon pa ti vo nanryen me mon ti aprann ki sa bann panse i diferan avek sa ki Labib i dir, ki dekrir Bondye konman en Papa ki annan lanmour ek konpasyon e ki enterese avek nou endividyelman. Dousman dousman, mon ti kontrol mon bann panse olye les mon bann panse kontrol mwan. Mon’n aprann vwar mon lekor parey Bondye i vwar mwan. Sa ti vreman ed mwan pour aret annan bann panse negatif lo mon lekor.

“Mon pe esper sa letan kot tou bann move souvenir ek panse negatif pou disparet. Mon konnen ki dan lavenir i pou nepli annan problenm mantal e sa i ed mwan pour andir mon bann problenm la konmela e osi annan en zoli lespwar pour lavenir ler mon pou nepli bezwen fer fas avek depresyon.”