1 | Lapriyer—“Larg tou zot traka lo li”

LABIB I DIR: “Larg tou zot traka lo [Bondye] parski i enterese avek zot.”—1 PYER 5:7.

Ki sa i vedir?

Bondye Zeova i envit nou pour koz avek li lo nenport keksoz ki pe fatig nou. (Psonm 55:22) Napa problenm ki tro gro oubyen tro pti pour priy lo la. Si i enportan pour nou, i osi enportan pour Zeova. Sa i akoz Zeova i enterese avek nou e i konpran nou santiman. En fason enportan pour ganny lape lespri i ler nou priy Zeova.—Filipyen 4:6, 7.

Ki mannyer sa i kapab ede?

Ler nou pe lite avek nou problenm mantal, nou kapab santi nou konpletman tousel. Lezot dimoun pa toultan konpran ki problenm nou pe pas ladan. (Proverb 14:10) Me ler nou senserman priy Zeova e dir li ki mannyer nou santi, i pou touzour ekout nou e konpran nou. Zeova i vwar nou, i konn nou bann douler ek soufrans e i anvi ki nou koz avek li lo nenport kwa ki pe fatig nou.—2 Kronik 6:29, 30.

Ler nou koz avek Zeova dan lapriyer, sa i ranforsi nou konfyans ki i enterese avek nou. Nou kapab santi parey sa psalmis ki ti priye: “Ou’n vwar mon problenm. Ou konnen ki mon soufer en kantite.” (Psonm 31:7). Lefet ki nou konnen ki Zeova i vwar sa ki nou pe pas atraver, sa i ed nou pour kontinyen fer fas avek nou bann difikilte. Me Zeova i fer plis ki zis vwar nou bann problenm. I konpran pli byen sa ki nou pe pas ladan plis ki okenn lezot dimoun e i ed nou trouv rekonfor ek lankourazman ki dan Labib.

Lafason ki Labib pe ed Julian

Lafason ki lenkyetid i afekte mwan

“Mon pe lalit avek lenkyetid e osi avek en maladi ki apel obsessive-compulsive disorder (OCD). Parfwa san ekspekte, mon santi mwan enkyet. En moman mon byen e en lot moman mon santi mwan vreman enkyet san okenn rezon. Mon pli enkyet ler mon parmi lezot dimoun. Mon vreman konsernen avek sa ki zot mazinen lo mwan.

“Mon bann zanmi ki konnen ki mon annan sa problenm, zot fer zot mye pour ed mwan. Mon bezwen admet ki parfwa sa ki zot dir i pa sa ki mon anvi tande. Me mon apresye zot zefor pour esey ed mwan.

“Parfwa, mon lenkyetid ek sa maladi OCD i fer li difisil pour mwan priye. Mon bezwen fer bokou zefor pour mwan konsantre e koz avek Zeova dan lapriyer. Mon mazin tro bokou keksoz ki fer mwan souvan konfize. Ler mon pa kapab kontrol mon panse, i difisil pour mwan dir Zeova sa ki mon pe mazinen e sa ki mon pe santi.”

Lafason ki Labib i ed mwan

“Ler mon’n etidye Labib, mon’n aprann ki lapriyer pa devret tro gran oubyen tro konplike pour Bondye aksepte. Parfwa, ler mon napa mo pour dir Zeova sa ki mon pe santi, mon senpleman dir: ‘Zeova, ed mwan silvouple.’ Apre sa, mon santi ki Zeova i konpran mwan e i donn mwan sa ki mon bezwen dan sa moman. Apard ki lapriyer, mon ti rod led medikal. Mon kontan pour dir ki gras a sa de fason ki mon’n ganny led mon kondisyon in vreman amelyore. Menm si mon bezwen fer bokou zefor pour demann led mon Papa ki dan lesyel, mon fer li akoz mon asire ki i kontan mwan e i anvi ed mwan.”