3 | Aprann avek bann legzanp ki dan Labib

LABIB I DEKRI . . . Bann zonm ek bann madanm fidel ki’n eksperyans “bann santiman parey nou menm.”—ZAK 5:17.

Ki sa i vedir?

Dan Labib, i annan legzanp bann zonm ek madanm ki’n eksperyans diferan lemosyon. Anmezir nou lir zot leksperyans, nou kapab vwar en personnaz ki son sityasyon i parey avek sa ki pour nou.

Ki mannyer sa i kapab ede?

Nou tou nou anvi ki lezot dimoun i konpran nou, sirtou ler nou pe lite avek nou prop lasante mantal. Ler nou lir leksperyans bann personnaz dan Labib, nou kapab relye zot bann panse ek santiman avek sa ki pour nou. Sa bann leksperyans i fer nou realize ki pa zis nou ki enkyet ouswa ki annan problenm emosyonnel.

Dan Labib, i annan bokou legzanp bann dimoun ki ti santi zot dezespere e pa kapab fer nanryen. Eski ou’n deza santi ki ou’n ganny ase? Moiz, Eliya ek David ti santi koumsa.—Nonm 11:14; 1 Lerwa 19:4; Psonm 55:4.
Labib i koz lo en madanm ki apel Ana, ki ti santi li “vreman sagren” akoz i pa ti kapab fer zanfan e ki lot madanm son msye ti sifok li akoz sa.—1 Samyel 1:6, 10.
Labib i koz lo en zonm ki apel Zob ki ti annan bann santiman ki parey avek sa ki pour nou. Menm si i ti annan lafwa, i ti soufer en kantite. En fwa i ti dir: “Mon’n degout mon lavi, mon nepli anvi viv.”—Zob 7:16.

Ler nou konnen ki mannyer sa bann personnaz dan Labib in reisi fer fas avek bann panse ek santiman negatif, nou osi nou kapab ganny lafors pour fer fas avek nou bann soufrans.

Lafason ki Labib pe ed Kevin

Lafason ki bipolar disorder i afekte mwan

“Ler mon ti pros pour ganny 50 an, dokter ti dir mwan ki mon ganny en maladi ki apel bipolar disorder. I ti annan letan kot mon ti santi ki mon kapab fer fas avek keksoz ki arive dan mon lavi. Me i ti osi annan letan kot mon ti santi ki i pa vo lapenn viv.”

Lafason ki Labib pe ed mwan

“Zapot Pyer i en personnaz dan Labib ki mon kapab refer avek. I ti fer bokou fot ki ti fer li santi ki i pa vo nanryen. Me olye kontinyen santi koumsa, Pyer ti rod led avek son bann zanmi ki ti enterese avek li. Ler mon pa santi mwan byen akoz sa maladi, mon lenperfeksyon i kapab fer mwan santi ki mon pa vo nanryen. Mon ti aprann pour esey reste avek mon bann zanmi ki anvi ed mwan pour kontinyen avek mon lavi parey Pyer.

“En lot personnaz dan Labib ki rekonfort mwan en kantite i Lerwa David. Souvan, i ti dan depresyon akoz son sityasyon e i ti regret bann fot ki i ti’n fer dan lepase. Mon kapab santi parey li akoz parfwa mon dir oubyen fer bann keksoz ki apre mon regrete. Mon ti vwar bann parol ki David ti dir dan Psonm 51 vreman rekonfortan. Dan verse 3, David i dir: ‘Mon konn byen mon bann fot e mon pese i toultan la devan mwan.’ Sa i fason ki mon santi ler mon dan bann moman vreman difisil, akoz ler mon koumsa mon pa kapab mazin bann keksoz pozitif. Mon osi santi parey sa ki i dir dan verse 10: ‘O Bondye, donn mwan en leker pir e sanz mon fason panse pour ki mon reste fidel.’ Mon ti fer parey David e mon ti demann Bondye pour ed mwan annan en pwennvi pozitif. Finalman verse 17 ti rekonfort mwan. Sa verse i dir: ‘O Bondye, ou pa pou rezet en dimoun ki annan en leker kase e ki dan lapenn.’ Sa verse i reasir mwan ki Bondye i kontan mwan.

“Ler mon konsantre lo bann legzanp ki dan Labib e sa ki Bondye in donn mwan ziska prezan, sa i ranforsi mon lespwar pour lavenir. Bann promes Labib i vin reel pour mwan e sa i vreman ed mwan pour kontinyen viv mon lavi.”